Manluluwas diha sa kamingawan sa Judea

Sama lamang nga ang Manluluwas migahin og panahon sa pag-andam sa espirituhanong paagi alang sa Iyang pagpangalagad, kita kinahanglan mag-andam sa atong mga kaugalingon sa pagtudlo pinaagi sa Espiritu.

Pagtudlo pinaagi sa Espiritu

Sa dihang ang Maluluwas mimando ni Joseph Smith ug Sidney Rigdon sa pagsangyaw sa Iyang ebanghelyo, Siya misaad kanila, “Ang Espiritu Santo mosangyaw sa pagpamatuod ngadto sa tanan nga mga butang bisan unsa ang inyong isulti” (Doktrina ug mga Pakigsaad 100:8; tan-awa usab Doktrina ug mga Pakigsaad 42:15–17; 50:17–22). Ang samang saad maggamit ngadto sa tanan niadtong kinsa nagtudlo sa ebanghelyo, lakip kanimo. Samtang kamo magtudlo sa ebanghelyo ni Jesukristo, makabaton kamo sa Espiritu Santo uban kaninyo sa paggiya kaninyo ug sa pagpamatuod sa kamatuoran ngadto sa mga hunahuna ug mga kasingkasing niadtong inyong tudloan (tan-awa sa Doktrina ug mga Pakigsaad 8:2). Wala kamo mag-inusara kon kamo magtudlo, kay “dili kamo mao ang magasulti, kon dili ang Espiritu Santo” (Marcos 13:11).

Ang Espiritu Santo mao ang tinuod nga magtutudlo. Walay mortal nga magtutudlo, bisan unsa kahanas o kasinati, ang makailis sa Iyang tahas sa pagsaksi sa kamatuoran, makapamatuod ni Kristo, ug makausab sa mga kasingkasing. Apan ang tanang mga magtutudlo mahimong mga instrumento sa pagtabang sa mga anak sa Dios sa pagkat-on pinaagi sa Espiritu.

Sa Pagtudlo pinaagi sa Espiritu

• Andama ang inyong kaugalingon sa espirituhanong paagi.

• Kanunay pangandam sa pagtubag sa espirituhanong mga pag-aghat mahitungod sa mga panginahanglan sa mga estudyante.

• Paghimo og mga sitwasyon ug mga oportunidad alang sa mga estudyante nga matudloan pinaagi sa Espiritu Santo.

• Tabangi ang mga estudyante nga tinguhaon, ilhon, ug lihokon ang personal nga pagpadayag.

• Pagpamatuod kanunay, ug dapita ang mga estudyante sa pagpakigbahin sa ilang mga pagbati, mga kasinatian, ug mga pagpamatuod.

Giandam sa Manluluwas ang Iyang Kaugalingon sa Pagtudlo sa Espirituhanong Paagi

Sa pagpangandam alang sa Iyang pagpangalagad, ang Manluluwas migahin og 40 ka adlaw sa kamingawan “aron makig-uban sa Dios” (Hubad ni Joseph Smith, Mateo 4:1 [sa Mateo 4:1, footnote b]). Apan ang Iyang espirituhanong pagpangandam misugod og dugay na kaayo. Sa dihang mitintal si Satanas Kaniya, nakahimo Siya sa paggamit sa “mga pulong sa kinabuhi” nga Iyang giandam alang “niini nga takna” nga Siya magkinahanglan niini (Doktrina ug mga Pakigsaad 84:85). Paghunahuna mahitungod sa inyong kaugalingong mga paningkamot sa pag-andam sa inyong kaugalingon sa espirituhanong paagi sa pagtudlo. Unsa ang inyong nakat-onan gikan sa Mateo 4:1–11 mahitungod kon unsaon nga kamo makasunod sa ehemplo sa Manluluwas diha sa inyong epirituhanong pagpangandam?

