Talateú
Kuo fokotuʻu ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻū tohi ko e Ngaahi Akonaki ʻa e Kau Palesiteni ʻo e Siasí ke tokoni atu ke ke toe ofi ange ai ki Hoʻo Tamai Hēvaní pea mo fakaloloto hoʻo mahino ki he ongoongolelei ʻo Sīsū Kalaisi kuo toe fakafoki maí. ʻI he toe tānaki atu ʻe he Siasí ha ʻū tohi ki he hokohoko ko ʻení, te ke tātānaki leva ia hoʻo ʻū tohi ʻo e ongoongoleleí ki ho ʻapí. ʻOku fakataumuʻa e ʻū tohi ko ʻení ke fakaʻaongaʻi ki he ako fakatāutahá pea mo e lēsoni ʻo e Sāpaté. ʻE lava ke nau tokoni atu ki hoʻo teuteu lēsoni kehé mo tali ha ngaahi fehuʻi fekauʻaki mo e tokāteline ʻo e Siasí.
ʻOku ʻoatu ʻi he tohí ni e ngaahi akonaki ʻa Palesiteni ʻEselā Tafu Penisoni, naʻe hoko ko e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mei he ʻaho 10 ʻo Nōvema 1985, ki he ʻaho 30 ʻo Mē 1994.
Ako Fakatāutahá
ʻI hoʻo ako ʻa e ngaahi akonaki ʻa Palesiteni ʻEselā Tafu Penisoní, fekumi ʻi he faʻa lotu ki he ueʻi ʻa e Laumālie Māʻoniʻoní. ʻE tokoni atu ʻa e ngaahi fehuʻi ʻi he ngataʻanga ʻo e vahe takitaha ke ke fakalaulauloto, ke mahino, mo fakaʻaongaʻi ʻa e ngaahi akonaki ʻa Palesiteni Penisoní. ʻE ala tokoni atu ʻa e ngaahi fakakaukau ko ʻení:
-
Hiki ʻa e ngaahi fakakaukau mo e ngaahi ongo ʻoku haʻu kiate koe mei he Laumālie Māʻoniʻoní ʻi hoʻo akó.
-
Laineʻi ʻa e fakamatala ʻokú ke loto ke manatuʻí. Fakakaukau ke ako maʻuloto ʻa e ngaahi fakamatalá ni pe fakaʻilongaʻi ia ʻi hoʻo folofolá ʻi he tafaʻaki ʻo e ngaahi vēsí.
-
Lau tā-tuʻo lahi ha vahe pe potufolofola koeʻuhí ke mahino lelei ange kiate koe.
-
Fai kiate koe ha ngaahi fehuʻi hangē ko ʻení: ʻOku fakalahi fēfē ʻe he ngaahi akonaki ʻa Palesiteni Penisoní ʻeku mahino ki he ngaahi tefitoʻi moʻoni ʻo e ongoongoleleí? Ko e hā ʻoku finangalo ʻa e ʻEikí ke u ako mei he ngaahi akonaki ko ʻení?
-
Vahevahe ʻa e meʻa naʻá ke akó mo e kau mēmipa ʻo e fāmilí mo e kaungāmeʻá.
-
Fehuʻi pē kiate koe pe ʻe tokoniʻi fēfē koe ʻe he ngaahi akonaki ʻi he tohí ni ʻi ho ngaahi faingataʻaʻia fakatāutahá mo ha ngaahi meʻa ʻokú ke hohaʻa ki ai.
Ko e Faiako mei he Tohi Ko ʻEní
Kuo fakataumuʻa e tohí ni ke fakaʻaongaʻi ʻi ʻapi pea ʻi he lotú. ʻE lava ke tokoni atu e ngaahi fakahinohino ko ʻení ke ke faiako mei he tohí.
Teuteu ke Faiakó
Fekumi ki he fakahinohino ʻa e Laumālie Māʻoniʻoní ʻi hoʻo teuteu ke faiakó. Ako ʻi he faʻa lotu ʻa e vahé ke ke ʻiloʻi fakapapau ʻoku mahino kiate koe ʻa e ngaahi akonaki ʻa Palesiteni Penisoní. Te ke faiako ʻi he loto fakamātoato mo mālohi lahi ange ʻi he taimi kuo takiekina fakatāutaha ai koe ʻe heʻene ngaahi leá (vakai, T&F 11:21).
Kapau ʻokú ke akoʻi ha lēsoni ʻa e Lakanga Taulaʻeiki Faka-Melekisētekí pe Fineʻofá, ʻoku totonu ke ʻoua naʻá ke tuku e tohí ni ki tafaʻaki pe teuteu ha lēsoni mei ha toe nāunau kehe. Filifili ʻi he faʻa lotu mei he vahé, ʻa e ngaahi akonaki ko ia ʻokú ke ongoʻi ʻe ʻaonga taha ki hoʻo kalasí. ʻOku ʻi ai ha ngaahi vahe ʻe niʻihi ʻoku hulutuʻa e nāunau ia aí ke lava ʻo akoʻi lolotonga e taimi kalasí.
