“Pagsunod sa Ebanghelyo ni Jesukristo,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).
“Pagsunod sa Ebanghelyo ni Jesukristo,” Kinatibuk-ang Tamdanan nga Basahon.
16.
Pagsunod sa Ebanghelyo ni Jesukristo
Ang buhat sa Dios sa kaluwasan ug kahimayaan nakatutok sa upat ka balaanong gitudlo nga mga responsibilidad (tan-awa sa 1.2). Ang una niini mao ang pagsunod sa ebanghelyo ni Jesukristo. Nagsunod kita sa ebanghelyo kon kita:
-
Mopakita og hugot nga pagtuo diha ni Jesukristo.
-
Maghinulsol matag adlaw.
-
Mohimo og mga pakigsaad uban sa Dios samtang modawat kita sa mga ordinansa sa kaluwasan ug kahimayaan.
-
Molahutay hangtod sa kataposan pinaagi sa pagtuman niadto nga mga pakigsaad.
Samtang mosunod kita sa ebanghelyo ug mosinati sa impluwensya sa Espiritu Santo, magtinguha kita sa pagtabang sa mga sakop sa pamilya ug sa uban nga makadawat sa mga panalangin sa Dios (tan-awa sa 1 Nephi 8:10–12). Magkat-on ug motudlo kita sa ebanghelyo ni Jesukristo diha sa panimalay ug sa simbahan. Magtinguha usab kita nga makabarog sa kinaugalingong paningkamot sa pagsangkap sa atong kaugalingon ug sa atong pamilya, sa espirituwal ug temporal nga paagi.
Ang pagsunod sa ebanghelyo naglangkob sa uban pang mga aspeto sa buhat sa Dios sa kaluwasan ug kahimayaan. Kini naglakip sa pag-atiman niadtong nanginahanglan, pagdapit sa tanan nga modawat sa ebanghelyo, ug paghiusa sa mga pamilya alang sa kahangtoran.