Liua ia Iesu Keriso

O se suiga o le loto e oo mai i le mulimuli ia Iesu Keriso

Pe na e vaai i se katepila i le natura? Faaalu sina minute e mafaufau ai i se vavega tele, e ala i le mana o le suiga, e mafai ai e se katepila masani ona liua i se pepe matagofie. O lea laasaga ma lea laasaga, e tuputupu a’e ma suia le katepila, ma avea ai o se mea fou atoa.

O le liua e ofoina mai ai lena lava ituaiga o suiga matagofie mo i tatou. A o liliu atu o tatou loto ia Iesu Keriso, osifeagaiga e tausi Ana poloaiga, ma saili e fai Lona finagalo, e suia o tatou olaga. E faasolosolo malie lava ona avea i tatou ma “tagata fou” (2 Korinito 5:17), e sili atu ona faapei o le Atua ma saunia lelei e maua le ola e faavavau.

O Le A Le Liua?

O le liua o le faagasologa lea e fesoasoani ai Iesu Keriso ia i tatou e suia o tatou talitonuga, loto, ma olaga ina ia avea faapei o Ia ma lo tatou Tama Faalelagi. E aofia ai le faaali o le faatuatua ia Iesu Keriso, salamo, papatisoga, tausia o poloaiga, mauaina o le faatosinaga faapaiaina o le Agaga Paia, ma le tumau e oo i le iuga E ala i le Togiola a Iesu Keriso ma mulimuli i le taitaiga a le Agaga, e mafai ai ona tatou suia ma faatoilalo faatosinaga le lelei a le lalolagi. O lenei suiga e aumaia ai ia i tatou le filemu ma le fiafia i lenei olaga ma le ola e faavavau i le lalolagi a sau.

Vaaiga aoao i le Autu: Liua

Taiala e faatatau i le suesueina o le talalelei: Faatuatua ia Iesu Keriso, Salamo, Tumau e oo i le Iuga

Vaega 1

O Le Liua ia Iesu Keriso e Mafai Ona Alu ai le Taimi, Taumafaiga, ma le Onosai

Ua valaaulia i tatou uma e Iesu Keriso e o mai ia te Ia. A o tatou mulimuli i le Faaola, tatou te suia ma avea atili e faapei o Ia. Mo le toatele, o le liua o se faagasologa faifai malie nai lo le taunuuga o se mea e tasi e mamana pe matautia. E umi le taimi e alu ai ma taumafaiga faifaipea.

Ina ia tupu le liua, e tatau ona tatou faatino i le faatuatua ma le malamalama lea tatou te maua e ala i le Agaga Paia. Pe a liua i tatou “e ala i le mana o le Agaga … e suia [o tatou] loto.” E ogatasi o tatou manaoga ma manaoga o le Tama Faalelagi ma Iesu Keriso. Na aoao mai Elder David A. Bednar: “O le liua moni e aumaia ai se suiga i talitonuga, loto, ma le olaga o se tasi e talia ma ogatusa ma le finagalo o le Atua. … O le taunuuga o faaaliga mai le Atua, e o faatasi ma le salamo o le tagata lava ia, usitai, ma le maelega.”

Ae o le liua ia Iesu Keriso e le faapea ai ua tatou atoatoa. I luga o le ala i le liua, o i tatou uma tatou te faia pea lava ni mea sese. Ae, e ala i le faatuatua faifai pea ia Iesu Keriso ma le salamo i aso taitasi, e mafai ai ona tuputupu ae lo tatou mauaina o le mana o Iesu Keriso ma e mafai ai ona faateleina lo tatou liua ia te Ia i le avea ai ma ni Ona soo.

Mea e mafaufau i ai

Faitau mau nei e lua e uiga i le Aposetolo o Peteru: Mataio 16:13–17 ma le Luka 22:31–32. Aisea e avea ai le liua atoatoa ia Keriso o se laasaga taua pe a uma ona maua se molimau ia te Ia? E faapefea ona faamanuiaina i tatou e ala i le liua moni ia Keriso?
Mafaufau i le valaaulia ma le mana o le Faaola e fesoasoani ia i tatou e sui ai ma avea e pei o Ia. Na aoao mai Elder Eduardo Gavarret: “E valaaulia i tatou e le Alii e faaaoga ai ni upu galue eseese: ‘O mai ia te au,’ ‘Mulimuli mai ia te au,’ ‘Savali faatasi ma au.’ I tulaga taitasi e le o se valaaulia faasamasamanoa; o se valaaulia ina ia faatino. E agai mo tagata uma.” Mafaufau pe faapefea ona valaaulia oe e le soifuaga ma aoaoga a le Faaola e sui. E mafai ona e faitauina le Luka 22:39–44; Ioane 6:51; Eperu 5:9; 10:1–10; 2 Nifae 2:3–10; 9:5–24; ma le Mataupu Faavae o le Faatuatua 1:3 mo ni malamalamaaga. Mafaufau i mea e mafai ona e faia i le asō po o le vaiaso lenei e faaali atu ai i le Faaola ua e talia Lana valaaulia ma fesoasoani e suia lou olaga.

