Hugna 18

Dungganon, Malipayon, Malampuson nga Kaminyoon

Ang minyo nga mga magtiayon makatagamtam og panag-uyon ug walay katapusang relasyon kon sila magpabilin nga matinud-anon sa Ginoo ug sa usag usa.

Gikan sa Kinabuhi ni Spencer W. Kimball

Sa wala pa ang iyang tawag sa Korum sa Napulog Duha ka mga Apostoles, si Spencer W. Kimball maoy usa sa mga tag-iya sa kompaniya sa insurance ug realty sa Safford, Arizona. Usa sa iyang mga empleyada, nga mao si Carmen Richardson Smith, nahinumdom sa pagkamatinud-anon ni Spencer ug ni Camilla Kimball sa dihang ang ilang anak nga lalaki nga si Edward nasakit og polio niadtong 1930:

“Ang relasyon tali ni Brother Kimball ug sa iyang asawa maoy usa ka butang nga akong gidayeg pag-ayo. Dihang si Eddie didto sa California, alang sa dugang nga pagtambal, si Sister Kimball nagpabilin didto uban kaniya ug si Presidente Kimball mobiyahe didto sa delikado nga mga higayon. Sa mga panahon sa pagpakaayo gikan sa pag-opera ni Eddie, si Brother Kimball mouli sa balay aron pag-atiman sa nahabiling pamilya, samtang ang iyang asawa nagpabilin uban ni Eddie.

“Nagtuo ko nga sige siya’g sulat kaniya kada adlaw. Dili lamang mubo nga 50 ka pulong nga sulat. Usahay kon apiki na siya sa panahon modikta siya kanako sa pagsulat, ug ako nakahinumdom sa akong gibati: kadto daw sama sa usa ka sagrado nga dungog.

“Ang ilang kaminyoon nindot, malipayon, ug sila daw dunay dakong pagtahud sa usag usa. Ingon og ang ilang kinabuhi nagpakabana pag-ayo sa usag usa.”¹

Ang gugma ni Spencer ug ni Camilla Kimball sa usag usa, nga makita gayud dihang sila mga batan-on pa, nagkalig-on ug nagkalawum samtang sila nagkaedad na. Si Presidente Kimball kanunay mopahayag og pagpasalamat sa relasyon nga gisaw-an niya ug sa iyang asawa: “Si Camilla anaa sa akong kiliran sa tanang kasinatian. Amo nang nalubong ang among mga ginikanan ug uban pang mga minahal, ug amo nang gitugyan ang amo mismong gagmayng mga anak nga natawong kulang sa bulan. Nasinati na namo ang hilabihang kaguol ug ang tumang kalipay.… Magkauban kaming nagbangutan ug ingon man magkaubang mangatawa.… Ang among kinabuhi puno sa kalipay bisan sa tanang kasub-anan ug sa seryoso nga mga panghitabo. Nanayaw kami; nanganta kami; miabiabi kami’g mga bisita sa balay; nahigugma ug gihigugma kami. Uban sa asawa nga pareha ni Camilla Eyring, ang kinabuhi nahimong kompleto, hingpit, ug buhong.”²

Kay nakasinati’g dugay ug malipayong kaminyoon, iyang naobserbahan: “Kita nagkinahanglan og maayo ug buotan nga kauban kinsa dili motan-aw sa atong mga sayop, dili mohinumdom sa atong mga kabuang ni mahinumdom sa atong mga kahuyang; … kita nagkinahanglan og mahigugmaong kauban nga katambayayong sa dihang kita nag-antus ug naghilak ug nag-ampo ug nagdayeg; usa ka tawo kinsa atong kauban sa atong pag-antus ug mga kahimangud, ang usa ka tawo nga nahigugma kanato tungod sa atong pagka-kita o mahimo unta kita kaysa unsa ang atong hitsura sa gawas.”³

Mga Pagtulun-an ni Spencer W. Kimball

Ang mahangturong kaminyoon gi-orden sa Dios, ug ang pamilya importante sa plano sa Langitnong Amahan alang kanato.

