Hugna 6

Pagkaplag sa mga Kasulatan alang sa atong mga Kaugalingon

Matag usa kanato makadawat sa mga panalangin sa pagsubsob sa atong mga kaugalingon diha sa mga kasulatan.

Gikan sa Kinabuhi ni Spencer W. Kimball

Sa katorse anyos pa si Spencer W. Kimball, nakabati siya ni Susa Young Gates anak ni Brigham Young nga namulong sa usa ka komperensya sa stake kabahin sa pagbasa sa mga kasulatan. Nakahinumdom siya nga: “Siya mihatag og makapadasig nga pagpamulong kabahin sa pagbasa sa mga kasulatan ug makaangkon og kahanas sa mga kasulatan; dayon mihunong siya sa iyang pagsulti aron sa pagpangutana sa mga naminaw, mga liboan kami tanan, ‘Pila kaninyo ang nakahurot na og basa sa Biblia?’

“… Ang pagbati nga nakasala naglibut kanako. Daghan na kaayo ako og nabasa nga mga libro nianang higayona, mga pamantalaan, komiks ug uban pa, ug makalingaw nga mga libro, apan ang akong masudyaon nga kasingkasing miingon kanako, ‘Ikaw, Spencer Kimball, wala pa gayud nimo mabasa kanang balaan nga libro. Ngano?’ Gitan-aw nako ang palibut sa tigumanan sa pagsiguro kon ako lang ba ang napakyas sa pagbasa sa sagrado nga basahon. Sa liboan nga nanambong, aduna siguroy katunga sa dosena kinsa mapasigarbuhong miisa sa ilang mga kamot. Nahugno ko sa akong gilingkuran. Wala na nako mahunahuna ang uban nga nangapakyas usab, apan pulos grabe nga panudya sa kaugalingong hunahuna. Wala na ako masayud kon unsa pay gihunahuna ug gibuhat sa uban, apan wala na akoy laing nadunggan pa sa sermon. Natuman na ang tuyo niini. Sa pagtapos sa miting, gipangita nako ang dako-dako nga pultahan paggawas ug nagdaling mipauli sa balay nga usa ka eskina sa silangan sa chapel; ug nagpangagot ang akong mga ngipon ug miingon sa kaugalingon, ‘basahon nako, basahon nako, basahon nako.’

“Agi sa luyong pultahan sa among balay, miadto ako sa estante sa kusina diin ang lamparilya gihipus, gipili nako ang usa nga puno pa sa gas ug may bag-o pang pabilo, ug misaka sa hagdanan paingon sa akong lawting [attic room]. Didto akong giablihan ang Biblia ug gisugdan ang Genesis, una nga kapitulo ug unang bersikulo, ug gibasa ko kini pag-ayo hangtud pagkagabii sa kang Adan ug Eva ug Cain ug Abel, ug Enoch ug Noe ug hangtud sa baha ug hangtud kang Abraham.”¹

Gibanabana nga usa ka tuig human niadto, nahuman og basa ni Spencer ang Biblia: “Unsa ka dakong katagbawan alang kanako nga natuman ang pagbasa sa Biblia sugod sa sinugdanan hangtud sa katapusan! Unsa ka dakong kamaya sa espiritu! Unsa ka dakong kalipay ang akong nadawat gumikan sa kinatibuk-ang mga sulod niini!”² Ang kasinatian nakahatag og usa ka mohangtud nga impresyon, ug sa kaulahian sa iyang kinabuhi kanunay kini niyang gigamit sa kinatibuk-an ug sa mga komperensya sa erya.