Ang Espiritu mao ang tiunay nga magtutudlo ug ang tinuod nga tinubdan sa pagkakabig. Ang gamhanang pagtudlo sa ebanghelyo nagkinahanglan dili lamang sa pag-andam sa leksiyon apan sa pag-andam og maayo sa inyong kaugalingon sa espirituhanong paagi sa dili pa kamo magsugod sa pagtudlo. Kon kamo andam sa espirituhanon nga paagi, kamo mas makahimo og maayo sa pagdungog ug pagsunod sa giya sa Espiritu samtang kamo magtudlo. Ang paagi sa pagdapit sa Espiritu Santo nganha sa inyong pagtudlo mao ang pagdapit Kaniya nganha sa inyong kinabuhi. Kini naglakip sa makugihong paningkamot sa pagsunod sa ehemplo sa Manluluwas ug sa pagpuyo sa Iyang ebanghelyo uban sa inyong tibuok nga kasingkasing. Ug tungod kay walay usa kanato nga naghimo niini sa hingpit, kini nagpasabot usab og paghinulsol sa matag adlaw.

Mga Pangutana nga Palandongon: Unsa ang kahulogan niini nganha kaninyo sa pag-andam sa inyong kaugalingon sa espirituhanong paagi sa pagtudlo? Unsa kamo nadasig sa pagbuhat sa pagpalambo sa paagi nga kamo nag-andam sa inyong kaugalingon sa espiritahong paagi? Unsaon ninyo paghunahuna nga ang espirituhanong pag-andam makahimo og kalainan sa inyong pagtudlo?

Gikan sa mga Kasulatan: Esdras 7:10; Lucas 6:12; Alma 17:2–3, 9; Doktrina ug mga Pakigsaad 11:21; 42:13–14

Ang Manluluwas Kanunay nga Andam sa Pagtubag sa mga Panginahanglan sa Uban

Si Jairo, ang magmamando sa sinagoga, mihapa sa tiilan ni Jesus, nangamuyo Kaniya sa pagtabang sa iyang himatyon nga anak nga babaye. Si Jesus ug ang Iyang mga disipulo midotdot sa ilang pag-agi ngadto sa nagdasok nga mga dalan paingon sa balay ni Jairo sa dihang sa kalit mihunong si Jesus. “Kinsa ang mihikap kanako?” Siya nangutana. Kini ingon og lain nga pangutana––diha sa nagdotdot nga mga tawo, kinsa wala maghikap Kaniya? Apan gibati sa Manluluwas nga diha niana nga pundok sa mga katawhan, usa ka tawo miduol Kaniya nga adunay piho nga panginahanglan ug may hugot nga pagtuo nga madawat ang pagkaayo nga Iyang gitanyag. Sa gihapon aduna pay panahon sa pagduaw sa anak nga babaye ni Jairo. Apan siya miingon una ngadto sa babaye kinsa mihikap sa Iyang sapot, “Anak, ang imong pagsalig nakapaayo kanimo; lumakaw ka nga malinawon” (tan-awa sa Lucas 8:41–48).

Isip usa ka magtutudlo, kamo usahay mahimong makakita sa inyong kaugalingon nga magdali sa paghuman sa inyong giandam nga itudlo. Samtang kana mahimong importante, siguroha nga sa inyong pagdali dili ninyo palabyon ang usa ka dinaliang panginahanglan sa usa ka tawo nga inyong gitudloan. Agi og dugang sa espirituhanong giya nga inyong gipaningkamotan samtang kamo nag-andam sa pagtudlo, paningkamoti usab ang giya sa Espiritu samtang kamo nagtudlo. Paningkamoti nga maamgohan ang mga panginahanglan, ang mga pangutana, ug ang mga interes sa mga estudyante. Ang Espiritu Santo makatabang kaninyo sa pag-ila kon sa unsang paagi madawat o masabtan sa estudyante ang usa ka butang nga inyong gitudlo. Siya mahimong moaghat kaninyo, usahay, sa pag-usab sa inyong mga plano. Sama pananglitan, tingali kamo nadani sa paggahin og daghan pang oras kay sa inyong gitumong sa usa ka hisgotanan o sa pagbiya sa pipila ka mga panaghisgotan para unya alang sa usa ka butang nga mas importante sa mga estudyante karon.

