inahan nga nagtudlo sa anak nga lalaki

17.

Pagtudlo sa Ebanghelyo

Kita motudlo sa ebanghelyo aron sa pagtabang sa mga tawo nga malig-on ang ilang hugot nga pagtuo diha sa Langitnong Amahan ug ni Jesukristo. Kita magtinguha sa pagtabang sa mga tawo nga mahimong mas sama sa Manluluwas, modawat sa Iyang gahom sa ilang kinabuhi, ug sa kataposan makaangkon og kinabuhing dayon. Kon ang pulong sa Dios gitudlo ug gidawat pinaagi sa Espiritu, kini adunay gahom sa pag-usab og mga kasingkasing ug pagdasig sa pagkakabig. Kini adunay “labaw nga gamhanan nga sangp[o]tanan diha sa mga hunahuna sa mga katawhan kay sa … bisan unsa pa” (Alma 31:5).

17.1

Mga Baroganan sa Kristohanong Pagtudlo

Kon magtudlo sa ebanghelyo, ang mga ginikanan, mga magtutudlo, ug mga lider mosunod sa ehemplo ni Jesukristo, kinsa mao ang Bantogang Magtutudlo. Ang pagtudlo sumala sa pamaagi sa Manluluwas usa ka sagrado nga pagsalig ug responsibilidad.

Ang mga lider mopaambit sa mosunod nga mga baroganan sa Kristohanong pagtudlo uban sa mga magtutudlo sa ilang mga organisasyon. Kini nga mga baroganan gipasabot nga mas detalyado diha sa Pagtudlo sumala sa Pamaagi sa Manluluwas.

17.1.1

Higugmaa Kadtong Inyong Gitudloan

Ang tanan nga gibuhat sa Manluluwas usa ka pagpakita sa Iyang gugma (tan-awa sa 2 Nephi 26:24). Ang mga lider ug ang mga magtutudlo mosunod sa Iyang ehemplo pinaagi sa pagpakita og gugma alang niadtong ilang gitudloan. Sila mag-ampo alang niadtong ilang gitudloan sumala sa ngalan, magtinguha sa pagkonektar ngadto nila ug pagsabot kanila, ug sa pagtutok sa indibidwal nga mga panginahanglan. Sila mangita sa mga sakop sa ilang klase o korum nga wala motambong.

17.1.2

Pagtudlo pinaagi sa Espiritu

Sa pagdasig sa mga tawo nga magbaton og hugot nga pagtuo kang Jesukristo, ang mga magtutudlo kinahanglang motudlo pinaagi sa Espiritu. Ang mga magtutudlo magtinguha sa giya sa Espiritu samtang sila moandam ug motudlo, ug sila maningkamot nga magpakabuhi nga takos sa Iyang impluwensiya matag adlaw.

17.1.3

Itudlo ang Doktrina

Ang Manluluwas mitudlo sa doktrina sa Iyang Amahan. Nagsunod sa ehemplo sa Manluluwas, ang mga magtutudlo motutok sa importante, makaluwas nga mga kamatuoran sa ebanghelyo. Sila motudlo nga gigamit ang mga kasulatan, mga pagtulon-an sa mga propeta sa ulahing mga adlaw, ug giaprobahan nga mga materyal sa kurikulum. Ang mga magtutudlo mogiya og dinasig nga mga panaghisgotan ug moseguro nga ang ilang pagtudlo makahatag og kaayohan ug sakto ang doktrina. Ang giaprobahan nga mga materyal gilista diha sa bag-o nga Mga Instruksiyon alang sa Kurikulum diha sa ChurchofJesusChrist.org.

17.1.4

Pagdapit og Makugihon nga Pagkat-on

Ang mga magtutudlo moawhag sa mga miyembro nga mahimong responsable sa ilang kaugalingong pagkat-on. Sila mosuporta sa mga miyembro sa ilang mga paningkamot sa indibidwal nga pagkat-on sa ebanghelyo ug uban sa ilang mga pamilya. Sila modapit sa mga miyembro sa pagpaambit sa unsay ilang nakat-onan ug sa pagbuhat niini. Ang hugot nga pagtuo sa usa ka tawo motubo kon siya aktibong moapil sa pagkat-on sa ebanghelyo ug mogamit niini nga mga baroganan sa inadlaw-adlaw nga kinabuhi.

17.2

Nakasentro sa Panimalay nga Pagkat-on ug Pagtudlo sa Ebanghelyo

Aron makabig ngadto ni Ginoong Jesukristo, ang matag miyembro sa Simbahan maoy responsable sa pagkat-on sa ebanghelyo alang sa iyang kaugalingon. Agig dugang, ang mga ginikanan mao ang responsable sa pagtudlo sa ebanghelyo ngadto sa ilang mga anak. Ang pagkat-on ug pagtudlo sa ebanghelyo kinahanglang nakasentro sa panimalay. Ang mga lider ug mga magtutudlo sa Simbahan moawhag ug mosuporta sa nakasentro sa panimalay nga pagtudlo ug pagkat-on sa ebanghelyo.