Padayon nga nadawat ni Presidente Kimball ang mga panalangin sa pagtuon sa kasulatan sa tibuok niyang kinabuhi ug miawhag sa uban sa pagbuhat sa ingon. Si Elder Richard G. Scott, sa wala madugay nahimong usa ka sakop sa Napulog Duha ka mga Apostoles, nakahinumdom: “Si Elder Spencer W. Kimball nagdumala sa among erya sa mission president pa ako. Napanid-an nako kon unsa siya ka maayong mosabut ug mogamit sa Basahon ni Mormon panahon sa iyang mga makadasig nga mga mensahe ngadto sa mga miyembro ingon man sa mga misyonaryo. … Sa zone meeting usa niana ka okasyon, miingon siya, ‘Richard, migamit ka og mga kasulatan gikan sa Basahon ni Mormon karon sa usa ka paagi nga wala pa gayud nako mahunahunai sukad.’ Usa kadto ka mabinantayon nga preparasyon sa usa ka makahuluganon nga pagtulun-an nga gusto niyang akong makat-unan. Midugang pa gayud siya, ‘Ug kon hunahunaon nabasa nako ang Basahon ni Mormon sobra pa sa setenta y sais ka higayon.’ Wala niya isulti sa piho nga gamay ra ang akong kahibalo kabahin sa mga kasulatan, ug nga ako nagkinahanglan nga mogahin sa tibuok kinabuhi sa paghunahuna ug paggamit nini. Kadtong bugtong nga komentaryo nakadasig kanako ngadto sa tibuok kinabuhi nga tumong alang sa dugang nga kahibalo sa sagrado nga pulong sa Dios.”³

Mga Pagtulun-an ni Spencer W. Kimball

Ang mga kasulatan usa ka talagsaon nga butang nga ang matag usa gikinahanglan nga makadiskubre niini sa ilang mga kaugalingon.

Usahay dili lang kaayo nato mahatagan sa gibug-aton ang mga kasulatan tungod kay dili hingpit ang atong pagkasabut kon unsa ka talagsaon nga butang ang pag-angkon niini, ug unsa ka dako ang atong panalangin tungod kay kita aduna niini. Maingon og igo na kaayo alang kanato ang atong mga kasinatian niining kalibutan ug naanad nga maminaw lang sa ebanghelyo nga gipanudlo kanato nga lisud alang kanato ang paghunahuna nga sukad dili lang unta kana maoy himoon.

Apan kinahanglan natong masabtan nga [dili] pa lang kaayo [daghan] ang mga katuigan sukad ang kalibutan nakagawas gikan sa hataas nga panahon sa espirituhanong kangitngit nga gitawag nato og Dakong Apostasiya. Kinahanglang aduna kitay mahunahuna kabahin sa giladmon sa espirituhanong kangitngit nga mipatigbabaw sa wala pa moabut ang tingpamulak sa 1820 dihang ang Amahan ug ang Anak mipakita ngadto kang Joseph Smith—ang kangitngit nga nakita na ni propeta Nephi ug gihulagway nga “makahahadlok nga kahimtang sa pagkabuta” diin ang ebanghelyo gipugngan gikan sa tawo. (Tan-awa sa 1 Ne. 13:32.) …

… Ang kamatuoran nga wala ako matawo panahon sa espirituhanong kangitngit diin mahilum ang kalangitan ug ang Espiritu gibakwi mihatag sa akong kalag og kalipay. Sa pagkatinuod, ang pagkawalay pulong sa Ginoo nga mogiya kanato mao ang pagkasalaag sa usa ka halapad nga disyerto diin wala kay makita nga mga matiman-an, o sa pinakagrabe nga kangitngit nga langub nga walay kahayag nga mopakita kanato sa dalan aron makagawas. …

… Si Isaias mihimo og direkta nga pakisayran sa katapusan sa kangitngit ug ang pag-abot sa Basahon ni Mormon [tan-awa sa Isaias 29:11–12]. …

Ug diha nagsugod ang katingalahan nga buhat, “bisan usa ka katingalahang buhat ug usa ka kahibulungan” nga gisaad sa Ginoo nga iyang ipadayon sa paghimo. (Tan-awa sa Isa. 29:14.)