Mga Pangutana nga Palandongon: Kanus-a kamo mibati nga ang usa ka ginikanan o lain nga magtutudlo nakamatikod sa inyong mga panginahanglan isip usa ka estudyante? Kadto bang inyong gitudloan nahibalo nga kamo mas interesado diha sa ilang pagkat-on kay sa paghuman sa usa ka leksiyon? Unsaon ninyo nga mas mamaayo ang pagsulti sa inyong mga interes?

Gikan sa mga Kasulatan: 1 Pedro 3:15; Alma 32:1–9; 40:1; 41:1; 42:1

Naghatag ang Manluluwas og mga Oportunidad alang sa mga Tawo nga Matudloan pinaagi sa Espiritu Santo

Malisod alang sa daghan sa panahon ni Jesus sa pagsabot kon kinsa gayod Siya, apan dihay daghang mga opinyon. “Ang uban nagaingon nga si Juan nga Bautista kono,” ang Iyang mga disipulo mitaho, “ang uban, si Elias; ug ang uban, nga si Jeremias, o usa sa mga propeta.” Apan dayon si Jesus nangutana nga midapit sa Iyang mga disipulo sa pagsalikway sa mga opinyon sa uban ug sa pagtan-aw sa sulod sa ilang kaugalingong mga kasingkasing: “Unsa may inyong sulti, kinsa man ako?” Siya gusto kanila nga mangita sa ilang tubag dili gikan sa “tawo” apan direkta gikan sa “akong Amahan nga anaa sa langit.” Kini mao ang matang sa saksi––personal nga pagpadayag gikan sa Espiritu Santo––nga mihimo ni Pedro sa pagpahayag, “Ikaw mao ang Kristo, ang Anak sa buhing Dios” (tan-awa sa Mateo 16:13–17).

Aron mabuhi sa espirituhanong paagi sa ulahing mga adlaw, ang mga tawo nga inyong tudloan manginahanglan og usa ka espirtuhanong saksi sa kamatuoran. Kamo dili makahatag niini ngadto kanila, apan kamo makadapit, makaawhag, makadasig, ug makatudlo kanila sa pagpangita niini. Makahimo kamo sa pagklaro––pinaagi sa inyong mga pulong ug mga lihok––unsa ka importante ang Espiritu Santo sa pagkat-on sa ebanghelyo. Hunahunaa, pananglitan, ang kahimtang sa pagkat-on nga inyong gimugna ug giawhag. Usa ka butang nga ingon ka yano sama sa paghan-ay sa mga lingkoranan sa usa ka kwarto o ang paagi nga kamo motimbaya ug makigsultihanay sa mga estudyante nagpahimutang og espirituhanong pagbati alang sa kasinatian nga maangkon sa mga estudyante. Kamo makadapit usab sa mga estudyante sa pag-andam sa ilang mga kaugalingon sa espirituhanong paagi sa pagkat-on, sama lamang nga kamo nag-andam sa espirituhanong paagi sa pagtudlo. Hangyoa sila sa pagpangako sa responsibilidad alang sa espiritu nga ilang madala. Ug kamo makahatag og mga oportunidad alang kanila sa pagbati sa Espiritu nga nagpamatuod kabahin ni Jesukristo ug sa Iyang ebanghelyo. Kana nga saksi mahimong usa ka”bato” alang kanila, “ug ang mga gahom sa kamatayon dili gayod makabuntog [kanila]”(Mateo 16:18).

Mga Pangutana nga Palandungon: Unsa ang inyong na-obserbahan nga nagtampo ngadto sa usa ka espirituhanong palibot alang sa pagkat-on sa ebanghelyo? Unsa ang nakapalinga gikan niini? Unsa ang nagtabang sa mga tawo nga inyong tudloan sa pagkat-on gikan sa Espiritu? Hunahunaa ang mahitungod sa lugar diin kamo kasagaran nagtudlo. Unsa ang inyong bation kon kamo atua didto? Unsaon ninyo nga mas epektibong makadapit sa Espiritu nga maanaa didto?