Ang kaminyoon, dungganong kaminyoon, gi-orden sa Dios. Siya mimando nga ang panimalay ug ang pamilya kinahanglang maoy himoong sukaranang yunit sa katilingban, ug kita kinahanglang mapasidan-an nga ang mga dili husto nga kultura karon nagpalayo gikan niining gi-orden nga plano sa Dios.…

Daw dunay nagkadaghang uso batok sa kaminyoon gikan sa nagkadautan nga mga tawo sa kalibutan ug ang nagkakusog nga uso sa kaminyoon nga walay anak. Natural, ang sunod nga pangutana mao, “Nganong magminyo man?” Ug magsugod na kita sa pagkasabut sa mga rason kabahin “sa rebolusyon nga batok sa kaminyoon.” Dunay mga argumento nga ang mga anak palasanon, usa ka higut, usa ka responsibilidad. Daghan ang mikombinser sa ilang mga kaugalingon nga ang edukasyon, kagawasan gikan sa pagdili ug sa responsibilidad––kana mao ang pinakanindot nga pagpakabuhi. Ug sa walay palad kining sayop ug makadaot nga ideya gituhoan na sa uban natong mga tawo mismo.⁴

Sa pagbatok ug pagsumpo sa dautan nga pagtulun-an diha sa medya ug sa sine ug telebisyon ug sa pasundayag ug sa mga kadalanan, kinahanglan natong itudlo ang kaminyoon, ang husto nga kaminyoon, ang mahangturong kaminyoon.⁵

Ang unang rason alang sa mahangturong kaminyoon mao nga ang kinabuhi mahangturon; ug ang kaminyoon, aron mahiuyon sa mahangturong mga katuyoan, kinahanglang makanunayon sa gidugayon sa kinabuhi. Ang kaminyoon pinaagi sa opisyal sa sibil, o pinaagi sa mga opisyal sa Simbahan sa gawas sa mga templo, gihimo alang sa karon nga panahon lamang, “hangtud nga ang kamatayon mobulag kaninyo” o “hangtud nga kamong duha buhi pa.” Matapos kini uban sa kamatayon.… Ang mahangturong kaminyoon gipahigayon pinaagi sa propeta sa Ginoo o pinaagi sa usa sa pipila lamang kinsa iyang gihatagan og katungod. Kini gipahigayon diha sa balaang mga templo nga gitukod ug gipahinungod alang niana nga katuyoan. Ang ingon lamang nga kaminyoon ang molapas sa lubnganan ug mopatunhay sa relasyon sa bana ug asawa ug sa ginikanan ug anak ngadto ug hangtud sa kahangturan.⁶

Ang dungganon nga, malipayon, ug malampusong kaminyoon mao gayud ang unang tumong sa matag normal nga tawo. Ang kaminyoon gidesinyo sa Ginoo aron paghimo og lig-on ug malipayong mga panimalay ug kaliwatan. Bisag kinsa ang motuyo sa paglikay sa kaminyoon dili lamang kay dili normal, kondili mipakyas sa iyang kaugalingong plano.

Akong depensahan ang termino nga normal tungod kay ang Ginoo mihatag sa sumbanan sa iya mismong kaugalingon pinaagi sa paghiusa nila ni Adan ug Eba, ang iyang unang lalaki ug unang babaye dinhi sa yuta, ug nagpahigayon sa balaang seremonya sa kaminyoon aron paghimo kanila nga bana ug asawa. Magkalahi sila sa ilang kinaiya, uban sa magkalahi nga tahas nga gidala. Pagkahuman gayud sa iyang pagpahigayon sa seremonya siya miingon kanila: “Sumanay ug dumaghan kamo, ug pun-on ninyo ang yuta, ug magagahum kamo niini: ug magbaton og pagbulot-an” (Gen. 1:28).

