Hugna 13

Ang Pagkamasulundon nga Nagagikan sa Hugot nga Pagtuo sa Dios

Ang hugot nga pagtuo diha sa Ginoo makatabang kanato sa pagtuman sa mga kasugoan uban sa mauyonon nga kasingkasing ug makadawat og dili maihap nga mga panalangin.

Gikan sa Kinabuhi ni Spencer W. Kimball

Niadtong Marso 1972, sa dihang si Spencer W. Kimball pa ang Akting nga Presidente sa Korum sa Napulog Duha ka mga Apostoles, nakasinati siya og mga problema sa kasingkasing. Niadtong higayona, usa sa iyang mga doktor mao si Russell M. Nelson, nga sa kaulahian nahimong miyembro sa Korum sa Napulog Duha. Si Elder Nelson misugilon:

“Sa dihang nag-anam og kaluya ang kasingkasing ni Presidente Kimball ug nakamatikud siya nga duol na ang kamatayon, nakigkomperensya siya sa iyang mga lider sa Simbahan, ang Unang Kapangulohan. Aron paghatag og medikal nga kasayuran sigun sa gihangyo, iyang giimbitar ang iyang maunungon nga espisyalista sa kasingkasing [cardiologist], nga si Dr. Ernest L. Wilkinson, ug ako.

“Si Presidente Kimball naghingutas nga misugod, ‘Hapit na ako mamatay. Gibati ko nga nagkaupos na ang akong kinabuhi. Sa paglamay na karon sa sakit akong gituohan nga mabuhi na lamang ako og mga duha pa ka bulan. Karon buot ko nga ipahayag sa akong doktor ang iyang mga hunahuna.’

“Gikumpirmar usab dayon ni Dr. Wilkinson ang mga gibati ni Presidente Kimball, miingon nga wala gayuy pagkaayo ug ang kamatayon modangat sa dili madugay.

“Dayon si Presidente Kimball mitawag kanako isip usa ka heart surgeon ug nangutana, ‘Unsa ang ikatabang sa pag-opera?’

“Akong gipasabut nga sa pag-opera, kon buhaton kini, maglangkob og duha ka mga parte. Una, gikinahanglan nga ilisan ang aortic valve [ang magpugong sa dugo nga moagas gikan sa aorta balik sa kasingkasing]. Ikaduha, usa ka importante nga coronary artery nga may sampong kinahanglan nga buhaton uban sa bypass graft.

“Si Presidente Harold B. Lee sa Unang Kapangulohan nangutana dayon sa pinakamahinungdanon nga pangutana, ‘Unsa ang kakuyaw sa ingon nga pamaagi?’

“ ‘Wala ako masayud,’ mitubag ako. ‘Sa tawo nga nagpangidaron og setenta y siyete ang kuyaw bisan sa hain niini nga operasyon dako kaayo. Apan sa pagbuhat sa duha ngadto sa usa ka tawo kansang kasingkasing luya na modala kini sa hilabihan kalisud nga ang operasyon dili mahimong irekomendar. …’

“Ingon og kapoy nga mitubag si Presidente Kimball, ‘tigulang na ako ug andam na nga mamatay,’ si Presidente Lee misagbat. Mitindog siya ug gidukdok ang iyang kumo sa lamisa, ug miingon, uban sa iyang mapanagnaon nga gahum, ‘Spencer, natawag ikaw! Dili ka mamatay! Buhaton pa nimo ang tanang kinahanglan nga imong buhaton sa pag-atiman sa imong kaugalingon ug magpadayon sa pagpakabuhi.’

“Mitubag si Presidente Kimball, ‘Kon mao kana magpaopera ako.’

“Mipailawum siya sa makuti nga operasyon dili tungod kay gilauman nga luwas siya diha sa opinyon sa iyang medikal nga mga matatambag, apan tungod kay masulundon siya sa tambag sa Ginoo, nga gipahayag pinaagi sa mga lider sa Simbahan— bisan pa man sa personal nga kakuyaw.

“Ang resulta nahibaloan na kaayo. Napanalanginan siya nga mabuhi sa operasyon nga nakahunong sa paglamay sa iyang sakit.”¹

Pinaagi sa iyang ehemplo ug sa iyang tambag ngadto sa mga Santos, si Presidente Kimball nagtudlo nga mapanalanginan kita kon magpakita kita sa atong hugot nga pagtuo sa Dios pinaagi sa pagsunod sa Iyang kabubut-on.

