Hugna 4

Ang Milagro sa Pagpasaylo

Pinaagi sa sinsero nga paghinulsol ug sa matubsanong gahum sa Manluluwas, atong masinati ang milagro sa pagpasaylo.

Gikan sa Kinabuhi ni Spencer W. Kimball

Si Presidente Spencer W. Kimball nagtudlo nga “ang paghinulsol mao gayud ang yawe sa mas maayo, mas malipayong kinabuhi. Kitang tanan nanginahanglan niini.”¹

Iya usab nga namatikdan nga ang “paglaum mao … ang dakong hinungdan sa paghinulsol, kay kon wala kini walay bisan usa nga mohimo sa malisud, padayon nga paningkamot nga gikinahanglan.” Sa paghulagway niini nga punto, misugilon siya og usa ka kasinatian sa pagtabang sa usa ka babaye kinsa miduol kaniya nga mibati og kasubo kabahin sa sala nga iyang nahimo. Miingon siya: “Nakahibalo ko sa akong nahimo. Gibasa nako ang mga kasulatan, ug nasayud ako sa mga sangputanan. Nasayud ako nga ako gisilutan ug dili na gayud mapasaylo, ug nganong sulayan ko pa man karon sa paghinulsol?”

Si Presidente Kimball mitubag: “Minahal kong sister, wala ka masayud sa kasulatan. Wala ka masayud sa gahum sa Dios ni sa iyang kaayo. Ikaw mahimo nga mapasaylo niining dautan kaayo nga sala, pero nagkinahanglan kini sa tinud-anay nga sinserong paghinulsol aron mahimo kini.”

Iya dayon nga gikutlo ngadto sa babaye ang daghang mga kasulatan mahitungod sa pagpasaylo nga makab-ot niadtong kinsa sinsero nga maghinulsol ug motuman sa mga kasugoan sa Dios. Sa pagpadayon sa pagpahimangno kaniya, nakita niya ang paglaum nga mipahigmata sa babaye hangtud nga siya namulong: “Salamat, salamat! Mituo ako kanimo. Maghinulsol gayud ako ug hugasan ang akong hugaw nga mga saput pinaagi sa dugo sa Kordero ug angkonon kana nga kapasayloan.”

Si Presidente Kimball nakahinumdom nga ang babaye sa kadugayan mibalik sa iyang opisina nga “usa na ka bag-ong binuhat— masanagon nga mata, nga adunay kagaan sa mga tunob, puno sa paglaum samtang siya namahayag kanako nga, sukad niadtong halandumong adlaw nga ang paglaum nahimong sama sa giya nga bitoon ug iya kining gihuptan, wala na gayud siya mousab [sa sala] ni magpaduol niini.”²

Mga Pagtulun-an ni Spencer W. Kimball

Ang milagro sa pagpasaylo nagdala og kalinaw ug motabang kanato nga maduol sa Dios.

Adunay mahimayaong milagro nga naghulat sa matag kalag kinsa andam nga magbag-o. Ang paghinulsol ug pagpasaylo makahimo og usa ka masanagon nga adlaw sa pinakangitngit nga kagabhion. Kon ang mga kalag matawo pag-usab, kon ang mga kinabuhi mabag-o—diha moabut ang talagsaong milagro nga mopanindot ug mopainit ug mobayaw. Kon ang espirituhanong kamatayon mihulga ug karon aduna nay pagpabalik sa kinabuhi, kon ang kinabuhi mopapahawa sa kamatayon—kon kini mahitabo mao kini ang milagro sa mga milagro. Ug kining talagsaon nga mga milagro dili gayud mohunong samtang aduna pay bisan usa ka tawo kinsa mogamit sa matubsanong gahum sa Manluluwas ug sa iya mismo nga maayong mga binuhatan nga maoy mopahinabo sa iyang pagpakatawo pag-usab. …

Ang lintunganay sa milagro sa pagpasaylo mao nga kini magdala og kalinaw sa kanhiay mabalak-on, dili makapahulay, mapakyason, siguro gihasol nga kalag. Sa masamok ug gubot nga kalibutan usa kini ka tinud-anay nga gasa nga dili mapalit.³