Ang pagminyo normal ug ang pagpanganak husto. Ang kada tawo kinahanglan maninguha ug moplano nga magminyo tungod kay mao kana ang plano sa Dios sa langit alang kanato. Mao kana ang paagi nga iyang gihimo.⁷

Ang tibuok plano sa [Ginoo] maalamon nga giorganisar aron pagdala og mga bata sa kalibutan uban sa gugma ug pagsalig sa mga anak ngadto sa ilang mga ginikanan. Kon ang mga dili natural nga mga ideya sa daghang katawhan karon ang nagpatigbabaw, ang kalibutan, ang katawhan, ug ang tanang angay nga mga butang dugay na untang natapos.…

… Ang Ginoo miingon nga aron makabaton sa labing taas sa tulo ka mga langit o mga ang-ang sa himaya diha sa celestial nga gingharian, “ang tawo kinahanglan mosulod niini nga kapunongan sa priestood [ang gipasabut mao ang bag-o ug walay katapusan nga pakigsaad sa kaminyoon];

“Ug kon dili siya mosulod, siya dili makabaton niini.” (D&P 131:2–3.)

Kini mao ang husto nga paagi.

Adunay ubang mga tawo kinsa napakyas sa pagminyo tungod sa ilang kaugalingong pagpili. Ilang gihikawan ang ilang mga kaugalingon. Tingali adunay daghang mga babaye kinsa mihikaw usab sa ilang mga kaugalingon sa mga panalangin. Adunay uban kinsa wala gayud magminyo tungod kay wala silay kahigayunan. Dayag na lang, nga kita nasayud, nga ang Ginoo mohimo og igong pagtagad ug nga wala gayuy usa nga ipanghimaraut tungod sa usa ka butang nga wala na gayuy kahigayunan nga mahimo.…

Pero, mahitungod sa kaminyoon ug sa mga tahas sa lalaki ug sa babaye, ayaw gayud itugot nga ang tawo mosupak sa Dios.…

Matinuoron akong naglaum nga ang atong mga babaye, ug mga lalaki nga mga Santos sa Ulahing mga Adlaw, moinum gayud sa tubig sa kinabuhi ug mopahiangay sa ilang mga kinabuhi sa nindot ug dakong mga tahas nga gihatag sa Ginoo kanila.

Naglaum ako nga dili kita mangahas sa paghingpit sa hingpit nang daan nga plano, hinuon mosiksik sa tibuok natong gahum, hunahuna ug kusog sa paghingpit sa atong mga kinabuhi sa tibuok nga programa nga gihatag kanato. Tungod kay ang uban kanato napakyas, dayag na lang nga dili makiangayon nga mobasol sa plano. Atong pugngan ang atong mga kinaiya, ang atong mga kalihokan, ang atong tibuok kinabuhi, nga kita mahimong sumusunod sa buhong ug daghan kaayong mga panalangin nga gisaad kanato.⁸

Ang mahangturong kaminyoon nagkinahanglan sa pinakamaayong pagpangandam.

Ang kaminyoon malagmit mao ang pinakamahinungdanon sa tanan natong mga desisyon ug dunay dako kaayo nga mga epekto, kay dili lamang kini maghatag og daklit nga kalipay, kondili ingon man usab sa walay katapusang kalipay. Makaapekto kini dili lamang sa duha ka tawo nga natungdan, kondili ingon man usab sa ilang mga pamilya ug labi na sa ilang mga anak ug sa mga anak sa ilang mga anak hangtud na sa daghang mga henerasyon.

Sa pagpili og kauban sa kinabuhi ug sa kahangturan, dayag na lang nga ang pinakamaayo nga pagplano ug paghunahuna ug pag-ampo ug pagpuasa kinahanglan buhaton aron pagsiguro nga sa tanang mga desisyon, kini ang dili gayud mahimong masayop. Sa tinuod nga kaminyoon kinahanglan gayud nga adunay panaghiusa sa mga hunahuna ug ingon man sa kasingkasing. Ang mga emosyon dili kay mao ra ang motino sa mga desisyon, pero ang hunahuna ug ang kasingkasing, nga napalig-on pinaagi sa pagpuasa ug pag-ampo ug seryosong paghunahuna, maoy mohatag sa usa ka binuhat og dako nga kahigayonan sa malipayon nga kaminyoon. Apil na niini ang sakripisyo, pag-ambitay, ug ang dakong panginahanglan sa dili paghunahuna sa kaugalingon.…

