Sises Ketilong nan Serusalem

Aramas akan kasamwo arail Sounkomouro

Aramas akan awih likin Serusalem pwe rehn tuhong Sises.

Kereniongehr ansou en Pahsopa, kamadipw kesempwal ehu ong mehn Suhs akan. Aramas tohto kohla Serusalem pwehki Pasohpa. Sises oh Sapwelime werek kan pil ketila wasao. Ansou me aramas akan rongada me Sises wie ketiket kohdo, irail kohla pwe rehn tuhong Ih.

Madiu 21:1; Sohn 12:12–13

Sises oh Sapwellime werek kan kerenlahngehr Serusalem.

Ansou me Sises oh Sapwelime werek kan kerenlangehr Serusalem, E peki rehrail en wadohng Ih emen dongki. Sounpar tohto mwowe, soukohp emen kosoia me Sounkomour o pahn ketido ni karakarahk, dakedake dongki pwulopwul men.

Madiu 21:1–7; pil kilang Zechariah 9:9

Sises ketilong nan kanihmwo dakedake dongki men. Aramas akan inenen perenikihda arail kilang Ih. Irail kasamwo Ih nin duwen nanmwariki men. Irail kihdi rahn tuhke kan oh likou nan pwehl pwe donkey o en alu powe. Irail kalahngan ong Koht weriweriki, “Hosana: Kapaiada Nanmwariki en Isrehl me ketidohr ni mwaren Kauno.”

Madiu 21:8–9; Luhk 19:36–38; Sohn 12:13

Aramas tohto nan Serusalem pwonopwoniki dahme wiewiawi. “Ihs met?“ irail idek. Ekei sapeng me iei ih Sises mehn Nasared.

Madiu 21:10–11

Sises mahsanih aramas akan arail weliweliali mwohni nan tehnpas sarawio.

Mwuri, Sises ketila ni tehnpas sarawio. Ekei aramas wasao wie weliweliali mwohni oh netinetiki mahn akan ong mehn meirong. Sises mwangih me re sohte mehlel.

Madiu 21:12

Sises masanihong aramas akan me weliweliali mwohni ko en kokohlasang ni tehnpas sarawio.

Sises sohte mwahuki arail wiewie mwohni sang rehn aramas akan me men sarawi nan tehnpas sarawio. E kahreiong irail en kokolahsang tehnpas sarawio oh wekidedi arahl tehpel kan. E masanih, “Tehnpesei pahn kahdaneki tehnpas en kapakap; ahpw kumwail wiahda wasahn soun pirap ekei.“

Madiu 21:12–13; pil kilang Aisseia 56:7; Seremaia 7:11

Sises kamwahuihla aramas akan nan tehnpas sarawi.

Aramas me maskun de me sohte kak alu kohdohr rehn Sises nan tehnpas sarawi, oh E kamwahuila irail. Seri kan weriweriki “Hosana,“ kepikepinga Sises oh kosokosoia me Ih me Sounkomour.

Madiu 21:14–15

Sises mahseniong prihst kan oh soun inting kan.

Ekei prihst kan oh soun inting kan lingeringei ansou me re kilangada dahme Sises wia oh rong dahme seri kan kosokosoia. Sises katamankihong irail duwen iren pwuhk sarawi ehu me kosoia Koht pahn wiahda kaping unsek kan en kohsang nan ewen seri kan.

Madiu 21:15–16; pil kilang Psalm 8:2