Hugna 10

Paglig-on sa atong mga Kaugalingon batok sa Dautang mga Impluwensya

Ang ebanghelyo ni Jesukristo naghatag kanato og gahum ug proteksyon batok sa mga kadautan sa atong panahon.

Gikan sa Kinabuhi ni Spencer W. Kimball

Nagtudlo si Presidente Spencer W. Kimball nga ang pakig-away batok ni Satanas ug sa iyang mga pundok “dili ginagmay nga panagsangka uban sa dili kaayo matinguhaon nga kaaway, apan usa ka dako kaayo nga gubat uban sa gamhanan kaayo nga kaaway, naestablisar na og maayo, ug organisado pa nga ingon og mabuntog kita kon dili kita magmalig-on, maayong pagkabansay ug mabinantayon.”¹

Isip usa ka batan-ong misyonaryo nga nag-alagad didto sa Central States Mission, girekord niya sa iyang diary ang usa ka kasinatian nga naghulagway sa iyang hugot nga tinguha sa pagbatok sa tintasyon. Nagsakay siya og tren paingon sa Chicago, Illinois, sa dihang giduol siya sa usa ka tawo. “Misulay [siya] sa pagpabasa kanako og usa ka malaw-ay nga libro uban sa hilas nga mga litrato. Gisultihan nako siya nga wala akoy hilig niana. Nagsugod dayon siya sa pagpanintal kanako sa pag-uban kaniya ngadto sa Chicago ug nasayud ako nga ihatud niya ako sa pagkalaglag. Gisupo nako siya apan human sa iyang pagbiya akong gibati ang dakong kaulaw sa akong kaugalingon sulod sa usa ka takna. Nakahunahuna ako—’O! giunsa sa pagpaninguha og maayo ni Satanas, pinaagi sa iyang mga sulugoon, sa pagsulay nga mahisalaag ang batan-ong mga tawo.’ Gipasalamatan ko ang Ginoo nga aduna akoy gahum sa pagbuntog niini.”²

Mga Pagtulun-an ni Spencer W. Kimball

Si Satanas tinuod ug mogamit sa bisan unsang paagi aron sa pagsulay sa paglaglag kanato.

Niining panahon sa pagkamalimbungon [sophistication] ug pagkamasalaypon ang mga tawo yano-yanohon dili lamang ang Dios apan ang yawa usab. Ubos niini nga konsepto, si Satanas usa lamang ka minugna-mugna, nga magamit aron pagpabilin sa mga tawo nga magmatinud-anon niadtong minus pa og kahibalo nga mga panahon apan nabiyaan na sa atong maalamon nga panahon. Wala nay molabaw pa sa kamatuoran. Personal na kaayo si Satanas, indibidwal nga pagkatawo, apan walay mortal nga lawas. Ang Iyang tinguha sa pag-angkon kanato dili mominus ang paghingusog diha sa pagkadautan kay sa pagkamatarung sa atong Amahan aron pagdani kanato ngadto sa iyang kaugalingong mahangturon nga gingharian.³

Aron masayud kon hain ang peligro ug aron mailhan kini diha sa tanan nga mga panagway niini ang proteksyon gihatag. Mabinantayon ang usa ka dautan. Andam siya kanunay sa paglingla ug angkonon isip iyang mga biktima ang matag dili mabinantayon, matag usa nga walay pag-amping, matag masinupakon nga tawo.⁴

Sa walay pagtagad kon kinsa ang matungnan sa espesyal nga atensyon sa kaaway sa bisan unsa nga higayon, gitinguha niya nga ang tanang mga tawo mahimong “mauyamot sama ngadto kaniya” (2 Ne. 2:27). Sa pagkatinuod, siya nagtinguha “sa kauyamot sa tanang mga katawhan” (2 Ne. 2:18). Dili siya mosimang sa iyang katuyoan ug abtik ug dili mohunong sa iyang tinguha.⁵

Si Pedro mipahimangno kanato: “Magmalinawon kamo sa hunahuna, managtukaw kamo. Ang inyong kaaway nga mao ang yawa nagalibotlibut sama sa leon nga nagangulob nga nangitag iyang matukob” (1 Ped. 5:8).