… Ang “soul mates” dili tinuod ug usa lamang kini ka ilusyon; ug samtang ang kada batan-ong lalaki ug babaye mangita uban sa tumang kakugi ug pag-ampo aron makakita og kauban kang kinsa ang kinabuhi mahimong mauyonon ug nindot, siguro gayud nga hapit tanang buotang lalaki ug babaye makabaton og kalipay ug malampusong kaminyoon kon ang duha andam nga mobayad sa kantidad.…

Ang duha ka mga indibidwal nga hapit na sa altar sa kaminyoon kinahanglan makaamgo nga aron maangkon ang malipayong kaminyoon nga ilang gilauman, kinahanglan masayud sila nga ang legal nga kaminyoon dili mao ang tubag sa tanang problema, pero kini nagpasabut og sakripisyo, panag-ambitay, ug gani pagkunhod sa ubang personal nga mga kagawasan. Kini nagpasabut og dugay, hugot nga pagdaginot. Kini nagpasabut nga ang mga bata nagdala og pinansyal nga kabug-at, kabug-at sa pagserbisyo, mga kabug-at sa pag-amuma ug sa kahingawa; pero nagpasabut usab kini og pinakanindot ug pinakatam-is nga emosyon sa tanan.⁹

Ang paglangay sa kaminyoon … dili gayud maayo. Ang tanang normal nga tawo kinahanglan magplano sa sayo pa sa ilang mga kinabuhi sa pag-apil sa husto nga kaminyoon sa templo ug sa pagsanay ug pagbaton og mga pamilya sa hingkod nilang mga katuigan.¹⁰

Kadtong mga batan-ong tawo kinsa nagplano sa kaminyoon sa templo nakaestablisar nang daan og hunahuna nga makapahimo kanila nga mauyonon nga magplano uban sa napiling kauban kon makit-an na. Bisan gani sa dili pa ipahigayon ang ilang kaminyoon sa balaang dapit sila magplano na sa kinabuhi nilang duha, ug mopadayon sa proseso isip kaslonon nga babaye ug lalaki kon sila maghiusa sa pagplano sa ilang dalan paingon sa malipayon, malampuson ug espirituhanong kinabuhi ngadto sa kahimayaan sa gingharian sa Dios.¹¹

Bisag kinsa kaninyo molibut gayud sa kalibutan alang sa ordinansa sa pagbugkos kon kamo nasayud sa kamahinungdanon niini, kon kamo nakaamgo kon unsa kini ka nindot. Walay gilayon, walay kwarta nga kulang, walay sitwasyon ang makapugong kaninyo sa pagminyo sa balaang templo sa Ginoo.¹²

Adunay bag-ong espiritu sa Zion kon ang batan-ong mga babaye mosulti sa ilang mga hinigugma, “Kon dili ka makakuha og rekomen sa templo, nan dili gayud ako andam magpahigot sa akong kinabuhi uban kanimo, bisan gani sa mortalidad.” Ug ang batan-ong nahibalik nga misyonaryong mga lalaki mosulti sa ilang mga hinigugma, “Gikasubo nako, bisan og nahigugma ako pag-ayo kanimo, dili ko makigminyo sa gawas sa balaang templo.”…

… Matingala kita kon ngano, uban niining tanang mga panalangin ug mga saad, nga ang mga tawo mapakyas sa pagminyo sa husto ug sa ingon nag-usik sa ilang mga kinabuhi diha sa mibagtok nga yelo nga daw walay pagkatunaw. Ngano kaha nga duna pay batan-ong mga tawo nga mohunahuna pa og kaminyoon sa gawas sa templo ug isalikway kadtong mga himaya nga maangkon?¹³

Ang minyo nga mga magtiayon makasunod og usa ka walay katapusang pormula aron magkauban sa pagkaplag og kalipay.

Hapit tanang mga kaminyoon mahimong nindot, mauyonon, malipayon, ug mahangturon, kon ang duha ka tawo nga natungdan motino nga kini kinahanglan gayud, nga kini kinahanglang himoon, nga kini kinahanglang mahimo gayud.¹⁴

Ang mismong pagpahigayon sa seremonya dili modala og kalipay ug malampusong kaminyoon. Ang kalipay dili lamang moabut pinaagi sa pagpindot sa buton, pareha sa suga nga de kuryente; ang kalipay maoy usa ka kahimtang sa hunahuna ug naggikan sa kahiladman. Kini kinahanglang trabahoan. Dili kini mapalit og kwarta; dili kini makuha lang sa wala.