Mga Pagtulun-an ni Spencer W. Kimball

Ang matuod nga hugot nga pagtuo nag-aghat kanato sa pagbuhat sa kabubut-on sa Dios.

Ang paggamit sa hugot nga pagtuo mao ang pagkaandam nga modawat bisan walay hingpit nga kamatuoran ug sa pagpadayon ug sa pagpahigayon sa mga buhat. “Patay ang pagtuo nga mahimulag sa binuhatan” [Santiago 2:26] ug ang patay nga pagtuo dili mogiya sa usa ka tawo nga mopadayon aron sa pagpahiangay sa kinabuhi o sa pagserbisyo nga maisugon. Ang tinuod nga hugot nga pagtuo nagtukmod sa usa ka tawo nga mopadayon sa usa ka makaayo ug mapahimuslan nga mga buhat nga ingon og nasayud siya sa hingpit.²

Mahimo nga ang usa ka tawo makapahimulos sa mga kaayohan sa mga milagro sa pisikal nga kalibutan bisan dili hingpit ang iyang kahibalo nga nagpahipi diha sa mga baruganan. Mahimo niyang himoon ang kangitngit ngadto sa kahayag pinaagi sa pagtuplok sa switch ug magbasa diha sa hilabihan ka ngitngit nga kagabhion. Dili na kinahanglan nga magmugna siya og elektrisidad, ni magbaton og kahibalo sa pagpanaud og wire sa panimalay. Apan kinahanglan gayud nga siya adunay igong pagtuo aron sa pagsiguro nga adunay mga suga ug pagtuo sa pagtuplok sa switch. Mahimo dayon nga makadawat siya sa kahayag. … Mahimo nga lisuon niya ang dial ug malingaw sa maanindot nga musika gikan sa layo bisan kon dili maghimo og radyo o hingpit nga makasabut sa mga paagi niini, apan ang panalangin dili gayud maiya gawas kon ikonektar niya ang iyang radyo sa kuryente, ug itumong ang dial sa hustong dapit. Sa sama nga paagi, ang usa ka tawo mahimo nga makadawat og espirituhanon nga mga panalangin ug mga pagpadayag, pinaagi sa paghimo og gikinahanglan nga mga paningkamot. Ang hugot nga pagtuo mao ang yawe nga mapakita pinaagi sa pag-ampo ug mga buhat.³

Mag-ampo kita alang sa kahayag, dayon magsugod og trabaho uban sa tanan natong mahimo ug sa atong mga basahon ug sa atong mga hunahuna ug pagkamatarung aron makakuha ug inspirasyon. Mangayo kita og kahanas sa paghukom, dayon gamiton ang tanan natong mga gahum aron sa pagbuhat sa maalamon nga paagi ug sa pagpalambo sa kaalam. Mag-ampo kita alang sa kalampusan sa atong trabaho ug dayon magtuon og maayo ug maningkamot uban sa tanan natong mahimo aron tabangan nga matubag ang atong mga pag-ampo. Kon mag-ampo kita alang sa kahimsog kinahanglan gayud nga sundon nato ang balaod sa kahimsog ug buhaton sa tanan natong gahum aron sa pagpatunhay sa atong mga lawas nga mahimsog ug malagsik. Mag-ampo kita alang sa panalipud ug dayon mohimo og igo nga panagana aron makalikay sa kakuyaw. Kinahanglan gayud nga magbuhat uban sa hugot nga pagtuo.⁴

Kinahanglan gayud nga adunay hugot nga pagtuo diha sa Dios nga moaghat sa mga tawo nga limpyohan ang ilang mga kinabuhi; sa paghikalimot sa ilang mga kaugalingon diha sa pagserbisyo sa ilang isigkatawo ug sa pagbuntog sa tanang mga kahuyang sa unod, usa ka hugot nga pagtuo nga modala sa hingpit nga paghinulsol, mapadayunon ug modala kanila ngadto sa pagbunyag, sa priesthood, ug mga ordinansa sa templo.⁵

Anhi makaplagi ang pagtulun-an sa ebanghelyo ni Jesukristo, nga makit-an lamang niadtong mga espirituhanon. Ubos sa matinabangon nga mga balaod sa ebanghelyo, ang kada usa—adunahan o kabus, maalamon o walay kaalam—giawhag nga unahon og pagsabut uban sa hugot nga pagtuo ug dayon, pinaagi sa paningkamot, mopakita nianang hugot nga pagtuo diha sa mas taas, dungganon nga kinabuhi.⁶

Ang pagsunod nga gibase sa hugot nga pagtuo dili sama sa buta nga pagsunod [blind obedience].

