Kapitulo 3: Leksiyon 3—Ang Ebanghelyo ni Jesukristo
“Kapitulo 3: Leksiyon 3—Ang Ebanghelyo ni Jesukristo,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Kapitulo 3: Leksiyon 3,” Isangyaw ang Akong Ebanghelyo
Kapitulo 3: Leksiyon 3
Ang Ebanghelyo ni Jesukristo
Imahe
Ang Ikaduhang Pag-anhi, ni Harry Anderson
Ang mga Tawo Mahimong Maghunahuna
Kinsa si Jesukristo? Sa unsang paagi nga Siya makatabang kanako ug sa akong pamilya?
Unsa man ang buot ipasabot sa pagbaton og hugot nga pagtuo diha kang Jesukristo? Sa unsang paagi nga ang pagbaton og hugot nga pagtuo Kaniya makapanalangin sa akong kinabuhi?
Unsay buot ipasabot sa paghinulsol?
Unsaon nako nga mabati ang kalinaw ug kapasayloan sa Dios human nga nakahimo ko og dili maayo nga mga pagpili?
Unsa ang katuyoan sa bunyag?
Unsa ang gasa sa Espiritu Santo?
Unsay buot ipasabot nga molahutay hangtod sa kataposan?
Ang ebanghelyo ni Jesukristo mao ang paagi nga kita makaduol ngadto kang Kristo. Yano kaayo kini nga ang usa ka bata makasabot niini. Kini nga leksiyon nagtutok sa ebanghelyo ug doktrina ni Kristo, lakip na sa hugot nga pagtuo diha ni Jesukristo, paghinulsol, bunyag, sa gasa sa Espiritu Santo, ug paglahutay hangtod sa kataposan. Nagtutok usab kini kon sa unsang paagi nga ang ebanghelyo makapanalangin sa tanan nga mga anak sa Dios.
Ang pulong nga ebanghelyo literal nga nagpasabot nga “maayong balita.” Ang ebanghelyo ni Jesukristo mao ang maayo nga balita tungod kay naghatag kini sa doktrina—ang mahangtoron nga mga kamatuoran—nga atong gikinahanglan aron moduol ngadto Kaniya ug maluwas (tan-awa sa 1 Nephi 15:14). Ang ebanghelyo nagtudlo kanato kon unsaon sa pagpakabuhi og maayo, makahuloganon nga mga kinabuhi. Ang maayong balita sa ebanghelyo naghatag sa paagi aron kita mapasaylo sa mga sala, mabalaan, ug makabalik ngadto sa presensiya sa Dios.
Mga Sugyot alang sa Pagtudlo
Kini nga seksiyon naghatag og usa ka sampol nga latid aron sa pagtabang kanimo nga makaandam sa pagtudlo. Naglakip usab kini sa mga ehemplo sa mga pangutana ug mga imbitasyon nga mahimo nimong gamiton.
Samtang mangandam ka sa pagtudlo, mainampoon nga mokonsidear sa sitwasyon ug sa mga espirituhanong panginahanglan sa matag tawo. Desisyoni kon unsa ang labing makatabang nga itudlo. Pag-andam sa paghatag og kahulogan sa mga termino nga lagmit dili masabtan sa mga tawo. Pagplano sumala kon unsa ka taas ang imong oras, maghinumdom nga himoong mubo ang mga leksiyon.
Pagpili og mga kasulatan nga magamit samtang kamo magtudlo. Ang seksiyon nga “Sukaranan nga Doktrina” sa leksiyon naglakip og daghang makatabang nga mga kasulatan.
Ikonsiderar kon unsa ang mga ipangutana samtang ikaw magtudlo. Planoha ang mga imbitasyon nga ihatag nga makadasig sa matag tawo sa pagbuhat.
Hatagi og gibug-aton ang gisaad nga mga panalangin sa Dios, ug ipakigbahin ang inyong pagpamatuod sa unsay inyong gitudlo.
Imahe
mga misyonaryo nga nagtudlo sa pamilya
Unsa Kaha ang Inyong Itudlo sa mga Tawo sulod sa 15–25 Minutos
Pagpili og usa o dugang pa sa mosunod nga mga baroganan nga itudlo. Ang sukaranan nga doktrina alang sa matag baroganan gihatag human niini nga latid.
Ang Balaan nga Misyon ni Jesukristo
Ang Dios mipadala sa Iyang Hinigugmang Anak, si Jesukristo, dinhi sa yuta aron sa pagtubos kanato gikan sa sala ug kamatayon.
Tungod sa maulaong sakripisyo ni Jesus, kita mahimong malimpyohan sa atong mga sala ug mabalaan kon kita maghinulsol.
Human nga si Jesus gilansang sa krus, Siya nabahanhaw. Tungod sa Iyang Pagkabanhaw, kitang tanan mabanhaw human kita mamatay. Kini nagpasabot nga ang matag espiritu ug lawas sa tawo mahiusa pag-usab, ug ang matag usa kanato mabuhi hangtod sa kahangtoran diha sa usa ka hingpit, nabanhaw nga lawas.
Hugot nga Pagtuo diha ni Jesukristo
Ang hugot nga pagtuo mao ang unang baroganan sa ebanghelyo ni Jesukristo.
Ang hugot nga pagtuo diha ni Jesukristo naglakip sa pagbaton og pagsalig nga Siya mao ang Anak sa Dios ug pagsalig Kaniya isip atong Manluluwas ug Manunubos.
Ang hugot nga pagtuo diha ni Jesukristo usa ka baroganan sa buhat ug gahom.
Atong mapalig-on ang atong hugot nga pagtuo pinaagi sa pag-ampo, pagtuon sa mga kasulatan, ug pagtuman sa mga sugo.