Sukad sa sinugdanan sa pagpahiuli sa ebanghelyo pinaagi ni propeta Joseph Smith, [minilyon ka] mga kopya sa Basahon ni Mormon ang naimprinta ug naapud-apod. … Ang wala maihap kon pila ka Biblia ang naimprinta, misobra pa sa gidaghanon sa laing mga gimantala nga mga basahon. Aduna usab kitay Doktrina ug mga Pakigsaad ug Perlas nga Labing Bililhon. Agig dugang nga atong mabasa dinhi niining mga bililhong basahon, adunay, wala nato mahibaloi sa lain nga panahon sa kasaysayan sa kalibutan, ang edukasyon ug abilidad sa paggamit niini, kon gusto kita.

Ang karaang mga propeta nasayud nga human sa kangitngit dunay moabut nga kahayag. Nagpuyo kita niana nga kahayag— apan ato ba kining nasabtan sa hingpit? Uban sa doktrina sa kaluwasan nga sayon mahimo ra natong kab-uton, nahadlok ako nga ang uban natabunan gihapon sa “espiritu sa kahinanok, mga mata nga dili makakita, ug mga dalunggan nga dili makadungog.” (Mga Taga-Roma 11:8.)

… Mohangyo ako sa tanan nga motimbang-timbang sa atong nahimo sa pagtuon sa kasulatan. Kasagaran na kini nga butang nga mobasa og pipila lang ka mga tudling sa kasulatan sa atong kabubut-on, nga naglutaw lang sa atong mga hunahuna, nga ingon nalang ana, ug unya mag-ilusyon nga kita daghan na og nahibaloan sa ebanghelyo. Niining pagkabutanga, ang pag-angkon og gamay ra nga kahibalo sa tinuod mahimong usa ka problema. Kombinsido ako nga kada usa kanato, sa ubang panahon sa atong mga kinabuhi, kinahanglang modiskubre sa mga kasulatan alang sa atong kaugalingon—ug dili kay modiskubre niini sa makausa lang, apan diskubrehan kini og balik-balik.⁴

Ang atong mga pasalig nga moserbisyo sa Ginoo magkalig-on kon kita mobasa sa mga kasulatan.

Ang istorya ni Haring Josias sa Daang Tugon usa nga makatabang kaayo nga “mipahisama … ngadto … [sa atong] kaugalingon.” (1 Ne. 19:24.) Kanako, usa kana sa pinakanindot nga mga sugilanon diha sa tanang mga kasulatan.

Si Josiah walo ka tuig pa lang dihang gisugdan niya sa pagdumala ang Judah, ug bisan ang iyang mga kaliwatan grabe ka dautan, ang mga kasulatan nag-ingon kanato nga “ug gibuhat niya ang matarung sa mga mata sa Ginoo, ug naglakat sa tanang dalan ni David nga iyang amahan, ug wala motipas ngadto sa tuong kamot o sa wala.” (2 Mga Hari 22:2.) Sa tanan mao kini ang labing makapatingala dihang atong nahibaloan nga nianang panahona (duha lamang ka mga henerasyon sa wala pa gun-oba ang Jerusalem niadtong 587 B.C.) ang nakasulat nga balaod ni Moises nawala ug wala na gayud igdungog, bisan sa mga kaparian sa templo!

Apan sa ika-diseotso nga tuig sa iyang pagdumala, si Josias mimando nga ayuhon ang templo. Nianang higayona nakit-an ni Hilkiah, nga high priest, ang libro sa balaod, diin si Moises mibutang niini ngadto sa arka sa pakigsaad, ug gihatud kini ngadto kang Haring Josias.

Sa dihang ang libro sa balaod gibasa ngadto ni Josias, iyang “gigisi ang iyang sinina” ug mibakho atubangan sa Ginoo.