Ug ang Manluluwas miingon nga ang kada pinili pagalinglahon ni Lucifer kon mahimo [tan-awa sa Joseph Smith—Mateo 1:22]. Si [Lucifer] mogamit sa iyang salabutan aron sa paglibog ug sa iyang mga pangatarungan aron sa paglaglag. Iyang tuison ang mga kahulugan, inanayon kita sa pagpahisalaag, ug danihon kita gikan sa pagkamatarung ngadto sa hilabihang pagpakasala.⁶

Ang hari sa panglimbong nagkat-on sa kada posible nga paagi aron molampos ang iyang mga katuyoan, naggamit sa tanang kahimanan, tanang gamit nga mahimo. Siya modumala, motuis, ug mousab ug tabonan ang tanang butang nga gimugna alang sa kaayohan sa tawo, … aron siya makadumala sa mga hunahuna sa tawo ug dauton ang ilang mga lawas ug angkunon kini nga iyaha.

Dili gayud siya matulog––makugihon ug makanunayon siya. Maampingon siya nga moanalisar sa iyang problema ug unya mopadayon sa makugihon ug mapaigoon nga paagi; aron makab-ut ang iyang katuyoan. Gamiton niya ang tanang lima ka salabutan ug ang natural nga kagutom ug kauhaw sa tawo aron pagpahisalaag kaniya. Gipanagan-an na niyang daan ang pagsukol ug naglig-on sa iyang kaugalingon batok niini. Gamiton niya ang panahon ug gidugayon ug paglingawlingaw. Makanunayon siya ug madanihon ug hanas. Naggamit siya sa ingon ka importante nga mga butang sama sa radyo, telebisyon, mantalaan, ayroplano, ug sa sakyanan aron sa pagtuis ug pagguba. Gamiton niya ang pagpakig-uban sa tawo, sa iyang pag-inusara, sa kada panginahanglan niya aron sa pagpahisalaag niini. Gamiton niya ang iyang trabaho sa pinakamapuslanon nga panahon diha sa pinakamadanihon nga dapit uban sa may pinakaempluwensya nga mga tawo. Wala gayuy usa nga kalimtan niya nga makalimbong ug makatuis ug makapadunot. Gamiton niya ang kwarta, gahum, kusog. Danihon niya ang tawo ug agnihon diha sa pinakahuyang niya nga kinaiya. Wagtangon niya ang kaayo ug magmugna og kangil-ad. …Gamiton niya ang tanang pamaagi sa panudlo aron sa paglaglag sa tawo.⁷

Ang kaaway maliputon. Abtik siya. Nasayud siya nga dili siya makahimo sa pagdani sa mga buotan nga mga lalaki ug babaye sa pagpabuhat dayon og hilabihan ka dautan, mao nga buhaton niya sa sekreto nga paagi, mohunghong og may kabahin nga matuod hangtud nga ang buot niya nga biktimahon magasunod kaniya.⁸

Uban sa panabang sa Ginoo, makabatok kita sa mga impluwensya sa kadautan.

Kon buot kita nga moikyas [sa] makamatay nga mga gahum sa kadautan ug magpabilin nga gawasnon ang atong panimalay ug pamilya ug lig-on kaayo nga mapanalipdan batok sa tanang makalaglag nga mga impluwensyang naglibot kanato, kinahanglan gayud nga aduna kitay panabang sa … mismong Tiglalang. Adunay usa lamang ka siguro nga paagi ug kana pinaagi sa ebanghelyo ni Ginoong Jesukristo ug ang pagkamasulundon niini sa mahinungdanon ug dinasig nga mga pagtulun-an.⁹

Sa kinabuhi sa kada usa may panahon nga moabut ang panagbangi tali sa maayo ug dautan, tali ni Satanas ug sa Ginoo. Ang kada tawo nga moabut sa edad nga may pagkatulubagon nga walo ka tuig ug kinsa may hingpit nga pagkamahinulsolon nga kasingkasing tukma nga gibunyagan sa piho makadawat sa Espiritu Santo. Kon paminawon, kini nga miyembro sa Dios nga Kapangulohan mogiya, modasig, ug mopainit, ug mobabag sa mga pag-aghat sa dautan.¹⁰