Gikan sa mga Kasulatan: Lucas 24:31–32; Juan 14:26; 16:13–15; Moroni 10:4–5; Doktrina ug mga Pakigsaad 42:16–17; 50:13–24

mga misyonaryo nagtudlo og usa ka pamilya

Samtang kita nagtudlo, makadapit kita sa mga estudyante sa pagtinguha og ilang kaugalingong espirituhanong pagsaksi sa kamatuoran.

Gitabangan sa Manluluwas ang Uban sa Pagtinguha, Pag-ila, ug Paglihok sa Personal nga Pagpadayag

Ang Ginoo gusto nga makigsulti kanato––ug Siya gusto kanato nga mahibalo nga Siya nakigsulti kanato. Sa 1829, usa ka 22 anyos nga magtutudlo sa eskwelahan nga ginganlan og Oliver Cowdery nakakat-on mahitungod sa walay lipud-lipod, madasigong doktrina nga bisan kinsa makadawat og personal nga pagpadayag. Apan siya adunay mga pangutana susama ngadto sa unsay gipangutana sa daghan kanato: “Ang Ginoo ba sa tinuod nagtinguha sa pagpakigsulti ngari kanako? Ug unsaon ko sa pagkahibalo kon unsa ang Iyang gisulti?” Sa pagtubag niini nga mga pangutana, gidapit ni Jesukristo si Oliver sa paghunahuna og balik sa usa ka pribadong higayon sa espirituhanong pagsiksik. “Wala ba Ako magsulti og kalinaw nganha sa imong hunahuna?” Nangutana Siya (tan-awa sa Doktrina ug mga Pakigsaad 6:21–24). Wala madugay, gitudloan Niya si Oliver mahitungod sa ubang mga paagi ang Espiritu makasulti ngadto kaniya (tan-awa sa Doktrina ug mga Pakigsaad 8:2–3; 9:7–9; tan-awa usab Doktrina ug mga Pakigsaad 11:12–14).

Nagpuyo sa usa ka kalibotan nga sa kanunay makalimot sa espirituhanong mga butang, tanan kita nagkinahanglan og tabang sa pag-ila sa tingog sa Espiritu. Mahimong nabati nato ang Espiritu nga wala makaamgo niini. Ug tanan kita makakat-on pa mahitungod kon unsaon sa pagtinguha sa Espiritu, pag-ila sa Iyang impluwensya, ug sa paglihok diha sa mga pag-aghat nga Siya naghatag kanato. Samtang kamo magtudlo, tabangi ang mga estudyante sa pagdiskobre sa mga paagi ang Espiritu makasulti––ug giunsa Niya sa pagpakigsulti ngadto kanila. Usa sa labing importanting mga gasa nga kamo makahatag isip usa ka magtutudlo mao ang pagtabang niadtong inyong tudloan sa pag-uswag dinhi niining tibuok kinabuhi nga pagtinguha og personal nga pagpadayag.

Mga Pangutana nga Palandungon: Nganong importante ang pagkat-on sa pagdawat og personal nga pagpadayag? Diha bay usa ka tawo sukad nga mitabang kaninyo sa pagsabot kon unsaon sa pagtinguha ug pag-ila sa pagpadayag? Unsaon ninyo sa pag-awhag niadtong inyong tudloan sa pagtinguha, pag-ila, ug paglihok sa pagpadayag gikan sa Espiritu Santo?

