Hugna 19

Pagpalig-on sa Atong mga Pamilya

Kinahanglan atong palig-unon ug protektahan ang atong mga pamilya pinaagi sa pagtudlo ug pagtuman sa ebanghelyo diha sa atong mga panimalay.

Gikan sa Kinabuhi ni Spencer W. Kimball

Si Presidente Spencer W. Kimball kasagaran mipasabut og maayo sa panginahanglan sa pagpalig-on sa mga pamilya pinaagi sa pagsunod sa ebanghelyo diha sa panimalay. Naghulagway sa iyang kaugalingong mga kasinatian, miingon siya: “Isip usa ka batan-on, ug uban sa akong asawa ug mga anak sa among kaugalingong panimalay, nakahinumdom ako sa among ganahan nga mga kalihokan sa pamilya. Ang langit anaa sa among panimalay. Kon ang usa ka sakop mobuhat og usa ka butang, mokanta man, mopasiugda og dula, mo-recite sa artikulo sa hugot nga pagtuo, mosaysay og istorya, mopaambit og talento, o mohimo og buluhaton, dihay pagtubo ug nindot nga pagbati.”¹

Si Presidente Kimball ug ang iyang asawa, nga si Camilla, mipalig-on sa ilang mga anak pinaagi sa pagtudlo ug pagdasig kanila ug dayon motugot kanila nga magbaton og responsibilidad sa ilang kaugalingong mga pagpili. Ang ilang anak nga babaye, nga si Olive Beth, nahinumdom nga sila “gigiyahan imbis nga pugson kami ngadto sa mga dalan nga gusto nilang among adtoan.”²

Si Presidente ug si Sister Kimball mipakita og dakong gugma sa matag usa sa ilang mga anak. Ang usa ka anak nga lalaki, nga si Edward, miingon: “Ang akong amahan kanunay nga mahigugmaon kaayo. Nasayud ako nga ako gipangga niya.” Si Edward nahinumdom sa iyang usa ka kasinatian sa dihang mitambong siya sa solemno nga panagtigum sa Templo sa Salt Lake: “Dihay liboan ka mga lalaki didto. Sa dihang ang miting nahuman, [ang akong amahan] nakakita kanako diin ako nagkanta sa chorus. Sa iyang paggawas, miduol siya, migakos ug mihalok kanako.”³

Mga Pagtulun-an ni Spencer W. Kimball

Ang pamilya maoy sentro sa plano sa atong Amahan ug mao ang pundasyon sa katilingban.

Ang kinabuhi sa pamilya mao ang pinakamaayong paagi sa pagkab-ot og kalipay niini nga kalibutan, ug kini mao ang klaro nga sumbanan nga gihatag kanato gikan sa Ginoo kon unsa ang kahimtang sa sunod nga kalibutan.⁴

Ang Ginoo mi-organisar sa tibuok plano sa sinugdanan uban sa usa ka amahan kinsa mopasanay, mohatag, ug mohigugma ug mogiya, ug usa ka inahan nga momabdos ug manganak ug moamuma ug mopakaon ug mobansay. Ang Ginoo mahimo untang mo-organisar niini sa laing paagi pero mipili nga adunay yunit nga may responsibilidad ug mga asosasyon nga adunay katuyoan diin ang mga bata mabansay ug madisiplina sa usag usa ug mahigugma, magpasidungog, ug magpasalamat sa usag usa. Ang pamilya maoy usa ka mahinungdanong plano sa kinabuhi ingon sa giplano ug gi-organisar pinaagi sa atong Amahan sa langit.⁵

Ang pamilya mao ang sukaranang yunit sa gingharian sa Dios dinhi sa yuta. Ang Simbahan walay kalig-on kon walay lig-on nga mga pamilya.⁶

Gikan sa sinugdanan, Ang Simbahan ni Jesukristo sa mga Santos sa Ulahing mga Adlaw mihatag og gibug-aton sa kinabuhi sa pamilya. Kanunay natong nasabtan ang mga pundasyon sa pamilya, isip usa ka mahangturong yunit, gihan-ay nang daan sa wala pa kini nga yuta malalang! Ang katilingban kon wala ang sukaranang kinabuhi sa pamilya walay pundasyon ug mahanaw ngadto sa pagkawalay nada.…

