Hugna 15

Kinahanglang Mahimo Kita nga mga Tawo nga may Balaang Pagtahud

Mas labaw pa kay sa pamatasan, ang balaang pagtahud mao ang hiyas nga kinahanglang mahimo nga bahin sa atong pamaagi sa kinabuhi.

Gikan sa Kinabuhi ni Spencer W. Kimball

Niadtong 1955 si Presidente David O. McKay mipahinungod sa unang templo sa Uropa, ang Templo sa Bern Switzerland. Si Elder Spencer W. Kimball, nga kaniadto usa ka miyembro sa Korum sa Napulog Duha ka mga Apostoles, gi-eskedyul nga mamulong sa sesyon sa hapon sa unang adlaw sa pagpahinungod. Nag-inusara siya nga migahin og usa ka oras sa sulod sa templo nianang adlawa “nangandam sa hunahuna ug kasingkasing alang nianang hapona, wala magdali, hilum, matinahuron ug balaanon.”¹ Panahon sa iyang pakigpulong miingon siya: “Sa pagmata nako karong buntaga ug nagsugod pagkamatngon human sa kagabhion, akong nakita ang nagsingabut nga kaadlawon, ug ang unang miabut sa akong hunahuna mao ang balaan nga templo nga pagapahinungdan niining adlawa. Akong gihunahuna nga, ‘Dili mokaon karong adlawa. Kinahanglang pasinawon ang sapatos, utawon ang mga sinina, ug kinahanglan gayud nga aduna akoy limpyo nga hunahuna.’ Sa pagpaingon ngadto sa Zollikofen naninguha ako nga dili gayud molitok og mga pulong, ug sa dihang miabut ako sulod niini nga lawak ug mitupad ni [Presidente McKay] ug ang tanan niyang gisulti diha lamang sa sagrado nga mga paghunghong, akong nasayran nianang gutloa nga gibati nako ang pipila sa iyang gibati. ‘Kabalaan sa Ginoo, Kabalaan nga angay sa mga Santos sa Ginoo.’ ”²

Dili lamang gitagana ni Presidente Kimball ang iyang balaang pagtahud sa mga okasyon sama sa mga pagpahinungod sa templo. Nagsulti siya og balaang pagtahud isip pamaagi sa kinabuhi, ug gihatagan niya og panig-ingnan kini nga pagtulun-an bisan sa ginagmay, inadlaw nga mga kalihokan. Sama pananglit, sa makausa sa dihang mibisita siya og meetinghouse, hilum nga misulod siya sa usa ka kasilyas, gilabay ang mga papel nga diha sa salog, ug gilimpyohan ang lababo. Usa ka lokal nga lider sa Simbahan nakamatikod niining yano nga pagpakita og pagtahud. Nadasig sa ehemplo ni Presidente Kimball, gitudloan niya ang uban sa pagpakita og mas labaw pa nga balaang pagtahud alang sa mga sagrado nga mga dapit ug mga butang.³

Mga Pagtulun-an ni Spencer W. Kimball

Ang balaan nga pagtahud dili temporaryo nga pamatasan nga himoon lamang ma Dominggo apan usa ka mapadayunon nga kinaiya sa pagkamatinud-anon sa Dios.

Ang balaang pagtahud gihatagan og kahulugan isip usa ka “pagbati o kinaiya sa dakong pagtahud, gugma, ug kataha, sama ngadto sa usa ka butang nga sagrado.” Sa paghulagway niini isip kamatinuoron ngadto sa Dios maoy laing paagi sa pagpakita og kahulugan sa balaang pagtahud.

Kadaghanan sa atong mga lider namahayag kabahin sa balaang pagtahud isip usa sa pinakataas nga hiyas sa kalag, mipasabut nga naglakip kini sa tinuod nga pagtuo diha sa Dios ug sa iyang pagkamatarung, edukado, ug sa gugma alang sa maanindot nga mga butang sa kinabuhi.…

Ug ingon man sa ubang mga baruganan sa ebanghelyo, ang balaang pagtahud mosangput ngadto sa dugang hingpit nga kalipay.