Ang uban nagtuo nga ang kalipay usa ka madanihong kinabuhi sa kasayon, kaharuhay, ug kanunay nga mahinamon; pero ang tinuod nga kaminyoon gibase sa kalipay nga mas labaw pa niana, kini moabut gikan sa paghatag, pag-alagad, pagpaambitay, pagsakripisyo ug pagka dili hakog.

Ang duha ka tawo nga naggikan sa managlahi nga kagikan makat-on sa dili madugay human ipahigayon ang seremonya nga ang kamatuoran gayud ang kinahanglang atubangon. Wala nay kinabuhi sa pantasya o pagpakaaron-ingnon; kinahanglan mogawas kita sa mga panganod ug mobutang sa atong mga tiil nga ligon diha sa yuta. Ang responsibilidad kinahanglan pagasugdan ug ang bag-ong mga katungdanan kinahanglan pagadawaton. Ang ubang personal nga mga kagawasan kinahanglang biyaan, ug daghang mga pagpahiayon, dili hinakog nga pagpahiayon, ang kinahanglang himoon.

Ang usa ka tawo sa dili madugay makaamgo human sa kaminyoon nga ang kapikas adunay mga kahuyang nga wala mapakita daan o madiskobrehi. Ang mga hiyas nga kanunayng napadako panahon sa pagpangulitawo karon nagkagamay na, ug ang mga kahuyang diin daw gamay kaayo ug dili makit-an panahon sa pagpangulitawo karon midako na kaayo. Ang panahon miabut na alang sa kasingkasing nga masinabtanon, alang sa pagtimbang-timbang sa kaugalingon, ug alang sa maayong hunahuna, pagrason, ug pagplano.…

Adunay dili mapakyas nga pormula nga mogarantiya sa kada magtiayon og malipayon ug mahangturong kaminyoon; pero sama sa tanang pormula, and mahinungdanong mga sagol kinahanglan dili gayud kalimtan, kuhaan, o limitahan. Ang pagpili sa dili pa mangulitawo ug dayon ang pagpadayon sa pagpangulitawo human sa kaminyoon managsama ka importante, pero dili mas importante kaysa kaminyoon mismo, ang kalampusan niini nagdepende sa duha ka binuhat––dili diha sa usa, pero diha sa duha.

Sa kaminyoon nga nagsugod ug gibase diha sa resonable nga mga sumbanan …, walay kombinasyon sa gahum ang makaguba niini gawas sa gahum sa sulod o sa duha ka kapikas mismo; ug kinahanglan sila modawat sa kinatibuk-ang responsibilidad. Ang ubang tawo ug mga ahensya mahimong moimpluwensya sa maayo o sa dautan. Ang pinansyal, sosyal, politikal, ug ubang mga sitwasyon malagmit adunay kalabutan; pero ang kaminyoon nagdepende una ug sa kanunay sa duha ka kapikas kinsa makahimo kanunay sa ilang kaminyoon nga malampuson ug malipayon kon sila determinado, dili hakog, ug matarung.

Ang pormula simple ra; ang mga sagol gamay ra, hinuon adunay daghang mga pagdugang sa matag usa.

Una, kinahanglan adunay husto nga pamaagi kalabut sa kaminyoon, diin mamalandong sa pagpili og kapikas kinsa hapit na makakab-ot sa kinatas-ang bahin sa kahingpitan kutob sa mahimo diha sa tanang matang nga mahinungdanon sa mga indibidwal. Ug dayon kadtong duha ka tawo kinahanglan moanha sa altar sa templo nga makaamgo nga sila maningkamot gayud og maayo kalabut niining malampusong gihiusa nga pagpuyo.

Ikaduha, kinahanglan adunay pagka dili gayud hakog, kalimtan ang kaugalingon ug modumala sa tanan sa kinabuhi sa pamilya ug sa tanan nga may kalabutan niana alang sa kaayohan sa pamilya, nga magpaubos sa kaugalingon.