Gaoioiga mo le aoao faatasi ma isi

E mafai ona e matamata i se vitio pe vaai i ata o se manu o faasolosolo i suiga, e pei o se tamai tapili [tadpole] ua liua i se lane po o se katepila ua liua i se pepe. Afai e maua, e mafai ona e matamata i le vitio “Elder Neil L. Andersen Shares Lessons Learned from a Butterfly,” lea na ia faasoa mai ai se vitio ua leva ona faaalia ai le liua o se katepila o loo lalagaina se faamoega ma iu ai ina aliae mai o se pepe matagofie. Talanoa e uiga i suiga ofoofogia e oo i ai nei meaola. Ona mafai lea ona e faitau i le mea na aoao mai e le Aposetolo o Paulo e uiga i le avea ma “se tagata fou” ia Keriso (2 Korinito 5:17). E faapefea ona pei le liua ia Iesu Keriso o le avea ma se mea fou? Na aoao mai Peresitene Dallin H. Oaks e faapea “o tagata o loo agai atu i le liua manaomia ua amata ona vaai i mea e pei ona silasila i ai lo tatou Tama Faalelagi ma Lona Alo, o Iesu Keriso. O loo latou faalogo i Lona siufofoga nai lo le leo o le lalolagi, ma o loo latou faia mea i Lana ala nai lo ala o le lalolagi.” Na faapefea ona e tuputupu ae ma suia a o e faavaeina au amioga i lou liua i le talalelei a Iesu Keriso? Mafaufau e tusifaamaumau ou manatu faapea foi ma lou lotofaafetai mo le tagata ua avea ai lou olaga.
E tele tala mamana o le liua i tusitusiga paia. E mafai ona e filifili se tasi pe sili atu o nei tala, suesue pe matamata i ai, ma atonu foi e faatinoina. O faataitaiga e aofia ai tala ia Ruta (tagai i le Ruta 1), Enosa (tagai i le Enosa 1, pe le matamata le “Ua Tatalo Malosi Enosa”), Alema le Itiiti (tagai i le Mosaea 27, pe matamata i le “Ua Liua Alema le Itiiti i le Alii”), ma le Tupu o Lamonae (tagai i le Alema 17–19, pe matamata i le “Ua Auauna ma Aoao Atu e Amona le Tupu o Lamonae”). Talanoaina mea ua e aoaoina mai le faataitaiga a le tagata o loo i le tala. E ui o le liua e masani lava o se faagasologa e sili atu ona faifai malie nai lo le mea na tupu i nei tagata taitoatasi, ae e tele mea e mafai ona tatou aoaoina mai o latou aafiaga. E faapefea e o latou aafiaga ona faamalosia lou lava manao e mulimuli i le valaaulia a Keriso e sui?

Aoao atili

Esekielu 11:19–20; Mataio 18:3; Kalatia 3:26–27; 2 Nifae 31:19–20; Mosaea 3:19; 4:1–10; 5:2; 27:24–30; 3 Nifae 9:20
Henry B. Eyring, “Molimau ma le Liua,” Liahona, Fep. 2015, 4–6
David A. Bednar, “Faaliliuina i le Alii,” Liahona, Nov. 2012, 106–9
Eduardo Gavarret, “O Se Liua Tele o le Loto: E Leai se Isi Mea Ou te Tuuina Atu ia te Outou,” Liahona, Nov. 2022, 21–23

Vaega 2

O Le Liua ia Iesu Keriso O se Tulitulimatagau o le Olaga Atoa

E tasi le mea o le liua ia Iesu Keriso ma tautino atu e mulimuli ia te Ia. Ae o le isi o le tausia o lena tautinoga i lou olaga atoa. E pei ona taua e Peresitene Dieter F. Uchtdorf: “O le avea ai ma se soo o Iesu Keriso e le o se taumafaiga e faatasi ona fai i le vaiaso pe faatasi i le aso. O se taumafaiga e faia i taimi uma.”

