Lēsoni 12
“Ko Au ko e Mā ʻo e Moʻuí”
-
Naʻe fakatukupaaʻi ʻe Sīsū ʻa e kau taki ʻo e kakai Siú ke nau “fekumi lahi ʻi he ngaahi Tohi Tapú” (Sione 5:39). Ko e hā hono faikehekehe ʻo e fekumi ki he folofolá pea mo hono laú? Kuó ke ngaohi fēfē ke toe mahuʻingamālie ange ʻa hoʻo ʻako fakatāutaha mo fakafāmili ʻo e folofolá? Kuo tāpuekina fēfē kimoutolu ʻi hoʻo mou fekumi ki he folofolá?
-
Ko e hā ne toe hōloa ai e tui ʻa Pitá ʻi heʻene luelue he fukahi vaí? (Vakai Mātiu 14:30). ʻOku tau faʻa fai fēfē he taimi ʻe niʻihi ʻa e fehālaaki tatau ʻi he taimi ʻoku hoko mai ai ʻa e faingataʻá?
-
ʻOku hoko fēfē ʻa e “mā ʻo e moʻuí” ko ha fakamatala totonu ia ʻo e Fakamoʻuí mo e ngaahi tāpuaki kuó ne foaki mai kiate kitautolú? (Vakai Sione 6:35, 47–51). Te tau lava fēfē ʻo kai ʻi he “mā ʻo e moʻuí”? (Vakai Sione 6:47, 51–54; Mātiu 26:26–28; ʻAlamā 5:33–35; T&F 20:77).
Fokotuʻu ki hono Aleaʻi ʻe he Fāmilí
Lau ʻa e Mātiu 14:22–32. Fakamahino ange naʻe maʻu ʻe Pita ha tui lahi ʻi he taimi naʻá ne lue ai ʻi he fukahi vaí, ka ʻi heʻene ilifiá naʻe kamata leva ke ngoto hifo. Fakaʻaliʻali ha tā ʻo Sīsū Kalaisi, peá ke fakalotolahiʻi e fāmilí, neongo ʻe ʻi ai maʻu pē ha faingataʻa te nau fehangahangai mo ia, ka te nau lava ʻo ikunaʻi e filí kapau te nau manatua e Fakamoʻuí mo muimui kiate ia. Kole ki he fāmilí ke nau fakamatala fekauʻaki mo ha taimi ne nau ikunaʻi ai haʻanau manavahē ʻi heʻenau manatu kia Sīsū Kalaisi mo ʻene ngaahi akonakí.