Sa tanang tawo, kita … dili gayud unta magpadala sa sayop nga mga argumento nga ang yunit sa pamilya nahigot sa usa lamang ka klase sa paglambo nga nasinati sa tawhanong katilingban. Gawasnon kitang mosalikway nianang mga kalihokan nga nagtuis sa kamahinungdanon sa pamilya ug mohatag og gibug-aton sa kamahinungdanon sa hinakog nga panag-iyahay. Nasayud kita nga ang pamilya mahimong mahangturon. Nasayud kita nga kon dunay problema ang usa ka pamilya, maproblema gayud ang tanang institusyon sa katilingban.…

Ang atong pulitikanhong mga institusyon … dili makatabang kanato kon ang atong sukaranang institusyon, ang pamilya, wala magkahiusa. Ang mga kasabutan sa kalinaw dili makaluwas kanato kon adunay panag-away imbis nga gugma ang anaa sa panimalay. Ang mga programa sa kawalay trabaho dili makatabang kanato kon daghan ang wala na matudloi kon unsaon pagtrabaho o walay oportunidad sa pagtrabaho o ang kahilig, sa ubang bahin, sa pagbuhat sa ingon. Ang tigpahamtang sa balaod dili makabantay kanato kon daghan kaayong mga tawo ang dili uyon sa pagdisiplina sa ilang mga kaugalingon o magpadisiplina.⁷

Wala kita’y kapilian … kon dili ang paghupot sa mithi sa mga Santos sa Ulahing mga Adlaw nga pamilya. Ang kamatuoran nga ang uban karon walay kahigayunan sa pagpuyo sa ingon niana nga pamilya dili igong rason sa paghunong sa paghisgot niini. Hisgutan nato ang kinabuhi sa pamilya uban sa pagkamabination, bisan pa man, sa kasayuran nga daghan … ang walay kahigayunan karon nga masakop o maapil sa ingon niana nga pamilya. Pero dili nato masalikway kini nga sumbanan, tungod kay daghang laing mga butang ang nagdepende niini.⁸

Ang mga ginikanan kinahanglan nga mohimo og mga tigumanan sa espirituhanong kalig-on aron makaabag sa ilang mga anak sa mga kasinatian sa kinabuhi.

Sa atong mga kinabuhi adunay daghang mga matang sa tigumanan. Ang ubang tigumanan alang sa pagtigum og tubig. Ang uban tigumanan og pagkaon, sama sa atong gihimo sa atong family welfare program ug sama sa gihimo ni Jose sa Ehipto sa panahon sa pito ka tuig sa kabuhong. Kinahanglan usab nga adunay mga tigumanan sa kahibalo aron pagtagbaw sa umaabut nga panginahanglan; mga tigumanan sa kaisug aron sa pagbuntog sa mga baha sa kahadlok nga mobutang og walay kasiguroan nga kinabuhi; mga tigumanan sa pisikal nga kalig-on aron sa pagtabang kanato nga makasagubang sa kanunayng mga kabug-at sa trabaho ug sa mga sakit; mga tigumanan sa kaayo; mga tigumanan sa kusog; mga tigumanan sa hugot nga pagtuo. Oo, ilabi na ang tigumanan sa pagtuo aron kon ang kalibutan moduot kanato, mobarug kita nga lig-on ug kusgan; kon ang mga tentasyon sa nagkadunot nga kalibutan nga naglibut kanato mokuha sa atong mga kalagsik, mokutkot sa atong espirituhanong kabaskog, ug motinguha sa pagbira kanato paubos, kita nanginahanglan sa tinigum nga hugot nga pagtuo nga makadala sa mga batan-on ug sa kaulahian sa pagkahamtong ibabaw sa kalaay, sa kalisud, sa makalilisang nga mga higayon, pagkasagmuyo, mga paglingla, ug mga tuig sa pagsulay, panginahanglan, kalibug, ug kapakyas.…