Kinahanglan gayud natong hinumduman nga ang balaang pagtahud dili usa ka walay timik, temporaryo nga pamatasan nga ma Dominggo lang nato gamiton. Ang tinuod nga balaang pagtahud naglakip og kalipay, ingon man usab sa gugma, pagtahud, pagpasalamat ug diosnong kahadlok. Usa kini ka hiyas nga kinahanglang himoon nga kabahin sa atong pamaagi sa kinabuhi. Sa pagkatinuod, ang mga Santos sa Ulahing mga Adlaw mao gayud unta ang may pinakabalaang pagtahud nga mga tawo sa tibuok kalibutan.⁴

Kinahanglan nga batonan nato ang balaang pagtahud alang sa Amahan ug sa Anak ug alang sa Ilang balaan nga mga ngalan.

Ang balaang pagtahud ngadto sa Amahan ug sa Anak maoy usa sa pinakamahinungdanong hiyas o kinaiya niadtong kinsa makakab-ot sa celestial nga gingharian. Diha sa seksyon 76 sa Doktrina ug mga Pakigsaad, nga nahibaloan isip “Ang Panan-awon,” nga gihatag ngadto ni Joseph Smith ug Sidney Rigdon niadtong Pebrero 1832, atong makita:

“Ug sa ingon kami nakakita sa himaya sa celestial nga milabaw diha sa tanan nga butang—diin ang Dios, gani ang Amahan, maghari diha sa iyang trono hangtud sa kahangturan;

“Niadto kansang trono ang tanan nga mga butang miyukbo sa mapainubsanon nga pagtahud, ug mihatag kaniya og himaya hangtud sa kahangturan.

“Sila kinsa mopuyo diha sa iyang atubangan mao ang simbahan sa Unang natawo; ug sila nakakita ingon nga sila nakit-an, ug nahibalo ingon nga sila nahibaloan, ingon nga nakadawat sa iyang kahingpitan ug sa iyang grasya.

“Ug siya mihimo kanila og managsama sa gahum, ug sa kusog, ug sa kamandoan.” (D&P 76:92–95.)

Ang laing moderno nga pagpadayag nagtudlo kanato sa paghatag og balaang pagtahud gani ang ngalan gayud sa Dios; gisultihan kita sa dili pagpasipala sa ngalan sa Amahan, ug gani ang paglikay sa kanunay nga paggamit niini. (D&P 107:2–4.) …

Makita nga ang balaang pagtahud alang sa Dios ug sa iyang ngalan maoy usa sa pinakaimportanting hiyas nga atong mapalambo.⁵

Didto sa ospital usa ka adlaw niana gitulod ako sa wheelchair pagawas sa operating room sa usa ka tig-atiman kinsa nadakin-as, ug dihay migawas nga masuk-anong pamalikas nga tunglo gikan sa iyang mga ngabil nga giapilan og ngalan sa Manluluwas. Bisan og danag lang nga pagkamatngon, nahasibug ako ug nangamuyo: “Palihug! Palihug! Ako kana nga Ginoo kansang ngalan imong gipanamastamasan.”

Dihay dako nga kahilum, dayon usa ka mahinay nga hagawhaw, “gikasubo ko.” Nalimot siyag kadali nga ang Ginoo hugot nga mimando sa tanan niyang mga tawo, “Dili mo paggamiton ang ngalan sa Ginoo nga imong Dios sa pasipala; kay ang Ginoo dili mag-isip nga walay sala niadtong nagagamit sa iyang ngalan sa pasipala” (Exod. 20:7).…

