“ʻI he Tupu ʻo Tokolahi ʻa e Kau ʻĀkongá”

ʻI he tupulaki ko ia ʻa e Siasí he kuonga muʻá, ne faʻa ʻi ai ha fetaʻemahinoʻaki ʻi he ngaahi kulupu ne ʻi aí. (Ngāue 6:1). Te tau lava fēfē ʻi heʻetau hoko ko e kāingalotu ʻo e Siasí, ʻo ikunaʻi e ngaahi fetaʻemahinoʻaki mo e ngaahi ʻā vahevahe ʻiate kitautolú? Ko e hā hono ʻuhinga ʻoku mahuʻinga ke tau fai ai iá?
Naʻe feʻiloaki fēfē ʻa Filipe mo e ʻiunoke mei ʻItiopeá? (Vakai Ngāue 8:25–29). Ko e hā ha ngaahi tāpuaki ne maʻu ʻe Filipe mo e ʻItiopeá tuʻunga he muimui ʻa Filipe ki he Laumālié? (Vakai, Ngāue 8:30–38). Ko e hā ha ngaahi tāpuaki kuó ke maʻu (pe ko ha taha ʻokú ke ʻiloʻi) koeʻuhí ko haʻo muimui ki he Laumālié?
Naʻe liliu ʻa Saula mei heʻene fakatangaʻi e kāingalotú ʻo ne hoko ko ha tamaioʻeiki ʻa e ʻEikí ʻi he hili ʻene fanongo ki he leʻo ʻo e ʻEikí (Ngāue 9:1–9, 17). Te tau lava fēfē ʻo fanongo ki he leʻo ʻo e ʻEikí? (Vakai, T&F 1:38; 6:23; 8:2; 18:34–36). ʻE lava fēfē ʻe heʻetau fanongo ki he leʻo ʻo e ʻEikí ʻo tokoniʻi kitautolu ke tau ului?

Fokotuʻu ki hono Aleaʻi ʻe he Fāmilí

Hili haʻamou lau fakafāmili mo fakaʻilongaʻi e ʻū potu folofola ko ʻení, fai ʻa e ngaahi fehuʻi ko ʻení.

Ko e hā hono ʻuhinga ʻoku mahuʻinga ai ʻa ʻete hoko ko ha mēmipa ʻo e uōtí pe koló? Ko hai fua e kau taki mo e kau faiako ʻi hotau uōtí? Ko e hā ʻoku nau fai ke tokoniʻi mo poupouʻi kitautolú? Ko e hā te tau fai ke tokoniʻi mo poupouʻi kinautolú?