Mapasalamaton ako sa akong mga ginikanan, kay sila naghimo og mga tigumanan alang sa akong mga igsoon ug kanako. Ang mga tigumanan gipuno uban sa mga kinaiya sa pag-ampo, pagtuon, mga kalihokan, tinuod nga mga pagserbisyo, ug kamatuoran ug pagkamatarung. Kada buntag ug kada gabii mangluhod kami sa among mga lingkuranan kilid sa lamesa ug magpulihay sa pag-ampo. Sa dihang naminyo ako, ang kinaiya nagpadayon, ug ang among bag-ong pamilya nagpadayon sa maong gimbuhaton.⁹

Ang kinabuhi sa panimalay, husto nga pagtudlo diha sa panimalay, paggiya sa ginikanan ug pagpangulo––kini mao ang tambal sa mga sakit sa kalibutan ug sa mga anak niini. Kini mao ang tambal sa espirituhanon ug emosyonal nga mga sakit ug tambal sa mga problema niini. Kinahanglang dili ihatag sa mga ginikanan ang pagtudlo sa mga anak ngadto sa uban.

Daw dunay nagtubo nga kahilig sa pagbalhin niini nga responsibilidad gikan sa panimalay ngadto sa gawas nga mga impluwensya sama sa eskwelahan ug sa simbahan, ug sa mas dakong kahingawa, ngadto sa lainlaing ahensya ug mga institusyon nga moatiman sa mga bata. Mahimong ingon niana ka importante ang mga panggawas nga mga impluwensya, dili gayud kini paigo nga mopuli sa impluwensya sa inahan ug sa amahan. Ang kanunayng pagtudlo, kanunayng pagmabinantayon, pagpakig-uban, ug pagkamagbalantay sa atong kaugalingong mga anak gikinahanglan aron sa pagpabilin sa atong mga panimalay nga maghiusa ug mopanalangin sa atong mga anak subay sa pamaagi sa Ginoo.¹⁰

Ang mga auxiliary sa Simbahan importante kaayo, ug kita kinahanglang moambit sa tanang mga panalangin nga gitanyag niini. Pero dili gayud kita motugot nga mopuli kini sa mga ginikanan, sa pagpuli sa mga responsibilidad sa mga ginikanan sa pagtudlo sa ilang mga anak sa ebanghelyo ni Jesukristo.¹¹

Ang mga lider ug mga magtutudlo sa auxiliary sa kabatan-onan kinahanglan mangutana, sa unsang paagi ako makatabang niining mga kabatan-onan nga mohigugma ug mosunod sa ilang mga ginikanan, mopasidungog kanila, ug mosuporta sa mga responsibilidad sa pamilya? Unsaon nato pag-eskedyul sa mga miting, mga pagpraktis, ug mga kalihokan aron paglikay sa pagsamok sa mga relasyon ug mga responsibilidad sa panimalay, ug sa paghatag og panahon sa mga kalihokan sa pamilya?

Ang atong pasalig sa pagsunod sa ebanghelyo nga sentro sa panimalay kinahanglan mao ang klaro nga mensahe sa kada programa sa priesthood ug sa auxiliary, pagmenos, kon gikinahanglan, sa ubang kapilian nga mga kalihokan nga malagmit makapalinga sa hustong tumong sa pamilya ug sa panimalay.¹²

Pinaagi lamang sa hustong pagplano ug pahigayon sa atong kinabuhi sa pamilya nga kita makagiya sa atong mga anak ug magpabilin kanila nga luwas gikan sa mga laang nga modala sa pagpakasala ug pagkaguba, ug pagbutang kanila sa dalan sa kalipay ug kahimayaan. Niini, walay mas gamhanan kaysa ehemplo sa ilang kaugalingong mga ginikanan ug sa impluwensya sa ilang kinabuhi sa panimalay. Ang mga kinabuhi sa atong mga anak mahimong pareha sa ilang nakita sa ilang kaugalingong mga panimalay samtang nagtubo ngadto sa hingkod nga pagkalalaki ug sa hingkod nga pagkababaye. Busa kita kinahanglan mopahigayon sa atong dalan subay sa agianan diin gusto kita nga ang atong mga anak mosunod.¹³