Dili sayon ang pag-angkon og kalinaw niining masamok nga kalibutan. Sa panginahanglan ang kalinaw usa ka personal nga kabutonon. … Makab-ot lamang kini pinaagi sa pag-angkon kanunay og mahinulsulon nga kinaiya, pagpangayog kapasayloan sa sala madako man ug magamay, ug padayon nga magpaduol sa Dios. Alang sa mga miyembro sa Simbahan mao kini ang unod sa ilang preparasyon, sa ilang pagkaandam nga mohimamat sa Manluluwas sa iyang pag-anhi. … Kinsa kadtong andam adunay malinawon nga kasingkasing. Sila mga umaambit sa panalangin nga gisaad sa Manluluwas ngadto sa iyang mga apostoles: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglang dili magkaguol ang inyong kasingkasing, ni magtalaw.” (Juan 14:27.)

[Usa sa mga katuyoan] sa Ang Simbahan ni Jesukristo sa mga Santos sa Ulahing mga Adlaw mao ang pagtawag sa katawhan bisan asang dapit sa paghinulsol. Kinsa kadtong maminaw sa tawag, mga miyembro sa Simbahan o dili, mahimong mag-aambit sa milagro sa kapasayloan. Ang Dios mopahid sa ilang mga mata sa mga luha sa kasakit, ug pagbasol, ug pagkahugno, ug kahadlok, ug kahasol. Pulihan sa kauga ang nabasa nga mga mata, ug mga pahiyum sa katagbawan maoy mopuli sa magul-anon, mabalak-ong panagway.

Makahuwas kaayo! Makahupay kaayo! Makalipay kaayo! Kadtong nabug-atan sa mga kalapasan ug mga kagul-anan ug mga sala mahimong mapasaylo ug malimpyohan ug mahimong tim-os kon sila mobalik ngadto sa ilang Ginoo, magkat-on kaniya, ug mosunod sa iyang mga kasugoan. Ug kitang tanan nga nagkinahanglang maghinulsol sa inadlaw-adlaw nga mga kasaypanan ug mga kahuyang mahimo usab nga makaambit niini nga milagro.⁴

Kitang tanan nanginahanglan sa paghinulsol.

“… Walay butang nga mahugaw nga makasulod sa gingharian sa Dios. …” (1 Ne. 15:34.) Ug usab, “… walay mahugaw nga butang nga makapuyo uban sa Dios. …” (1 Ne. 10:21.) Sa mga propeta ang pulong nga mahugaw niining bahina nangahulugan sa unsay buot ipasabut sa Dios. Alang sa tawo kini nga pulong mahimong may kalabutan sa gipasabut—sama pananglit sa usa ka gamayng patak sa buling nga dili makahugaw sa usa ka puti nga sinina o saput. Apan alang sa Dios kinsa mao ang kahingpitan, ang pagkalimpyo nagpasabut sa moral ug personal nga kalimpyo. Kon ubos pa niana, bisan usa lang ka ang-ang o lain pa, mao ang pagkadili limpyo ug sa ingon dili makapuyo uban sa Dios.

Kon dili pa tungod sa bulahang mga gasa sa paghinulsol ug pagpasaylo kini unta mahimong usa ka walay paglaum nga sitwasyon alang sa tawo, tungod kay walay bisan usa gawas lang sa Agalon ang nakapuyo sukad nga walay sala dinhi sa yuta.⁵

Wala gayuy usa ka adlaw sa kinabuhi sa tawo nga ang paghinulsol wala kinahanglana alang sa iyang kaayohan ug sa mahangturon nga pag-uswag.

Apan kon ang kadaghanan kanato maghunahuna na gani sa paghinulsol ato hinoong pamub-on ang atong mga panan-aw ug tan-awon nga maayo lang kini alang sa atong mga bana, sa atong mga asawa, sa atong mga ginikanan, sa atong mga anak, sa atong mga silingan, sa atong mga kahigalaan, sa kalibutan—kang bisan kinsa ug sa tanan nga walay labot ang atong kaugalingon. Sa susama nga paagi adunay nagdagsang, tingali wala batia, nga pagbati nga gidisenyo sa Ginoo ang paghinulsol alang lamang niadtong kinsa nakapatay o nanapaw [adultery] o nangawat o lain pang grabe nga mga krimen. Dili gayud ingon niana. Kon kita mapainubsanon ug matinguhaon sa pagpuyo sa ebanghelyo makahunahuna kita sa paghinulsol nga iaplay kini sa tanang mga butang nga atong gipanghimo sa kinabuhi, maespiritwal man o temporal. Ang paghinulsol alang sa tanang kalag kinsa wala pa makakab-ot sa kahingpitan.⁶