Paghinulsol
Ang hugot nga pagtuo diha ni Jesukristo modala kanato sa paghinulsol. Ang paghinulsol mao ang proseso sa pagdangop ngadto sa Dios ug sa pagpalayo gikan sa sala. Samtang kita maghinulsol, ang atong mga lihok, mga tinguha, ug mga hunahuna mausab aron mahimong mas mahiuyon sa kabubut-on sa Dios.
Kon tinuoray ang atong paghinulsol, ang Dios mopasaylo kanato. Ang kapasayloan posible tungod kay si Jesukristo miula alang sa atong mga sala.
Samtang kita maghinulsol, mobati kita og kalinaw samtang ang atong pagbati nga sad-an ug kaguol mamaayo.
Ang paghinulsol usa ka tibuok kinabuhi nga proseso. Ang Dios mohangop kanato og balik sa matag higayon nga kita maghinulsol. Dili gayod Siya mohunong sa pagpaabot kanato.
Bunyag: Atong Unang Pakigsaad sa Dios
Ang bunyag mao ang paagi nga kita unang mosulod og usa ka pakigsaad nga relasyon sa Dios.
Ang bunyag adunay duha ka bahin: bunyag pinaagi sa tubig ug pinaagi sa Espiritu. Kon kita mabunyagan ug makompirmahan, malimpyohan kita sa atong mga sala, nga maghatag kanato og bag-ong pagsugod sa kinabuhi.
Bunyagan kita pinaagi sa pagpaunlod, nga nagsunod sa ehemplo ni Jesus.
Ang mga bata dili bunyagan hangtod nga sila mag-otso anyos. Ang mga bata nga mamatay sa wala pa niana nga edad matubos pinaagi sa Pag-ula ni Jesukristo.
Moambit kita sa sakramento matag semana agi og paghinumdom sa sakripisyo ni Jesus ug aron sa pagbag-o sa atong mga pakigsaad sa Dios.
Ang Gasa sa Espiritu Santo
Ang Espiritu Santo mao ang ikatulong sakop sa Dios nga Kapangulohan.
Human kita mabunyagan, kita modawat sa gasa sa Espiritu Santo pinaagi sa ordinansa nga gitawag og kompirmasyon.
Kon kita makadawat sa gasa sa Espiritu Santo, kita mahimong makabaton sa Iyang panag-uban sa tibuok natong kinabuhi kon kita matinud-anon.
Ang Espiritu Santo mobalaan kanato, mogiya kanato, mohupay kanato, ug motabang kanato nga masayod sa kamatuoran.
Molahutay hangtod sa Kataposan
Ang paglahutay naglakip sa pagpadayon sa pagpakita og hugot nga pagtuo kang Kristo sa matag adlaw. Kita magpadayon sa pagtuman sa atong mga pakigsaad sa Dios, maghinulsol, magtinguha sa panag-uban sa Espiritu Santo, ug moambit sa sakramento.
Kon kita matinud-anong magtinguha sa pagsunod ni Jesukristo, ang Dios nagsaad nga makabaton kita og kinabuhi nga dayon.
Ang Ebanghelyo ni Jesukristo Nagpanalangin sa Tanang Anak sa Dios
Ang pagsunod sa ebanghelyo makapadako sa atong kalipay, makapadasig sa atong mga lihok, ug makapalambo sa atong mga relasyon.
Kita lagmit magmalipayon—isip mga indibidwal ug isip mga pamilya—kon kita magsunod sa mga pagtulon-an ni Jesukristo.
Pinaagi sa ebanghelyo ni Jesukristo, ang mga pamilya mapanalanginan niini nga kinabuhi ug mahimong mahiusa alang sa kahangtoran ug magpuyo diha sa presensiya sa Dios.
Mga Pangutana nga Mahimo Ninyong Ipangutana sa mga Tawo
Ang mosunod nga mga pangutana mao ang mga ehemplo sa unsay mahimo ninyong ipangutana sa mga tawo. Kini nga mga pangutana makatabang kanimo nga makabaton og makahuluganon nga mga panag-estoryahanay ug makasabot sa mga panginahanglan ug panglantaw sa tawo.
Unsa ang imong nahibaloan mahitungod ni Jesukristo?
Unsa man ang buot ipasabot nganha kanimo nga magbaton og hugot nga pagtuo diha ni Jesukristo?
Unsa nga mga kausaban ang gusto nimong himoon sa imong kinabuhi?
Unsa ang imong nasabtan sa paghinulsol?
Unsa ang imong nasabtan sa bunyag? Unsa ang imong mahimo karon aron mangandam alang sa bunyag?
Sa unsang paagi nga ang Espiritu Santo nagtabang kanimo sa imong panaw nga mobalik ngadto sa presensiya sa Dios?
Unsa ang usa ka hagit nga giatubang nimo o sa imong pamilya? Mahimo ba kaming mopakigbahin og pipila ka paagi nga makatabang ang ebanghelyo ni Jesukristo?
Mga Imbitasyon nga Mahimo Ninyong Ipadangat
Ipangutana ba nimo sa Dios pinaagi sa pag-ampo aron matabangan ka nga masayod nga ang unsay among gitudlo tinuod? (Tan-awa sa “Mga Panabot sa Pagtudlo: Pag-ampo” sa kataposan nga seksiyon sa leksiyon 1.)
Mosimba ka ba karong Dominggo aron makakat-on og dugang mahitungod sa unsay among gitudlo?
Basahon ba nimo ang Basahon ni Mormon ug mag-ampo aron masayod nga kini mao ang pulong sa Dios? (Mahimo nimong isugyot ang piho nga mga kapitulo o mga bersikulo.)