Ang bata modala diha sa iyang kaugalingong kinabuhi kadaghanan sa nakita sa kinabuhi sa iyang pamilya diha sa panimalay. Kon siya makakita sa iyang nga ginikanan nga kanunay moadto sa templo, magsugod siya og plano sa kinabuhi sa templo. Kon tudloan siya sa pag-ampo alang sa mga misyonaryo, siya sa hinayhinay madani sa programa sa misyonaryo. Karon, kini simple kaayo, pero mao kini ang paagi sa kinabuhi. Ug mosaad kami kaninyo nga ang inyong mga anak modala kaninyo og dungog ug himaya samtang kamo mohatag kanila og husto nga ehemplo ug pagbansay.¹⁴

Nakakita ako usahay og mga anak sa maayong mga pamilya nga mirebelde, misalikway, nahisalaag, nakasala, ug gani mibatok gayud sa Dios. Niini sila nagdala og kagul-anan sa ilang mga ginikanan, kinsa mihimo kutob sa ilang mahimo … aron sa pagtudlo ug sa pagpuyo isip mga ehemplo. Pero kanunay usab akong makakita sa kadaghanan niining samang mga anak, human sa mga tuig sa paglatagaw, nabuotan, nakaamgo unsa ang nawala kanila, naghinulsol, ug nakahimo og dakong kontribusyon sa espirituhanong kinabuhi sa ilang komunidad. Nagtuo ko nga ang rason nga kini mahitabo mao nga, bisan sa tanang dautan nga mga hangin diin kini nga mga tawo naulipon, sila sa gihapon naimpluwensya pa, ug mas labaw pa silang nakaamgo, sa dagan sa kinabuhi sa mga panimalay diin sila gipadako. Kon, sa ulahing mga katuigan, mobati sila og tinguha sa pagtukod diha sa ilang kaugalingong mga pamilya ang samang kahimtang nga ilang natagamtan isip mga anak, sila malagmit mobalik ngadto sa hugot nga pagtuo nga naghatag og kahulugan sa mga kinabuhi sa ilang ginikanan.¹⁵

Mga amahan ug mga inahan, ang inyong labing unang responsibilidad mao ang inyong pamilya. Pinaagi sa pagtinabangay makabaton kamo og matang sa panimalay nga gilauman sa Ginoo nga kamo makaangkon. Pinaagi sa pagpakita og gugma ug pagsabut sa usag usa ug sa inyong mga anak, kamo makatukod og usa ka tigumanan sa espirituhanong kalig-on nga dili gayud mahutdan.¹⁶

Nagkinahanglan kita nga mopalig-on sa atong mga pamilya batok sa mga dautan nga naglibut kanato.

Ang panahon moabut nga kadto lamang kinsa motuo pag-ayo ug aktibo diha sa pamilya ang makapatunhay sa ilang mga pamilya taliwala sa pagpundok sa mga dautan nga naglibut kanato.¹⁷

Ang dautan nahibalo asa moatake. Moatake gayud siya sa panimalay. Moguba siya sa pamilya. Kana mao ang gusto niyang buhaton.… Modesider kita nga dili gayud kana siya makabuhat niini sa atong mga pamilya.¹⁸

Nagkinahanglang magpadayon kitang mopalig-on sa atong mga panimalay ug sa atong mga pamilya ug sa pagpanalipod kanila sa paghasmag sa mga dautan sama sa diborsyo, naguba nga mga pamilya, kabangis, ug abuso, ilabi na sa mga asawa ug sa mga anak. Nagkinahanglan kita nga kanunay nga magbantay batok sa imoralidad, pornograpiya, ug pagtugot sa sekswal nga kinaiya nga mahimong moguba sa kaputli sa mga miyembro sa pamilya, bata ug tigulang.…

… Makaplagan nato kining dautang mga kusog hapit bisan asa kita moadto. Anaa kini kanunay. Madala kini nato sa panimalay gikan sa eskwelahan, gikan sa dulaanan, gikan sa sinehan, sa opisina, ug sa merkado. Adunay pipila lamang ka mga lugar nga atong adtoan sa kada adlaw nga kalihokan diin makaikyas kita niini.