Ang paghinulsol mao ang yawe sa kapasayloan. Moabli kini sa pultahan sa kalipay ug kalinaw ug motudlo sa dalan padulong sa kaluwasan diha sa gingharian sa Dios. Ablihan niini ang espiritu sa pagkamapainubsanon diha sa kalag sa tawo ug himoon siyang mahinulsulon sa kasingkasing ug manunuton sa kabubut-on sa Dios.

“Ang sala mao ang kalapasan sa balaod” (1 Juan 3:4), ug niana nga kalapasan ang silot giandam ubos sa walay katapusan nga pamalaod. Ang matag normal nga indibidwal responsable sa mga sala nga iyang nahimo, ug ingon man manubag sa silot nga nagkapot sa mga gipangsupak nga balaod. Bisan pa man, ang kamatayon ni Kristo sa krus mitanyag kanato nga dili maapil sa walay katapusan nga silot alang sa daghang mga kasal-anan. Giantus Niya sa iyang kaugalingon ang silot alang sa mga sala sa kalibutan, uban sa pagsabut nga kinsa kadtong maghinulsol ug moduol kaniya mapasaylo sa ilang mga sala ug mahimong gawasnon sa silot.⁷

Ang pag-ila sa sala ug ang pagbati og diosnong kasubo maoy usa ka bahin sa tinud-anay nga paghinulsol.

Ang paghinulsol usa ka mabination ug manggiloy-on nga balaod. Layo ang kinutuban niini ug manggilabuton sa tanan. … Hinimo kini nga may daghang elemento, ang matag-usa dili mahimong magbulag aron ang paghinulsol makumpleto. …

Walay harianon nga dalan sa paghinulsol, walay pinalabi nga agianan sa kapasayloan. Matag tawo mosunod gayud sa sama nga paagi bisan siya adunahan o kabus, makinaadmanon o burong, taas o mubo, prinsipe o makililimos, hari o yano nga tawo. “Kay ang Dios walay pinalabi.” (Mga Taga-Roma. 2:11.) …

Sa dili pa lihukon ang daghang mga elemento sa paghinulsol aduna pay una nga lakang. Ang una nga lakang mao ang higayon diin ang nakasala makaamgo sa pag-ila sa iyang sala. Mao kini ang pagpahigmata, ang tinud-anay nga pagbati og kahasol [guilt]. Kon wala kini walay mahimong tinud-anay nga paghinulsol tungod kay walay gihimo nga pag-angkon sa sala. …

Kon kita nasayud sa gibug-aton sa atong sala, mahimo natong ikondisyon ang atong mga hunahuna sa pagsunod sa mga pamaagi dayon mapahilayo kita sa mga epekto sa sala. Si Alma misulay sa pagtudlo niini ngadto kang Corianton dihang miingon siya: “… Himoa nga ang imong mga sala mosamok kanimo, uban niana nga paghasol nga modala kanimo ngadto sa paghinulsol. … Ayaw paningkamot sa pagpamalibad sa imong kaugalingon sa kinagamyan nga bahin. …” (Alma 42:29–30.)⁸

Ang Espiritu Santo makahimo og importante nga papel sa pagkombinser sa makasasala sa iyang sayop. Motabang siya nga makit-an “ang kamatuoran sa tanang mga butang” (Moro. 10:5); sa pagtudlo sa tanang mga butang ug sa pagdala sa tanang mga butang sa iyang panumduman (Juan 14:26); ug pailhon ang kalibutan mahitungod sa sala (Juan 16:8).

Kasagaran ang mga tawo moingon nga naghinulsol na sila apan ang ila ra diay nga gihimo mao ang pagpakita og pagmahay sa usa ka sayop nga binuhatan. Pero ang tinuod nga paghinulsol gimarkahan pinaagi nianang diosnong kasubo nga makapausab, makapalahi, ug makaluwas. Ang pagpangayo og pasaylo dili igo. … Si Pablo miingon og sama niini ngadto sa mga santos nga taga-Corinto:

“Ug karon ako malipayon, dili tungod kay kamo nangaguol, kondili tungod kay kamo nangaguol uban sa kaguol nga nakapahinulsol kaninyo: kay kamo mibati man sa diosnon nga kasubo, busa wala diay kamo kapildihi tungod kanamo.