Peitai, e le faapea ai la, e tatau ona tatou faalagolago i lo tatou lava malosi e tumau ai e oo i le iuga. E tuuina mai e le Atua ia i tatou le fesoasoani faalelagi i le ala atoa—Na te taiala ma faamafanafana i tatou i Lona Agaga, Na te aoao i tatou e le aunoa e ala i Ana perofeta, ma na Ia auina mai Lona Alo e maliu mo i tatou ina ia mafai ona faamalosia i tatou e ala i le faatuatua ia te Ia pe a tatou tautevateva.

Mea e mafaufau i ai

O le a le mea e manaomia e tumau ai i le liua malosi i le talalelei ma tumau ai e oo i le iuga? Na aoao mai Elder Dale G. Renlund: “O lona uiga tatou te faatumauina le faatuatua ia Iesu Keriso e ala i le tatalo, suesue i tusitusiga paia, aai ma feinu i le faamanatuga i vaiaso taitasi, ma maua le Agaga Paia e avea ma a tatou soa tumau. E manaomia ona tatou fesoasoani ma le mataalia ma auauna atu i isi ma faasoa atu le talalelei ia i latou. E tatau ona tatou amiotonu atoatoa ma faamaoni i mea uma. … E tatau ona tatou iloa faaosoosoga e faigofie ona lofituina ai i tatou ma tuu ese mai le aapa atu i ai—e le mafai ona ausia.” E mafai ona e faitauina le savali a Elder Renlund “Faasaoina o le Liua Tele o le Loto” ma mafaufau i mea o loo e faia e tumau ai i le liua malosi ia Keriso. Pe o e faatumauina ni mausa faigofie i aso taitasi ma vaiaso taitasi o le a fesoasoani ia te oe e faaauau ai pea i le faatuatua? Pe o e matuai faataumamaoa lava faaosoosoga mai le aapa atu i ai? Mafaufau loloto ma tusi i lalo vaega atonu e te manao e faia ai ni suiga i lou olaga e fesoasoani e te tumau ai i le ala o le feagaiga.

Gaoioiga mo le aoao faatasi ma isi

O loo faamatala mai i le Tusi a Mamona se tala mamana e uiga i se vaega o tagata na taua o Aneti-Nifae-Liae o e “na liua i le Alii, [ma] e lei pauu ese lava” (Alema 23:6). Suesue le Alema 23–25, ma fai se lisi o mea ua e aoaoina e uiga i lenei vaega. Na faapefea ona fesoasoani le Faaola ia i latou ia matua malolosi i lo latou faatuatua? Ona mafai lea ona e tusia i luga o se fasipepa se mea se tasi e mafai ona e “tanumia … loloto” (tagai i le Alema 24:16–17) o le a fesoasoani ia te oe e tumau ai i le tuuto malosi ia Iesu Keriso. Pe atonu foi e te tanumia se mea faaletino e faatusa i lau tautinoga e tumau i le faamaoni.
O le liua i le olaga atoa ia Iesu Keriso e oo mai i le ola ai i Lana talalelei—i aso uma. Na faasoa mai e Sister Bonnie L. Oscarson ni mausa taua e uunaia ai le liua tumau: “O le liua moni e tupu a o faaauau pea ona e galue i aoaoga faavae ua e iloa e moni ma tausi poloaiga, i lea aso ma lea aso, masina ma lea masina. … E tupu le liua pe a tatou filigā i le faia o a tatou tatalo, suesueina o a tatou tusitusiga paia, auai i le lotu, ma ia agavaa e auai i sauniga o le malumalu. E oo mai le liua ao tatou faatinoa ia mataupu faavae amiotonu na tatou aoaoina i totonu o tatou aiga ma le potuaoga.”

Ina ia fesoasoani ia te outou e faaauau pea i le ala o le liua, e mafai ona outou tauaveina lenei luitau o se vaega: O aso uma mo aso e 30, pe a feagai ma filifiliga, fesili ifo ia te oe lava, “O le a se mea e faia e se tagata o le Au Paia o Aso e Gata Ai ua liua moni?” Mafaufau e te tali atu i se tagata e tulitatao ai i lenei sini. A uma ona outou faamaeaina le luitau, e mafai ona outou talanoaina o outou aafiaga o se vaega. Na faapefea ona fesoasoani le Faaola ia te oe e sui a o e taumafai e faia filifiliga e ogatusa ma Ana aoaoga?

Aoao atili

2 Nifae 9:3–26; Alema 34:9–12
Dale G. Renlund, “Tautinoga Mausali ia Iesu Keriso,” Liahona, Nov. 2019, 22-25
Amy A. Wright, “Ia Tumau i le Aso ia Keriso,” Liahona, Nov. 2023, 9–12
Becky Craven, “Tuu Ma Oe le Sui,” Liahona, Nov. 2020, 58–60