Mësoni – Koha Maksimale: 45 Minuta

Diskutimi i Sotëm:

2 Mbrojeni Familjen Tuaj nga Vështirësitë

grafika e shtëpisë

Harta e Suksesit për Kujdestarinë Financiare

Pikat për Buxhetin dhe Shpenzimet

Lexoni:Shqyrtoni dhe përditësoni buxhetin tuaj. Çfarë po shkon mirë? Cilat kategori keni nevojë të rregulloni, nëse keni ndonjë? A mund të shpenzoni më pak në disa kategori që të kurseni më shpejt për fondin tuaj për raste të ngutshme, që të çliroheni nga borxhi ose që të kurseni për të ardhmen? Një nga zotimet tuaja të kësaj jave do të jetë të diskutoni për veprimtarinë vijuese gjatë këshillit familjar.

Veprimtaria (5 minuta)

Merrni parasysh secilën nga kategoritë më poshtë dhe përgjigjuni me sinqeritet.

Si Ndihem rreth Shpenzimeve të Mia?	Shpenzoj tepër pak	Ndihem mirë për shpenzimet e mia	Shpenzoj me tepri
Ngrënia në restorante	□	□	□
Artikujt ushqimorë	□	□	□
Ushqimet e lehta dhe pijet	□	□	□
Zbavitja	□	□	□
Qiraja ose kredia	□	□	□
Shërbimet komunale	□	□	□
Veshjet	□	□	□
Gjërat për shtëpinë	□	□	□
Transporti	□	□	□
Sigurimet	□	□	□
Telefoni celular	□	□	□

Përsiatni:Çfarë do të bëni nëse hasni një krizë financiare? Çfarë krize financiare keni përjetuar në të kaluarën?

Lexoni:Te Dhiata e Vjetër, Jozefi e paralajmëroi Faraonin për shtatë vite bollëku, të pasuar me shtatë vite zie buke. Menjëherë, Faraoni caktoi mbikëqyrës për të vendosur mënjanë [prodhime] shtesë nga vitet e begata që të përgatitej për vitet e këqija (shih Zanafilla 41:1–37). Ndonëse mund të mos kemi gjithmonë një profeci të qartë se kur do të vijnë kohët e begata dhe të këqija, profetët sot na kanë nxitur që të përgatitemi për kohë krize, veçanërisht kur gjërat po shkojnë mirë.

Në këtë kapitull, ne do të mësojmë se çfarë të bëjmë kur hasim një krizë financiare dhe si të përgatitemi për kohë krizash përpara se ato të ndodhin.

Diskutoni:Çfarë lloj krizash financiare mund të hasni? Hidhni në letër më poshtë idetë e grupit.

Gjithnjë Ekziston një Mënyrë

Kur filluam të mësonim për mbledhjen e një fondi për raste të ngutshme, unë dhe bashkëshorti im nuk e kishim menduar se në të vërtetë do të mblidhnim mjaftueshëm para. Ne u lutëm për udhërrëfim dhe përgjigjja jonë ishte që të shitnim një nga makinat tona. Tani bashkëshorti im merr autobusin për të shkuar në punë dhe ne kemi një fond të mirëfilltë për raste të ngutshme.

1. Mësoni t’i Përballoni Krizat Financiare

Lexoni:Ashtu si një plan për raste të ngutshme apo largim në rast zjarri, në rastin e një krize financiare ju duhet të keni një rrjedhë veprimi që është e lehtë për ta ndjekur. Rreth përballimit të sprovave, Plaku Marvin J. Ashton pyeti: “A mund të uleni qetësisht, të shqyrtoni faktet dhe të renditni të gjitha rrjedhat e mundshme të veprimit? A mund t’i identifikoni shkaqet dhe ta përcaktoni rrugëdaljen? Të menduarit të thellë në qetësi mund t’i zgjidhë problemet më shpejt sesa vrulli i tërbuar” (“Give with Wisdom That They May Receive with Dignity”, Ensign, nëntor 1981, f. 88). Përcaktimi se si t’iu bëjmë ballë krizave financiare që më përpara, do t’ju lejojë që të jeni të përgatitur emocionalisht dhe financiarisht kur vështirësitë të godasin dhe mund t’ju ndihmojë që t’i parandaloni disa kriza në të ardhmen. Përballimi i një krize financiare kërkon dy hapa: vlerësimin e situatës dhe ndërmarrjen e veprimit të duhur.