Siya nga mas gamhanan pa kay ni Lucifer, siya nga kinsa maoy atong dangpanan ug atong kusog, mopaluyo kanato sa panahon sa hilabihang pagtintal. Samtang ang Ginoo dili gayud mamugos sa pagluwas ni bisan kinsa sa sala o pagpalingkawas gikan sa mga kamot sa mga maninintal, gamiton niya ang iyang Espiritu aron sa pag-aghat sa makasasala sa pagbuhat niini uban sa balaanong panabang. Ug ang tawo nga monunot sa matam-is nga impluwensya ug mga pangamuyo sa Espiritu ug mohimo sa tanan niyang gahum sa pagpabilin diha sa usa ka mahinulsulon nga kinaiya gigarantiyahan og panalipud, gahum, kagawasan ug hingpit nga kalipay.¹¹

Si Satanas … nakig-away aron sa pagpasunod ni Moises. …

“Moises, anak sa tawo, simba kanako,” ang yawa mitintal, uban sa panaad sa mga kalibutan ug katigayunan ug gahum. …

… Ang propeta mimando: “Pahawa gikan dinhi, Satanas. …” (Moises 1:16.) Ang bakakon, ang maninintal, ang yawa dili mosugot nga biyaan kining posible nga biktima, nga karon diha sa kasuko ug kapintas “misinggit uban ang makusog nga tingog, ug nagyawyaw diha sa yuta, ug nagmando nga nag-ingon; ako mao ang Bugtong Anak, simba kanako.” (Moises 1:19.)

Si Moises nakaila sa panlimbong ug nakakita sa gahum sa kangitngit ug ang “kapait sa impiyerno.” Kini mao ang usa ka gahum nga dili sayon nga buntugon ni mapapahawa. Nahadlok, mitawag siya sa Dios, dayon mimando uban sa bag-o nga gahum:

“Dili ako mohunong sa pagtawag sa Dios … kay ang iyang himaya misulod kanako, busa ako makaila tali kaniya ug kanimo. … Sa ngalan sa Bugtong Anak, pahawa gikan dinhi, Satanas.” (Moises 1:18, 21.)

Dili bisan pa gani si Lucifer, … ang nag-unang kaaway sa katawhan, ang makabarug sa priesthood sa Dios. Nagkurog, nauyog, nagtunglo, nagbakho, nagdangoyngoy, nagpangagot sa iyang mga ngipon, mibiya siya gikan sa madaugon nga Moises.¹²

Kinahanglan nga andam gayud kita sa paghimo og ligdong nga baruganan sa atubangan ni Satanas … ug batok sa mga pangulo ug mga kagamhanan ug ang tigmando sa kangitngit. Nagkinahanglan kita sa tibuok hinagiban sa Dios aron kita makabarug. [Tan-awa sa Mga Taga-Efeso 6:12–13]¹³

“Isul-ob ninyo ang tibuok hinagiban sa Dios,” maingon sa gipahimangno ni Pablo [Mga Taga-Efeso 6:11]. Uban niining balaanon nga impluwensya ug panalipud, mahimo nga makaila kita sa panglimbong sa kaaway sa bisan unsa pa ka madanihon nga mga pulong ug pangatarungan ug makahimo kitang “makasukol inig-abut na sa adlaw sa kalisdanan, ug tapus sa inyong tanang pakigbisog.” [Tanawa sa Mga Taga-Efeso 6:13.]¹⁴

Dili gayud kita monunot bisan pa man sa pinakagamay nga mga pagtintal.

Bug-at nga sala ang mosulod sa atong mga kinabuhi sa pagnunot nato sa unang ginagmay nga mga pagtintal. Panagsa ra ang tawo makahimo og dagkong kalapasan nga wala una mag-agi sa ginagmay nga sala, nga maoy nagbukas sa ganghaan sa mas bugat nga sala. Naghatag og ehemplo sa usa ka matang sa sala, usa ka tawo miingon, “Ang usa ka matinuoron nga tawo dili dihadiha mahimong dili na matinuoron mao usab sa hawan nga umahan nga kalit lamang nga nahimo dayong sagbuton.”

