Luk 19:1–10

Sakies Sounrik Daksis

Doudahng pohn tuhke pwoat pwe en kilang Sises

Sises ketila nan kahnihmw en Seriko. Ohl emen adaniki Sakies kin kouson wasahuo. Sakies sounrik daksis kepwehpwe men. Aramas tohto sohte pereniki sounrik daksis kan. Irail kin medewe me sounrik daksis kan kin kihsang mwohni laud rehn aramas akan.

Luk 19:1–2

Sakies rongada me Sises ketiket nan kahnihmwo. E men esehla duwen Sises. E song en kohla kilang Sises, ahpw e sohte kak pwehki diren aramas me mihmiseli limwah Sises, oh Sakies nohn mwotomwot pwe en kilang ih nanpwungen aramas akau. Ia mwomwen eh pahn kak kilang Sises?

Luk 19:3–4

Sakies tangala oh doudahng pohn tuhke pwoat pwe en kilang Sises. Ni ansou me Sises lella wasahuo, E ahpw mahsendahlahte oh mahsaniada Sakies pohn tuhkeu. Sises ahpw ketin eker edehu oh mahsanih, “Patohdihdo.” Sises kupwuriki en pwarek ih ni imwehu. Sakies ahpw mwadangete doudihsang pohn tuhkeu. E udahn perenkihda Sises eh pahn ketila ni imwehu.

Luk 19:4–6

Aramas akan nan Seriko ahpw medemedewe dahme kahrehda Sises pahn ketikihla ni imwen Sakieso. Irail medewe me Sakies aramas dipan emen pwehki e wia sounrik daksis.

Luk 19:7

Sakies patohwanohng Sises, “Elepen ei kopweh kan I kihong me semwehmweh kan.” E koasoia me ma e kihsang mwohni laud sang aramas emen, e kin kapwurehiong irail laudsang. Sises mahsanihong Sakies, “Rahnwet komour lellohngehr ni ihmw wet.” Sises mahsanih me E ketido pwe en rapahkih oh komourala aramas akan me salongalahr.

Luk 19:6, 8–10