Diha sa entablado, sa telepono, sensitibo nga mga dunggan ug mga mata ang napungot sa kada adlaw nga pagpasipalang paggamit sa ngalan sa Ginoo nga atong Dios. Diha sa mga pribado nga club, sa mga umahan, sa sosyal nga mga panagtigum, sa negosyo, ug sa mga propesyon ang ngalan sa Manunubos gigamit sa mapangahason ug masalaypon nga paagi. Kita kinsa mga walay hunahuna ug mga danghag, ug kita kinsa mga madumtanon ug masinupakon, kinahanglan nga mahinumdom nga dili kita makahimo sa paggamit sa ngalan sa Ginoo sa pagpasipala nga dili masilotan. Wala ba kaha nato gidapit ang kalaglagan sa kaulahian samtang atong gipanamastamasan ang tanang mga butang nga balaanon ug sagrado, bisan sa yano ug walay pagtahud nga paggamit diha sa atong inadlaw nga paghisgot sa mga ngalan sa Dios? …

Usa kini ka bug-at kaayo nga butang alang ni bisan kinsa nga gamiton sa walay pagtahud ang ngalan sa Dios. Ug kini naglakip sa paggamit sa ngalan sa Ginoo nga walay pagtugot, ug adunay daghang mga tawo nga nangangkon og mga pagpadayag ug nangangkon og awtoridad nga dili gikan sa Ginoo.

Sa nanglabay nga mga katuigan, ang mga propeta wala gayud mohunong pagbadlong niining grabe nga sala. Si propeta Isaias nanawagan sa pagpanubag ug sa paghinulsol niadtong “nanumpa tungod sa ngalan ni Jehova, ug naghisgut sa Dios sa Israel, apan dili kamatuoran, ni sa pagkamatarung” (Isa. 48:1).…

Ang paghisgut sa ngalan sa Ginoo uban sa balaang pagtahud kinahanglan gayud nga himoon nga kabahin sa atong mga kinabuhi isip mga miyembro sa Simbahan. Sama pananglit, kita isip buotan nga mga Santos sa Ulahing mga Adlaw, dili manigarilyo. Dili kita moinum og makahubog nga ilimnon. Dili kita moinum og tsa ug kape. Sa sama nga paagi, dili kita mogamit og dautan nga pinulongan. Dili kita motunglo o modaut og dungog. Dili kita mogamit sa ngalan sa Dios sa pagpasipala. Dili malisud ang pagkahimong hingpit sa paglikay sa pagkaanad sa pagpamalikas, kay kon pugngan sa usa ka tawo ang iyang ba-ba nga dili mamalikas, may purohan pa nga mahingpit siya nianang bahina.

Apan ang atong responsibilidad wala matapos dinhi. Paglikay lamang kana nga makahimo og sala. Sa pagbuhat og matarung, kinahanglan gayud nga litukon nato ang ngalan sa Ginoo uban sa pagtahud ug pagkabalaan diha sa atong mga pag-ampo, sa atong mga pakigpulong, ug sa atong mga paghisgot.…

Gihingpit ni Jesus ang iyang kinabuhi ug nahimo natong Kristo. Bililhon nga dugo sa dios ang giula, ug siya nahimo natong Manluluwas, ang iyang nahingpit nga kinabuhi gihatag, ug nahimo siya nga atong Manunubos; ang iyang pag-ula alang kanato naghimong posible nga makabalik kita sa atong Langitnong Amahan, ug bisan pa niana unsa ka walay paghunahuna, unsa ka dili mapasalamaton ang kadaghanang manununod! Ang pagka walay utang kabubut-on mao ang sala sa tanang panahon.

Daghan kaayo ang nangangkon nga sila nagtuo kaniya ug sa iyang mga buhat, ug bisan pa man gamay ra gayud ang mipasidungog kaniya. Minilyon kanato ang nagtawag sa atong mga kaugalingon nga mga Kristiyanos, pero panagsa ra ang moluhod sa pagpasalamat alang sa iyang pinakamahinungdanon nga gasa, ang iyang kinabuhi.

Atong ipahinungod pag-usab ang atong mga kaugalingon sa kinaiya nga may balaang pagtahud, ngadto sa pagpakita og pasalamat sa atong Ginoo alang sa iyang dili ikatandi nga sakripisyo. Atong hinumduman ang moderno nga sugo, “Busa, himoa nga ang tanan nga mga tawo magbantay giunsa nila paggamit ang akong ngalan sa ilang mga ngabil” (D&P 63:61).⁶

Mga templo, mga balay tigumanan, ug mga panimalay kinahanglan nga mahimong mga dapit sa balaang pagtahud.