Mahimo ba kami nga motakda og panahon alang sa among sunod nga pagbisita?
Sukaranan nga Doktrina
Kini nga seksiyon naghatag sa doktrina ug mga kasulatan nga imong tun-an aron sa pagpalig-on sa imong kahibalo ug pagpamatuod sa ebanghelyo ug sa pagtabang kanimo sa pagtudlo.
Imahe
These Twelve Jesus Sent Forth [Kining Napulog Duha Gipadala ni Jesus], ni Walter Rane
Ang Balaan nga Misyon ni Jesukristo
Ang Langitnong Amahan mipadala sa Iyang Hinigugmang Anak, si Jesukristo, nganhi sa yuta aron mahimong posible alang kanatong tanan nga makasinati og hingpit nga kalipay niini nga kalibotan ug sa kinabuhi nga dayon sa umaabot nga kalibotan. “Ug kini mao ang ebanghelyo, ang maayo nga mga balita, … nga [si Jesukristo] mianhi sa kalibotan, [aron] mag-antos sa mga sala sa kalibotan, ug magbalaan sa kalibotan, ug sa paghugas niini gikan sa tanan nga dili matarong; nga pinaagi kaniya ang tanan unta maluwas” (Doktrina ug mga Pakigsaad 76:40–42).
Isip mga mortal, kitang tanan makasala, ug kitang tanan mamatay. Ang sala ug kamatayon mopugong kanato sa pagbaton og kinabuhi nga dayon uban sa Dios gawas kon kita adunay usa ka Manunubos (tan-awa sa 2 Nephi 9). Sa wala pa gilalang ang kalibotan, ang Langitnong Amahan mipili kang Jesukristo aron sa pagtubos kanato. Sa usa ka labing taas nga pagpadayag sa gugma, si Jesus mianhi sa yuta ug mituman sa iyang balaanon nga misyon. Gihimo Niya nga posible alang kanato nga matubos gikan sa atong mga sala, ug Iyang giseguro nga kitang tanan mabanhaw human kita mamatay.
Si Jesukristo nagpuyo og usa ka kinabuhi nga walay sala. Sa kataposan sa iyang mortal nga pangalagad, gidala Niya sa Iyang Kaugalingon ang atong mga sala pinaagi sa Iyang pag-antos didto sa Getsemani ug sa dihang Siya gilansang sa krus (tan-awa sa 1 Nephi 11:33). Ang pag-antos ni Jesus grabe kaayo nga kini nakapahimo Kaniya “sa pagkurog tungod sa kasakit, ug sa pag-agas sa dugo sa matag lungag sa panit (Doktrina ug mga Pakigsaad 19:18). Human sa Iyang Paglansang sa Krus, si Jesus nabanhaw, nakaangkon og kadaogan batok sa kamatayon. Magkauban, kini nga mga panghitabo mao ang Pag-ula ni Jesukristo.
Ang atong mga sala makapahimo kanato nga dili limpyo sa espirituwal nga paagi, ug “walay mahugaw nga butang nga makapuyo uban sa Dios” (1 Nephi 10:21). Agig dugang, ang balaod sa kaangayan nagkinahanglan og sangpotanan alang sa atong mga sala.
Ang maulaong sakripisyo ni Jesus naghatag sa paagi nga kita malimpyohan sa sala ug mabalaan kon kita maghinulsol. Kini usab naghatag sa paagi sa pagtagbaw sa mga gipangayo sa kaangayan (tan-awa sa Alma 42:15, 23–24). Ang Manluluwas miingon, “Ako … nag-antos niini nga mga butang alang sa tanan, nga sila unta dili mag-antos kon sila maghinulsol; apan kon dili sila maghinulsol sila kinahanglan gayod nga mag-antos sama kanako” (Doktrina ug mga Pakigsaad 19:16–17). Kon dili pa tungod ni Jesukristo, ang sala motapos unta sa tanang paglaom alang sa usa ka umaabot nga pagpakabuhi uban sa Langitnong Amahan.
Sa paghalad sa Iyang Kaugalingon isip usa ka sakripisyo alang kanato, si Jesus wala mowagtang sa atong personal nga responsibilidad. Gikinahanglan natong magbaton og hugot nga pagtuo Kaniya, maghinulsol, ug maningkamot nga motuman sa mga sugo. Samtang kita maghinulsol, si Jesus moangkon alang kanato sa Iyang mga katungod sa kaluoy sa Iyang Amahan (tan-awa sa Moroni 7:27–28). Tungod sa pagpataliwala sa Manluluwas, ang Langitnong Amahan mopasaylo kanato, nga mohupay kanato sa kabug-at ug pagbati nga sad-an sa atong mga sala (tan-awa sa Mosiah 15:7–9). Espirituwal kitang malimpyohan ug sa kataposan mahimong hangopon ngadto sa presensiya sa Dios.
Ang balaanon nga misyon ni Jesus mao usab ang pagluwas kanato gikan sa kamatayon. Tungod kay Siya nabanhaw, kitang tanan mabanhaw human kita mamatay. Kini nagpasabot nga ang matag espiritu ug lawas sa tawo mahiusa pag-usab, ug ang matag usa kanato mabuhi hangtod sa kahangtoran diha sa usa ka hingpit, nabanhaw nga lawas. Kon dili pa tungod ni Jesukristo, ang kamatayon motapos unta sa tanang paglaom alang sa usa ka umaabot nga pagpakabuhi uban sa Langitnong Amahan.
