Alang sa mga Lider—Pag-oryent ug Pagsuporta sa mga Magtutudlo

Isip usa ka lider, kamo adunay responsibilidad nga “makigtagbo sa bag-ong natawag nga mga magtutudlo” sa inyong organisasyon ug “motabang kanila sa pag-andam sa ilang mga calling” (Kinatibuk-ang Tamdanan, 17.3, Librarya sa Ebanghelyo). Kini nga mga miting mga oportunidad sa pagpaila sa bag-ong mga magtutudlo ngadto sa ilang sagradong mga calling ug sa pagdasig kanila uban sa usa ka panglantaw kon unsay ipasabot sa pagtudlo sumala sa pamaagi sa Manluluwas. Isip usa ka lider, makatabang kamo sa bag-ong mga magtutudlo nga mangandam sa pagserbisyo pinaagi sa pagbuhat sa mosunod:

• Pagpahayag og pagsalig nga ang Manluluwas motabang kanila sa ilang calling (tan-awa sa Doktrina ug mga Pakigsaad 88:78).

• Paghatag sa bag-ong mga magtutudlo og kopya niini nga kapanguhaan, ug pag-awhag kanila sa pagpangita og mga paagi sa paggamit sa mga baroganan niini diha sa ilang pagtudlo.

• Pakigbahin ngadto sa bag-ong mga magtutudlo og bisan unsa nga mahitungod sa inyong organisasyon nga makatabang kanila nga mahibaloan.

• Ingon nga gikinahanglan, pakigsulti sa bag-ong mga magtutudlo hain nga kwarto magklase ug sa unsa nga leksiyon magsugod. Paghatag og bisan unsang impormasyon nga ilang gikinahanglan mahitungod sa ilang klase ug sa mga sakop sa klase.

• Pagpasabot ngadto sa bag-ong mga magtutudlo nga kamo makatabang kanila sa ilang calling. Pagtanyag og suporta diha sa klasehanan ug sa paggamit sa mga kapanguhaan sa pagtudlo kon gikinahanglan.

• Pagtanyag nga mo-obserba usahay sa mga klase sa mga magtutudlo, ug mohatag og feedback ingon nga giaghat sa Espiritu.

• Pagdapit sa mga magtutudlo sa pag-apil sa matag tulo ka bulan nga mga miting sa konseho sa magtutudlo.

Sa kinatibuk-ang pagserbisyo sa mga magtutudlo, padayon sa pagpakigkita nila matag karon ug unya aron sa paghatag og nagpadayon nga suporta. Sama pananglitan, kamo makahimo og usa ka daklit nga panaghisgotan uban sa usa ka magtutudlo sa dili pa o human sa klase aron sa paghisgot sa mga baroganan sa Pagtudlo Sumala sa Pamaagi sa Manluluwas. Pangutan-a ang magtutudlo kon unsa ang ilang gibati nga nindot nilang nabuhat ug mga pamaagi nga gusto nilang mapalambo. Dasiga sila uban sa kamabination ug uban sa pasalamat alang sa serbisyo nga ilang gihatag.

Kamo kinahanglan nga mangandam alang niini nga mga panaghisgotan pinaagi sa pagtan-aw sa magtutudlo nga nagtudlo. Paningkamot sa pagsabot og mas maayo sa mga kalig-on sa magtutudlo ug sa pagdiskobre og mga paagi nga kamo makatanyag og suporta. Ang pagpalambo sa mga kalig-on sa magtutudlo sama gayod ka importante sa pag-ila sa mga oportunidad alang sa paglambo.