“Kay ang diosnon nga kasubo mosangpot sa paghinulsol nga mag-agak ngadto sa kaluwasan nga dili magahambin sa pagbasol: apan ang kasubo nga kalibutanon mosangpot sa kamatayon.” (2 Mga Taga-Cor. 7:9–10.)⁹

Sa matag pasaylo adunay kondisyon. Ang plaster kinahanglang mas lapad pa kay sa samad. Ang pagpuasa, ang mga pag-ampo, ang pagpaubos kinahanglang pareho o sobra pa kay sa sala. Kinahanglan adunay usa ka masulub-on nga kasingkasing ug usa ka mahinulsulon nga espiritu. Kinahanglan adunay “sako nga sapot ug mga abo.” Kinahanglan adunay mga luha ug tinud-anay nga pag-usab sa kasingkasing.¹⁰

Ang pagbiya sa sala naglakip sa pagbaton og bag-ong kinabuhi.

Tinuod, bisan ang tinud-anay nga pagbati og kahasol dili igo. Mahimong makalaglag kini ug makadaot kon dili pagaubanan sa mga paningkamot aron siya mahilayo sa pagbati nga sad-an. Ang kauban sa konbiksyon, dayon, mao ang dakong tinguha nga limpyohon ang pagbati og kahasol ug bayaran ang mga nangadaot tungod sa sayop.¹¹

Adunay usa ka malisud nga pagsulay sa paghinulsol. Mao kini ang pagbiya sa sala. Kana kon putlon sa usa ka tawo ang iyang sala uban sa matarung nga mga motibo—tungod sa nagtubo nga kahibalo sa gibug-aton sa sala ug ang pagkaandam nga motuman sa mga balaod sa Ginoo—siya tinud-anay nga naghinulsol. Kini nga kriterya gipahiluna sa Ginoo: “Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal niini ug mobiya niini.” (D&P 58:43. Mga italik gidugang.)

Sa laing pagkasulti, dili kana tinuod nga paghinulsol hangtud nga siya mobiya sa sayop nga dalan nga iyang giagian ug mosubay og bag-ong dalan. … Ang makaluwas nga gahum dili mahatag niadtong kinsa ganahan lang nga mausab ang kinabuhi. Ang tinud-anay nga paghinulsol moaghat sa usa ngadto sa pagbuhat.

Ang usa kinahanglang dili makalitan nga ang paningkamot gikinahanglan diay, ug dili lang puro tinguha. Human sa tanan, ang pagbuhat maoy mopalambo sa atong moral ingon man sa atong pisikal nga mga kaunuran [muscles].¹²

Sa pagbiya sa sala ang usa dili kay igo lang nga mangandoy sa mas maayo nga pagkabutang. Kinahanglang buhaton niya kini. Tingali gikinahanglan niya nga kasilagan ang nahugawan niyang kinabuhi ug batokan ang sala. Kinahanglan niyang siguraduhon nga dili lang biyaan ang sala pero iyang mausab ang mga sitwasyon nga naglibut sa sala. Kinahanglan niyang likayan ang mga lugar ug mga pagkabutang ug mga kahimtang diin ang sala nahitabo, kay kadto sila maoy daling makapabanhaw niadto nga sala. Kinahanglan niyang talikdan ang mga tawo kinsa uban kanila nahimo ang sala. Dili kinahanglang kayugotan ang mga tawo nga may kalabutan apan kinahanglan niyang likayan sila ug ang tanang may kalabutan sa sala. Kinahanglan niyang wagtangon ang tanang mga sulat, mga alahas, ug mga butang nga makapahinumdom kaniya sa “nangagi nang mga adlaw” ug sa “nangagi nang mga panahon.” Kinahanglan niyang kalimtan ang mga pinuyanan, numero sa telepono, mga tawo, mga lugar ug mga sitwasyon gikan sa makasasalang kagahapon, ug magbaton og bag-o nga kinabuhi. Kinahanglan niyang wagtangon ang tanan nga makapahigmata sa karaang panumduman.¹³