Nagbuhat kita og maalamon, makatabang nga pagkamasulundon kon kita boluntaryo, mapainubsanon, ug malipayon nga mosunod sa mga sugo sa atong Ginoo.⁷

Ang pagsunod! Ang pagpaminaw! Unsa ka lisud nga sugo! Kanunay kitang makadungog: “Walay usa nga makasulti kanako kon unsay akong isul-ob, unsay akong kan-on o imnon. Walay usa nga makapugong unsay akong buhaton sa mga adlawng Igpapahulay, sa akong mga kinitaan, ni sa bisan unsang paagi mopugong sa akong personal nga mga kagawasan! Buhaton nako kon unsay akong gusto! Dili ko mobuhat og sama sa buta nga pagsunod!”

Sama sa buta nga pagsunod! Unsa ka gamay sa ilang nasabtan! …

Kon ang mga tawo mosunod sa mga sugo sa usa ka tiglalang, dili kini sama sa buta nga pagsunod. Unsa ka lahi ang kahadlok sa usa ka sakop ngadto sa iyang malupigon nga hari ug sa maligdong, ang mauyunon nga pagsunod maoy ihatag sa usa ka tawo ngadto sa iyang Dios. Ang diktador ambisyoso, hakog, ug adunay tinagoan nga mga katuyoan. Ang kada sugo sa Dios matarung, kada panudlo may katuyoan, ug ang tanan alang sa kaayohan sa gidumala. Ang nahauna tingali sama sa buta nga pagsunod, apan ang naulahi piho nga pagsunod sa hugot nga pagtuo. …

Buta ba nga pagsunod kon ang usa ka tawo mituman sa pahimangno nga “Kusog nga Boltahe—Palayo” o kini ba pagsunod sa hugot nga pagtuo diha sa hunahuna sa mga eksperto kinsa nasayud sa kakuyaw?

Buta ba nga pagsunod kon ang nagsakay sa eroplano mohigut sa iyang seat belt sa pagkidlap sa pahibalo o pagsalig ba sa kasinatian ug kaalam niadtong kinsa labaw pa nga nasayud sa mga peligro ug mga kakuyaw?

Buta ba nga pagsunod kon ang gamay nga bata masadyaon nga molayat gikan sa lamesa ngadto sa kusgan nga mga bukton sa mapahiyumon nga amahan, o hingpit ba nga pagsalig diha sa usa ka mahigugmaong ginikanan nga mibati og kasiguro nga masalo niya ug kinsa nahigugma sa anak og labaw pa sa mismong kinabuhi? …

Buta nga pagtahud ba diay kon kita, uban sa atong may kinutuban nga salabutan, may kinutuban nga kahibalo, hinakog nga mga tinguha, tinago nga mga katuyoan, ug pisikal nga mga kahidlaw, modawat ug mosunod sa pag-agak ug mosunod sa mga sugo sa atong mahigugmaon nga Amahan nga … milalang og usa ka kalibutan alang kanato, nahigugma kanato ug nagplano og usa ka makaayo nga programa alang kanato, hingpit nga walay tinago nga katuyoan, kinsang pinakamahinungdanon nga kalipay ug himaya mao ang “pagpahinabo sa pagka-imortal ug sa kinabuhi nga dayon” alang sa tanan niyang mga anak? [Tan-awa sa Moises 1:39.]⁸

Dili ba kini sama sa buta nga pagsunod, bisan kon walay hingpit nga pagsabut, sa pagsunod sa usa ka Amahan nga mipamatuod sa iyang kaugalingon.⁹

Ang mga kasulatan naghatag og mga ehemplo sa pagkamasulundon nga nagagikan sa hugot nga pagtuo.