“Kay dako ang kaligutgot ni Jehova nga misilaub batok kanato,” miingon siya, “tungod kay ang atong mga amahan wala mamati sa mga pulong niining basahona, sa pagbuhat sa tanang nahisulat mahitungod kanato.” (2 Mga Hari 22:13.)

Ang Hari dayon mibasa sa libro atubangan sa tanang katawhan, ug nianang panahona silang tanan mihimo og panaad nga tumanon ang tanang mga kasugoan sa Ginoo “sa bug-os nilang kasingkasing ug sa bug-os nilang kalag.” (2 Mga Hari 23:3.) Dayon gipadayon ni Josias ang paglimpiyo sa gingharian sa Judah, pagtangtang sa tanang mga dios-dios, ang kakahoyan, tag-as nga mga dapit, ug ang tanang mangil-ad nga mitumaw panahon sa pagdumala sa iyang mga kagikan, nga naghugaw sa yuta ug sa katawhan niini. …

“Ug walay hari nga nanghiuna kaniya nga sama kaniya, nga mibalik sa Ginoo uban sa bug-os niyang kasingkasing, ug uban sa bug-os niyang kalag, ug uban sa bug-os niyang gahum, sumala sa tibuok kasugoan ni Moises; ni human kaniya may mitindog pa nga sama kaniya.” [2 Mga Hari 23:25.]

Dako ang akong pagbati nga kinahanglan natong tanan nga mobalik ngadto sa mga kasulatan sama sa gibuhat ni Haring Josias ug tugutan kining magalihok sa bug-os nga kusog sulod kanato, nga magduso kanato ngadto sa dili mapalingpaling nga determinasyon sa pag-alagad sa Ginoo.

Ang balaod ni Moises lang ang anaa kang Josias. Sa atong mga kasulatan anaa ang ebanghelyo ni Jesukristo sa iyang kinatibukan; kon ang pagtilaw tam-is, sa kahingpitan aduna ang kalipay.

Ang Ginoo wala magtiaw kanato sa dihang iyang gihatag kining mga butanga, kay “Kaniya kinsa gikahatagan og daghan, pagapangayoan og daghan.” (Lucas 12:48.) Ang aduna niining mga nagpasabut nga responsibilidad alang kanila. Kinahanglan natong tun-an ang mga kasulatan sigun sa mga kasugoan sa Ginoo (tan-awa sa 3 Ne. 23:1–5); ug kinahanglang tugutan nato kining modumala sa atong mga kinabuhi ug sa mga kinabuhi sa atong mga anak.⁵

Makakat-on kita og mga pagtulun-an sa kinabuhi pinaagi sa pagtuon sa kasulatan.

Ang kada pagtulun-an sa mga sumbanan sa maayong pamatasan ug sa husto nga espirituhanong pagpuyo makita diha sa mga kasulatan. Dinha makita ang mga ganti sa pagkamatarung ug ang mga silot sa sala.⁶