Ug diha gihapon sa laing pinakaimportante nga dapit, ang Ginoo nagmando pinaagi sa moderno nga pagpadayag nga kinahanglan gayud nga magbaton kita og tukma nga pagtahud alang sa iyang balaan nga balay. Sa importanting pagpadayag nga gihatag ngadto ni Joseph Smith nga naila isip pagpahinungod nga pag-ampo alang sa Kirtland Temple, usa ka sugo ang gihatag nga dinhi, maingon man usab sa ubang sagrado nga mga templo nga gitukod alang sa Ginoo, kinahanglan nga mahimong usa ka dapit sa balaang pagtahud ngadto Kaniya. (Tan-awa sa D&P 109:13, 16–21.)

Sa tukma nga salabutan, ang gisulti kabahin sa sagrado nga mga templo sa Simbahan magamit ngadto sa kada “balay sa Ginoo,” bisan kon balay tigumanan kini o sa bisan unsa pa nga dapit diin ang mga Santos nagsimba, o sa pagkatinuod, sa bisan asa nga panimalay sa mga Santos sa Ulahing mga Adlaw.⁷

Alang sa mga Santos sa Ulahing mga Adlaw ang chapel dili hilit nga dapit o lawak sa usa ka katedral, dili dapit nga may mga altar sa bulawan ug mahalon nga mga bato. Usa kini ka dapit nga walay daghan kaayong mga pagpakita o pagpasundayag, walay istatuwa ug labi pa nga walay mga hulagway, simple lamang ang pagdayandayan ug yano, limpyo ug hayag ug takus nga tahuron. Usa kini ka dapit diin ang mga tawo komportable nga naglingkod, sa matuod nga panag-inigsoonay, diin ang leksyon gitudlo, ang mga choir nanganta, mga miyembro nag-ampo ug nagsangyaw, ug diin ang tanan nakakat-on og kahibalo ug pagdasig—ug diin ang tigulang ug batan-on nag-ambit sa sakrament. Dinhi ang mga pamatasan sa hunahuna ug buhat ang gisagop ug gipaila ngadto sa mga kinabuhi, ug dinhi nagsugod ang hugot nga pagtuo, nadasig pag-usab ug nabalaan.

Ang chapel wala ipahinungod ngadto sa tigpakaaron ingnon nga diosnon nga nagpakita og seryoso nga mga panagway, salikwaut nga mga pagtimbaya, o bugnaw ug haw-ang nga kahilum, kondili sa balaan nga pagtahud alang sa balaan nga mga dapit, sagrado nga mga katuyoan, ug balaan nga mga personahe mao gayud ang kanunay nga makita didto.⁸

Kita ba mga katawhan nga adunay balaan nga pagtahud? Ang ato ba nga mga lihok sa panimalay ug sa simbahan nagpakita og balaan nga pagtahud alang sa atong Tiglalang?

Usahay maghunahuna kita. Nagtambong kita sa mga miting sa sakrament ug mga komperensya diin ang mga kabataan magsuroysuroy diha sa hawanan nga walay nagpugong. Panahon sa service, atong mamatikdan ang mga hingkod nga magsinultihay uban sa ilang katupad, mga tawo nga nangatulog, ug mga batanon nga nanagpundok diha sa mga pasilyo. Atong makita ang mga pamilya nga nangaulahi ug saba kaayong naglumbaay paingon sa ilang mga lingkuranan, ug mga pundok nga dagko kaayo og tingog nga nag-istoryahanay diha sa chapel human sa miting.