Tan-awa sa Ang Giya ngadto sa mga Kasulatan: “Jesukristo”
Hugot nga Pagtuo diha ni Jesukristo
Ang unang baroganan sa ebanghelyo mao ang hugot nga pagtuo diha ni Ginoong Jesukristo. Ang hugot nga pagtuo mao ang pundasyon alang sa tanan nga ubang baroganan sa ebanghelyo.
Ang hugot nga pagtuo diha ni Jesukristo naglakip sa pagbaton og pagsalig nga Siya mao ang Bugtong nga Anak sa Dios. Naglakip kini sa pagsalig Kaniya isip atong Manluluwas ug Manunubos—nga Siya lamang ang atong paagi nga makabalik ngadto sa presensiya sa Dios (tan-awa sa Mga Buhat 4:10–12; Mosiah 3:17; 4:6–8). Giimbitar kita nga magpakita og “dili matarog nga hugot nga pagtuo diha kaniya, mosalig sa hingpit diha sa mga maayo nga buhat kaniya kinsa gamhanan sa pagluwas” (2 Nephi 31:19).
Ang hugot nga pagtuo diha ni Jesukristo naglakip sa pagtuo nga Siya miantos alang sa atong mga sala diha sa Iyang maulaon nga sakripisyo. Tungod sa iyang sakripisyo, kita malimpyohan ug matubos kon kita maghinulsol. Kini nga paglimpyo makatabang kanato nga makakaplag og kalinaw ug paglaom niini nga kinabuhi. Kini nagtugot usab kanato nga makadawat og kahingpitan sa kalipay human kita mamatay.
Ang hugot nga pagtuo diha ni Jesukristo naglakip sa pagsalig nga pinaagi Kaniya, kitang tanan mabanhaw human kita mamatay. Kini nga hugot nga pagtuo makasuporta ug makahupay kanato sa mga panahon nga mamatyan. Ang kasubo sa kamatayon mahimong mawagtang pinaagi sa saad sa Pagkabanhaw.
Ang hugot nga pagtuo diha ni Jesukristo naglakip sa pagtuo ug pagsalig nga gidala Niya sa Iyang Kaugalingon ang atong mga kasakit ug mga kahuyang (tan-awa sa Isaias 53:3–5). Siya nasayod pinaagi sa Iyang kasinatian kon unsaon nga maluluy-ong mosuporta kanato latas sa mga hagit sa kinabuhi (tan-awa sa Alma 7:11–12; Doktrina ug mga Pakigsaad 122:8). Kon kita magpakita og hugot nga pagtuo, Siya motabang kanato nga mopadayon sa unahan latas sa mga kalisod.
Pinaagi sa atong hugot nga pagtuo Kaniya, si Jesus makaayo kanato, sa pisikal ug sa espirituwal nga paagi. Kanunay Siya nga andam sa pagtabang kanato samtang kita naghinumdom sa Iyang imbitasyon nga “paghunahuna ngari kanako sa matag hunahuna; ayaw pagduha-duha, ayaw kahadlok” (Doktrina ug mga Pakigsaad 6:36).
Usa ka Baroganan sa Lihok ug Gahom
Ang hugot nga pagtuo diha ni Jesukristo mosangpot sa lihok. Kita mopahayag sa atong hugot nga pagtuo pinaagi sa pagtuman sa mga sugo ug sa pagbuhat og maayo matag adlaw. Kita maghinulsol sa atong mga sala. Kita maunongon ngadto Kaniya. Kita maningkamot nga mas mahisama Kaniya.
Samtang magpakita kita og hugot nga pagtuo, makasinati kita sa gahom ni Jesus sa atong inadlaw-adlaw nga mga kinabuhi. Siya mopadako sa atong kaugalingong labing maayo nga mga paningkamot. Siya motabang kanato nga molambo ug mobatok sa tintasyon.
Pagpalig-on sa Atong Hugot nga Pagtuo
Si propeta Alma mitudlo nga ang pagpalambo og hugot nga pagtuo mahimong magsugod sa usa ka yano nga “pagtinguha sa pagtuo” (Alma 32:27). Dayon, aron motubo ang atong hugot nga pagtuo diha ni Jesukristo, gikinahanglan natong amumahon kini pinaagi sa pagkat-on sa Iyang mga pulong, paggamit sa Iyang mga pagtulon-an, ug pagsunod sa Iyang mga sugo. Si Alma mitudlo nga kon kita mapailobon, makugihon nga moamuma sa pulong sa Dios sa atong mga kasingkasing, “kini mogamot, ug [mahimong sama sa] usa ka kahoy magtubo ngadto sa kinabuhi nga walay kataposan”—sa ingon nagpalig-on sa atong hugot nga pagtuo (Alma 32:41; tan-awa sa mga bersikulo 26–43).
Ang paghinulsol mao ang ikaduhang baroganan sa ebanghelyo. Ang hugot nga pagtuo diha ni Jesukristo ug ang atong gugma alang Kaniya modala kanato ngadto sa paghinulsol (tan-awa sa Helaman 14:13). Ang paghinulsol mao ang proseso sa pagdangop ngadto sa Dios ug sa pagpalayo gikan sa sala. Samtang kita maghinulsol, ang atong mga lihok, mga tinguha, ug mga hunahuna mausab aron mahimong mas mahiuyon sa kabubut-on sa Dios. Ang kapasayloan sa sala nahimong posible pinaagi ni Jesukristo ug sa Iyang maulaon nga sakripisyo.