Ang atong matarung ug maalamon nga mga ginikanan, nga si Adan ug si Eva, mga panig-ingnan sa mga butang sa pagkamasulundon nga nagagikan sa ingon og bata nga may hugot nga pagtuo:

“… Ug si Adan nagmasulundon ngadto sa mga sugo sa Ginoo.

“Ug human sa daghan nga mga adlaw usa ka anghel sa Ginoo mipakita ngadto ni Adan nag-ingon: Ngano nga ikaw naghalad og mga sakripisyo ngadto sa Ginoo? Ug si Adan miingon ngadto kaniya: Wala ako masayud, gawas nga ang Ginoo misugo kanako.

“Ug unya ang anghel misulti, nag-ngon: Kini nga butang mao ang usa ka pagkasama sa sakripisyo sa Bugtong Anak sa Amahan, nga puno sa grasya ug kamatuoran.” (Moises 5:5–7.)

Sama sa buta nga pagsunod? Labing siguro nga dili. Nakaila sila ni Jehova, nakadungog sa iyang tingog, nag-uban kaniya didto sa Tanaman sa Eden, ug nasayud sa iyang kabuotan, kaangayan, ug salabutan. Ug sulod sa “daghang mga adlaw” giihaw nila ang nating karnero nga walay lama ug gihalad kini nga wala gani masayud og ngano, apan sa hingpit nga pagsalig nga dihay matarung nga katuyoan sa balaod ug ang rason ikabutyag sa dili madugay human sa pagtuman sa balaod.¹⁰

Si Pablo nga nakigsulti sa mga Hebreohanon miingon:

“Tungod sa pagtuo si Noe, sa napasidan-an siya sa Dios mahitungod sa mga hitabo nga wala pa makita, mitagad sa pasidaan ug iyang gibuhat ang arka alang sa pagluwas sa iyang panimalay.” (Mga Heb. 11:7.)

Tungod kay wala pay timailhan sa ulan ug baha. Ang iyang katawhan mibiaybiay kaniya ug mitawag kaniya og buang. Ang iyang pagsangyaw wala paminawa. Ang iyang mga pasidaan gihunahuna nga dili makatarunganon. Walay gibasihan, wala pa gayud sukad masayri nga ang baha motabon sa yuta. Unsa ka binuang ang pagtukod og arka diha sa uga nga yuta uban sa nagsidlak nga adlaw ug ang kinabuhi nagpadayon sa naandan! Apan wala nay panahon. Ang arka nahuman na. Ang baha miabut. Ang mga dili masulundon ug masinupakon nangalumos. Ang milagro sa arka misunod sa hugot nga pagtuo nga gipakita diha sa pagtukod.

Si Pablo misulti pag-usab:

“Tungod sa pagtuo si Sarah usab nakadawat pa ug gahum sa pagpanamkon bisan tuod siya lapas na sa panuigon alang niini, sanglit iya mang giisip nga kasaligan kadtong naghimo sa saad.” (Mga Heb. 11:11.) …

Kataw-anan kaayong isulti nga ang mga bata mahimong matawo sa nag-edad ug sobra sa gatusan ka tuig nga gani gidudahan una ni Sarah. Apan ang hugot nga pagtuo sa dungganon nga managtiayon mipasulabi, ug ang anak sa milagro natawo aron mahimong amahan sa daghang kanasuran.

Hilabihan ka hugot nga pagtuo ang gipakita ni Abraham sa dihang labaw pa sa tawhanong gahum nga pagsulay ang gihatag kaniya. Ang batan-on niyang “anak sa saad,” nga gitagana nang daan nga mahimong amahan sa mga gingharian, kinahanglan gayud karon nga ihalad diha sa altar sa sakripisyo. Sugo kini sa Dios, apan mao ra og sukwahi kaayo! Sa unsang paagi nga ang iyang anak nga si Isaac, mahimong amahan sa dili maihap nga kaliwatan kon sa iyang kabatan-on ang iyang mortal nga kinabuhi pagatapuson? Ngano man gayud nga siya, si Abraham, gisugo man aron sa paghimo niining mangil-ad nga buhat? Lisud hunahunaon, imposible! Apan sa gihapon mituo siya sa Dios. Ang dili matarug niyang hugot nga pagtuo midala kaniya nga may masulub-on nga kasingkasing paingon sa yuta sa Moriah kuyog niining batan-ong anak nga lalaki. …

“Diha kaniya wala ang kakulang sa pagtuo nga arang makapahimo kaniya nga maduhaduhaon sa saad sa Dios, hinonoa sa naghimaya siya sa Dios mitubo siya nga malig-on sa iyang pagtuo;

“Masaligon sa hingpit nga ang Dios arang makatuman sa iyang saad.” (Mga Taga-Roma 4:20–21.)