Hilabihan ka lisud niini, kondili imposible, alang sa yawa sa pagsulod sa usa ka pultahan nga sirado. Maingon nga wala siyay abilidad sa pagtintal kanato. Apan kon tugotan nato ang atong kaugalingon nga masulod sa ginagmay nga pagtintal, sa dili madugay tintalon kita niya sa gagmay nga sala ug dayon dakodako nga sala hangtud inanay nga mahulog kita ngadto sa mas pinakabug-at nga kasal-anan.

Kini nga sitwasyon makapahinumdom sa usa ka istorya kabahin sa kamilyo ug sa iyang agalon nga nagbiyahe tabok sa balason nga disyerto sa dihang miabut ang usa ka unos. Ang biyahero dali nga nakapahimutang sa iyang tolda ug misulod, dayon nanirado aron sa pagpanalipud sa iyang kaugalingon sa makasamad nga nagtuyok nga mga balas sa naghaguros nga unos. Dayag na lang nga ang kamilyo nabiyaan sa gawas, ug samtang ang mapintas nga hangin mihapak sa balas diha sa iyang kalawasan ug sa iyang mga mata ug ilong nabati niya nga dili na maagwanta mao nga sa katapusan nagpakiluoy siya nga pasudlon sa tolda.

“Husto ra kanako kini nga lawak,” miingon ang biyahero.

“Apan mahimo ba nga ang akong ilong lang aron makaginhawa ako nga walay balas?” mihangyo ang kamilyo.

“O sige, tingali mahimo nimo kana,” mitubag ang biyahero, ug gibuksan niya ang tabon og gamay kaayo ug ang taas nga ilong sa kamilyo gipasulod. Unsa ka komportable karon ang kamilyo! Apan wala madugay ang kamilyo gilaayan sa nagpamaak nga balas diha sa iyang mata ug mga dunggan… :

“Ang gipadpad sa hangin nga balas sama og makapangos sa akong ulo. Mahimo bang ang ulo lang nako ang ipasulod?”

Ang biyahero nangatarungan pag-usab, nga dili makadaut kaniya ang pag-uyon, kay ang ulo sa kamilyo mahimong makaukopar sa luna sa ibabaw sa tolda nga wala niya gamita. Mao nga gipasulod sa kamilyo ang iyang ulo ug ang mananap natagbaw na usab—apan kadiyot ra.

“Atubangang bahin lang sa akong lawas,” nagpakilooy siya, ug misugot na usab ang biyahero ug dayon ang atubangan nga abaga ug mga tuhod sa kamilyo nasulod na sa tolda. Sa katapusan, sa mao gihapon nga paagi sa paghangyo ug pagtugot, ang lawas sa kamilyo, ang iyang bukobuko ug ang tanan diha na sa tolda. Apan karon ingon og huot na kaayo alang sa duha, ug gipatiran sa kamilyo ang biyahero paggawas ug ngadto sa hangin ug unos.

Sama sa kamilyo, si Lucifer mao dayon ang mahimong agalon kon ang usa ka tawo mouyon ngadto sa una niyang mga pagdani. Dili madugay ang konsiyensya hingpit nga mapahilum, ang dautan nga gahum aduna nay hingpit nga impluwensya, ug ang ganghaan sa kaluwasan masirad-an na hangtud nga usa ka kinasingkasing nga paghinulsol ang makaabli niini pag-usab.

Ang pagkaimportante sa dili pagnunot sa tintasyon sa pinakagamay gilatid diha sa ehemplo sa Manluluwas. Wala ba niya maila ang kakuyaw sa dihang didto siya sa bukid uban sa napukan niyang igsoon, nga si Lucifer, samtang gitintal og maayo nianang hanas nga tigpanintal? Mahimo unta niyang maablihan ang pultahan ug moatubang sa kakuyaw sa dili maalamon nga paagi pinaagi sa pag-ingon, “Sige, Satanas, paminawon nako ang imong sugyot. Dili ko kinahanglang mouyon, dili ko kinahanglang monunot, dili ko kinahanglang modawat—pero maminaw ako.”