Diskutoni:Përse është e rëndësishme që të vendosni tani se si ta përballoni një krizë financiare? Si ju kanë ndihmuar Shpirti që t’iu bëni ballë krizave në të kaluarën?

Vlerësoni Situatën

Lexoni:Për ta vlerësuar një krizë të mundshme financiare, ju mund të doni të bëni pyetjet në vijim:

• A jeni besnik në pagimin e së dhjetës dhe ofertave tuaja? A po e jetoni jetën tuaj në një mënyrë të tillë që të jeni të denjë për bekimet e Perëndisë?

• Çfarë masash paraprake për raste të ngutshme keni tashmë në zbatim që do t’ju ndihmojnë të përballeni me sfidën aktuale? A keni rezerva ushqimore dhe uji? një fond për raste të ngutshme? sigurimin e duhur?

• Ku ju çalojnë përgatitjet për rastet e ngutshme?

• Cilat polica për sigurimet keni që mund të mbulojnë një pjesë ose të gjithë pjesën e kësaj sfide?

• Për sa kohë do të jeni në gjendje të mbështeteni te fondi juaj për raste të ngutshme?

• A ka vend në buxhetin tuaj dhe në planin për eliminimin e borxhit për rregullime të përkohshme, nëse është e nevojshme?

Diskutoni:Përse është e rëndësishme që ta vlerësoni plotësisht një situatë përpara se të veproni?

Veproni

Lexoni:Në varësi të llojit dhe gjendjes së krizës suaj financiare, ka veprime të ndryshme që mund të jeni në gjendje t’i ndërmerrni që t’ju ndihmojnë për t’i kapërcyer sfidat tuaja financiare. Ndonëse këto veprime mund të mos kenë kuptim për të gjitha situatat, hapat vijues duhet t’ju japin një ide të asaj se ç’mund të bëhet në rastin e një krize financiare.

Telefononi Kompaninë Tuaj të Sigurimeve

Lexoni:Disa kriza financiare mund të përfshijnë një rast të ngutshëm shëndetësor, një aksident automobilistik, riparime për shtëpinë ose humbjen e punës. Për situata të tilla, përpara se t’ju zërë paniku ose të ndërmerrni veprime të tjera, merreni në telefon kompaninë tuaj të sigurimeve që t’ju kontrollojë pjesën e mbulimit. Bërja e pyetjeve për mbulimin nuk do të thotë që po paraqitni një kërkesë. Por nëse në situatën tuaj jeni të mbuluar, duhet të jeni në gjendje të kuptoni disi se sa do të jenë shpenzimet tuaja vetjake.

Diskutoni:Cilat kriza financiare ia vlen të mbulohen nga kompania juaj e sigurimeve?

Përdorni Fondin Tuaj për Raste të Ngutshme

Lexoni:Qëllimi i fondit tuaj për raste të ngutshme është t’ju ndihmojë të dilni nga krizat financiare. Mos u ndieni fajtor që i përdorni ato për këto situata. Ju mund ta përdorni fondin tuaj për raste të ngutshme për çfarëdo gjëje që iu nevojitet – nga shpenzimet e jetesës deri te sigurimet me përqindje të zbritura. Tregohuni të zgjuar që ta përdorni atë për gjërat e duhura në kohën e duhur. Rimbusheni fondin tuaj për raste të ngutshme sa më shpejt të jetë e mundur nëse ju duhet të përdorni para nga ai.

Paguani së Pari Shpenzimet dhe Faturat Tuaja më të Rëndësishme

Lexoni:Shqyrtojini mirë të gjitha shpenzimet dhe faturat tuaja dhe përcaktoni se cilën duhet të paguani menjëherë dhe cilën mund ta shtyni për një periudhë të shkurtër kohe pa gjobë të madhe. Mund të jetë e nevojshme të telefononi faturuesit tuaj për të parë nëse ka periudha të përkohshme që nuk kërkojnë pagesa [gjatë rasteve të ngutshme], mundësi skemash për pagesa pa interes ose zgjatje të afatit përfundimtar. Tregohuni të zgjuar se cilat shpenzime të paguani së pari dhe shqyrtoni pasojat e pafavorshme për shtyrjen e pagesave të faturave të tjera përpara se ta bëni këtë. Do t’ju nevojitet të ndaloni së bëri shpenzime të panevojshme për një periudhë, nëse është e mundur. Përqendrohuni tek ushqimi, strehimi, shërbimet komunale dhe transportimi i nevojshëm përpara se të bëni shpenzime të tjera.