Nan unsa man ang atong katungdanan? Unsa ang kinahanglan natong buhaton? Kinahanglan kita kanunay nga magbantay niining dautang presensya diha sa atong mga panimalay ug gub-on kini pareha sa atong buhaton sa mga kagaw ug hugaw sa mga sakit. Kinahanglan ato silang pangitaon gikan sa mga tipiganan sa atong mga hunahuna, mopalingkawas sa atong mga kaugalingon sa maong pagkakalibutanon, mopalong sa mga nagbaga nga pagkadautan sa dili pa kini mahimong makadaot nga kalayo. Unsaon nato kini paghimo?

Kon buot kita nga molikay niadtong makalilisang nga mga tumong sa yawa ug mopabilin sa atong mga panimalay ug mga pamilya nga gawasnon ug mapalig-on pag-ayo batok sa tanang makaguba kaayong mga impluwensya nga naglibut kanato og maayo, kinahangalan kitang makabaton sa panabang sa mismong magtutukod ug tigpasiugda niining plano sa pamilya––ang Tiglalang mismo. Adunay usa lamang ka siguradong paagi ug kana pinaagi sa ebanghelyo ni Ginoong Jesukristo ug ang pagkamasulundon sa tulugkaron ug dinasig nga mga pagtulun-an. Sa tinuod kita kinahanglang makaamgo nga ang ilis sa usa ka pamilya nga ang panimalay gawasnon sa maong dautang mga impluwensya mao ang paghupot sa mga sugo sa Dios.¹⁹

Samtang ang mga ginikanan mobasa sa mga pamantalaan ug mga magasin ug makita unsa ang gustong itudlo sa kalibutan ngadto sa ilang mga anak, sila kinahanglang mahimong mas determinado nga ang ilang mga anak dili mamantsahan sa maong sala ug sayop. Ang mga ginikanan kinahanglang mosangkap gayud sa kinabuhi diha sa panimalay, sa disiplina, ug sa pagbansay nga maoy mobatok ug mosumpo sa dautan nga nagpadayong gihimo diha sa kalibutan. Samtang ang mga anak makakat-on sa dili maayong mga butang sa kalibutan, kinahanglan usab nga sila makakat-on sa maayong mga butang sa kalibutan ug sa husto nga mga pagtubag ug sa husto nga mga kinaiya.²⁰

Pipila kadto ka tuig ang milabay mibisita kami sa nasud nga lahi nga mga ideyolohiya ang gitudlo ug “makadaot nga mga doktrina” ang gitudlo kada adlaw sa mga eskwelahan ug sa gikontrolar sa gobyerno nga medya. Kada adlaw ang mga bata maminaw sa mga doktrina, mga pilosopiya, ug mga mithi nga gitudlo sa ilang mga magtutudlo.

Adunay usa ka tawo nga miingon nga “ang kanunay pagtulo sa tubig mopahumok sa pinakagahing bato.” Nasayud ako niini, busa nangutana ako kabahin sa mga bata: “Nagpabilin ba sila sa ilang hugot nga pagtuo? Wala ba sila madani sa kanunay nga pamugos sa ilang mga magtutudlo? Unsaon ninyo pagsiguro nga dili sila mobiya sa simpleng hugot nga pagtuo sa Dios?”

Ang tubag pareha ra sa pag-ingon “Moayo kami sa naguba nga mga tigumanan kada gabii. Motudlo kami sa among mga anak sa positibong pagkamatarung aron ang bakak nga mga pilosopiya dili maoy mokontrol. Ang among mga anak nagtubo sa hugot nga pagtuo ug pagkamatarung bisan pa sa kapig-ot nga mga pamugos gikan sa gawas.”

Bisan gani ang nagliki nga mga diki [dam] mahimong maayo ug magamit pa, ug ang mga sinakong balas makapugong sa pagbaha. Ug ang gisubli nga kamatuoran, gibag-ong pag-ampo, mga pagtulun-an sa ebanghelyo, pagpahayag og gugma, ug kaikag sa mga ginikanan mahimong makaluwas sa anak ug mopabilin kanila sa hustong dalan.²¹

Ang panimalay mao ang dapit diin ang pagka-espirituhanon kinahanglan itudlo ug amumahon.