Ikatulo, kinahanglan ipadayon ang paghinalaray sa gugma ug pagpahayag sa pagbati, kabuotan, ug pagsabut aron pagpabilin sa gugma nga buhi ug magtubo.

Ikaupat, kinahanglan adunay hingpit nga pagsunod sa mga sugo sa Ginoo ingon nga gilatid diha sa ebanghelyo ni Jesukristo.

Uban niini nga mga igsasagol nga hustong pagkasagol ug padayong magpabilin nga naglihok, imposible gayud kaayo nga walay kalipay nga moabut, walay pagsinabtanay nga magpadayon o ang pagkabungkag sa kaminyoon mahitabo. Ang mga abogado sa diborsyo mobalhin na lang og laing mga propesyon ug ang mga korte sa diborsyo manira na lang.¹⁵

Ang pagka dili hakog ug ang pagsunod sa mga sugo modala og kalampusan sa kaminyoon.

Ang mga managhigugmaay kinahanglan nga makaamgo sa dili pa magpakasal nga ang kada usa kinahanglan modawat sa tinuod ug sa hingpit nga ang kaayohan sa gamay nga bag-ong pamilya kinahanglan maoy kanunayng molabaw kaysa kaayohan sa bisan kinsa sa kapikas. Kada usa mowagtang na sa pulong “ako” ug “akong” ug ilisan sa … “kita” ug “atoa.” Kada desisyon kinahanglang maghunahuna nga adunay duha ug mas daghan pa nga maapektuhan niini. Samtang ang asawa maghimo og dakong desisyon karon, siya maghunahuna gayud sa epekto niini ngadto sa mga ginikanan, sa mga anak, sa panimalay, ug sa ilang espirituhanong mga kinabuhi. Ang pagpili sa bana og trabaho, sa iyang katilingbanong kinabuhi, sa iyang mga higala, sa iyang tanang interes kinahanglang hunahunaon na uban sa pagsabut nga siya kabahin na lamang sa usa ka pamilya, nga ang panginahanglan sa kinatibuk-ang grupo maoy kinahanglang hunahunaon.¹⁶

Alang sa duha ka tawo nga naninguhang magmalampuson ang ilang kaminyoon, nagkinahanglan sila og maayong pagkaplano nga badyet, nga gihimo sa bana ug sa asawa, ug dayon ang maampingong pagsunod niini. Daghang mga kaminyoon ang nasamok sa palitanan kon ang walay plano nga pagpamalit gihimo. Hinumdumi nga ang kaminyoon usa ka panag-uban ug mahimong dili kini magmalampuson sa laing paagi.¹⁷

Ang usa ka kaminyoon mahimong dili kanunay sayon ug dili mahimong walay problema, pero kini mahimong usa nga magmalinawon gayud. Ang magtiayon mahimong may kakabus, sakit, kahigawad, kapakyasan, ug bisan gani kamatayon diha sa pamilya, pero bisan pa niini kini dili makakuha kanila sa ilang kalinaw. Ang kaminyoon mahimong magmalampuson kon walay pagkahakog nga mopatigbabaw. Ang mga kasamok ug mga problema makapasuod sa mga ginikanan ngadto sa paghiusa kon anaa ang hingpit nga pagka dili hakog.…

Ang gugma sama sa usa ka bulak, ug, sama sa lawas, nagkinahanglan og kanunayng pagpakaon. Ang mortal nga lawas mahimong sa dili madugay moniwang ug mamatay kon dili kanunayng pakan-on. Ang linghod nga bulak malaya ug mamatay kon walay pagkaon ug tubig. Ug busa ang gugma, usab, dili mapaabot nga molungtad sa hangtud gawas kon kini padayon nga pakan-on uban sa tipik sa gugma, ang pagpakita sa pagtamud ug pagdayeg, ang mga pagpahayag og pagpasalamat, ug ang paghunahuna sa pagka dili hakog.