Diskutoni:Përse do të ishte më e rëndësishme që të paguani së pari shpenzimet e renditura?

Telefononi Kreditorët Tuaj

Lexoni:Në rrethana ekstreme, mund të jetë gjë me mend të telefononi kreditorët tuaj dhe t’u shpjegoni situatën tuaj aktuale. Në varësi të krizës, ju mund të doni t’i kërkoni:

• Shtyrje të përkohshme ose zvogëlim të pagesave.

• Zgjatje të huas ose ndryshim të përkohshëm për kriteret e saj.

Ndonëse kjo mund të jetë mundësia e vetme e arsyeshme në rastet ekstreme, kini kujdes se shtyrja e pagesave ose ndryshimi i kritereve për huan tuaj mund t’ju çojë në taksa shtesë dhe ta bëjë huan më të shtrenjtë gjatë kohëzgjatjes.

Përcaktojini Burimet e Tjera që Mund të Vijnë në Ndihmë

Lexoni:Përgjegjësia jonë është të sigurojmë për veten dhe familjen tonë. Sidoqoftë, do të ketë raste kur do të na duhet të mbështetemi te të tjerët përkohësisht. Ndërsa kërkoni burime të tjera, jini të kujdesshëm që të mos bëheni të varur te ndihma për një kohë të gjatë – një varësi e tillë do të pengojë përparimin tuaj shpirtëror dhe material. Teksa lexojmë te kapitulli 2, Presidenti Spenser W. Kimball dha mësim se ka katër nivele të ndihmës materiale tek të cilat mund të drejtohemi:

mbështetja financiare

1. Vetvetja: Së pari ju duhet të bëni gjithçka që mund ta bëni vetë për të siguruar për familjen tuaj dhe për ta lehtësuar kërcënimin e menjëhershëm.

2. Familja: Nëse nuk jeni në gjendje t’i plotësoni vetë nevojat financiare bazë pasi keni bërë gjithçka që ju vetë mundeni, ju duhet t’i drejtoheni një pjesëtari të ngushtë ose të afërm të familjes, nëse është e nevojshme, për mbështetje financiare të përkohshme, qoftë për strehim, ushqim ose nevoja të tjera.

3. Kisha: Pasi keni bërë gjithçka që mund ta bëni vetë dhe pasi të kërkoni ndihmë nga familja, mund të keni nevojë të takoheni me udhëheqësit tuaj të Kishës (peshkopin, presidentin e degës ose presidenten e Shoqatës së Ndihmës) për të shqyrtuar mundësi shtesë. Kujtoni se udhëheqësit tuaj të Kishës janë udhëzuar me urtësi që t’i ndihmojnë njerëzit ta përkrahin jetën kur është e nevojshme, jo stilin e jetesës.

4. Komuniteti: Programe përkrahëse të ndryshme komunitare ose shtetërore mund të jenë në dispozicion për ju që të mund t’ju ofrojnë ndihmë në formë këshillimi financiar ose për punësimin, ndihmë për strehimin, përkrahje për ushqimin e të porsalindurve dhe kujdesin për nënat shtatzëna, e të tjerë. Kujtoni se këto programe janë përcaktuar për të dhënë ndihmë afatshkurtër. Mos u mbështetni tek ata për një kohë të gjatë.

Diskutoni:Përse duhet të kërkojmë ndihmë nga familja jonë përpara se të kërkojmë ndihmë nga Kisha dhe komuniteti? Çfarë burimesh që përcaktoi grupi juaj janë në dispozicion në zonën tuaj për t’ju ndihmuar në kapërcimin e krizave?

Veprimtaria (10 minuta)

Hapi 1: Përgjigjiuni në mënyrë të pavarur pyetjeve më poshtë dhe merrni parasysh se çfarë do të bëni për të përballuar një krizë financiare.

Nëse do të humbisja burimin e të ardhurave të mia, për sa kohë do të jetoja me kursimet e mia? (Sa ditë, javë apo muaj?)

Kush janë kreditorët e mi që do të më duhej t’i telefonoja për t’ia shpjeguar situatën time?

Te cilët pjesëtar të familjes apo miq mund të drejtohesha nëse do të më nevojitej ndihmë?