Atong makat-unan ang mga pagtulun-an sa kinabuhi nga andam kaayo ug sigurado kon atong makita ang resulta sa pagkadautan ug pagkamatarung diha sa mga kinabuhi sa uban. … Ang pagkaila kaayo ni Job ug pagsuod kaniya maoy usa ka pagkat-on sa paghupot og hugot nga pagtuo pinaagi sa pinakagrabe nga mga kalisdanan. Ang pagkaila kaayo sa kusog ni Jose sa kaharuhayan sa karaang Ehipto dihang gitintal siya sa usa ka madanihon nga babaye, ug ang pagtan-aw niining putli nga batan-ong lalaki nga mipugong sa tanang gahum sa kangitngit nga giumol niining usa ka makabibihag nga binuhat, sa tinuod makapalig-on kini sa tinud-anay nga magbabasa batok sa maong sala. Ang pagtan-aw sa pailub ug kalig-on ni Pablo dihang iyang gigahin ang tibuok niyang kinabuhi sa iyang pangalagad maoy usa ka paghatag og kaisug niadtong kinsa mibati nga sila gipasakitan ug gisulayan. Gibunalbunalan siya sa makadaghang higayon, kadaghan gipriso tungod sa iyang gihimo, gibato hangtud hapit mamatay, nalunod sa barko tulo ka higayon, gikawatan, hapit malumos, biktima sa sayop ug dili maunungon nga mga kaigsoonan. Samtang himatyon sa kagutom, pagkatuok, kurog sa katugnaw, dili nindot og mga saput, si Pablo sa gihapon makanunayon sa iyang serbisyo. Wala gayud siya magduhaduha bisan kausa human niya madawat ang pagpamatuod human niadtong dili kasarangan nga kasinatian. Ang pagtan-aw sa paglambo ni Pedro diha sa ebanghelyo isip maoy nakatabang kaniya nga mausab gikan sa usa ka kabos nga mangingisda—walay hibangkaagan, kulang sa kaalam, ug ignorante, nga maoy ilang tan-aw kaniya—nga miuswag ngadto sa pagkamaayong tig-organisar, pagkapropeta, pagkalider, batid sa pag-ila sa Dios, ug pagkamagtutudlo. …

Ang atong mga anak mahimong makakat-on sa mga pagtulunan sa kinabuhi pinaagi sa paglahutay ug sa personal nga kalig-on ni Nephi; sa pagkadiosnon sa tulo ka mga Nephites; sa hugot nga pagtuo ni Abraham; sa gahum ni Moises; sa pagpanglingla ug sa pagkawalay pagtuo ni Ananias; sa kaisog bisan pa sa kamatayon niadtong dili mosibug nga mga Ammonites; sa walay pagkatarug nga pagtuo sa mga inahan nga Lamanite nga ilang gipasa ngadto sa ilang mga anak nga lalaki, unsa ka gamhanan nga kini maoy nakaluwas sa mga batan-ong sundalo ni Helaman. Walay bisan usa ang namatay niana nga gubat.

Sa tanang mga kasulatan ang matag-kahuyang ug kalig-on sa tawo gihulagway, ug ang mga ganti ug mga silot nahisulat. Siguradong buta ang usa ka tawo kinsa dili makahibalong mopuyo og maayong kinabuhi pinaagi sa pagbasa. Ang Ginoo miingon, “Kamo nagasusi sa mga kasulatan; kay nagahunahuna man kamo nga pinaagi niini makakaplag kamo sa kinabuhing dayon: gani kini mao ang nagapanghimatuod mahitungod kanako,” (Juan 5:39.) Ug mao gihapon kini nga Ginoo ug agalon kinsang kinabuhi makita nato ang tanang kalidad sa pagkamaayo: diosnon, kalig-on, pagpailub, pagkahingpit. Ug unsaon man pagtuon sa mga estudyante niining talagsaong sugilanon kon dili nila maangkon ang pipila niini sa ilang kinabuhi?⁷

Dinhi [sa mga kasulatan] mao ang mga talaan sa kinabuhi sa mga propeta ug sa mga lider ug sa Ginoo mismo, nga naghatag og mga ehemplo ug direksyon aron ang katawhan, pinaagi sa pagsunod niana nga mga ehemplo, mahimo nga hingpit, malipayon, puno sa kamaya, ug sa kahangturan mahimo ang ilang mga tumong ug gilauman.⁸

Ang Espirituhanong kahibalo makab-ot sa tanan kinsa magatuon ug magasiksik sa mga kasulatan.

Daghan pa gihapong mga Santos kinsa dili regular nga magbasa ug mamalandong sa mga kasulatan, ug diyutay ra gayud kaayo ang ilang mga kahibalo sa mga instruksyon sa Ginoo alang sa mga anak sa katawhan. Daghan ang nabunyagan ug nakadawat og pagpamatuod, ug “makasulod niini nga higpit ug pig-ot nga dalan,” bisan pa napakyas gihapon sa pagpadayon sa lakang nga gikinahanglan—nga “mopadayon sa unahan, magbusog sa pulong ni Kristo, ug molahutay hangtud sa katapusan.” (2 Ne. 31:19, 20; mga italik gidugang.)

