Wiewia Kan 10

Kornilius oh Kempoakepah kan Alehdi Ngehn Sarawi

Rongamwahuo mie ong koaros

Kornelius wia kaun en sounpei en Rom kan. Ih oh ah peneinei kamehlele Koht, ahpw kaidehn irail mehn Suhs oh irail sohte ese duwen Sises Krais. Kornelius kin ehukihwei dahme e ahneki kan ong me semwehmwe kan oh kin kalapw kapakap ong Koht.

Wiewia Kan 10:1–2

Mwurin souwas ehu, tohnleng emen kohdo rehn Kornelius ni e kaisihsol oh wie kapakap. Tohnlengo koasoia, “Kornelius, ahmw kapakap kan alahldahr.” Koht mahsaniher ah kadek kan. Tohnlengo padahkiong Kornelius en rapahkihda Wahnparoan Piter, me koukouson nan kanihmw ehu me adaneki Sopa. Piter pahn padahkihong Kornelius dahme e pahn wia.

Wiewia Kan 10:3–6, 30–32

Kornelius padahkiong nah ladu kan dahme tohnlengo mahsenih. E kadar iraillahng Sopa pwe rehn peki rehn Piter en pwarek ih.

Wiewia Kan 10:7–8

Nan Sopa, Piter mihmi pohn ihmw ehu oh wie kapakap. E men mwengedahr oh pahn kohlahng mwenge, ni ansou ohte e kilangada kaudiahl ehu.

Wiewia Kan 10:9–10

Piter kilangada lapalahn lohs ehu kohkohdihdohsang nanleng, me audaudkihda soangesoangen mahn tohto oh mahn pihr tohto. Piter ahpw rongada ngihl ehu me koasoia ah en kang mahn oko. Ahpw ih soangen mahn me mehn Suhs akan sohte mweimwei en kang. Kosonned en Moses padahngki me re sohte mwakelekel. Piter sohte men kang irail.

Wiewia Kan 10:11–14

Ngihlo koasoia me ma Koht wiahda mehkot me mwakelekel, e sohte kak kahdaneki me e sohte mwakelekel. Kaudiahlo kapwurupwurihong pahn pak siluh. Piter medewe dah wehwepehu.

Wiewia Kan 10:15–17

Ni ansou ohte, Ngehno padahkihong Piter me ohl silimen raparapahki ih. “Iang irail da,” Ngehno koasoia, “pwe ngehi me kadariraildo.”

Wiewia Kan 10:16–21

Ohl silimen ko iei nein Kornelius ladu kan. Irail padahkihong Piter duwen tohnlengo me Kornelius kilangada oh peki ma Piter kak iang irail da oh kohla padahki ih. Mehn Suhs sohte kin pidelong nan ihmwen aramas me kaidehn mehn Suhs, oh Wahnparoan akan sohte kin padahki irail duwen rongamwahuo. Ahpw sang ni ah tamanda kaudiahl me e alehdier, Piter pilada en kohla.

Wiewia Kan 10:22, 28

Ansou me Piter lella wasao, Kornelius wie awiawi ih iangahki kempoakepah kan oh ah tohn peneinei kan. E padahkiong Piter me re onopadahr en rong dahme Koht mahsanihong ih en kohdo oh padahkiong irail.

Wiewia Kan 10:26, 33

Met Piter esehdahr dahme Koht songosong en padahkiong ih nan ah kaudiahlo. Piter padahkiong irail me Koht sohte poakohng te wasa ehu de pwihn en aramas ehu laudsang ehu tohrohr. Koht kin alehda sohte lipilipil aramas me kin idahwen Ih oh kin wia me pwung. Piter padahkihong Kornelius oh ah peneinei oh kempoakepah kan duwen Sises Krais.

Wiewia Kan 10:34-43

Duwen me e padahngki, Ngehn Sarawio kohdo rehn koaros me rongorong. Piter luhkeiong irail en pepdaisla ni mwaren Sises Krais. Piter esedahr me seri en Koht koaros pahn kapindowe nan Mwomwohdiso en Sises Krais. Rongamwahu en Sises Krais kalohklahng koaros.

Wiewia Kan 10:44–48