Si Amahang Abraham ug si Inahang Sarah nasayud—nasayud nga ang saad pagatumanon. Unsaon—wala sila masayud ug wala magpakisayud. Sa walay duhaduha si Isaac mabuhi gayud aron mahimo nga amahan sa dili maihap nga kaliwatan. Nasayud sila nga mahimo siya, bisan kon gikinahanglan nga siya mamatay. Nasayud sila nga mahimo gihapon nga banhawon siya gikan sa mga patay aron matuman ang saad, ug dinhi ang hugot nga pagtuo maoy mag-una sa milagro.¹¹

Hinumdumi nga sila si Abraham, Moises, Elijah, ug ang uban dili klaro nga makakita sa katapusan gikan sa sinugdanan. Sila … naglakaw pinaagi sa hugot nga pagtuo ug walay panan-awon. Hinumdumi usab nga walay mga ganghaan nga abli, si Laban wala mahubog, ug walay yutan-on nga paglaum ang gipahiangay nianang higayona sa paggamit ni Nephi sa iyang hugot nga pagtuo ug sa kaulahian milakaw aron pagkuha sa mga palid. Walay dili madutlan sa kalayo nga biste o ubang ordinaryo nga himan sa panalipud ang diha sa nagdilaab nga hudno aron sa pagpanalipud sa tulo ka mga Hebreohanon sa kamatayon; walay panit ni metal nga bangil alang sa mga ba-ba sa mga leon sa dihang gitanggong si Daniel didto sa langub. …

… Hinumdumi nga walay mga lungsod ug mga siyudad, walay mga umahan ug mga tanaman, walay mga panimalay ug balay tipiganan, walay namuswak nga disyerto didto sa Utah sa dihang milabang sa kapatagan ang gipanggukod nga mga pioneer. Ug hinumdumi nga walay langitnong mga binuhat didto sa Palmyra, sa Susquehanna o sa Cumorah sa dihang ang matinguhaon sa espirituhanong kahibalo nga si Joseph hilum nga misulod sulod sa Kakahoyan, miluhod sa pag-ampo sa daplin sa suba, ug mitungas sa bakilid sa sagrado nga bungtod.¹²

Ang hugot nga pagtuo maoy mag-una sa milagro.

Diha sa hugot nga pagtuo atong itisok ang liso, ug dayon atong makita ang milagro sa pagpamuswak. Ang mga tawo sa kasagaran masayop sa pagsabut ug balihon ang pamaagi. Unahon una nila ang pag-ani sa dili pa motanum, ang ganti sa wala pa ang serbisyo, ang milagro sa wala pa ang hugot nga pagtuo. … Kadaghanan kanato gustong maangkon ang kalagsik nga walay paghunahuna sa mga pamalaod sa kahimsog, mangayo og panalangin sa langit nga walay pagbayad sa ikapulo. Makigsulti kita sa atong Amahan nga walay pagpuasa ug pag-ampo; mangayo kita og ulan sa tukma nga panahon ug kalinaw diha sa yuta nga walay pagtahud sa Igpapahulay ug sa pagsunod sa ubang mga sugo sa Ginoo. Kutloon una nato ang rosas sa dili pa itanum ang mga gamot, buot kitang moani una sa lugas sa dili pa motanum ug mobugwal.

Kon makaamgo unta kita sama sa gisulat ni Moroni:

“Kay kon wala ang hugot nga pagtuo taliwala sa mga katawhan ang Dios dili makahimo og milagro taliwala kanila. …

“Ug ni sa bisan unsa nga panahon adunay nakahimo og mga milagro hangtud human sa ilang hugot nga pagtuo; busa sila mituo una diha sa Anak sa Dios.” (Ether 12:12, 18.)¹³

Kon makabuhat kita karon pinaagi sa hugot nga pagtuo, kon motuo kita sa kabuhong nga gisaad sa Dios, kon makasunod kita ug maghulat nga mapailubon, tumanon sa Ginoo ang tanan niyang buhong nga mga saad kanato:

“… Ang wala makita sa mata, ni madungog sa dunggan ni mosantop sa kasingkasing sa tawo, ang gikatagana sa Dios alang kanila nga nahigugma kaniya.” (1 Mga Taga-Cor. 2:9.)¹⁴

Nagkinahanglan gayud og hugot nga pagtuo aron mobayad sa ikapulo kon ang kwarta nihit ug ang gikinahanglan daghan. Nagkinahanglan og hugot nga pagtuo aron magpuasa ug mohimo og pamilya nga mga pag-ampo ug motuman sa Pulong sa Kaalam. Nagkinahanglan og hugot nga pagtuo aron sa pag-home teaching, [miyembro] nga misyonaryong buhat, ug ubang serbisyo, kon gikinahanglan ang pagsakripisyo. Nagkinahanglan og hugot nga pagtuo aron pagtuman sa full-time nga misyon. Apan hibaloi kini—nga kining tanan mao ang pagtanum, samtang ang matinud-anon, matinguhaon nga mga pamilya, espirituhanon nga kasiguroan, kalinaw ug kinabuhing dayon mao ang maani. …

… Maingon man nga ang walay kahadlok nga hugot nga pagtuo mipahunong sa mga ba-ba sa mga leon, nakahimo nga walay epekto ang nagdilaab nga mga siga sa kalayo, miabli sa uga nga mga agianan lahus sa mga suba ug mga dagat, mipanalipod batok sa lunop ug huwaw, ug nagdalag langitnong mga pagpakita pinaagi sa mga propeta, mao nga ang matag usa sa atong kinabuhi ang hugot nga pagtuo makaayo sa masakiton, modala og kahupayan niadtong nagbangutan, molig-on sa paninguha batok sa pagtintal, makalingkawas gikan sa pagkaulipon sa makadaut nga pamatasan, makadawat og kalig-on sa paghinulsol ug pag-usab sa atong mga kinabuhi, ug mogiya ngadto sa usa ka siguro nga kahibalo sa kabalaanon ni Jesukristo. Ang dili mabuntog nga pagtuo makatabang kanato nga mosunod sa mga sugo uban sa mauyonon nga kasingkasing ug sa ingon magdala og dili maihap nga mga panalangin, uban sa kalinaw, pagkahingpit, ug kahimayaan didto sa gingharian sa Dios.¹⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Tan-awa ang ulohan niini nga hugna. Ngano nga ang pagkamasulundon usa ka buhat sa hugot nga pagtuo?
Basaha ang kabahin sa desisyon nga kinahanglang buhaton ni Presidente Kimball niadtong Marso 1972 (mga pahina 169–170). Unsa nga mga baruganan sa ebanghelyo sa inyong hunahuna ang magamit kon nag-atubang kita sa malisud nga mga desisyon?
Samtang nagbasa ikaw sa pagtandi ni Presidente Kimball tali sa “sama sa buta nga pagsunod” ug “hugot nga pagtuo nga pagsunod,” unsa nga mga kalainan ang inyong nakita? (Tan-awa sa mga pahina 174–175.) Unsay atong nahibaloan kabahin sa Langitnong Amahan nga makatabang kanato nga mosunod Kaniya sa “boluntaryo, mapainubsanon, ug malipayon nga paagi”? Unsa kaha ang inyong ikasulti ngadto sa tawo nga nagingon nga ang mga miyembro sa Simbahan sama sa buta nga nagsunod sa ilang mga lider?
Ribyuha ang mga istorya sa kasulatan diha sa mga pahina 175–178. Unsa ang mga butang nga komon nga anaa sa mga tawo niining mga istorya? Unsay mga butang diha kanila nga anaa kanimo? Unsay imong nakat-unan gikan kanila?
Kanus-a ikaw makakita sa hugot nga pagtuo nga nag-una sa milagro? (Alang sa pipila ka mga ehemplo, tan-awa sa mga pahina 178–179.) Sa unsa nga paagi kita makatudlo sa atong mga pamilya nga ang hugot nga pagtuo mag-una sa milagro?

May Kalabutan nga mga Kasulatan: Josue 22:5; Santiago 2:14–26; Ether 12:4–21; Moroni 7:33; D&P 130:20–21