Ang mga lider ug ang mga magtutudlo moawhag sa mga miyembro nga magtinguha sa ilang kaugalingong inspirasyon kon unsaon sa pagtuon ug pagtudlo sa ebanghelyo. Ang ilang nag-una nga mga kapanguhaan kinahanglan mao ang mga kasulatan ug mga mensahe sa kinatibuk-ang komperensiya. Ang nagsuporta nga mga kapanguhaan maglakip sa Dali, Sunod Kanako—Alang sa mga Indibidwal ug mga Pamilya ug mga magasin sa Simbahan.

17.3

Mga Responsibilidad sa mga Lider

Ang mga lider mao ang responsable sa pagtudlo ug pagkat-on diha sa ilang mga organisasyon. Ang pipila ka paagi nga ilang matuman kini nga responsibilidad gilatid sa ubos.

• Magpakita og ehemplo pinaagi sa pagkat-on sa ebanghelyo ug pagtudlo niini sumala sa pamaagi sa Manluluwas.

• Moseguro nga ang pagtudlo diha sa ilang mga organisasyon naglig-on sa hugot nga pagtuo ug eksakto ang doktrina.

• Kon ang mga lider mga sakop sa konseho sa ward, maghisgot uban sa mga sakop sa konseho unsaon sa pagpalambo ang pagkat-on ug pagtudlo sa ebanghelyo diha sa ward. Ang bishop mahimong modapit sa presidente sa Sunday School sa paggiya niini nga mga panaghisgotan.

• Kon gikinahanglan, morekomendar og mga ngalan ngadto sa bishopric sa mga miyembro sa ward nga tawagon isip mga magtutudlo sa ilang mga organisasyon, magsunod sa mga lagda diha sa 30.1.

• Makigtagbo sa bag-ong natawag nga mga magtutudlo ug motabang nila sa pag-andam alang sa ilang mga calling (tan-awa sa Pagtudlo sumala sa Pamaagi sa Manluluwas, 38).

• Mohatag og padayon nga suporta ngadto sa mga magtutudlo diha sa ilang mga organisasyon. Makigsulti kanunay ngadto sa mga magtutudlo mahitungod sa ilang mga paningkamot sa paglig-on sa hugot nga pagtuo sa mga tawo nga ilang gitudloan. Kon gikinahanglan, mangayo og tabang sa presidente sa Sunday School.

17.4

Mga Miting sa Konseho sa Magtutudlo

Sa mga miting sa konseho sa magtutudlo, ang mga magtutudlo magtinambagay mahitungod sa mga baroganan sa Kristohanong pagtudlo. Sila usab magtinambagay kon unsaon sa pagpalambo ang pagkat-on ug pagtudlo sa ebanghelyo. Sila mogamit sa Pagtudlo sumala sa Pamaagi sa Manluluwas isip usa ka kapanguhaan.

Ang mga miting sa konseho sa magtutudlo himoon matag tulo ka bulan atol sa 50-minutos nga panahon sa klase sa Dominggo.

• Ang mga miting alang sa mga magtutudlo sa pagkapari, Relief Society, ug Young Women mahimong ipahigayon sa una o ikatulo nga Dominggo.

• Ang mga miting sa mga magtutudlo sa Sunday School mahimong ipahigayon sa ikaduha o ikaupat nga Dominggo.

Ang kapangulohan sa Primary magpakitambag sa sakop sa bishopric aron sa pagtino unsaon sa pagpalambo ang pagtudlo diha sa Primary. Ang presidente sa Sunday School makatabang kon gikinahanglan. Ang pipila ka opsiyon gilista sa ubos:

• Ang mga magtutudlo sa Primary mahimong motambong sa mga miting sa konseho sa magtutudlo uban sa mga magtutudlo gikan sa ubang mga organisasyon.

• Ang linain nga mga miting sa konseho sa magtutudlo alang sa mga magtutudlo sa Primary mahimong ipahigayon. Kini nga mga miting mahimong ipahigayon atol sa 20-minutos nga panahon sa pagpanganta sa Primary. Isip usa ka alternatibo, kini mahimong ipahigayon sa dili pa o human sa regular nga mga miting sa Dominggo o sa laing adlaw sa semana.

• Ang mga miyembro sa kapangulohan sa Primary makabisita sa mga klase sa Primary ug makigtambag uban sa mga magtutudlo pagkahuman mahitungod sa pagtudlo sumala sa pamaagi sa Manluluwas.

Ang konseho sa ward mahimong moorganisar og mga miting sa konseho sa magtutudlo alang sa mga ginikanan aron sa pagtabang nila sa pagpalambo sa pagtudlo sa ebanghelyo diha sa panimalay. Sama sa ubang mga miting sa konseho sa magtutudlo, kini ipahigayon atol sa 50-minutos nga panahon sa klase sa Dominggo.

Ang konseho sa ward modumala ug moeskedyul sa mga miting sa konseho sa magtutudlo. Ang presidente sa Sunday School sa kasagaran mangulo sa mga miting. Hinoon, ang bishopric mahimong mohangyo og laing miyembro sa pagpangulo niini.

Alang sa dugang nga impormasyon, tan-awa sa Pagtudlo sumala sa Pamaagi sa Manluluwas, 3, o sa teaching.ChurchofJesusChrist.org.