Sa pagbiya sa sala, sa pag-usab sa kinabuhi, sa pag-usab og mga personalidad, pag-umol og mga kinaiya o umulon kini pag-usab, atong gikinahanglan ang tabang sa Ginoo, ug makasiguro kita niini kon atong buhaton ang atong bahin. Ang tawo nga mosalig og maayo sa Ginoo mahimong tigdumala sa kaugalingon ug makatuman sa bisan unsa nga giplano niyang buhaton, bisan ang pagkuha sa mga tumbaga nga mga palid [brass plates], paghimo og barko, pagbuntog sa dili maayong kinaiya, o sa pagbuntog sa bug-at nga kalapasan.¹⁴

Ang pagkumpisal mopagaan sa mga kahasol.

Ang pagkumpisal sa sala usa sa kinahanglanong elemento sa paghinulsol ug sa ingon sa pag-angkon og kapasayloan. Usa kini sa mga pagsulay sa tinud-anay nga paghinulsol, kay, “Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal niini ug mosalikway niini.” (D&P 58:43. Mga italik gidugang.) …

Tingali ang pagkumpisal usa sa mga pinakalisud sa tanang mga babag nga buluhaton alang sa mahinulsulong makasasala. Ang iyang kaulaw kasagaran maoy mopugong kaniya sa pagpahibalo nga sad-an siya ug sa pagdawat sa iyang sayop. Usahay ang iyang kakulangan sa pagsalig sa mga tawo nga kasultihan sa iyang sala maoy mangatarungan sa iyang hunahuna nga itago kini nga kinandadohan sulod sa kaugalingon niyang kasingkasing. …

Kay nasayud sa mga kasingkasing sa katawhan, ug sa ilang mga intensyon, ug sa ilang mga katakus sa paghinulsol ug sa pag-bago sa ilang kaugalingon, ang Ginoo naghulat sa pagpasaylo hangtud nga ang paghinulsol igo na. Ang masalaypon kinahanglang adunay “masulub-on nga kasingkasing ug mahinulsulong espiritu” ug andam sa pagpaubos sa iyang kaugalingon ug sa pagbuhat sa tanan nga gikinahanglan. Ang pagkumpisal sa dagkong mga sala ngadto sa tukma nga awtoridad sa Simbahan maoy usa sa mga kinahanglanon nga gihimo sa Ginoo. Kining mga sala naglakip sa pagpanapaw, pakighilawas, lain pang sekswal nga mga kalapasan, ug uban pang mga sala nga susama ang gibugaton. Kini nga pamaagi sa pagkumpisal nagsiguro og tukma nga kontrol ug proteksyon sa Simbahan ug sa mga katawhan niini ug ibutang ang mga tiil sa malapason ngadto sa dalan sa tinuod nga paghinulsol.

Daghang mga malapason nga sa ilang kaulaw ug garbo mihupay sa ilang mga konsensya, bisan sa temporaryo lang, uban sa pipila ka mga pag-ampo sa hilum ngadto sa Ginoo ug mangatarungan nga igo na kadto nga pagkumpisal sa ilang mga sala. “Pero ako nang gikumpisal ang akong mga sala ngadto sa akong Langitnong Amahan,” moinsister sila, “ug mao ra kana ang tanang gikinahanglan.” Dili kini tinuod kon dagko nga sala ang nahimo. Dayon duha ka hut-ong sa pagpasaylo ang gikinahanglan nga magdala og kalinaw sa malapason—ang usa gikan sa tukma nga mga awtoridad sa Simbahan sa Ginoo, ug ang usa gikan sa Ginoo mismo. [Tan-awa sa Mosiah 26:29.] …

… Ang labing maayo nga pagkumpisal boluntaryo, dili pinugos. Kini nagagikan gayud sa sulod sa malapasong kalag, dili tungod kay nasakpan siyang nakasala. Ang ingon niana nga pagkumpisal … usa ka timailhan sa nagtubo nga paghinulsol. Nagpasabut kini sa konbiksyon sa makasasala sa iyang sala ug sa iyang tinguha nga biyaan ang dautang mga binuhatan. Ang boluntaryo nga pagkumpisal walay sukod nga mas dawaton sa panan-aw sa Ginoo kay sa napugos sa pag-angkon, kulang sa pagpaubos, napugos sa usa ka tawo pinaagi sa mga pangutana dihang naklaro nga sad-an. Ang ingon nianang napugos sa pag-angkon dili timailhan sa mapainubsanong kasingkasing nga manawag og kalooy sa Ginoo: “… Kay ako, ang Ginoo, mopasaylo sa mga sala, ug ako maloloyon niadto kinsa nagkumpisal sa ilang mga sala uban sa mapainubsanon nga kasingkasing.” (D&P 61:2. Mga italik gidugang.)¹⁵