Ang paghinulsol mas labaw pa kaysa pagpakita og determinasyon sa pag-usab sa kinaiya o pagbuntog sa kahuyang. Ang paghinulsol mao ang sinserong pagdangop ngadto kang Kristo, kinsa mohatag kanato sa gahom nga makasinati og usa ka “dako nga kausaban” sa atong mga kasingkasing (Alma 5:12–14). Samtang masinati nato kining kausaban sa kasingkasing, kita matawo pag-usab sa esprituhanong paagi (tan-awa sa Mosiah 27:24–26).
Pinaagi sa paghinulsol, kita makapalambo og lahi nga panglantaw kabahin sa Dios, sa atong mga kaugalingon, ug sa kalibotan. Kita mobati pag-usab sa gugma sa Dios alang kanato isip Iyang mga anak—ug sa gugma sa Manluluwas alang kanato. Ang oportunidad sa paghinulsol mao ang usa sa labing mahinungdanon nga mga panalangin nga gihatag sa Dios kanato pinaagi sa Iyang Anak.
Proseso sa Paghinulsol
Kon kita maghinulsol, atong giila ang atong mga sala ug mobati og tinuod nga pagbasol. Mokumpisal kita sa atong mga sala ngadto sa Dios ug mangayo alang sa Iyang kapasyloan. Ato usab nga ikumpisal ang seryoso kaayo nga mga sala ngadto sa awtorisado nga mga lider sa Simbahan, kinsa mosuporta kanato samtang kita maghinulsol. Buhaton nato ang unsay atong mahimo aron sa paghimo og pagpasig-uli, nga nagpasabot sa pagpaningkamot sa pagkorihir sa mga problema nga gidangatan tungod sa atong mga binuhatan. Ang tinud-anay nga paghinulsol labing maayo nga ikapakita pinaagi sa matarong nga mga binuhatan sulod sa usa ka panahon.
Ang paghinulsol usa ka inadlaw-adlaw nga proseso sa tibuok natong kinabuhi. “Nakasala ang tanan ug nahilayo sa himaya sa Dios” (Mga Taga-Roma 3:23). Kinahanglan nga magpadayon kita sa paghinulsol, maghinumdom nga kita “[maka]sagubang sa tanan tungod sa gahom nga gihatag kana[to] ni Kristo” (Mga Taga-Filipos 4:13). Ang Ginoo miseguro kanato nga, “ingon sa kanunay nga ang akong mga katawhan maghinulsol Ako mopasaylo kanila sa ilang mga kalapasan batok kanako” (Mosiah 26:30).
Mga Panalangin sa Paghinulsol
Ang paghinulsol mao ang usa ka positibo nga baroganan nga magdala og hingpit nga kalipay ug kalinaw. Kini magdala kanato “ngadto sa gahom sa Manunubos, ngadto sa kaluwasan sa [atong] mga kalag” (Helaman 5:11).
Kon kita maghinulsol, ang atong sala ug kaguol mamaayo sa paglabay sa panahon. Mas mabati gayod nato ang impluwensya sa Espiritu. Ang atong tinguha nga mosunod sa Dios mag-anam og kalig-on.
Imahe
Presidente Russell M. Nelson
“Daghan ra kaayo ang nagkonsiderar sa paghinulsol isip silot––usa ka butang nga likayan. … Apan kining pagbati nga gisilotan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarog nga andam mogakos, malaomon ug andam nga moalim, mopasaylo, mohugas, mopalig-on, molimpyo, ug mobalaan kanato” (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67).
Ang hugot nga pagtuo diha ni Kristo ug paghinulsol mag-andam kanato alang sa mga ordinansa sa bunyag ug sa kompirmasyon. Ang bunyag mao ang unang makaluwas nga ordinansa sa ebanghelyo ni Jesukristo. Samtang dawaton nato kining malipayon nga ordinansa sa paglaom, naghimo kita sa atong unang pakigsaad sa Dios.
Ang ordinansa usa ka sagradong buhat o seremonya nga himoon pinaagi sa awtoridad sa pagkapari. Ang pipila ka ordinansa, sama sa bunyag, gikinahanglan sa atong kaluwasan.
Pinaagi sa mga ordinansa, naghimo kita og mga pakigsaad ngadto sa Dios. Kini nga mga pakigsaad sagrado nga mga saad tali nato ug sa Dios. Siya nagsaad sa pagpanalangin kanato kon kita motuman sa atong mga saad ngadto Kaniya. Kinahanglan nga kita adunay lig-on nga pasalig sa pagtuman sa atong mga saad ngadto sa Dios.
Ang Dios mihatag og mga ordinansa ug mga pakigsaad aron sa pagtabang kanato nga moduol ngadto Kaniya ug makabaton ug kinabuhi nga dayon. Samtang kita modawat og mga ordinansa sa pagkapari ug motuman sa may kalabotan nga mga pakigsaad, kita makasinati sa “gahom sa pagka-diosnon” sa atong mga kinabuhi (Doktrina ug mga Pakigsaad 84:20).
Ang Pakigsaad sa Bunyag
Gitudlo sa Manluluwas nga ang bunyag gikinahanglan aron kita makasulod sa gingharian sa langit (tan-awa sa Juan 3:5). Gikinahanglan usab kini aron kita mahimong mga miyembro sa Simbahan ni Jesukristo. Ang atong Manluluwas mipakita og ehemplo pinaagi sa pagpabunyag (tan-awa sa Mateo 3:13–17).
Kon kita mabunyagan ug motuman sa atong pakigsaad, ang Dios nagsaad sa pagpasaylo sa atong mga sala (tan-awa sa Mga Buhat 22:16; 3 Nephi 12:1–2). Kini nga dakong panalangin nahimong posible pinaagi sa maulaong sakripisyo ni Jesukristo, kinsa “[mihigugma kanato], ug pinaagi sa iyang dugo giluwas kita niya sa atong mga sala” (Gipadayag 1:5). Ang Dios nagsaad usab sa pagpanalangin kanato sa pakig-uban sa Espiritu Santo aron kita mahimong mabalaan, magiyahan, ug mahupay.