Ang mga matinud-anon lamang ang makadawat sa gisaad nga gasa, nga mao ang kinabuhing dayon. Kay ang usa dili makadawat og kinabuhing dayon nga dili siya mahimong “matinumanon sa mga pulong “ (tan-awa sa Santiago 1:22) ug mahimong walay kahadlok sa pagsunod sa mga kasugoan sa Ginoo. Ug ang usa dili mahimong “matinumanon sa mga pulong “ nga dili una mahimong “tigpaminaw.” Ug ang pagkahimong usa ka”tigpaminaw” dili lang kay yano og tinapulang magbarug ug maghulat og higayon aron makahibalo sa impormasyon; kini mao ang pagsiksik ug pagtuon ug pag-ampo ug pagsabut. Busa ang Ginoo miingon, “ug kinsa kadto nga wala modawat sa akong tingog wala makasinati sa akong tingog, ug dili ako.” (D&P 84:52.)⁹

Ang mga katuigan nagtudlo kanako nga kon kita maabtikong mopadayon niining takus nga katuyoan sa kaugalingon [ang pagtuon sa kasulatan] sa tinud-anay ug sa mainampingon nga paagi, kita tinuod nga makakaplag og mga tubag sa atong mga problema ug kalinaw sa atong mga kasingkasing. Atong masinati ang Balaang Espiritu nga mopalapad sa atong panabut, makakaplag og bag-ong mga hunahuna, masaksihan ang pamaagi sa paghukyad sa tanang kasulatan; ug ang mga doktrina sa Ginoo moabut nga magdala og dugang kahulugan kanato nga wala pa nato mahunahunai sukad. Agig sangputanan niini, makaangkon kita og dakong kaalam diin maoy makagiya sa atong mga kaugalingon ug sa atong mga pamilya.¹⁰

Hangyoon ko ang tanan karon sa pagtuon sa kinasingkasing sa mga kasulatan, kon ugaling wala pa kini nimo buhata.¹¹

Kon atong isub-sob ang atong kaugalingon sa mga kasulatan, makaila kita ug mahigugma sa Langitnong Amahan ug ni Jesukristo.

Akong nakita nga kon dili kaayo nako hatagan og bili ang akong pakigrelasyon uban sa Dios ug sa dihang maora og walay diosnong dalunggan nga naminaw ug walay diosnong tingog nga mamulong, nga ako layo ra gayud kaayo. Kon akong isubsob ang akong kaugalingon sa mga kasulatan ang gilay-on magkaduol ug ang pagkaespirituhanon mobalik. Akong makita ang akong kaugalingon nga mas labaw pang mahigugmaon niadtong kinsa kinahanglan nakong higugmaon sa tibuok nakong kasingkasing ug hunahuna ug kusog, ug sa paghigugma kanila og maayo, nakita nakong mas sayon ang pagsunod sa ilang mga tambag.¹²

Akong nahibaloan nga ang tanan nakong gikinahanglan aron modako ang akong paghigugma sa akong Magbubuhat ug sa ebanghelyo ug sa Simbahan ug sa akong mga kaigsoonan mao ang pagbasa sa mga kasulatan. Nakagahin ako og daghang mga oras sa kasulatan. … Wala ko kahibalo kon giunsa sa uban nga nagbasa sa kasulatan ug unya wala makapatubo og pagpamatuod sa iyang pagkadiosnon ug sa pagkabalaan sa buluhaton sa Ginoo, kinsa maoy tigpamaba sa mga kasulatan.¹³