Poupouʻi ʻa e kau akó ke nau ako ʻa e vahé, kimuʻa ʻi he lēsoní pea ke nau ōmai mo e tohí. Ko e taimi te nau fai ai iá, te nau mateuteu lelei ange ai ke kau ʻi he ngaahi fealēleaʻakí mo fefakamaamaʻaki.
ʻI hoʻo teuteu ke faiakó, tokanga makehe ki he “Ngaahi Fokotuʻu ki he Akó mo e Akoʻí” ʻi he fakaʻosinga ʻo e vahe takitaha. Te ke maʻu ʻi he ʻuluʻitohi ko ʻení ha ngaahi fehuʻi, ngaahi potufolofola fekauʻaki, mo ha tokoni ʻi he akó pe tokoni fakafaiakó. ʻOku fekauʻaki fakahangatonu ʻa e ngaahi fehuʻí mo e ngaahi potufolofola fekauʻakí mo e vahe ʻoku maʻu ai kinautolú. ʻE lava ʻa e ngaahi tokoni ke akó mo e ngaahi tokoni fakafaiakó ʻo tokoni atu ʻi hoʻo feinga ke ako mo moʻui ʻaki ʻa e ongoongoleleí.
Fakafeʻiloaki ʻa e Vahé
ʻI hoʻo fakafeʻiloaki ʻa e vahé, pea ʻi he lēsoní kakato, feinga ke fokotuʻu ha ʻātakai ʻa ia ʻe lava ai ke ueʻi ʻe he Laumālié ʻa e loto mo e ʻatamai ʻo kinautolu ʻokú ke akoʻí. Ke kamata e lēsoní, tokoniʻi kinautolu ʻokú ke akoʻí ke nau tokanga taha ki he ngaahi akonaki ʻi he vahé. Te ke lava ʻo fakaʻaongaʻi ha taha pe toe lahi ange ʻo e ngaahi fakakaukau ko ʻení:
-
Lau pea aleaʻi e konga ʻi he kamataʻanga ʻo e vahé ko e “Mei he Moʻui ʻa ʻEselā Tafu Penisoní.”
-
Aleaʻi ha fakatātā pe potufolofola mei he vahé.
-
Hivaʻi fakataha ha himi ʻoku fekauʻaki.
-
Vahevahe nounou mo kinautolu ha meʻa naʻá ke aʻusia fakatāutaha fekauʻaki mo e tefitó.
Poupouʻi e Fealēleaʻaki kau ki he Ngaahi Akonaki ʻa Palesiteni Penisoní
ʻI hoʻo faiako mei he tohí ni, fakaafeʻi ha niʻihi kehe ke nau ʻoatu ʻenau ngaahi fakakaukaú, fai ha ngaahi fehuʻi pea mou feakoʻiʻaki. Ko e taimi ʻoku nau kau longomoʻui atu aí, te nau toe mateuteu ange ai ke ako mo maʻu ha fakahā fakatāutaha. Tuku ke hokohoko atu e ngaahi fealēleaʻaki ʻoku leleí kae ʻoua naʻá ke feinga pē ke akoʻi kotoa e ngaahi akonakí. Ke poupouʻi ʻa e fealēleaʻakí, fakaʻaongaʻi e ngaahi fehuʻi ʻi he fakaʻosinga ʻo e vahé takitaha. ʻE lava ke ke faʻu pē ʻe koe haʻo ngaahi fehuʻi, ʻo fakafeʻunga ki he niʻihi ʻokú ke akoʻí.
ʻE ʻoatu ʻe he ngaahi meʻa ko ʻeni ke fili mei aí ha toe ngaahi fakakaukau lahi ange:
-
Kole ki he kau akó ke nau vahevahe ʻa e meʻa ne nau ako mei heʻenau ako fakatāutaha ʻo e vahé. ʻE tokoni ke ke fetuʻutaki ki ha niʻihi ʻo e kau akó he lolotonga e uiké ʻo kole ange ke nau ō mai kuo nau mateuteu ke vahevahe ʻa e meʻa ne nau akó.
-
Vahe ki he niʻihi ʻe fie kaú, ha ngaahi fehuʻi kuo filifili mei he fakaʻosinga ʻo e vahé (fakatāutaha pe fakakulupu). Kole ange ke nau kumi ʻa e ngaahi akonaki ʻi he vahé ʻoku fekauʻaki mo e ngaahi fehuʻí. Pea fakaafeʻi kinautolu ke nau vahevahe ʻenau ngaahi fakakaukaú mo ʻenau ʻiló.