Sa atong bahin sa pakigsaad sa bunyag, kita nagsaksi nga kita andam sa pagdala diha sa atong mga kaugalingon sa ngalan ni Jesukristo. Kita mosaad usab nga kanunayng mohinumdom Kaniya ug motuman sa Iyang mga sugo. Kita mosaad sa paghigugma ug pagserbisyo sa uban, “sa pagbangotan uban niadto nga nagbangotan; … sa paghupay niadto nga nagkinahanglan sa kahupayan, ug mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9; tan-awa sa mga bersikulo 8–10, 13). Kita mopahayag og determinasyon sa pagserbisyo ni Jesukristo hangtod sa kataposan sa atong mga kinabuhi (tan-awa sa Doktrina ug mga Pakigsaad 20:37; Mosiah 2:17).
Ang atong mga pasalig sa pakigsaad nga adunay kalabotan sa bunyag dako nga responsibilidad. Kini usab makapadasig ug malipayon. Kini magmugna og espesyal nga relasyon tali kanato ug sa Langitnong Amahan diin pinaagi niini Siya padayong mopaabot sa Iyang gugma.
Bunyag Pinaagi sa Pagpaunlod
Si Jesus mitudlo nga gikinahanglan kita mabunyagan pinaagi sa pagpaunlod alang sa kapasayloan sa atong mga sala (tan-awa sa Doktrina ug mga Pakigsaad 20:72–74). Ang bunyag pinaagi sa pagpaunlod nagsimbolo sa kamatayon, paglubong, ug Pagkabanhaw ni Jesukristo (tan-awa sa Mga Taga-Roma 6:3–6).
Ang bunyag pinaagi sa pagpaunlod adunay gamhanan usab nga personal nga simbolismo alang kanato. Kini nagrepresentar sa kamatayon sa atong karaan nga kinabuhi, sa paglubong niana nga kinabuhi, ug sa atong pagkawas diha sa espirituwal nga pagkatawo pag-usab. Sa higayon nga kita mabunyagan, kita magsugod sa proseso sa pagkatawo pag-usab ug mamahimong espirituwal nga mga anak nga lalaki ug mga anak nga babaye ni Kristo (tan-awa sa Mosiah 5:7–8; Mga Taga-Roma 8:14–17).
Mga Bata
Ang mga bata dili bunyagan hangtod nga sila moabot sa edad nga sila aduna nay tulubagon, nga mao ang edad nga walo ka tuig (tan-awa sa Doktrina ug mga Pakigsaad 68:27). Ang mga bata nga mamatay sa wala pa niana nga edad matubos pinaagi sa Pag-ula ni Jesukristo (tan-awa sa Moroni 8:4–24; Doktrina ug mga Pakigsaad 137:10). Sa dili pa bunyagan ang mga bata, kinahanglan nga tudloan sila sa ebanghelyo aron maandam sila alang niining importante nga lakang sa ilang mga kinabuhi nga mohimo og usa ka pakigsaad ngadto sa Dios.
Ang Sakramento
Ang atong Langitnong Amahan gusto nga kita magmatinud-anon ngadto sa mga pakigsaad nga atong himoon ngadto Kaniya. Aron pagtabang kanato sa paghimo niini, Siya misugo kanato sa pagtigom kanunay aron sa pag-ambit sa sakramento. Ang sakramento usa ka ordinansa sa pagkapari nga gipaila ni Jesus ngadto sa Iyang Apostoles sa wala pa gayod ang Iyang Pag-ula.
Ang pag-ambit sa sakramento mao ang mahinungdanong katuyoan sa panagtigom alang sa Sakramento sa matag semana. Ang pan ug tubig gipanalanginan ug giapod-apod ngadto sa kongregasyon. Ang pan nagrepresentar sa sakripisyo sa Manluluwas sa Iyang lawas alang kanato. Ang tubig nagrepresentar sa Iyang dugo, nga Iyang gipaagas alang kanato.
Moambit kita niini nga mga simbolo agi og handomanan sa sakripisyo sa Manluluwas ug aron sa pagbag-o sa atong mga pakigsaad sa Dios. Kita makadawat pag-usab sa saad nga ang Espiritu magauban kanato.
Ang bunyag adunay duha ka bahin. Si Jesus mitudlo nga kita kinahanglang “matawo … pinaagi sa tubig ug sa Espiritu” aron makasulod sa gingharian sa Dios (Juan 3:5). Si Joseph Smith mitudlo nga, “Ang bunyag pinaagi sa tubig katunga lamang sa bunyag, ug walay bili kon wala ang laing katunga—kana mao, ang bunyag sa Espiritu Santo” (Mga Pagtulon-an sa mga Presidente sa Simbahan: Joseph Smith [2007], 112).
Ang bunyag sa tubig kinahanglang pagasundan sa bunyag sa Espiritu aron makompleto. Kon kita makadawat sa duha ka bunyag, kita malimpyohan sa atong mga sala ug espirituwal nga matawo pag-usab. Kita dayon magsugod og usa ka bag-ong espirituwal nga kinabuhi isip mga disipulo ni Kristo.
Madawat nato ang bunyag sa Espiritu pinaagi sa usa ka ordinansa nga gitawag og kompirmasyon. Kini nga ordinansa gipahigayon pinaagi sa usa o daghan pa nga mga naghupot sa pagkapari kinsa mopandong sa ilang mga kamot sa atong ulo. Una silang mokompirmar kanato isip usa ka miyembro sa Simbahan, ug dayon sila motugyan sa gasa sa Espiritu Santo kanato. Kini mao ang sama nga ordinansa nga gipasabot diha sa Bag-ong Tugon ug sa Basahon ni Mormon (tan-awa sa Mga Buhat 8:14–17; 3 Nephi 18:36–37).