Gikan sa mga Kasulatan: Mga Taga-Galacia 5:22–23; Alma 5:45–47; Doktrina ug mga Pakigsaad 42:61; 121:33; Joseph Smith—Kasaysayan 1:8–20

Mipamatuod ang Manluluwas ngadto Niadtong Iyang Gitudloan

Atol sa usa ka ilabi ka malumong higayon sa pagtudlo ug pagpangalagad, si Jesus naningkamot sa paghupay sa Iyang higala nga si Marta, kansang igsoong lalaki namatay. Mipakigbahin Siya ngadto kaniya og usa ka yano nga pagpamatuod sa usa ka mahangturong kamatuoran: “Ang imong igsoon mabanhaw” (Juan 11:23). Ang iyang pagsaksi miaghat ni Marta sa pagpakigbahin sa iyang kaugalingong pagpamatuod: “Ako nahibalo nga siya mabanhaw sa pagpamanhaw unya sa kaulahian nga adlaw” (Juan 11:24). Tan-awa kon giunsa niini nga sundanan pagbalik balik diha sa Juan 11:25–27. Unsa ang nagdani kaninyo mahitungod sa ehemplo sa Manluluwas? Ngano nga ang pagpakigbahin sa pagpamatuod sa mga kamatuoran sa ebanghelyo ingon ka importante nga bahin sa pagtudlo?

Ang inyong pagpamatuod makahatag og gamhanang impluwensya diha niadtong inyong tudloan. Dili kini kinahanglan nga hanas nga pagkasulti o taas. Ug kini wala kinahanglana nga magsugod sa “Gusto kong mohatag sa akong pagpamatuod.” Yano nga ipakigbahin kon unsay inyong nahibaloan pinaagi sa gahom sa Espiritu Santo. Ang usa ka pagpamatuod sa kamatuoran labing gamhanan kon kini yano ug kinasingkasing. Pagpamatuod kanunay kabahin sa Manluluwas, sa Iyang ebanghelyo, ug sa Iyang gahom diha sa inyong kinabuhi, ug awhaga kadtong inyong tudloan sa pagbuhat og sama. Ug hinumdomi nga usahay ang labing gamhanan nga saksi wala dad-a sa magtutudlo apan sa kaubang estudyante.

Mga Pangutana nga Palandungon: Pangita og mga ehemplo diha sa mga kasulatan nga naghulagway sa gamhanang impluwensya sa usa ka tawo nga nagpamatuod. Unsa ang inyong nakat-onan gikan niadto nga mga ehemplo? Kanus-a kamo napanalanginan pinaagi sa pagpamatuod sa usa ka tawo? Giunsa sa pagpakigbahin sa inyong pagpamatuod pag-impluwensya niadtong inyong tudloan? Giunsa niini pag-impluwensya kaninyo?

Gikan sa mga Kasulatan: Mga Buhat 2:32–38; Mosiah 5:1–3; Alma 5:45–48; 18:24–42; 22:12–18; Doktrina ug mga Pakigsaad 46:13–14; 62:3

Pipila ka mga Paagi sa Paggamit Unsay Inyong Nakat-onan

• Hangyoa ang mga estudyante sa pagpakigbahin sa unsay gitudlo sa Espiritu Santo kanila samtang ilang gitun-an ang pulong sa Dios.

• Andama daan ang pagdawat og espirituhanong mga pag-aghat samtang nagtudlo.

• Isulat ang mga espirituhanong mga panghunahuna nga moabot samtang kamo nangandam.

• Paghatag og panagsa nga mga oportunidad alang sa mga miyembro sa klase sa pagpamalandong sa hilom nga paagi kon unsa ang gitudlo sa Espiritu kanila.

• Gamit og sagradong musika ug mga hulagway sa pagdapit sa impluwensya sa Espiritu.

• Paminaw alang sa mga pag-aghat samtang kamo nagplano ug nagtudlo, ug pangandan sa pagpahiangay sa inyong mga plano.

• Paghatag og mga oportunidad alang sa tanang mga estudyante sa pagpamatuod kabahin sa unsay ilang nakat-onan.

• Tabangi ang uban sa pag-ila kon ang Espiritu anaa.

• Pagpuyo sa kamatuoran nga inyong gitudlo aron kamo makapamatuod niini.

• Sunda ang mga pag-aghat sa pagtudlo diha dayon, sa impormal nga mga higayon.