Ang panimalay sa tinuod nga Santos sa Ulahing mga Adlaw maoy dangpanan batok sa mga unos ug mga pagpaninguha sa kinabuhi. Ang pagka-espirituhanon moabut ug maamumahan pinaagi sa adlaw-adlawng pag-ampo, pagtuon sa kasulatan, mga panaghisgot sa ebanghelyo sa panimalay ug may kalabutan nga mga kalihokan, mga home evening, mga family council, mag-uban sa trabaho ug panagdula, mag-alagad sa usag usa, ug makigbahin sa ebanghelyo uban niadtong naglibut kanato. Ang pagka-espirituhanon maamumahan usab diha sa atong mga aksyon sa pagkamapailubon, pagkabuotan, ug pagpasaylo sa usag usa ug sa atong pagsunod sa mga baruganan sa ebanghelyo diha sa pamilya. Ang panimalay mao ang dapit diin kita mahimong eksperto ug mga eskolar sa ebanghelyo sa pagkamatarung, magkat-on ug magpuyo nga maghiusa sa mga kamatuoran sa ebanghelyo.²²

Ang panimalay kinahanglan usa ka dapit diin ang pagsalig sa Ginoo maoy usa ka panaghiusang kasinatian, nga wala gigahin alang sa espesyal nga mga okasyon. Usa ka paagi sa paghimo niana mao ang usa ka kanunay, mainitong pag-ampo. Dili igo ang pag-ampo lang. Mahinungdanon gayud nga kita tinuoray nga makigsulti sa Ginoo, magbaton og hugot nga pagtuo nga iyang ipadayag kanato isip mga ginikanan kon unsa ang gikinahanglan natong mahibaloan ug buhaton alang sa kaayohan sa atong mga pamilya.²³

Ang pagtuon sa kasulatan isip mga indibidwal ug isip pamilya maoy pinakamahinungdanon sa pagkat-on sa ebanghelyo. Ang kada adlaw nga pagbasa sa mga kasulatan ug panaghisgot niini dugay nang gisugyot isip usa ka gamhanang himan batok sa kaignorante ug sa mga tintasyon ni Satanas. Kini nga buluhaton mohatag og dakong kalipay ug motabang sa mga miyembro sa pamilya nga mahigugma sa Ginoo ug sa iyang pagkamaayo.

Mahitungod sa pagdumala sa atong mga pamilya, kita gitudloan sa husto nga ang konseho sa pamilya mao ang pinakaunang konseho sa Simbahan. Ubos sa direksyon sa amahan ug sa inahan, kinsa kinahanglan usab nga magtinambagay sa usag usa, ang mga konseho sa pamilya mahimong maghisgot sa mga kahimtang sa pamilya, maghisgot sa mga panalapi sa pamilya, maghimo og mga plano, ug magsuporta ug maglig-on sa mga miyembro sa pamilya.²⁴

Mahitungod sa atong mga home evenings, usa ka gabii nga anaa sa panimalay uban sa pamilya o usa ka gabii nga anaa sa ganahang lugar sa gawas uban sa inyong pamilya mosulbad lang og gamay sa panginahanglan sa home evening. Ang pinakaimportante mao ang pagtudlo sa mga bata sa paagi sa kinabuhi nga maoy pinakamahinungdanon. Ang pag-adto sa usa ka pasundayag o salo-salo nga magdungan, o mangisda, katunga lamang ang gitagbaw sa tinuod nga panginahanglan, apan ang pagpabilin sa panimalay ug ang pagtudlo sa mga bata sa ebanghelyo, sa mga kasulatan, ug sa gugma alang sa usag usa ug sa gugma alang sa ilang mga ginikanan mao ang pinakamahinungdanon.²⁵

Pinaagi sa pagpasalig sa atong mga kaugalingon sa paghimo og kanunay ug madasigong family home evening ug pinaagi sa maayo kaayong pagplano sa leksyon nianang gabhiona, kita nagtudlo og leksyon sa atong mga anak diin sila makahinumdom hangtud sa hangtud. Busa kon kita maghatag sa atong mga anak sa atong kaugalingong panahon, naghatag kita sa atong presensya, ang usa ka gasa nga kanunayng makita.²⁶

Gusto nakong itandi ang home evening, pag-ampo sa pamilya, ug ang ubang may kalabutan nga mga kalihokan sa Simbahan alang sa pagluwas sa pamilya, kon kini makugihon nga gipatuman, sama sa usa ka payong. Kon ang payong dili ablihon, mas gamay lang kini og labaw sa sungkod ug kini mohatag lamang og gamay nga proteksyon gikan sa mga unos sa kinaiyahan. Ingon man, ang mga plano nga hinatag sa Dios gamay lamang og bili gawas kon kini gamiton.