Ang Espiritu Santo mao ang ikatulong sakop sa Dios nga Kapangulohan. Siya nagkahiusang naglihok uban sa Langitnong Amahan ug ni Jesukristo. Kon kita makadawat sa gasa sa Espiritu Santo, kita mahimong makabaton sa Iyang panag-uban sa tibuok natong kinabuhi kon kita matinud-anon.
Sa Unsang Paagi nga ang Espiritu Santo Mopanalangin Kanato
Ang gasa sa Espiritu Santo mao ang usa sa labing mahinungdanon nga mga gasa sa Langitnong Amahan. Ang Espiritu Santo molimpyo ug moputli kanato, nga mohimo kanato nga mas balaan, mas kompleto, mas sama sa Dios (tan-awa sa 3 Nephi 27:20). Siya motabang kanato nga mag-usab ug espirituwal nga molambo samtang kita magtinguha sa pagsunod sa mga lagda sa Dios.
Ang Espiritu Santo motabang kanato nga makat-on ug makaila sa kamatuoran (tan-awa sa Moroni 10:5). Siya mokompirmar usab sa kamatuoran sa atong mga kasingkasing ug mga hunahuna. Dugang pa, ang Espiritu Santo motabang kanato sa pagtudlo sa kamatuoran (tan-awa sa Doktrina ug mga Pakigsaad 42:14). Kon kita magkat-on ug motudlo sa kamatuoran pinaagi sa gahom sa Espiritu Santo, Siya modala niini ngadto sa atong mga kasingkasing (tan-awa sa 2 Nephi 33:1).
Kon kita mapainubsanon nga magtinguha og direksiyon gikan sa Espiritu Santo, Siya mogiya kanato (tan-awa sa 2 Nephi 32:5). Kini naglakip sa pag-aghat kanato kon sa unsang paagi kita makaserbisyo sa uban.
Ang Espiritu Santo naghatag og espirituwal nga kalig-on aron sa pagtabang kanato sa pagbuntog sa kahuyang. Siya motabang kanato sa pagbatok sa tentasyon. Siya makapasidaan kanato sa espirituwal ug pisikal nga kakuyaw.
Ang Espiritu Santo motabang kanato latas sa mga hagit sa kinabuhi. Siya mohupay kanato atol sa mga panahon sa pagsulay o kagul-anan, nagpuno kanato sa paglaom (tan-awa sa Moroni 8:26). Pinaagi sa Espiritu Santo, mabati nato ang gugma sa Dios alang kanato.
Kon kita mabunyagan ug makompirmahan, kita mosulod sa usa ka pakigsaad ngadto sa Dios. Lakip sa ubang mga butang, kita mosaad nga motuman sa Iyang mga sugo ug moserbisyo Kaniya alang sa nahibilin sa atong mga kinabuhi (tan-awa sa Mosiah 18:8–10, 13; Doktrina ug mga Pakigsaad 20:37).
Human nga kita mosulod sa dalan sa ebanghelyo pinaagi sa bunyag ug kompirmasyon, mohimo kita sa matag paningkamot nga magpabilin niini. Kon kita motipas sa dalan bisan og gamay lang, kita magpakita og hugot nga pagtuo kang Kristo aron maghinulsol. Ang panalangin sa paghinulsol nagtugot kanato sa pagbalik ngadto sa dalan sa ebanghelyo ug mopabilin sa mga panalangin sa atong mga pakigsaad ngadto sa Dios. Kon kita sinsero nga maghinulsol, ang Dios kanunay nga andam sa pagpasaylo ug pag-abi-abi kanato og balik.
Ang paglahutay hangtod sa kataposan nagpasabot sa pagpabiling matinud-anon ngadto sa Dios hangtod sa kataposan sa atong mga kinabuhi—latas sa maayo nga mga panahon ug lisod nga mga panahon, latas sa kabulahan ug kalisdanan. Mapainubsanon kitang motugot ni Kristo sa paghulma kanato ug mohimo kanato nga mas sama Kaniya. Kita motan-aw ngadto ni Kristo uban sa hugot nga pagtuo, pagsalig, ug paglaom dili igsapayan sa unsay maabot sa atong mga kinabuhi.
Ang paglahutay hangtod sa kataposan wala lang magpasabot nga magpadayon hangtod nga kita mamatay. Hinuon, kini nagpasabot sa pagtutok sa atong mga kinabuhi, mga hunahuna, ug mga aksiyon kang Jesukristo. Kini naglakip sa pagpadayon sa pagpakita og hugot nga pagtuo kang Kristo matag adlaw. Magpadayon usab kita sa paghinulsol, pagtuman sa atong mga pakigsaad sa Dios, ug pagtinguha sa pagpakig-uban sa Espiritu Santo.
Ang paglahutay hangtod sa kataposan naglakip sa “[pag]padayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo.” Ang atong Langitnong Amahan nagsaad nga samtang kita molahutay hangtod sa kataposan, kita “makabaton og kinabuhi nga dayon” (2 Nephi 31:20).
Ang Ebanghelyo ni Jesukristo Nagpanalangin sa Tanang Anak sa Dios
Ang ebanghelyo ni Jesukristo alang sa tanang anak sa Dios. Ang mga kasulatan nagtudlo nga “ang tanan managsama ngadto sa Dios” bisan unsa pa ang atong kaagi o sitwasyon. Siya nag-imbitar sa tanan sa “pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya” (2 Nephi 26:33).