Samtang ang dagkong mga sala sama niadtong unang nahisulat … nag-awhag sa pagkumpisal ngadto sa tukma nga mga awtoridad sa Simbahan, klaro nga ang ingon niana nga pagkumpisal dili kinahanglan ni angay nga buhaton alang sa tanang mga sala. Kadtong mga minus og gibug-aton pero nakapasilo sa uban— panagsumpaki sa managtiayon, ginagmayng tipak sa kasuko, panaglalis ug uban pang ingon niini—adto na ikumpisal sa tawo o mga tawo nga napasakitan ug ang hitabo husayon tali sa mga tawo nga adunay kalabutan, kasagaran dili na manginahanglan nga makahibalo ang awtoridad sa Simbahan.¹⁶

Ang pagkumpisal magdala og kalinaw. … Ang pagkumpisal dili lang kay itug-an ang mga sayop ngadto sa tukma nga awtoridad, apan pagbinahinay sa gibug-aton aron mogaan kini. Ang usa moalsa bisan gamayng bahin sa gibug-aton ug ibutang kini sa laing mga abaga nga makahimo ug andam nga motabang og pas-an sa gibug-aton. Dayon moabut ang katagbawan sa paghimo og laing lakang sa pagbuhat sa tanan kutob sa mahimo aron makalingkawas ang kaugalingon sa gibug-aton sa kalapasan.¹⁷

Ang pag-uli [restitution] maoy usa ka kinahanglanong bahin sa paghinulsol.

Kon ang usa ka tawo nakasinati sa dakong kaguol ug pagpaubos gumikan sa nahimo nga sala; kon iya nang napapas ang sala ug determinado gayud nga dumtan kini karon dayon; kon siya mapainubsanong mikumpisal sa iyang sala ngadto sa Dios ug ngadto sa tukma nga awtoridad sa yuta—kon kining tanan nahimo na aduna pay nahibiling kinahahanglanon nga mao ang pag-uli. Kinahanglan niyang ibalik kon unsa ang iyang giguba, gikawat, o gikasaypan.¹⁸

Ang mahinulsulong makasasala gikinahanglang mohimo sa paguli kutob sa mahimo. Miingon ko og “kutob sa mahimo” tungod kay adunay ubang mga sala diin walay igong pag-uli nga mahimo, ug ang uban niini dili tanang bahin ang mahimo nga iuli.

Ang usa ka kawatan o mangingilad tingali makahimo og uli sa ubang bahin [partial] sa iyang kinawat. Ang usa ka bakakon tingali makahimo sa pagsulti unsa ang matuod ug makorihian ang pipila ka bahin nga nangadaot resulta sa pagpamakak. Ang usa ka libakira nga makaguba sa dungog sa uban tingali mahimong mouli sa ubang bahin pinaagi sa matinguhaon nga paningkamot nga ibalik ang maayong pangalan sa tawo nga iyang gilibak. Kon pinaagi sa sala o pagkadili mabinantayon ang masalaypon nakaguba og butang sa uban, mahimong iyang ayohon o bayaran sa eksakto o ubang bahin niini.

Kon ang mga linihukan sa usa ka tawo nagdala og kagul-anan ug kaulawan sa iyang asawa ug sa mga anak, sa iya nga pag-uli [restitution] kinahanglan niyang buhaton ang tanang paningkamot nga mabalik ang ilang pagsalig ug gugma pinaagi sa pagpalabaw pa sa … debosyon ug pagkamatinud-anon. Kini tinuod usab sa mga asawa ug mga inahan. Sama usab kon ang mga anak makasala sa ilang mga ginikanan, ang usa ka bahin sa ilang … paghinulsol kinahanglan mao ang pagsakto sa mga sayop ug ang pagtahud sa ilang mga ginikanan.