Hapi 2: Bashkohuni me partnerin tuaj në veprim (ose bashkëshortin/en tuaj nëse ndodhet aty) dhe diskutoni për përgjigjet tuaja. Diskutoni për mënyrat se si mund të përgatiteni më mirë tani për kohët e vështira në vazhdim. Shënoni idetë tuaja dhe bëni plane që t’i ndiqni.

2. Shtoni Përgatitjet Tuaja për Rastet e Ngutshme

Lexoni:Ju duhet të keni ose duhet të jeni duke punuar për të mbledhur një fond njëmujor për raste të ngutshme. Përgatitjet tuaja nuk duhet të përfundojnë aty! Punoni për t’u çliruar nga borxhi konsumator dhe që më pas të mblidhni një fond tre deri gjashtë mujor për raste të ngutshme dhe të kërkoni sigurime për të mbrojtur të ardhurat tuaja.

Mblidhni një Fond Tre deri Gjashtë Mujor për Raste të Ngutshme

Lexoni:Pasi ta keni shlyer të gjithë borxhin tuaj konsumator, hapi tjetër është ta shtoni fondin tuaj njëmujor për raste të ngutshme në një fond tre deri gjashtë mujor për raste të ngutshme. Kujtoni që t’i ruani paratë për fondin tuaj për raste të ngutshme në një vend të sigurt që të mund t’i merrni pa paguar gjobë. Shtojeni këtë fond sa më shpejt të jetë e mundur që të jeni më mirë të përgatitur për krizat financiare. Një nga zotimet tuaja të kësaj jave do të jetë ta vlerësoni fondin tuaj për raste të ngutshme dhe të vazhdoni t’i shlyeni borxhet tuaja konsumatore.

Kërkoni Sigurime të Përshtatshme për Të Ardhurat

Shënim: Ky informacion mund të mos zbatohet për rajonin ose zonën tuaj.

Lexoni:Një nga pasuritë tuaja më të rëndësishme janë të ardhurat tuaja. Kërkoni për polica të besueshme sigurimi për paaftësinë fizike dhe për jetën në zonën tuaj dhe merrni mbulimin e përshtatshëm sa më shpejt të jetë e mundur.

Diskutoni rreth Përgatitjes për Krizat Financiare në Këshillin Tuaj Familjar

Lexoni:Një nga zotimet tuaja këtë javë do të jetë të diskutoni për përgjigjet tuaja për “Pikat për Buxhetin dhe Shpenzimet” (shih faqen 147) dhe për përgatitjet tuaja për krizat financiare. Diskutoni për rastet e ngutshme që mund të vijnë në familjen tuaj, si mund të përgatiteni për to, çfarë sigurimi mund t’ju nevojitet të merrni që t’ju ndihmojë ta mbroni veten dhe planet për t’u telefonuar faturuesve dhe kreditorëve nëse e kërkon nevoja. Ju mund të doni të përdorni përvijimin më poshtë “Model Diskutimi Në Këshillin Familjar”. Kujtoni, nëse nuk jeni i/e martuar, këshilli juaj familjar mund të përfshijë një shok/shoqe të dhomës, mik/mikeshë, pjesëtar/e të familjes ose këshillues/e.

Model Diskutimi Në Këshillin Familjar

Sigurohuni që të filloni dhe të mbaroni me një lutje për ta ftuar Shpirtin.

Pjesa 1: Shqyrtoni

• Si po ecni me buxhetin tuaj? (Shqyrtoni përgjigjet për veprimtarinë “Pikat për Buxhetin dhe Shpenzimet” në faqen 147.)

• Si po ecni me fondin tuaj njëmujor për raste të ngutshme?

• A jeni duke jetuar një jetë aq të drejtë sa ta meritoni ndihmën e Perëndisë gjatë një krize? Çfarë mund të përmirësoni?

Pjesa 2: Planifikoni

• Çfarë krizash financiare mund të ndodhin në familjen tuaj?

• S para ju nevojiten për fondin tre deri gjashtë mujor për raste të ngutshme? Çfarë mund të bëni që të kurseni për të?

• Për çfarë gjërash ia vlen dhe nuk ia vlen ta përdorni fondin tuaj për raste të ngutshme?

• Çfarë mund të bëni më tepër që të përgatiteni për këto kriza?

• Çfarë sigurimi ju nevojitet të merrni për t’i mbrojtur të ardhurat, shëndetin dhe zotërimet tuaja?

• Çfarë mund të bëni për ta përmirësuar ose rregulluar buxhetin tuaj?