Ang payong kon ablihon og maayo makapainat sa sida nga panapton. Kon mobunok ang ulan, kini modahilig lang; kon ang snow mangatagak, kini modailus lang; kon ang bagtok nga snow moabut, kini mobanda lang; kon ang hangin mohuros, kini moliyok palayo sa payong. Ug sa samang paagi, kining espirituhanong payong moabug sa mga kaaway sa ka-ignorante, pagtuotuo, pagduda, apostasiya, imoralidad, ug ubang matang sa pagkawalay dios.

Kini akong giampo nga kita mobukhad sa atong espirituhanong payong alang sa proteksyon sa atong mga pamilya.²⁷

Kinahanglan atong higugmaon ang atong mga anak ingon nga ang Dios nahigugma kanato.

Ang Dios mao ang atong Amahan. Nahigugma siya kanato. Naningkamot gayud siya sa pagtudlo kanato, ug kinahanglan kitang mosunod sa Iyang ehemplo ug higumaon pag-ayo ang atong kaugalingong mga anak ug padak-on sila diha sa pagkamatarung.²⁸

Unsa na kaha kadugay nga nakugos ninyo ang inyong mga anak, bisag unsa pa ang ilang gidak-on, diha sa inyong mga bukton ug misulti kanila nga nahigugma kamo kanila ug nalipay nga mahimong maangkon ninyo sila sa kahangturan?²⁹

O, mga kaigsoonan, ang pamilya mahimong mahangturon! Ayaw itugot nga ang mga tintasyon sa karon makapalayo kaninyo gikan kanila! Kabalaan, kahangturan, ug pamilya–– magkuyog gayud kini, maghiusa, ug busa mao usab kita!³⁰

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Nagpasabut sa iyang kaugalingong kinabuhi sa pamilya, si Presidente Kimball mihandum, “Ang langit diha sa among panimalay” (pahina 253). Unsaon nato paghimo og langitnong kahimtang diha sa atong mga panimalay? Sa unsang mga paagi ang kinabuhi sa panimalay makaandam kanato alang sa walay katapusang kinabuhi?
Unsa ang ubang pinakamahinungdanong mga butang nga mahimo sa mga ginikanan aron makahatag og mga tigumanan sa espirituhanong kalig-on alang sa ilang mga anak? (Alang sa pipila ka mga ehemplo, tan-awa sa mga pahina 256–262.)
Unsa ang mga risgo sa mga ginikanan nga motugyan sa pagtudlo sa ilang mga anak ngadto sa uban? Unsa ang anaa nga mga kapanguhaan sa Simbahan nga makatabang sa mga ginikanan sa pagtudlo sa mga anak? Sa unsang mga paagi nga ang mga lider ug mga magtutudlo sa Simbahan makasuporta sa mga ginikanan? (Alang sa pipila ka mge ehemplo, tan-awa sa mga pahina 256–257.)
Hunahunaa ang tambag ni Presidente Kimball sa mga pahina 262–265. Unsay mga ebidensya nga inyong nakita nga ang pagampo sa pamilya, pamilya nga pagtuon sa kasulatan, mga family council, ug family home evening dako gayud og ikatabang?
Basaha ang katapusang paragrap sa pahina 253. Dayon hunahunaa ang pangutana ni Presidente Kimball sa pahina 265: “Unsa na kaha kadugay ninyo nakugos ang inyong mga anak, bisag unsa pa ang ilang gidak-on, diha sa inyong mga bukton ug misulti kanila nga nahigugma kamo kanila ug nalipay nga mahimong maangkon ninyo sila sa kahangturan?²⁹

May Kalabutan nga mga Kasulatan: Deuteronomio 6:3–7; 2 Nephi 25:26; Mosiah 4:14–15; D&P 68:25–28