Mga Miting sa Konseho sa Magtutudlo—Alang sa mga Ginikanan ug alang sa Gitawag nga mga Magtutudlo

Ang matag ward kinahanglan mopahigayon og mga miting sa konseho sa magtutudlo matag tulo ka buwan, alang sa mga ginikanan ug alang sa gitawag nga mga magtutudlo diha sa ward. Niini nga mga miting, ang mga ginikanan ug ubang mga magtutudlo mahimong magtinambagay mahitungod sa mga baroganan sa Kristohanong pagtudlo (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 13.4, 13.5, 17.4, 17.5, Librarya sa Ebanghelyo).

Ang parehong mga matang sa mga miting sa konseho sa magtutudlo himoon og kausa matag tulo ka bulan atol sa 50-minutos nga panahon sa klase sa Dominggo.

Mga Miting sa Konseho sa Magtutudlo Alang sa mga Ginikanan

Kinsa ang Mangulo Niini nga mga Miting? Kasagaran, usa ka sakop sa kapangulohan sa Sunday School mangulo sa mga miting sa konseho sa magtutudlo alang sa mga ginikanan. Apan, ang bishopric mahimong motahas sa ubang mga miyembro sa ward nga mangulo og mga miting panagsa.

Ang konseho sa ward, uban sa tabang gikan sa kapangulohan sa Sunday School, magdumala sa mga miting sa konseho sa magtutudlo alang sa mga ginikanan. Sila magtinambagay mahitungod sa mga panginahanglan sa mga ginikanan ug mga pamilya, ug sila magtambayayong aron masuta asa nga mga baroganan gikan sa Pagtudlo Sumala sa Pamaagi sa Manluluwas ang labing makatubag niadto nga mga panginahanglan.

Kinsa ang Kinahanglang Motambong? Ang konseho sa ward magtino kon dapiton ba ang piho nga mga ginikanan o himoon ang pagtambong nga abli ngadto sa tanan kinsa gusto nga moapil.

Kanus-a Kinahanglan Ipahigayon Kini nga mga Miting? Ang mga miting sa konseho sa magtutudlo alang sa mga ginikanan mahimong ikapahigayon sa bisan hain nga Dominggo, sumala sa pagtino sa konseho sa ward.

Mga Miting sa Konseho sa Magtutudlo alang sa Gitawag nga mga Magtutudlo

Kinsa ang Mangulo Niini nga mga Miting? Kasagaran, usa ka sakop sa kapangulohan sa Sunday School mangulo sa mga miting sa konseho sa magtutudlo alang sa gitawag nga mga magtutudlo. Apan, ang bishopric mahimong motahas sa ubang mga miyembro sa ward nga mangulo og mga miting panagsa.

Ang konseho sa ward, uban sa tabang sa kapangulohan sa Sunday School, magdumala sa mga miting sa konseho sa magtutudlo alang sa gitawag nga mga magtutudlo. Sila magtinambagay mahitungod sa mga panginahanglan sa mga magtutudlo ug mga tigkat-on, ug sila magtambayayong aron masuta asa nga mga baroganan gikan sa Pagtudlo Sumala sa Pamaagi sa Manluluwas ang labing makatubag niadto nga mga panginahanglan.

Kinsa ang Kinahanglang Motambong? Ang tanan nga nagtudlo og korum o klase sa ward kinahanglan motambong sa mga miting sa konseho sa magtutudlo. Ang mga sakop sa kapangulohan sa korum ug organisasyon gidapit usab.

Kanus-a Kinahanglan Ipahigayon Kini nga mga Miting? Ang mga magtutudlo motambong sa mga miting sa konseho sa magtutudlo sa Dominggo nga sila wala magtudlo sa ilang regular nga klase.

• Ang mga magtutudlo sa korum sa pagkapari, Relief Society, ug Young Women mahimong makatambong bisan hain sa una o ikatulo nga Dominggo, sumala sa pagtino sa lokal nga mga lider.

• Ang mga magtutudlo sa Sunday School mahimong makatambong bisan hain sa ikaduha o ikaupat nga Dominggo, sumala sa pagtino sa lokal nga mga lider.

• Ang mga magtutudlo sa Primary mahimong makatambong sa bisan hain nga Dominggo, sumala sa pagtino sa mga kapangulohan sa Primary ug sa Sunday School sa ward. Kon gitinguha, ang mga magtutudlo sa Primary mahimong maglain og miting gikan sa ubang mga magtutudlo aron sa pagtambag mahitungod sa talagsaon nga mga aspeto sa pagtudlo sa kabataan. Kini mahitabo atol sa 20-minutos nga panahon sa pag-awit, sa wala pa o human sa regular nga mga miting sa Dominggo, o sa ubang adlaw sa semana. Sobra sa usa ka miting sa konseho sa magtutudlo ang mahimong ipahigayon kada tulo ka bulan alang sa mga magtutudlo sa Primary aron tanan sila dili ma-absent sa mga klase sa Primary sa samang semana. (Pahinumdom: Ingon nga gikinahanglan, ang kapangulohan sa Primary motudlo og puli nga mga magtutudlo, mohiusa sa mga klase, o mohimo og laing mga paghan-ay aron matugotan ang mga magtutudlo sa Primary sa pagtambong sa mga miting sa konseho sa magtutudlo.)

Han-ay alang sa mga Miting

Ang mga miting sa konseho sa magtutudlo—alang sa mga ginikanan ug alang sa gitawag nga mga magtutudlo—mosunod niini nga han-ay:

1. Mopakigbahin ug magtinambagay (mga 20 minutos). Dapita ang mga ginikanan o mga magtutudlo nga mopakigbahin unsa ang nindot nga nabuhat samtang sila nagtudlo sa ebanghelyo sa panimalay o sa ilang mga klase. Mahimo usab nilang ipakigbahin ang mga hagit nga ilang giatubang o mga butang nga gusto nilang palamboon.

2. Dungan nga magkat-on (mga 15 minutos). Hisgoti kauban sa mga ginikanan o mga magtutudlo ang usa sa mga baroganan diha sa Pagtudlo Sumala sa Pamaagi sa Manluluwas. Ang Dali, Sunod Kanako mahimo usab nga gamiton isip kapanguhaan alang niini nga mga panaghisgot.

3. Pagplano ug pagdapit (mga 10 minutos). Dapita ang mga ginikanan o mga magtutudlo nga mopakigbahin unsa ang ilang nakat-onan atol sa miting ug giunsa nila pagplano aron magamit kini.