Ang atong mga hunahuna nabaling ngadto sa mga tigsusi, mga higala, ug niadtong kansang mga pagpamatuod huyang ug naglambo pa. Ang atong mga miting nahimo bang usa ka gamhanang misyonaryo nga mga himan, diin nagmando ug mituhop sa mga kasingkasing ang Espiritu sa Ginoo? O aron mabati ang Espiritu kinahanglan ba gayud nga unahon pagwagtang ang daghang wala kinahanglana nga mga makababag?⁹

Ang usa ka buotan nga tawo may balaan nga pagtahud. Nagpakita siya og pagtahud diha sa balay alampoan bisan kon siya ra ang tawo didto. Walay mga tawo nga nanagpundok sa dihang mimando ang Ginoo ni Moises: “Huboa ang imong mga sandalias gikan sa imong mga tiil, kay ang dapit nga imong gitindogan, yuta nga balaan!” [Tan-awa sa Exodo 3:5.] Kinahanglan nga ayuhon sa pagplano sa nagdumala nga mga opisyal aron walay paghunghong nga madungog o makita diha sa atubangan. Ang mga ginikanan kinahanglang motudlo ug modisiplina sa ilang mga anak ug palingkuron tupad nila (gawas kon may nagdumala sa mga grupo sa klase). Ang mga tigpahiluna [usher] kinahanglan nga tudloan sa hilum nga pag-atiman sa pagpalingkod nga minus ang kahasol. Ang mga tigtambong kinahanglan nga sayong moabut, ug himoon ang ilang paghinangpanay sa pinugngan nga mga tingog, hinayon ang ilang paglakang, mangita og mga lingkoranan diha sa atubangan, ug molingkod sa mahilum nga mahunahunaong buot. Kinahanglan nga ang tanan moapil gayud kutob sa mahimo—mokanta uban sa nanganta, mag-ampo uban kaniya nga nag-ampo, nag-ambit sa sakrament uban sa mapasalamaton nga kasingkasing ug mopahinungod pag-usab sa mga pakigsaad nga unang nahimo. Usa ka kahigayunan ang gihatag aron sa pagpaminaw og maayo sa mga leksyon nga gitudlo, mga wali nga gisangyaw ug mga pagpamatuod nga gihatag, nga maghukom nga dili pinaagi sa pagka maayo nga mosulti kondili pinaagi sa pagkamatinuoron. Higayon na kini sa hingpit nga pagkat-on gikan sa nag-una nga tinubdan, tungod kay ang pinakamapainubsanon nga magtutudlo o mamumulong makahatag og hunahuna nga mahimong palamboon. Sa hilum natong pagsulod sa pultahan sa chapel mahimong biyaan nato sa gawas ang tanang mga pagpanaway, mga kabalaka, ug mga kahingawa—ang tanang panarbaho, pulitikal, sosyal, ug mga plano sa paglingawlingaw—ug sa malinawon nga paagi mopahigayon sa atong mga kaugalingon sa pagpamalandong ug sa pag-ampo. Mahimong moambit kita sa espirituhanong kahimtang. Mahimo nga ihalad nato ang atong mga kaugalingon sa pagkat-on, paghinulsol, pagpasaylo, pagpamatuod, pagdayeg, ug paghigugma.¹⁰

Ang balaan nga pagtahud magsugod sa panimalay.

Diin man, ang balaang pagtahud magsugod, ug sa unsang paagi mapalambo nato kini?

Ang panimalay mao ang yawe sa balaang pagtahud, nga sama usab sa matag diosnon nga hiyas.

Tuguti nga akong mapasabut kaninyo ang kamahinungdanon sa pagtudlo sa mga bata og pag-ampo. Diha kini sa personal ug pamilya nga pag-ampo nga ang gagmay nga mga bata makat-on sa pagduko sa ilang mga ulo, ikyugpos ang ilang mga kamot, ug mopiyong sa ilang mga mata samtang gipahinungdan ang atong Amahan sa langit. Ang kinaiya nga nakat-unan sa panimalay mao usab ang modeterminar sa kinaiya diha sa mga miting sa Simbahan. Ang usa ka bata nga nakat-on sa pag-ampo diha sa panimalay makasabut dayon nga kinahanglan gayud nga maghilum ug magpuyo sa panahon sa pag-ampo diha sa mga serbisyo sa pagsimba.

