Gafatia le Aso ia Keriso
O Iesu Keriso e mafai ai foi ona tatou “gafatia le aso.”
O se aso sa faatumulia i faataoto manino ma tuusa’o, fesili lavelave, ma aoaoga faavae loloto. I le mavae ai o se a’oa’iga ogaoga o i latou sa faapei o “tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma,”1 na aoao atu ai e Iesu nisi faataoto se tolu e uiga i le sauniaina faaleagaga ma le tulaga faaleso’o. O se tasi o nei o le faataoto o taupou e toasefulu.
“O ia ona po e tusa ai le malo o le lagi ma taupou e toasefulu, o e na ave a latou lamepa, ma latou o atu e faafetaiai i le faatoafaiava.
“Ua popoto le toalima o i latou, a e valea le toalima.
“O i latou o e sa vālea ua ave a latou lamepa, ae sa leai se suauu ia te i latou:
“A o e popoto ua ave ni suauu i a latou fagu faatasi ma a latou lamepa.
“Ua tuai mai le faatoafaiava, ona taufaitulemomoe ai lea o i latou uma, ua momoe lava.
“A ua oo i le tulua o po, ona sau ai lea o le alaga, Faauta, ua sau le faatoafaiava, ina o ia outou e faafetaiai ia te ia.
“Ona tutu ai lea o ia taupou uma lava, ma teuteu a latou lamepa.
“Ona fai atu lea o ē valea i ē popoto, Au mai ni a outou suauu ma matou; aua o le a mamate a matou lamepa.
“A ua tali mai o ē popoto, ua faapea mai, ne’i le lava ia i matou ma outou a e lelei ona outou o i e faatau ma faatau mai ai ni a outou.
“Ua latou o e faatau, ona sau ai lea o le faato’āfaiāva, o ē ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa.
“Mulimuli ane, ona o mai ai lea o isi taupou, ua faapea mai, Le Alii e, le alii e, ia e tatala atu le puipui mo i matou.2
“A ua tali atu o ia, ua faapea atu, E moni, ou te fai atu ia te outou, ou te le iloa outou.3
“O lea ia outou mataala ai, aua tou te le iloa le aso po o le ituaso e sau ai le Atalii o le tagata.”4
Sa tuuina mai e Peresitene Dallin H. Oaks ia fesili faatupu manatu e faatatau i le afio mai o le Faatoafaiava:5 “E faapefea pe a faapea o taeao le aso o Lona afio mai? Afai sa tatou iloa o taeao le aso tatou te faafetaia’i ai ma le Alii—e ala i lo tatou oti faafuasei, po o Lona tu faafuase’i mai foi—o le a sa tatou mea e fai i le asō?”6
Ua ou aoaoina mai le aafiaga patino e faapea o le sauniuniga mo le afio mai o le Alii e le gata ina tatau ai ae na pau lea o le auala e maua ai le filemu ma le fiafia moni.
Sa o se aso malū ma le la susulu o le tautolu ina ua ou faatoa faalogo i upu “Ua maua oe i le kanesa.” Sa ma lē magagana ma lo’u toalua! A o alu atu gugū le ma taavale i le fale ma fefulifulisa’i le tala, sa liliu atu lo’u loto i le ma fanau tama e toatolu.
I lo’u mafaufau sa ou fesili ai i le Tama Faalelagi, “Mata o le a ou oti?”
Sa musumusu mai le Agaga Paia, “O le a LELEI mea uma.”
Ona ou fesili lea, “Mata o le a ou ola?”
Na toe oo mai le tali: “O le a LELEI mea uma.”
Sa ou lē mautonu. Aisea na ou maua ai le tali lava e tasi pe ou te ola pe oti?
Ona faafuasei lea faatumulia neura uma o lo’u tino i le filemu a’ia’i a o faamanatu mai ia te au: Sa le manaomia ona ma faanatinati i le fale ma aoao le ma fanau i le ala e tatalo ai. Sa latou iloaina le ala e maua ai tali ma le mafanafana mai le tatalo. Sa le manaomia ona ma faanatinati i le fale ma aoao i latou e uiga i tusitusiga paia po o upu a perofeta soifua. O na upu ua uma ona avea o se punavai ua masani ai o le malosiaga ma le malamalama. Sa le manaomia ona ma faanatinati i le fale ma aoao i latou e uiga i le salamo, le Toetutu, le Toefuataiga, le ata o le faaolataga, aiga e faavavau, po o le aoaoga faavae tonu a Iesu Keriso.
I lena taimi o lesona uma o afiafi faaleaiga, suesuega o tusitusiga paia, tatalo o le faatuatua sa faia, faamanuiaga e tuuina atu, molimau e faasoa, o feagaiga e osia ma tausia, auai i le maota o le Alii, ma le tausia o le aso Sapati na taua—oka, se taua ina a tele! Sa tuai tele ona utu suauu i a matou lamepa. Sa matou manaomia mataua uma, ma sa manaomia ona matou faia nei loa lava!
Talu ai ona o Iesu Keriso ma Lana talalelei toefuata’i, pe a faapea ou te oti, semanu o le a faamafanafanaina, faamalolosia, ma toefuata’i i se aso lo’u aiga. Pe a faapea ou te ola, semanu e mafai ona ou maua le mana silisili i lenei lalolagi e fesoasoani ai, lagolago, ma faamaloloina a’u. I le i’uga, ona o Iesu Keriso, ua mafai ai ona LELEI mea uma.