Wala gayud mangatarungan si Kristo. Positibo ug dihadiha dayon gitapus niya ang panagsultihanay, ug mimando: “Pahawa ka, Satanas,” ang ipasabut, sama niini, “Palayo sa akong pananaw—pahawa sa akong atubangan—dili ako maminaw—dili ako mangilabut kanimo.” Dayon, atong mabasa, “unya ang yawa mipahawa kaniya.” [Mateo 4:10–11.]

Mao kini ang tukma natong sumbanan, kon atong pugngan ang sala kaysa mag-atubang og daghan pa kaayong malisud nga buluhaton sa paghinulsol niini. Samtang akong gitun-an ang istorya sa Manunubos ug sa mga pagtintal kaniya, sigurado ako nga iyang gigahin ang iyang mga kusog aron sa pagpalig-on sa iyang kaugalingon batok sa tintasyon kaysa pagpakig-away aron sa pagbuntog niini.¹⁵

Ang husto nga desisyon karon makatabang kanato nga makabarug sa mga pagpanintal sa kaulahian.

Ang usa sa nag-unang mga buluhaton alang sa kada indibidwal mao ang paghimo og mga desisyon. Daghang mga higayon sa matag adlaw nga maghimo kita og desisyon ug kinahanglan gayud nga modesisyon kon unsay atong pilion. Daghang mga kapilian nga malisud kaayo, apan modala kini kanato ngadto sa hustong direksyon nga paingon sa kinabuhing dayon; ang uban mubo ra, masangkaron ug makapahimuot, apan mopahisalaag kanato kini sa sayop nga direksyon. Importante nga klarohon sa atong hunahuna ang atong pinakamahinungdanon nga mga katuyoan, aron dili kita mabalda sa matag desisyon tungod sa dili importante nga mga pangutana: Unsay mas sayon o labaw pa ka makapahimuot nga paagi? o, Asa paingon ang uban?

Ang husto nga mga desisyon maoy pinakasayon nga himoon kon gipangandaman na natong daan, uban sa pinakamahinundanong mga tumong sa hunahuna, makapawala kini sa daghang kabalaka sa panahon sa pagdesisyon, kon kapuyon ug gitintal kita og maayo.

Sa batan-on pa ako, giusa na nako ang akong hunahuna nga dili gayud ako motilaw og tsa, kape, tabako, o bino. Akong nakaplagan nga kining hugot nga determinasyon nakaluwas kanako sa daghang higayon sa nagkalainlain nakong mga kasinatian. May daghang mga okasyon sa dihang hapit na gayud ako makahigop o makahikap o mosulay, apan ang dili mausab nga determinasyon nga ligdong nga natukod nakahatag kanako og rason ug kalig-on aron makasugakod.

… Karon mao ang panahon sa pagdesisyon nga dili kita mohunong sa mas kubos pa kaysa kahigayunan nga mabuhi sa hangtud uban sa atong Amahan, aron ang matag pagpili nga atong himoon makaapekto sa atong determinasyon nga walay tugutan nga makabalda sa pagkab-ot nianang pinakataas nga tumong.¹⁶

Palamboa ang pagdesiplina sa kaugalingon aron dili ka na mag-usab-usab sa desisyon nga imong pagabuhaton kon magatubang ikaw sa mao gihapon nga pagtintal. Kinahanglan nga kausa ra ikaw modesisyon sa usa ka butang.

Unsa ka mahinungdanon ang pagkahimo nga gawasnon sa pag-usab-usab og himo sa malisud nga desisyon kabahin sa usa ka pagtintal. Ang pagbuhat sa ingon dugay kaayo ug hilabihan ka kuyaw.¹⁷

Mahimong isalikway nato ang mga butang sa makausa ug hikalimtan kini! Mahimo nga kausahon ra nato sa pagdesisyon ang piho nga mga butang nga ilakip nato sa atong mga kinabuhi ug dayon barugan kini—sa walay pagkabalaka ug desisyonan pag-usab sa gatusan ka higayon kon unsay buhaton ug dili buhaton niini.