Ingon man usab, kon ang family home evening gihimong kabahin sa kinabuhi sa panimalay, ang mga bata masayud nga adunay talagsaon nga mga higayon, dili lamang sa simbahan apan diha sa panimalay, diin makat-on kita mahitungod sa atong Langitnong Amahan ug kon ang matag usa gikinahanglan nga anaa sa iyang pinakamaayo nga pamatasan.

Ang musika usa ka talagsaon nga kalingawan alang sa mga bata. Ang mga himno nga kanunayng gikanta sa simbahan mamahimo usab nga pamilyar diha sa panimalay. Ang gagmay nga mga bata ang mas makapahimulos kon ang mga ginikanan motabang kanila nga makakat-on og simple nga mga himno diha sa panimalay. Sa ingon nga paagi, ang mga bata mahinamon nga magpaabut nga mokanta sa sakrament ug ubang mga miting.

Siyempre, ang ginikanan kinahanglan nga motambong sa mga miting sa Dominggo uban sa ilang mga anak.

Ang amahan ug inahan kinahanglan nga magtambayayong sa paghimo aron pagsiguro nga ang pagpangandam alang sa mga miting maoy usa ka makalingaw nga kasinatian sa pamilya. Ang dinalian nga pagpundok sa mga bata, pagsul-ob og sinina, ug pagdali-dali paingon sa mga miting maoy makadaut sa balaan nga pagtahud.

Kon ang mga pamilya nahimutang niini nga kahimtang kanunay gayud sila nga maulahi sa pagsimba, kanunay nga may masuk-anong mga pulong ug nasakitan nga mga pagbati, ug ang mga bata kanunay nga gisaput ug dili magpuyo panahon sa service. Labi pa nga adunay balaang pagtahud ang pamilya nga nangandam nang daan sa layo pa ang mga miting, nga moabut sa chapel nga mag-una sa dili pa mosugod ang miting, ug magtupad sa paglingkod aron maminaw sa musika sa dili pa magsugod ug biyaan sa ilang mga hunahuna ang kalibutanon nga mga kabalaka.

Ang mga ginikanan nga adunay gagmay nga mga anak usahay maglisud sa pagtabang sa ilang gagmay nga mga bata nga malingaw sa mga miting ug pagpugong kanila sa paghimo og mga pangdisturbo. Ang paglahutay, kaligdong, ug pagpangandam diha sa panimalay maoy mahinungdanong mga elemento sa kalampusan. Kon maglibog sila kon unsaon sa pagdumala ang ilang mga anak diha sa simbahan, ang batan-on nga mga ginikanan mahimo nga mangayo og tambag sa may dako nga kasinatian nga managtiayon diha sa ward.

Sa kasagaran, sa dili pa ug sa pagkahuman sa mga miting, ang mga miyembro sa Simbahan magpundok diha sa chapel aron maghinangpanay. Ang uban nga morag wala tuyoa ang pagka walay pagtahud tungod lagi kay mahigalaon kita nga mga tawo ug nga ang Igpapahulay maoy sayon nga panahon sa pagbisita, sa pagpakigdait, ug sa pagpakig-ila-ila og bag-ong mga tawo. Ang mga ginikanan kinahanglan nga mohatag og ehemplo alang sa ilang mga pamilya pinaagi sa paghimo sa ilang pagbisita diha sa mga pasilyo o sa ubang mga dapit sa chapel sa dili pa o inig human sa mga miting. Human sa usa ka miting, ang mga ginikanan makahimo sa pagdala sa espirituhanon nga pagbati ngadto sa ilang panimalay pinaagi sa paghisgut diha sa panimalay og usa ka pamalandong, pagkanta, o ubang positibo nga hilisgutan sa miting uban sa ilang mga anak.¹¹

Ang atong ehemplo sa balaang pagtahud makahimo og gamhanan nga epekto sa uban.