Pipila lamang sa mga binilyon [dinhi] sa yuta ang makalakaw uban sa Dios sama sa nabuhat ni Adan ug Abraham ug ni Moises, gani, kining kalibutan nga atong gipuy-an, adunay mga kasulatan nga mabasa sa hapit matag tawo, ug, pinaagi niini, ang katawhan makaila pag-ayo sa ilang Langitnong Amahan, sa iyang Anak nga si Jesukristo, ug inubanan sa mga kahimtang ug mga kahigayunan ug sa gilauman nga kinabuhing dayon.¹⁴

Walay gidaghanon ang pagtuon sa tawo aron makaplagan ang Ginoo, apan iyang gipadayag ang iyang kaugalingon ngadto sa iyang mga sulugoon nga mao ang mga propeta, ug ila kitang gitudloan sa iyang kinaiyahan. Matag usa kanato mahimong makabaton og kumpirmasyon sa kamatuoran pinaagi sa atong kaugalingong pagpuasa ug pag-ampo. Bisan sa mga kagubot kabahin sa kahibalo sa Dios nga naglibot kanato mahimo kitang magpabilin nga malinawon taliwala niining mga kasamok uban sa simple, dili kaduhaduhaan nga kahibalo sa Amahan ug sa Anak nga gikuha gikan sa kaaraan og sa bag-o nga mga kasulatan ug gipamatud-an pinaagi sa Espiritu. Dinhi niini nga kahibalo aduna kitay paglaum sa kinabuhi nga dayon.¹⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Palandonga ang mga istorya nga anaa sa mga pahina “00” 74–76. Giunsa man niining istoryaha sa pagtabang kanimo? Pangutan-a ang imong kaugalingon kabahin sa imong pagbasa, pagsabut, ug pag-aplay unsay naa sa mga kasulatan. Hunahunaa ang imong personal nga mga tumong alang sa pagtuon sa kasulatan.
Samtang imong ribyuhon ang seksyon nga nagsugod sa pahina 77–78, hunahunaa ang imong kinabuhi kon walay mga kasulatan. Unsa kaha ang kalainan sa imong kinabuhi? Unsa ang mga sangputanan sa “dili kaayo paghatag og gibug-aton sa mga kasulatan”?
Nganong dili man igo ang pagpili lang og pipila ka mga paboritong mga tudling sa kasulatan “nga naglutaw lang sa atong mga hunahuna”? (pahina 77–78). Unsa man sa imong hunahuna ang buot ipasabut sa pagpangita sa mga kasulatan alang sa imong kaugalingon ug sa “pagdiskubre niini og balik-balik”?
Si Presidente Kimball miawhag kanato nga ipahisama ang sugilanon ni Haring Josias sa atong kaugalingon (mga pahina 78–80; tan-awa usab sa 2 Mga Hari 22–23). Unsa man ang susama ug ang kalainan nga imong nakita tali sa imong kinabuhi ug sa kinabuhi ni Haring Josias ug sa iyang mga katawhan?
Paghuna huna og pipila ka mga “pagtulun-an sa kinabuhi “ nga imong nakat-unan pinaagi sa pagtuon sa kasulatan. (Alang sa pipila ka mga sanglitanan, tan-awa sa mga pahina 80–82.)
Ribyuha ang ika-upat nga paragrap sa pahina 83. Unsa pay ubang mga mensahe sa kasulatan nga nakatabang kanimo nga matubag ang imong mga problema ug kalinaw sa imong kasingkasing?
Basaha ang una ug ang ikaduhang paragrap sa pahina 84. Unsa may epekto sa pagtuon sa kasulatan ngadto sa imong relasyon sa Dios? sa imong relasyon uban sa mga sakop sa pamilya? sa imong pagserbisyo sa mga calling sa Simbahan?

May Kalabutan nga mga Kasulatan: Amos 8:11–12; 1 Nephi 19:23; Alma 37:8; D&P 1:37; 18:33–36