Ang hingpit nga pagka dili hakog siguradong makakab-ot og laing rason sa malampusong kaminyoon. Kon ang usa kanunayng magtinguha og kaayohan, kaharuhay, ug kalipay sa usa, ang gugma nga makaplagan sa higayon sa pagpangulitawo ug nabugkos diha sa kaminyoon mahimong motubo ngadto sa dakong panag-uyon. Daghang mga magtiayon ang mitugot sa ilang mga kaminyoon nga mahimong mohupas ug sa ilang gugma nga mabugnaw sama sa bahaw nga pan o walay lami nga pasiaw o bugnaw nga gravy. Sa pagkatinuod ang mga pagkaon nga pinaka importante alang sa gugma mao ang pagsabut, kabuotan, kamahunahunaon, pagtagad, pagpahayag sa pagbati, mga gakus sa pasalamat, pagdayeg, garbo, panagkauban, pagsalig, pagtuo, panagtiayon, pagtambayayong, ug pagdepende sa usag usa.

Aron magmalipayon gayud sa kaminyoon, ang usa kinahanglan adunay padayon nga matinud-anong pagsunod sa mga sugo sa Ginoo. Walay usa, minyo o dili minyo, nga hilabihan gayud ka malipayon gawas kon siya nagmatarung. Adunay temporaryong katagbawan ug pagpakaaron-ingnon nga pagpakita og kalipay sa daklit lang, pero ang permanente, hingpit nga kalipay moabut lamang pinaagi sa pagkalimpyo ug pagkatakus.…

… Kon ang duha ka tawo nahigugma sa Ginoo labaw pa sa ilang kaugalingong mga kinabuhi ug mahigugma sa usag usa labaw pa sa ilang mga kaugalingon, nga magtambayayong diha sa hingpit nga panag-uyon sa programa sa ebanghelyo isip ilang sukaranang estraktura, sigurado gayud sila nga makaangkon niining dakong kalipay. Kon ang bana ug asawa kanunayng magkuyog nga moadto sa balaang templo, mangluhod nga maghiusa diha sa ilang panimalay uban sa ilang pamilya, magkuyog nga magkinuptanay ngadto sa ilang relihiyosong mga miting, mopabilin sa ilang mga kinabuhi nga hingpit nga putli––sa mental ug sa pisikal––aron nga ang tibuok nilang hunahuna ug mga tinguha ug mga gugma nakasentro ngadto sa usa ka binuhat, ang ilang kapikas, ug ang duha magtinabangay alang sa paglig-on sa gingharian sa Dios, nan ang kalipay anaa na sa kinatas-ang kahimtang niini.¹⁸

Ang kaminyoon nagkinahanglan og hingpit nga pag-unong ug hingpit nga kamatinuoron.

Adunay minyong mga tawo kinsa maibog pa ug mahigugma sa uban, nga nagtuong dili sayop ang magpaibog og gamay, nga mopakigbahin sa ilang mga kasingkasing ug nga maibog pa sa uban gawas sa asawa o bana. Ang Ginoo direkta nga miingon: “Higugmaa ang inyong mga asawa sa inyong tibuok nga kasingkasing, ug unong ngadto kaniya ug wala nay lain.” (D&P 42:22.)

Ug, kon ang Ginoo miingon sa tibuok ninyong kasingkasing, kini wala magtugot sa pakig-ambit o pakigbahin niini ni paghikaw niini. Ug, sa babaye kini gisubli: “Higugmaa ang inyong mga bana sa inyong tibuok kasingkasing ug unong ngadto kaniya ug wala nay lain.”

Ang mga pulong wala nay lain nagwala sa tanang tawo ug sa tanang butang. Dayon ang kapikas mahimong mas labaw pa sa kinabuhi sa bana o sa asawa, ug dili ang sosyal nga kinabuhi ni ang pagpanarbaho ni pulitikanhong kinabuhi ni bisag unsa nga interes ni tawo ni butang nga molabaw gayud sa kaubang kapikas. Usahay makakita kita og mga asawa kinsa mopalabi ug ipatigbabaw ang mga anak nga mapasagdan na lang ang bana, ug gani usahay ipalayo sila kaniya.