Ang ebanghelyo mopanalangin kanato tibuok natong mortal nga mga kinabuhi ug sa tibuok kahangtoran. Kita lagmit magmalipayon—isip mga indibidwal ug isip mga pamilya—kon kita magsunod sa mga pagtulon-an ni Jesukristo (tan-awa sa Mosiah 2:41; “Ang Pamilya: Usa ka Pamahayag ngadto sa Kalibotan,” ChurchofJesusChrist.org). Ang pagsunod sa ebanghelyo makapadako sa atong kalipay, makapadasig sa atong mga lihok, ug makapalambo sa atong mga relasyon.
Ang pagsunod sa ebanghelyo ni Jesukristo makapanalipod usab kanato gikan sa paghimo og mga pagpili nga makadaot kanato sa pisikal o espirituwal nga paagi. Kini makatabang kanato nga makakaplag og kalig-on ug kahupayan sa mga panahon sa pagsulay ug kaguol. Kini maghatag sa dalan paingon sa usa ka malipayon nga kinabuhing dayon.
Usa sa labing mahinungdanon nga mga mensahe sa gipahiuli nga ebanghelyo mao nga kitang tanan kabahin sa pamilya sa Dios. Kita ang Iyang pinalangga nga mga anak nga lalaki ug mga anak nga babaye. Bisan unsa pa ang sitwasyon sa atong pamilya dinhi sa kalibotan, ang matag usa kanato usa ka sakop sa pamilya sa Dios.
Laing mahinungdanon nga bahin sa atong mensahe mao nga ang mga pamilya mahimong mahiusa alang sa kahangtoran. Ang pamilya gi-orden sa Dios. Ang plano sa Langitnong Amahan sa kalipay makahimo sa mga relasyon sa pamilya nga magpadayon human sa kamatayon. Ang sagrado nga mga ordinansa ug mga pakigsaad sa templo naghimo niini nga posible alang sa mga pamilya nga mag-uban sa hangtod.
Pinaagi sa kahayag sa ebanghelyo, ang mga pamilya makasulbad sa mga dili pagsinabtanay, panagbingkil, ug mga hagit. Ang mga pamilya nga nangabungkag tungod sa panagsungi mahimong mamaayo pinaagi sa paghinulsol, pagpasaylo, ug hugot nga pagtuo sa gahom sa Pag-ula ni Jesukristo.
Ang ebanghelyo ni Jesukristo motabang kanato nga makapalambo og mas lig-on nga mga relasyon sa pamilya. Ang panimalay mao ang labing maayo nga dapit alang sa pagtudlo ug pagkat-on sa mga baroganan sa ebanghelyo. Ang usa ka panimalay nga giestablisar diha sa mga baroganan sa ebanghelyo mamahimong usa ka dapit nga kadangpan ug kasegurohan. Mahimo kining usa ka dapit diin mahimong magpuyo ang Espiritu sa Ginoo.
Ang mosunod nga latid mao ang usa ka sampol sa unsay mahimo ninyong itudlo sa tawo kon kamo adunay mubo lang nga oras. Kon mogamit niini nga latid, pagpili og usa o dugang pa nga mga baroganan nga itudlo. Ang sukaranan nga doktrina alang sa matag baroganan gihatag nang daan diha sa leksiyon.
Sa inyong pagtudlo, pangutana ug paminaw. Ihatag ang mga imbitasyon nga makatabang sa mga tawo nga makakat-on kon unsaon nga mas mapaduol ngadto sa Dios. Usa ka importante nga imbitasyon mao nga ang tawo makighimamat kaninyo pag-usab. Ang gitas-on sa leksiyon magdepende sa inyong mga ipangutana ug sa pagpaminaw nga inyong buhaton.
Imahe
mga misyonaryo nga nagtudlo og mga babaye
Unsa ang Mahimo Ninyong Itudlo sa mga Tawo sulod sa 3-10 Minutos
Ang Dios mipadala sa Iyang Hinigugmang Anak, si Jesukristo, dinhi sa yuta aron sa pagtubos kanato gikan sa sala ug kamatayon.
Ang hugot nga pagtuo diha ni Jesukristo usa ka baroganan sa buhat ug gahom. Ang hugot nga pagtuo motabang kanato nga makasinati sa makapalig-on nga gahom sa Manluluwas sa atong mga kinabuhi.
Ang hugot nga pagtuo diha ni Jesukristo modala kanato sa paghinulsol. Ang paghinulsol mao ang proseso sa pagdangop ngadto sa Dios ug sa pagpalayo gikan sa sala. Samtang kita maghinulsol, ang atong mga lihok, mga tinguha, ug mga hunahuna mausab aron mahimong mas mahiuyon sa kabubut-on sa Dios.
Kon maghinulsol kita, ang Langitnong Amahan mopasaylo kanato. Ang kapasayloan posible tungod kay si Jesukristo miula alang sa atong mga sala.
Ang bunyag adunay duha ka bahin: bunyag pinaagi sa tubig ug pinaagi sa Espiritu. Kon kita mabunyagan ug makompirmahan, malimpyohan kita sa atong mga sala, nga maghatag kanato og bag-ong pagsugod sa kinabuhi.
Human kita mabunyagan pinaagi sa tubig, kita modawat sa gasa sa Espiritu Santo pinaagi sa ordinansa sa kompirmasyon.
Samtang kita matinud-anong mosubay sa dalan sa ebanghelyo hangtod sa kataposan sa atong mga kinabuhi, ang Dios nagsaad nga kita makabaton og kinabuhi nga dayon.