Luk 24:1–12, 36–49; Sohn 20

E Ketin Iasadahr

Sises Krais ketin powehdier mehla ong koaros

Sapwellimen Sises tohnpadahko pwilikihdihengehr Paliwere nan sousouo. Irail men wia soahng teikan en kak apwalih Paliwere, ahpw ihte pwe e kereniengehr rahn en Sapad. Irail pilahnehda en pwurodohng mwurin Sapad eh pahn imwisekla.

Luk 23:52–56

Ni sohrahn en kesiluh en rahn mwurin Sises eh pwoulahu, Mary Makdala oh mehteiko ahpw kohla ni sousouo.

Luk 24:1; Sohn 20:1

Ni ansou me irail lella mwo, irail kilangada me takai me perehla sousouo katapwurasangehr. Irail pidolongala nan sousouo, oh paliweren Sises solahr mih mwo.

Luk 24:2–3; Sohn 20:1

Mary ahpw tangala pwe en ndahiong Pihter oh Sohn me aramas wahsangehr paliweren Siseso. Pihter oh Sohn ahpw tangala ni sousouo.

Sohn 20:2–4

Ni ansou me irail lella ni sousouo, Pihter oh Sohn pidolongala loalle. Ira kilangadahr me paliweren Sises solahr mie. Likou me E kidikidikipenehu me mihmi wasahuo.

Sohn 20:5–7

Pihter oh Sohn pwurala ni imwarahko, ahpw Mary mihmihte ni sousouo, wie sengiseng. E kilenglongala nan sousouo oh kilangada tohnleng riemen. Ira idek reh dahme e wie sengisengki. E ahpw nda me mie me wahsangehr paliweren Sises, oh e sehse iawasa e mih ie.

Sohn 20:11–13

Eri Sises ahpw ketido, ahpw Mary sohte wewehki me Ih mwo. Sises ahpw keinemwe reh, “Lih, dahme ke mwahmwahieiki?” Mary lemehki me Ih soumwet men. E ahpw kalelapak Reh ma E wewehki iawasa paliweren Sises mih ie.

Sohn 14:15.

Sises ahpw mahsanih, “Mary.” Mary ahpw sohpeilahng. Met e esehier me Sises mwo! E ahpw ndalahng Ih, “Maing Kaun.” Sises ahpw mahsanihong en ndahieng tohnpadahk teikau me E anahne ketdahla mahs rehn Seme Nanleng. Mary tuhwongdi tohnpadahk teikau oh ndahieng irail me e kilangadahr Sises oh E ketin ieias!

Sohn 20:16–18

Nih soutiko, pali tohtohn Wahnpoaron kau wie mihmipene. Irail ritingidi wenihmw kan, masmasak kaun en mehn Suhs kan de re diar irail. Mwadahngete, irail kilangada Sises eh ketin keskesihnen nanpwungarail. Irail tepte masepwehkada. Irail lemehki me Ih ngehn emen. Sises ahpw mahsanih, “Popohl ong kumwail.”

Luk 24:33–38; Sohn 20:19

Sises ahpw lukehieng Wahnpoaron ko en doahke limeh kan oh aluweluweh kan. E kupwuriki irail en ese me E ahniki paliwar, kaidehnte ngehn. E pil koanoate mwahmw oh pilawa rehrail. Tohnpadahko inenen perenkihda arail kilang Ih!

Luk 24:39–44; Sohn 20:20

Eri Sises ahpw sewesehda Sapwellime Wahnpoaron ko wewehkihla iren pwuhk sarawi kan me kasukuhlki duwen Sapwellime pwoula oh Iasada. E kupwuriki irail en padahkihong koaros me pwehki Ih, irail kak koluhla oh ale mahkepen diparail. Wahnpoaron kan pahn wia Sapwellime soun kadehde kan.

Luk 24:44–48

Wahnpoaron Tomas sohte mih wahsao ni ansou me Sises ketdohu. E koasoia me e sohte pahn kamehlele me Sises ieias ihte ma e pahn kilang lupwen meteh kan nin limeh kan.

Sohn 20:24–25

Mwurin rahn waluh, tohnpadahko pokonpene. Sises pwurehng sapahldo. Ansou wet Tomas iangehr mih mwo.

Sohn 20:26

Sises lukehieng Tomas en doahke lupwen ohla kan me mih nin limeh kan oh pengepenge. E ketin mahsanihong Tomas, “Ke dehr sohte ahniki pwoson, ahpw kamehlelehte.” Tomas ahpw nda, “Ei Kaun oh ei Koht.” Met Tomas kamehlelehier me Sises ketin iasadahr. Sises ahpw mahsanih me aramas akan kin kapaida ni ansou me irail kin kamehlele, itarete arail saikinte kilang Ih.

Sohn 20:27–29