Tatou te aoao mai se suesueina ma le faaeteete o le Mataupu Faavae ma Feagaiga ia foliga o le “LELEI”:
“Ma i lena aso, pe a Ou alu atu i loʼu mamalu, o le a faataunuu ai le faataoto na Ou tautala atu ai e faatatau i taupou e toasefulu.
“Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a lē taia i latou ma lafo i le afi, ae o le a latou gafatia le aso.”7
O Iesu Keriso e mafai ai foi ona tatou “gafatia le aso.” O le gafatia o le aso e le faapea o le faaopoopo i se lisi-o-mea-e fai ua matua faatupula’ia. Mafaufau i se tioata faamatatetele. O lona faamoemoega tupito e le na ona faafoliga matatetele ai mea. E mafai foi ona faaputuputu ma taulai le sulu ia atili malosi ai. E manaomia ona faafaigofie, taulai i a tatou taumafaiga, ma avea ma ē aoina le Malamalama o Iesu Keriso. Tatou te manaomia aafiaga e sili atu ona paia ma maufaaaliga.
O loo tu i Isaraelu i matusisifo se atumauga matagofie e tele ina faasino i ai o le “mauga lanulau’ava.” O le Mauga o Karamelu8 e tumau le lanulau’ava i le tausaga atoa i ni vaega tetele seia oo i nai vaega itiiti o le sau. O le faafailelega e tupu i aso taitasi. E faapei o “le sau o Karamelu,”9 a o tatou saili e faafailele o tatou agaga “i mea e faatatau i le amiotonu,”10 o “mea iti ma faigofie,”11 o le a ola ai a tatou molimau ma molimau a a tatou fanau!
Ia, atonu tou te manatu, ”Ae Sister Wright, e te le iloa lo’u aiga. O loo matou tauivi moni ae e leai se foliga faapea.” E sa’o oe. Ou te le iloa lou aiga. Ae e silafia e se Atua e le i’u le alofa, alofa mutimutivale, mana, malamalama ma le mamalu.
O fesili atonu e te fesiligia o fesili o le loto e tiga e oo i le loloto o lou agaga. O loo maua fesili faapena i tusitusiga paia:
“Le a’oa’o e, e te le manatu mai ea ia te i matou a fano?”12
“O fea nei o i ai lo’u faamoemoe?”13
“Se a se mea [ou te] faia, o le a aveesea le ao o le pogisa mai le faamalumalu mai ia te [a’u]?”14
“Ae o fea e maua ai le poto? ma o fea o i ai le nofoaga o le malamalama?”15
“E mafai faapefea ona outou taofi mau i mea lelei uma?”16
“Le Alii e, se a le mea e te finagalo i ai ou te faia?”17
Ona oo mai ai lea ma le matagofie o tali:
“Po ua e faatuatua ea i le mana o Keriso i le faaolataga?”18
“Ua poloaiina ea e le Alii se tasi ia latou lē taumamafa i lona agalelei?”19
“E te faatuatua e mafai [e Ia] ona fai lenei mea?”20
“Ua e talitonu ea i le au perofeta?”21
“Ua outou faaaoga ea le faatuatua i le togiola a ia o lē na foafoaina outou?”22
“E le faia ea e le Faamasino o le lalolagi uma le faamasinoga tonu?”23
A’u uo pele, e le mafai ona tatou fefaasoaa’i a tatou suauu, ae e mafai ona tatou faasoa atu Lona malamalama. O suauu i a tatou lamepa e le gata ina fesoasoani ia i tatou e “gafatia ai le aso” ae e mafai foi ona avea ma auala e faamalamalama ai le ala e tata’i atu ai i latou tatou te alolofa i ai i le Faaola, o Lē ua sauniuni “ma aao faaloaloa mai e tali” i latou.24
“O loo faapea ona fetalai mai o Ieova; Soia e te tagi, aua foi le tafe ifo o loimata i ou mata: aua e fai le taui a lau galuega, … e toe foi mai lava i latou mai le nuu o e ita mai.
“E i ai foi le faamoemoe i lou iuga, ua fetalai mai ai Ieova, e toe foi mai lava lau fanau i lo latou laueleele.”25
O Iesu Keriso o le “faamoemoe i lou iuga.” E leai sa tatou mea o i ai, pe le’i faia, e le au i ai Lana taulaga e le i’u ma e faavavau. O Ia o le mafuaaga e le mafai ai lava ona i’u la tatou tala.26 O le mea lea, “e tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai [tatou te] fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tamā: O le a [tatou] maua le ola e faavavau.”27
O le ola faavavau o le olioli e faavavau. O le olioli i lenei olaga, i le taimi nei—e le ona o luitau o o tatou taimi ae ona o le fesoasoani a le Alii e a’oa’o mai ai ma i’u ai ina faatoilalo i latou—ma le olioli e le mafuatiaina i le olaga a sau. O le a soloiesea loimata, o le a fonoa loto nutimomoia, o le a maua mea na leiloloa, o le a fo’ia atugaluga, o le a toefuata’i aiga, o mea uma foi a le Tama o le a avea mo tatou.28
Vaai atu ia Iesu Keriso ma ola ai29 o la’u molimau lea i le suafa paia ma le mamalu o le “Leoleo Mamoe ma le Epikopo o [o tatou] agaga,”30 o Iesu Keriso, amene.