“Pea Naʻe ʻĀsili ai ʻa e Tuʻu Maʻu ʻa e Ngaahi Siasí ʻi he Tuí”

Ngāue 15:36–18:22; 1 Tesalonika mo e 2 Tesalonika

Ne tali fēfē ʻe he kakai ʻi he falelotu faka-Siu ʻi Peleá ʻa e ngaahi akonaki ʻa Paulá? (Vakai Ngāue 17:10–12 ). Te tau lava fēfē ʻo fakatupulaki ha “[ʻatamai mateuteu]” ke ako ʻa e ongoongoleleí?
Ko e hā ne akoʻi ʻe Paula ki he kau ʻAtenisí ʻo kau ki he ʻOtuá? Vakai Ngāue 17:22–3. Ko e hā ʻoku mahuʻinga ai ke tau ʻiloʻi ko e hako kitautolu ʻo e ʻOtuá? (Ngāue 17:28). ʻOku tokoniʻi fēfē kitautolu ʻi heʻetau maʻu e mahino fekauʻaki mo e natula totonu ʻo e ʻOtuá mo hono fatongia ko ʻetau Tamaí, ke tau ʻofa mo lotu ai kiate iá?
Ko e hā ʻoku akoʻi mai ʻe Paula ʻi he 1 Tesalonika 1:5 mo e 1 Tesalonika 2:2–12 fekauʻaki mo e founga ke akoʻi ʻaki ʻa e ongoongoleleí ki he niʻihi kehé? Kuo tokoniʻi fēfē koe ʻe haʻo muimui ki he ngaahi tefitoʻi moʻoni ko ʻení, ʻi haʻo ʻakoʻi ʻa e ongoongoleleí?

Fokotuʻu ki hono Aleaʻi ʻe he Fāmilí

Palani ke fakaafeʻi mai ʻa e kau faifekau taimi kakató ki homou ʻapí ke mou maʻu meʻatokoni efiafi fakataha. Kole ange ke nau fakamatalaʻi ʻa e ngaahi ongo ʻoku nau maʻu fekauʻaki mo hono mahuʻinga ʻo e ngāue fakafaifekaú pea mou talanoa ʻo fekauʻaki mo e founga ne nau teuteu ai ke nau hoko ko ha kau faiafekau taimi kakató.

ʻAi ke hoko ko ha konga ʻo e fealēleaʻaki ko ʻení, haʻamou hivaʻi fakataha ʻa e “Fanongo ki he ʻEikí” Ngaahi Himi, 153 pe ko e Ngaahi Himi,169 “ʻOku ou Fakaʻamu ke u ʻAlu ʻo Ngāue Fakafaifekau.