-
Lau fakataha ha niʻihi ʻo e ngaahi akonaki ʻa Palesiteni Penisoni ʻi he vahé. Kole ki he kau akó ke nau vahevahe ha ngaahi sīpinga mei he folofolá pea mei heʻenau ngaahi aʻusiá ʻokú ne fakahaaʻi ʻa e ngaahi akonaki ko iá.
-
Kole ki he kau akó ke nau fili ha konga ʻe taha pea lau fakalongolongo ia. Fakaafeʻi kinautolu ke nau fakakulupu ʻo tautau toko ua pe toko tolu mo e kakai ne nau fili ʻa e konga tataú pea nau aleaʻi e meʻa kuo nau akó.
Poupouʻi e Fevahevaheʻakí mo hono Fakahokó
ʻE mahuʻingamālie ange ʻa e ngaahi akonaki ʻa Palesiteni Penisoní ki he kau ako ʻoku nau vahevahe ia mo ha niʻihi pea mo fakaʻaongaʻi kinautolu ʻi heʻenau moʻuí. Te ke lava ʻo fakaʻaongaʻi ha taha ʻo e ngaahi fakakaukau ko ʻení pe toe lahi ange:
-
Kole ki he kau akó pe te nau fakaʻaongaʻi fēfē e ngaahi akonaki ʻa Palesiteni Penisoní ʻi honau ngaahi fatongia ʻi ʻapí pea ʻi he Siasí. Hangē ko ʻení, te ke lava ʻo tokoni ke nau fakalaulauloto mo aleaʻi ha founga te nau lava ai ʻo fakaʻaongaʻi ʻa ʻene ngaahi akonakí, ko e ngaahi husepāniti, ngaahi uaifi, ngaahi mātuʻa, ngaahi foha, ʻofefine, kau faiako fakaʻapi, pe kau faiako ʻaʻahi.
-
Poupouʻi e kau akó ke nau vahevahe ha niʻihi ʻo e ngaahi akonaki ʻa Palesiteni Penisoní mo e kau mēmipa ʻo e fāmilí mo e ngaahi kaungāmeʻá.
-
Fakaafeʻi ʻa e kau akó ke nau fakahoko e meʻa kuo nau akó pea vahevahe ʻenau ngaahi aʻusiá ʻi he kamataʻanga ʻo e kalasi hokó.
Fakaʻosi e Fealēleaʻakí
Fakamāʻopoʻopo nounou pē ʻa e lēsoní pe kole ki ha toko taha pe toko ua ke nau fakahoko ia. Fakamoʻoni ange ʻa e ngaahi akonaki kuo mou aleaʻí. ʻE lava foki ke ke fakaafeʻi ha niʻihi kehe ke vahevahe ʻenau fakamoʻoní.
Fakamatala ki he Ngaahi Maʻuʻanga Fakamatala ʻOku Fakaʻaongaʻi ʻi he Tohi Ko ʻení
ʻOku toʻo hangatonu ʻa e ngaahi akonaki ʻi he tohi ko ʻení mei he ngaahi malanga, fakamatala, tohi, mo e ngaahi tohinoa ʻa Palesiteni ʻEselā Tafu Penisoní. Ko e ngaahi toʻo hangatonu mei he ngaahi meʻa kuo pulusí ʻoku kei tauhi pē ʻa e ngaahi fakaʻilonga leá, sipelá, mo e fakapalakalafí ʻo e ngaahi maʻuʻanga tokoni totonú tuku kehe kapau kuo fakangofua ha liliu fakaʻētita pe fakataipe ke lelei ange hono laú. ʻI he ʻuhingá ni, te ke fakatokangaʻi ha fanga kiʻi faikehekehe siʻi ʻi he tohí. Hangē ko ʻení, ko e ngaahi lea fetongi-nauna ki he ʻOtuá, ʻoku mataʻi tohi siʻi ʻi ha ngaahi toʻo fakahangatonu ʻe niʻihi pea mataʻi tohi lahi ʻi he niʻihi.
ʻIkai ngata aí, naʻe faʻa fakaʻaongaʻi ʻe Palesiteni Penisoni ha ngaahi foʻi lea hangē ko e kakai tangatá, tangatá, pe faʻahinga ʻo e tangatá ʻo ʻuhinga ki he kakai kotoa pē, tatau pē tangata mo e fefine. Naʻá ne faʻa fakaʻaongaʻi ʻa e fetongi nauna ne, ʻene, mo e ia ʻo fakatou ʻuhinga ki he tangatá mo e fefiné fakatouʻosi. Naʻe angamaheni ʻaki ʻeni ʻi he leá ʻi hono kuongá. Neongo e ngaahi faikehekehe ʻi he ngaahi lea ko ʻení mo e fakaʻaongaʻi lolotongá, ka ʻoku fakatou kaunga pē ngaahi akonaki ʻa Palesiteni Penisoní kia fafine mo tangata fakatouʻosi.