Ato nang nahisgutan ang kamahinungdanon sa balaang pagtahud ug nasusi ang pipila ka mga kahulugan niini. Gitanyag usab namo ang pipila ka mga sugyot mahitungod sa pagpasiugda sa balaan nga pagtahud diha sa panimalay ug sa simbahan. Ang tinuod nga kalamboan sa mga buhat sa katawhan, bisan pa niana, moabut kon ang lokal nga mga lider ug mga pamilya maghiusa sa ilang mga paningkamot aron mabuntog ang ilang piho nga mga problema sa balaang pagtahud. Gilantaw na namo ang pagpaningkamot sa tibuok Simbahan aron mouswag ang balaan nga pagtahud.…

Ang tinuod nga balaang pagtahud usa ka mahinungdanon nga hiyas, apan nagkaanam na og kawala sa kalibutan samtang ang mga pwersa sa kadautan mipalapad sa mga impluwensya niini. Dili nato hingpit nga matugkad ang gahum sa kaayo nga atong gihimo kon ang minilyon nga mga miyembro sa tinuod nga simbahan ni Kristo moalagad isip mga modelo sa balaanon nga kinaiya. Dili nato mahunahuna ang dugang nga gidaghanon sa mga kinabuhi nga atong matandog. Tingali mas labaw pa ka importante, dili nato makita ang mahinungdanon nga espirituhanong epekto sa atong kaugalingong mga pamilya kon mahimo kita nga mga matinahuron nga katawhan nga kita nasayud nga kita angay gayud nga mahimo.¹²

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Ribyuha ang mga ehemplo sa balaang pagtahud diha sa pahina 193. Unsay gisugyot niining duha ka mga istorya mahitungod sa kahulugan sa pagka may balaang pagtahud? Unsay mga ehemplo sa balaang pagtahud nga namatikdan nimo sa imong kinabuhi? Unsay nakat-unan nimo niini nga mga kasinatian?
Ribyuha ang unang upat ka mga paragrap diha sa pahina 194–195, sa pagpangita sa mga pagtulun-an ni Presidente Kimball mahitungod sa unsa ang balaang pagtahud ug unsa ang dili balaang pagtahud. Nganong kinahanglan nga ang mga Santos sa Ulahing mga Adlaw mao man ang “may pinakabalaang pagtahud nga mga tawo sa tibuok kalibutan”?
Unsa sa inyong hunahuna ang atong tubag kon makadungog kita og usa ka tawo nga mopasipala sa ngalan sa Ginoo? Unsay nakat-unan ninyo sa ehemplo ni Presidente Kimball? (Tan-awa sa pahina 195.) Unsay atong buhaton aron tahuron ang ngalan sa Ginoo?
Ribyuha ang mga pahina 196–197, sa pagpangita alang sa may balaang pagtahud nga mga buhat ug mga kinaiya ug sa walay balaang pagtahud nga mga buhat ug mga kinaiya. Sa unsa kaha nga mga paagi nga ang samang mga buhat ug mga kinaiya personal nga makaimpluwensya kanato? Sa unsa kaha nga paagi kini makaimpluwensya sa atong mga pamilya ug sa uban? Hunahunaa kon unsay mabuhat ninyo ug sa inyong pamilya aron mahimong may balaang pagtahud diha sa Simbahan.
Unsa sa inyong hunahuna ang mabuhat sa mga ginikanan diha sa panimalay aron pagtabang sa ilang anak nga buot makabaton og balaang pagtahud sa sakrament miting? sa ubang mga miting sa Simbahan ug mga kalihokan? (Tan-awa ang mga ehemplo sa mga pahina 200–201.)
Tun-i ang katapusang duha ka mga paragrap diha sa hugna (pahina 203–204). Sa unsa kaha nga mga paagi nga ang napauswag nato nga balaang pagtahud makaimpluwensya sa atong mga pamilya? sa atong mga komunidad?

May Kalabutan nga mga Kasulatan: 1 Mga Hari 6:1, 7; Mateo 21:12–14; Alma 37:14–16; D&P 63:61–62, 64