Ang pagduhaduha ug kahigawad mao ang mga kahimtang nga ganahang buhaton sa Kaaway, kay makapahamtang siya og daghan kaayong kadaut sa katawhan sa ingon niana nga mga kahimtang. … Kon wala pa ikaw makadesisyon, paghimo na og desisyon!¹⁸

Pagkaanindot unta kon makapahimo kita sa kada Santos sa Ulahing mga Adlaw nga batang lalaki ug babaye nga usahon na lang ang ilang mga hunahuna sa panahon sa pagkabata nga moingon, “Dili gayud ako mosunod ni Satanas o ngadto ni bisan kinsa nga gustong dauton nako ang akong kaugalingon.”¹⁹

Ang panahon sa pag-undang sa dautang mga buhat mao ang sa wala pa sila magsugod. Ang sekreto sa maayong kinabuhi anaa diha sa pagpanalipud ug pagpugong. Kadtong kinsa misunod sa dautan sa kasagaran mao kadtong mibutang sa ilang mga kaugalingon sa makuyaw nga kahimtang.²⁰

Gisuklan nato ang kaaway kon ilhon nato ang atong mga kahuyang ug maningkamot sa pagbuntog niini.

Nagtubo sa umahan, nasayud ako nga kon ang mga baboy makabuhi, unahon nako sa pagpangita ang mga lungag nga gilusotan niini sa unang pagkabuhi. Kon ang baka makagawas ngadto sa umahan nga mangita og lunhawng sagbut nga kasibsiban, nasayud na ako kon asa unang pangitaon ang dapit nga gieskapohan niini. Labing siguro mao ang dapit sa koral nga gilayatan niini sa una, o didto sa koral nga nabali. Sa samang paagi ang yawa nasayud kon asa manintal, asa ibutang ang iyang epektibo nga pagsulong. Pangitaon niya ang huyang nga dapit. Diin ang usa ka tawo huyang nang daan, labaw ka sayon nga matintal siya pag-usab.²¹

Mao ra og gilibutan kita kanunay sa kadautan. … Tungod niana, kinahanglan gayud nga kanunay kitang magmabinantayon. Ilhon nato ang atong mga kahuyang ug isalikway kini aron sa pagbuntog niini.²²

Kadaghanan kanato adunay huyang nga mga dapit diin ang kadautan molupig kanato gawas kon kita gibantayan ug gipanalipdan og maayo. …

Ang kasaysayan naghatag og daghan … mga ehemplo sa kalig-on ug garbo, sa indibidwal ug nasyonal, nga misyon sa pag-ataki diha sa huyang nga dapit. Maingon nga kining mga dapita sa kasagaran, anaa lang sa gawas, sa pisikal, si Lucifer ug ang iyang mga sumusunod nasayud sa mga kinaiya, mga kahuyang, ug huyang nga mga dapit sa kada usa ug mopahimulos niini aron sa paggiya kanato sa espirituhanon nga kalaglagan. Sa usa ka tawo mahimo nga kauhaw sa bino, sa uban adunay walay katagbawan, ang uban nagtugot sa iyang kahigal nga modominar; ang uban mahigugmaon sa kwarta, ug sa mga kaluho ug mga kaharuhay nga mapalit niini, ang uban nagtinguha sa gahum, ug uban pa.²³

Itugot nga kadtong kinsa adunay dautang mga katuyoan magmatinud-anon ug moila sa iyang mga kahuyang. Sultihan ko kamo nga ang Ginoo wala magbutang og sala sa atong mga kinabuhi. Wala niya himoa nga dautan ang tawo . … Ang sala gitugotan sa kalibutan, ug si Satanas gitugotan sa pagtintal kanato, apan kita adunay kagawasan sa pagpili. Mahimo nga makasala kita o magpuyo nga makatarunganon, apan dili kita makalingkawas sa responsibilidad. Ang pagbasol sa atong mga sala ngadto sa Ginoo, nga mag-ingon nga kinaiya na kini ug dili makontrolar, maoy makaulaw ug tinalawan. Ang pagbasol sa atong mga sala diha sa atong mga ginikanan ug sa paagi sa pagpadako kanato mao ang paagi sa paglikay sa responsibilidad. Mahimo nga mapakyas ang mga ginikanan sa usa ka tawo; ang ato mismong mga giagian mahimo nga makapahigawad, apan isip mga anak sa buhi nga Dios may gahum kita sa atong mga kaugalingon nga molabaw pa kay sa atong mga kahimtang, aron sa pag-usab sa atong mga kinabuhi.²⁴