Ang Ginoo miingon ngadto kanila: “Mounong ngadto kaniya ug wala nay lain.”¹⁹

Kasagaran, ang mga minyo padayon nga mounong ngadto sa ilang mga inahan ug sa ilang mga amahan ug sa ilang mga barkada. Usahay ang mga inahan dili mobuhi sa ilang katungod sa ilang mga anak, ug ang mga bana ingon man ang mga asawa mobalik pa gihapon sa ilang mga inahan ug mga amahan aron mopakigtambag ug mosugilon, samtang ang pag-unong angay nga maglabi unta ngadto sa asawa, ug ang tanang mga tinago nga kasuod ipabilin unta nga sekreto kaayo ug dili isulti sa uban.²⁰

Ang kaminyoon nagkinahanglan gayud og hingpit nga pagdapig ug hingpit nga pagkamaunungon. Ang matag kapikas modawat sa kauban inubanan sa pagsabut nga siya sa hingpit mohatag sa tibuok kasingkasing, kusog, pag-unong, dungog, ug pagbati, uban sa tibuok dignidad. Sala ang bisan unsa nga pagtipas niini; sala ang paghigugma sa uban nga dili kapikas. Sama nga kita kinahanglan adunay “bug-os nga tinguha ngadto sa himaya sa Dios,” sa ingon kinahanglan usab nga kita adunay usa ka mata, usa ka dunggan, usa ka kasingkasing nga bug-os ang tinguha ngadto sa kaminyoon ug sa kapikas ug sa pamilya.²¹

Mohangyo ako niadtong tanan nga nabugkos pinaagi sa mga panumpa sa kaminyoon ug mga pakigsaad sa paghimo niana nga kaminyoon nga balaan, ipabilin ang kalab-as, ipahayag ang pagbati nga makahuluganon ug sinsero ug kanunay.

Mga bana, pauli sa panimalay––uban sa lawas, espiritu, hunahuna, pagkamaunungon, mga kaikag, ug mga pagbati––ug higugmaa ang inyong kauban diha sa balaan ug walay paghunong nga relasyon.

Mga asawa, pauli sa panimalay uban sa tibuok ninyong kaikag, kamatinuoron, mga tinguha, mga pagkamaunungon, ug mga pagbati––makigtambayayong aron paghimo sa inyong panimalay nga usa ka bulahang langit. Sa ingon makapahimuot kamo sa inyong Ginoo ug Magtutudlo ug mogarantiya sa inyong mga kaugalingon sa dili hitupngan nga kalipay.²²

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Sa inyong hunahuna unsa man ang ubang mga ebidensya nga ang usa ka kaminyoon dungganan? malipayon? malampuson? Hain niini nga mga ebidensya ang inyong nakita sa relasyon tali ni Presidente Kimball ug sa iyang asawa, nga si Camilla? (Tan-awa sa mga pahina 237–239.)
Ribyuha ang seksyon nga nagsugod sa pahina 239. Unsa ang ubang mga impluwensya sa kalibutan karon nga inyong gihunahuna nga batok sa kaminyoon? Unsa ang mga epekto sa maong mga pag-atake? Unsa ang atong mabuhat aron “pagbatok ug pagsumpo” niini, ilabi na diha sa atong mga panimalay?
Hain sa mga pagtulun-an ni Presidente Kimball kalabut sa pagandam alang sa mahangturong kaminyoon ang nakapadani kaninyo pag-ayo ug ngano? (Tan-awa sa mga pahina 242–244.) Hain nga mga pagtulun-an ang malagmit makatabang niadtong kinsa naminyo na?
Si Presidente Kimball mihisgut sa “dili mapakyas nga pormula” sa kaminyoon (mga pahina 245–247). Kon bisan usa sa mga sagol niini ang mawala, sa unsa kaha nga paagi maimpluwensyahan ang kaminyoon?
Si Presidente Kimball mitudlo nga ang mga kapikas kinahanglan “mounong” sa usag usa ug wala nay lain (mga pahina 249–250). Unsa ang mabuhat sa mga magtiayon aron pagsiguro nga ang panggawas nga mga pasalig ug mga interes dili mosamok sa ilang pag-unong sa usag usa?

May Kalabutan nga mga Kasulatan: Genesis 2:18, 21–24; 1 Mga Taga-Corinto 11:11; Mga Taga-Efeso 5:22–25; D&P 132:7–21