Wiewia 6–7

Stipen Kadehdehki Sises Krais

Ladu kommwad emen tohnmeteikihla ah mour pwehki ah kadehde

Mwomwohdiso wie kekeirida mwadang. E inenen apwal ong Wahnparoan akan en apwalih towe kan koaros.

Wiewia kan 6:1–2

Wahnparoan akan medewe me irail en pilada ohl isimen pwe en sawas. Irail peki rehn towe kan en iang rapahki ohl kei me loalokong oh me kin audaudki Ngehn Sarawi.

Wiewia kan 6:3

Emen aramas me re pilada iei Stipen. Wahnparoan akan kihong Ih kapai ieu. Stipen ahneki pwoson laud oh kin wiahla manaman kopwuriamwei kan nan pwungen aramas ako.

Wiewia kan 6:5–8

Stipen kin padahngki duwen Sises Krais ni marain oh iangahki Ngehno. Ahpw kaun akan en sinakokeo sohte mwahuki dahme e kin padapadahngki kan. Irail kin koasoia me e kin uhwong Moses oh Koht. Irail wahdo Stipen mwohn samworo lapalapo oh taun teikan.

Wiewia kan 6:9–15; 7:1

Mesen Stipen duwehla mesen tohnleng emen. E katamankiong kaun ako me Koht poaronedo Moses pwe en kapitala mehn Isrehl kan. Stipen koasoia me Moses duwehte Sises Krais. Koht poaronedo Sises pwe en doarehla Sapwellime aramas akan, ahpw irail kaun akan sohte idahwen Ih. Kaun akan lingeringerida pahn Stipen.

Wiewia kan 7:20–43, 51–54

Audaudkihda Ngehn Sarawi, Stipen kilengdahla Nanleng. E kilangada Sises Krais kesikesihnen limwahn Sahm Nanleng.

Wiewia Kan 7:55–56

Ni ansou me Stipen padahkiong kaun akan dahme e kilangehr, irail inenen lingeringerda mehlel. Irail wer ni lingeringer oh parokedi Stipen. Irail wurahdekisang nan kanihmwo.

Wiewia kan 7:57

Irail kihdi arail likou puhp kan ni nehn ohl emen me adaneki Sohl. Irail eri katehki takai Stipen pwe en kemehla. Sohl pwungki dahme irail wiewia. Stipen kapakap. E peki rehn Kauno en mahkong irail aramas akan me kalokolokih Ih. E pil peki rehn Kauno en alehda ngehni nanleng.

Wiewia kan 7:59–60; 8:1