Mehn Kapehse
Duwen Kadehde Kapw
Koasoaipen Sises Krais oh Sapwellime werengkan
Pwuhk Sarawi wiawihkihda pali riau: Kadehde Mering oh Kadehde Kapw. Kadehde Mering ntingda sang rehn soukohp en mahs ako. Ekei soukohp pwukan ntingihdi me Koht inoukihdi me E pahn ketin kadaredo Sounkomour men. E pahn wia Sapwellimen Koht Iehros oh e pahn doareikitail sang nan dihp oh mehla pwe kitail en kak pwurala oh kousoanla rehn Koht ehu rahn.
Aiseia 53:3–5; Seikop 7:11; Moses 4
Kadehde Kapw koasoiahda me inou wet pweidahr. E koasoiahda ipwidi en Sises Krais, Sapwellimen Koht Iehros.
Luk 2:4–7
Kadehde Kapw pil koasoiahda duwen Sapwellimen Sises mour. E ketin ieias nan pwungen mehn Suhs akan oh padahkiong kitail ia mwomwen mour pwe kitail en kak pwurala rehn Sahm Nanleng ehu rahn.
Madiu 5:1–2
Sises kapaiada oh papah aramas akan. E wiahda soahng kopwuriamwei tohto ohng irail, me duwehte kamwahuiala aramas me soumwahu akan oh kamourada me melahr akan.
Madiu 4:23
Sises malipe meh ehk riemen sang nan pwungen Sapwellime werengko en wiahla Wahnpoaron kei. E ketkiheng irail mweimwei en kaukaweid Sapwellime Mwomwohdisohu.
Luk 9:1-2
Pwehki E poakohng kitail, Sises ninlimehda atail medek, nsensuwed, oh dihp. E ketin pwoukinkitaila. Eri, mwurin rahn siluh, E ketin powehdier mehlao oh ketin iasadahr. Sises Krais ketin ieias oh pwehki Ih, kitail kak koluhkihla dipatail kan oh pwurehng mourda mwurin atail mehla.
Aramas koaros me ese oh poakohng Sises ntingihada duwen mepwukat koaros. Sapwellime Wahnpoaron ako ntingiada kisin likou kan en sewese tohn Mwomwohdiso kalaudehla arail pwoson Sises Krais. Soahng koaros me irail ntingihada neknekla uwen sounpar tohto. Met komw kak wadek nan Kadehde Kapw oh esehla iamwomwen ahmw kak idawehn Sises Krais.
Luk 1:1–4