Isip usa ka pamalaod adunay daghang mga butang diin ang mahinulsulon nga kalag makahimo ug mga kausaban. “Ang masulub-on nga kasingkasing ug mahinulsulon nga espiritu” sa kasagaran makapangita og mga paagi nga maka-uli [restore] kutob sa iyang mahimo. Ang tinuod nga espiritu sa paghinulsol nag-ingon nga kinsa kadtong nakapasakit mohimo sa tanan sa tibuok niyang kusog nga tarungon ang sayop.¹⁹

Sa proseso sa paghinulsol kinahanglan natong ibalik nga kompleto kutob sa mahimo, kondili ibalik kini kutob sa pinakadako nga mahimo sa pag-uli. Ug pinaagi niining tanan kinahanglan natong hinumduman nga ang nagpakilooy nga makasasala, nga nagtinguha nga mahimo ang pag-uli para sa iyang mga nahimo, kinahanglan usab nga mopasaylo sa uban sa tanang mga sala nga nahimo batok kaniya. Ang Ginoo dili mopasaylo kanato gawas lang kung ang atong mga kasingkasing hingpit nga mahinloan sa tanang kalagot, kapungot ug pasangil batok sa atong mga isigkatawo.²⁰

Ang tinuod nga paghinulsol naglakip sa pasalig nga tumanon ang mga kasugoan sa Ginoo.

Sa iyang pasiuna sa bag-o nga padayag, ang Ginoo milatid sa usa nga maoy pinakalisud nga kinahanglanon sa tinud-anay nga paghinulsol. Alang sa uban kini mao ang pinakalisud nga bahin sa paghinulsol, tungod kay naghimo kini sa usa nga magbantay gayud sa nahibiling panahon sa iyang kinabuhi. Ang Ginoo miingon:

“… Kay ako ang Ginoo dili makatan-aw diha sa sala uban sa labing gamay nga matang sa pagtugot;

“Bisan pa niana, siya nga maghinulsol ug mobuhat sa mga sugo sa Ginoo mapasaylo.” (D&P 1:31–32. Mga italik gidugang.)

Kini nga kasulatan ang pinakatukma. Una, ang usa maghinulsol. Sa paglatas niya niini siya dayon kinahanglan nga mosunod sa mga kasugoan sa Ginoo aron magpabilin ang iyang mas hataas nga katuyoan. Kini kinahanglanon aron sa pag-angkon og hingpit nga kapasayloan. …

Kay kitang tanan makasala man madako o magamay nga sala, kitang tanan nanginahanglan sa padayon nga paghinulsol, sa pagpalambo sa atong mga tumong ug sa atong mga nahimo. Ang tawo maglisud sa pagtuman sa mga kasugoan sa Ginoo sulod sa usa lamang ka adlaw, sa usa ka semana, sa usa ka bulan o sa usa ka tuig. Kini usa ka paningkamot nga kinahanglang ipadayon pa gayud hangtud sa nahibiling mga katuigan sa tawo. …

… Ang paghinulsol kinahanglang maglakip sa usa ka bug-os, kinatibuk-ang pagtugyan ngadto sa programa sa Ginoo. Dili hingpit ang paghinulsol niadtong malapason kinsa wala mohatag sa iyang ikapulo, mopalta sa mga miting, mosupak sa adlawng Igpapahulay, wala makabuhat sa ilang pag-ampo sa pamilya, wala mosuporta sa mga awtoridad sa Simbahan, mosupak sa Pulong sa Kaalam, wala mahigugma sa Ginoo ni sa iyang isigkatawo. … Ang Dios dili makapasaylo hangtud nga ang makasasala mopakita og usa ka tinud-anay nga paghinulsol nga molukop sa tanang dapit sa iyang kinabuhi. …

“Ang pagsunod sa mga kasugoan” naglakip sa daghang mga kalihokan nga gikinahanglan sa mga matinud-anon. … Ang pinakamaayo nga binuhatan ug debosyon inubanan sa makapalig-on nga mga kinaiya maoy gikinahanglan. Agig dugang, ang usa ka maayong paagi sa pagpugong sa mga epekto sa sala sa kinabuhi sa usa ka tawo mao ang pagdala sa kahayag sa ebanghelyo ngadto sa uban kinsa sa karon wala pa makatilaw niini. Kini nagpasabut sa pakig-alayon sa mga dili aktibo nga mga miyembro sa Simbahan ug sa mga dili miyembro—ang naulahi mao ang kasagaran. Hinumdumi kon giunsa sa Ginoo sa pagsaysay ang kalabutan sa pagpasaylo sa mga sala ngadto sa paghatag og pagpamatuod mahitungod sa buluhaton sa ulahing mga adlaw:

“Kay ako mopasaylo kaninyo sa inyong mga sala uban niini nga sugo—nga kamo magpabilin nga makanunayon diha sa inyong mga hunahuna sa kaligdong ug sa espiritu sa pag-ampo, diha sa pagpamatuod ngadto sa tibuok kalibutan niadto nga mga butang nga gipahayag nganha kaninyo.” (D&P 84:61. Mga italik gidugang.)²¹

Dili ba nato masabtan nganong ang Ginoo sulod sa liboan ka mga katuigan naghangyo kanato nga moduol ngadto kaniya? Tinuod gayud nga ang Ginoo namulong kabahin sa pagpasaylo pinaagi sa paghinulsol, ug ang kahupayan moabut gumikan sa labihang kahasol sa sala, sa dihang iyang gisunod ang mahimayaong pag-ampo ngadto sa iyang Amahan uban niining halangdong pangamuyo ug saad:

“Umari kamo kanako, kamong tanan nga nabudlay ug nabugatan, ug papahulayon ko kamo.

“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog kapahulayan alang sa inyong mga kalag.

“Kay masayon ang akong yugo, ug magaan ang akong luwan.” (Mateo. 11:28–30.)

Maoy akong panghinaut ug pag-ampo nga ang mga kalakin-an ug kababayen-an sa tanang dapit maminaw niining maaghup nga imbitasyon ug tugutan ang Magtutudlo nga mopadangat diha sa ilang indibidwal nga mga kinabuhi sa talagsaong milagro sa pagpasaylo.²²

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Si Presidente Kimball mitawag sa pagpasaylo og “ang milagro sa mga milagro” (pahina 43–45). Sa unsang mga paagi nga ang pagpasaylo usa ka milagro? (Alang sa pipila ka mga ehemplo, tan-awa sa mga pahina 42–45.)
Samtang imong basahon ang seksyon nga nagsugod sa pahina 45–46, hunahunaa unsa kahay atong kahimtang kon wala ang atong Manluluwas ug ang Iyang Pag-ula.
Basaha ang ikalima, ikaunom, ug ikapito nga mga paragrap sa pahina 47. Sa unsang mga paagi sa imong hunahuna nga ang “diosnong kasubo” lahi ra kaysa pagpadayag og pagmahay? Unsa man ang mga ehemplo sa kasulatan sa diosnong kasubo nga magamit nato karon?
Sa mga pahina 48–49 si Presidente Kimball mihatag ug mga ehemplo kon unsaon sa pagbiya sa sala ug sa “pagbaton og bago nga kinabuhi.” Unsaon man kaha nato sa paggamit kining tambag ngadto sa bisan unsang sala nga gisulayan nato sa pagbuntog—sama pananglit sa, pornograpiya, pagpasipala, o sugal?
Ribyuha ang mga pahina 49–52. Nganong ang uban maghunahuna nga ang pagkumpisal lisud kaayo? Unsang mga panalangin ang moabut gumikan sa pagkumpisal ngadto sa Ginoo? ngadto sa bishop o branch president? ngadto sa uban kinsa atong napasakitan?
Hunahunaa ang unang paragrap sa pahina 53–55. Unsa man ang gipasabut nga himoon ang pag-uli gumikan sa mga sala? Unsa may buhaton sa usa ka mahinulsulon nga tawo aron masayud unsay pinakamaayong buhaton aron mahimo ang pag-uli gumikan sa iyang mga sala?
Unsa may kalainan sa mga pagtulun-an ni Presidente Kimball niini nga hugna gikan sa sayop nga ideya nga ang paghinulsol mao ang pagpahigayon sa mga lista sa mga naandan nga mga buhatunon?

May Kalabutan nga mga Kasulatan: Isaias 1:18; Mosiah 4:3; Alma 36:12–26; D&P 19:15–20; 64:8–9