Si Jesukristo ug ang Iyang mga disipulo diha sa Kataposang Panihapon

Kaninyo Ibilin Ko ang Kalinaw, ni Walter Rane

Pagtudlo mahitungod ni Jesukristo Bisan Unsa Pa ang Inyong Gitudlo

Adunay daghang butang nga itudlo mahitungod sa gipahiuli nga ebanghelyo ni Jesukristo––mga baroganan, mga sugo, mga panagna, ug mga istorya sa kasulatan. Apan tanan kini mga sanga sa samang kahoy, tungod kay sila adunay usa ka katuyoan: sa pagtabang sa tanang tawo sa pagduol ngadto ni Kristo ug sa paghingpit diha Kaniya (tan-awa sa Jarom 1:11; Moroni 10:32). Busa bisan unsa pa ang inyong itudlo, hinumdomi nga kamo sa tinuod nagtudlo mahitungod ni Jesukristo ug unsaon nga mahimong sama Kaniya. Ang Espiritu Santo makatabang kaninyo sa pag-ila og mga kamatuoran mahitungod sa Manluluwas ug sa Iyang matubsanong gahom diha sa matag baroganan sa ebanghelyo, sugo, ug mapanagnaon nga pagtudlo (tan-awa sa Jacob 7:10–11).

Kamo ba nagtudlo mahitungod sa sakripisyo? Hunahunaa ang pagsuta uban sa mga estudyante kon giunsa sa mga sakripisyo nga atong gihimo sa pagtudlo sa atong mga kalag ngadto sa “dako ug kataposang sakripisyo” sa Manluluwas (Alma 34:10). Kamo ba nagtudlo mahitungod sa panaghiusa? Hunahunaa ang paghisgot sa panaghiusa nga natuman ni Jesukristo uban sa Iyang Amahan ug ang Iyang pagdapit kanato nga mahimong usa uban Kanila. (tan-awa sa Juan 17). Tan-awa ang matag ulohan sa ebanghelyo isip oportunidad sa pagtudlo ug pagkat-on mahitungod ni Jesukristo.

Ang matag sugo naghatag usab niini nga oportunidad. Ayaw lamang pagtutok diha sa mga balaod sa ebanghelyo––pagkat-on usab mahitungod sa Tighatag sa Balaod. Kon kamo maghisgot sa Pulong sa Kaalam ug mohunong diha sa mga mahimo ug sa mga dili mahimo sa mahimsog nga pagpuyo, malaktawan ninyo ang oportunidad sa pagpamalandong kon unsa kaha ka hingpit si Jesukristo nag-amuma kanato––sa atong espirituhanon ug pisikal nga kaayohan––sa paghatag kanato niini nga balaod. Tutoki kon unsa ka andam ug ka matinguhaon ang Manluluwas sa pagpanalangin kanato sa Iyang gahom sa pagtabang kanato sa pagpuyo sa Iyang mga balaod. Ang matag sugo nga Siya naghatag kanato nagpadayag og usa ka butang mahitungod sa Iyang hunahuna ug kabubut-on ug kasingkasing––pagkaplag og hingpit nga kalipay diha sa pagtinabangay sa pagdiskobre niini!

Hatagi og Gibug-aton ang Ehemplo ni Jesukristo

Makabutang kita ni Jesukristo sa sentro sa atong pagtudlo ug pagkat-on pinaagi sa pag-ila ug paghatag og gibug-aton nga Siya mao ang hingpit nga ehemplo sa tanang mga baroganan sa ebanghelyo. Isip mga disipulo, dili lamang kita magsunod sa mga baroganan––magsunod kita ni Jesukristo. Samtang kita nagtutok diha sa hingpit nga ehemplo sa Manluluwas, ang Espiritu Santo mopamatuod mahitungod Kaniya ug modasig kanato sa pagsunod Kaniya.

Handurawa sa makadiyot nga ikaw nagtudlo sa baroganan sa paglahutay hangtod sa kataposan. Usa ka panaghisgotan mahitungod kon sa unsang paagi ang Manluluwas usa ka ehemplo sa paglahutay hangtod sa kataposan makadala og mga pagbati sa matam-is nga balaang pagtahod alang Kaniya. Unsa kaha ang makat-onan ug bation niadtong inyong gitudloan gikan sa Iyang ehemplo?

Ang Manluluwas nag-ayo sa usa ka tawo nga naghigda sa yuta

Ang Manluluwas naghimo og hingpit nga ehemplo alang kanatong tanan. Miayo Siya Kanilang Tanan, ni Michael Malm

Pagtudlo mahitungod sa mga Titulo, mga Tahas, ug mga Hiyas ni Jesukristo

Si Jesukristo adunay daghang mga titulo diha sa mga kasulatan. Ang matag usa nagdan-ag og usa sa Iyang mga tahas diha sa plano sa Dios ug nagtudlo kanato mahitungod sa iyang balaang mga hiyas. Mahimo ninyong hunahunaon ang pagsuta uban sa mga estudyante kon unsa ang gitudlo kanato sa mga titulo sama sa Karnero sa Dios, Tigpataliwala, Tighingpit sa Atong Hugot nga Pagtuo, ug Kahayag sa Kalibotan nagtudlo kanato mahitungod ni Jesukristo. Usab, samtang ikaw nagtabang sa mga estudyante nga moabot sa pagkahibalo og dugang pa mahitungod sa Manluluwas, lapas sa unsay Iyang gisulti ug gibuhat ngadto sa kinsa Siya ug unsa nga tahas Siya nagtinguha sa paghimo diha sa atong mga kinabuhi. Samtang kamo nagkat-on og dungan mahitungod sa kinaiya ug mga hiyas sa Manluluwas, ang Espiritu Santo molig-on sa inyong panabot ug paghigugma alang Kaniya.

Pangitaa ang mga Simbolo Nga Nagpamatuod ni Jesukristo

“Ang tanan nga mga butang,”ang Ginoo mipadayag, “gilalang ug gibuhat aron magpamatuod kanako” (Moises 6:63; tan-awa usab sa 2 Nephi 11:4). Uban nianang kamatuoran nga anaa sa atong hunahuna, makakat-on kita sa pagtan-aw og daghang mga simbolo diha sa mga kasulatan nga nagpamatuod sa Manluluwas. Kini nga mga simbolo naglakip sa mga butang nga sama sa pan, tubig, ug kahayag. Kon masabtan na nato kon sa unsang paagi kini nga mga butang may kalabotan ngadto sa Manluluwas, kini makatudlo kanato sa Iyang gahom ug mga hiyas. Gani kamo makakita og mga pagkasusama sa kinabuhi sa Manluluwas diha sa mga kinabuhi sa mg propeta ug ubang matinud-anong mga lalaki ug mga babaye diha sa mga kasulatan. Ang pagpangita og mga simbolo nagpadayag og mga kamatuoran mahitungod sa Manluluwas diha sa mga dapit nga mahimo nimong mataligam-an.