Nangamuyo kami sa atong katawhan sa bisan hain nga dapit, “Busa magpasakop kamo nga masinugtanon sa Dios; apan sukli ninyo ang yawa, ug kini siya mokaratil pagdalagan gikan kaninyo.” (Santiago 4:7.) …

Tingali adunay pipila nga mibati og dakong kabalaka tungod sa mga kahimtang sa kalibutan ug nagkadaghan nga hulga sa kadautan, apan ang Ginoo nag-ingon, “… kon kamo andam dili kamo mahadlok” (D&P 38:30), ug usab, “Kaninyo ibilin ko ang kalinaw. … Kinahanglan dili magkaguol ang inyong kasingkasing, ni magtalaw.” (Juan 14:27.)²⁵

Isip mga Santos sa Ulahing mga Adlaw kinahanglan gayud nga magmabinantayon kita kanunay. Ang paagi alang sa kada tawo ug kada pamilya nga makabantay batok sa mga pagtintal sa Kaaway ug sa pagpangandam alang sa mahinungdanon nga adlaw sa Ginoo mao ang pagkupot og maayo sa gunitanan nga puthaw, batonan ang mas hugot pa nga pagtuo, paghinulsol sa atong mga kasal-anan ug mga pagkulang, ug matinguhaon nga moapil sa pagtrabaho sa Iyang gingharian sa yuta, nga mao ang Ang Simbahan ni Jesukristo sa mga Santos sa Ulahing mga Adlaw. Ania dinhi ang bugtong tinuod nga kalipay alang sa tanang mga anak sa Amahan.²⁶

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–xi.

Hain nga mga patulun-an ni Presidente Kimball mahitungod ni Satanas ug sa iyang mga paagi ang makit-an ninyo nga makatabang ug ngano? (Tan-awa sa mga pahina 129–132.)
Ribyuha ang nagsugod nga seksyon diha sa pahina 133. Sa unsa nga mga paagi makatabang ang Ginoo kanato nga makabarug sa dautan? (Alang sa ehemplo, tan-awa ang istorya sa pahina 129.) Kanus-a ka nakadawat niining matang sa panabang?
Basaha ang sulugilanon [fable] diha sa pahina 135. Ngano sa inyong hunahuna nga ang biyahero mitugot sa kamilyo pagsulod sa iyang tolda? Hunahunaa kon giunsa sa Manluluwas pagbatok sa pagtintal (tan-awa sa mga pahina 135–136). Unsa ang pipila ka mga paagi nga makatabang ang mga ginikanan sa ilang mga anak nga makaila ug makabatok sa bisan pinakagamay nga mga pagtintal?
Ribyuha ang ikaduhang tibuok nga paragrap diha sa pahina 137. Ikompara ang paagi sa pagpugong sa sala uban sa paagi niini sa paghinulsol.
Si Presidente Kimball miingon, “Ang husto nga desisyon maoy pinakasayon nga himoon kon gipangandaman na natong daan” (pahina 137). Sa unsa unta nga paagi ang atong mga kinabuhi maapektuhan sa sayo nga mga desisyon aron paghupot sa ingon nga kasugoan sama sa Pulong sa Kaalam? (Sama pananglit, tan-awa sa pahina 137.) Unsay pipila ka mga desisyon nga may kalabutan sa pagsunod sa ebanghelyo nga hugot nimong gibarugan?
Hunahunaa ang namatikdan ni Presidente Kimball mahitungod sa iyang mga baboy ug sa iyang baka (pahina 138–139). Unsay atong maani sa pag-ila sa atong mga kahuyang ug sa pagdawat sa responsibilidad mahitungod niini?

May Kalabutan nga mga Kasulatan: 1 Mga Taga-Corinto 10:13; 1 Nephi 15:23–25; Helaman 5:12; Ether 12:27; D&P 10:5