Uso e ma Tuafafine ia Keriso
Talosia ia tatou olioli atili i le sootaga faaleagaga o loo tulai mai i lo tatou va ma faatauaina uiga faaleatua ma meaalofa eseese ua ia i tatou uma.
A’u uo pele, e ofoofogia sauniga o le konafesi i le asō. Na tatou taufai lagonaina uma le Agaga o le Alii ma Lona alofa e ala i savali matagofie na faasoa mai e o tatou taitai. Ua ou lagona le faamanuiaina e lauga atu ia te outou i lenei afiafi o le tootoo faaiu o lenei sauniga. Ou te tatalo ina ia mafuta mai pea le Agaga o le Alii ma i tatou a o tatou olioli faatasi o ni uso ma ni tuafafine moni ia Keriso.
Na tautino mai e lo tatou perofeta pele, o Russell M. Nelson: “Ou te valaau atu i o tatou tagata o le Ekalesia i soo se mea ia taimua i le lafoa’i o uiga ma soo se faatinoga o le faailoga lanu. Ou te aioi atu ia te outou ina ia faailoa atu le faaaloalo mo tagata uma o fanau a le Atua.”1 I le avea ai ma Ekalesia i le lalolagi atoa ua matua faatupula’ia, o le mulimuli ai i lenei valaaulia mai lo tatou perofeta o se mua’i tulaga manaomia taua lenei mo le fausiaina o le malo o le Faaola i malo uma o le lalolagi.
Ua aoao mai e le talalelei a Iesu Keriso e faapea o i tatou uma o ni atalii ma ni afafine agaga na fanaua e ni matua faalelagi o ē alolofa moni ia i tatou2 ma sa tatou ola o se aiga i le afioaga o le Atua ae tatou te le’i fananau mai i lenei lalolagi. Ua aoao mai foi i tatou e le talalelei e faapea na foafoaina i tatou uma i le faatusa ma foliga o le Atua.3 O le mea lea, e tutusa i tatou uma i Ona luma,4 aua na Ia “faia foi nuu uma o tane [ma fafine] i le toto e tasi.”5 O le mea lea, e tofu i tatou uma ma se natura paia, tofi, ma gafatia, aua e “tasi le Atua ma le Tama o i tatou uma, o le pule i mea uma lava, ma ua i ai i mea uma, o loo i totonu foi o i [tatou] uma.”6
O le avea ai o ni soo o Keriso, ua valaaulia i tatou e faateleina lo tatou faatuatua i, ma le alofa mo, lo tatou uso faaleagaga ma le usoga faaletuafafine e ala i le lalagaina moni faatasi o o tatou loto i le lotogatasi ma le alofa, tusa lava po o a o tatou eseesega, ona faateleina ai lea o lo tatou tomai e faalauiloa le faaaloalo mo le mamalu o atalii ma afafine uma o le Atua.7
Pe le o le tulaga tonu ea lea na tupu i le nuu o Nifae mo le toetoe atoa le lua seneturi ina ua uma ona auauna atu Keriso ia i latou?
“Ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua. …
“Sa leai ni sa Lamanā, po o soo se ituaiga o tagata; ae sa tasi i latou, o le fanau a Keriso, ma o suli i le malo o le Atua.
“Ma sa faamanuiaina tele lava i latou!”8
Na toe faamamafa atili mai e Peresitene Nelson le taua o le faalauiloa o le mamalu ma le faaaloalo mo o tatou uso a tagata ina ua ia ta’ua: “Ua poloai mai le Mataisau o i tatou uma ia taitasi i tatou ma lafoai ese uiga faaalia o le faailoga tagata e faasaga i soo se vaega o fanau a le Atua. A i ai se tasi o i tatou e i ai le faailoga tagata i isi e manaomia ona salamo! … Ua tatau ai ia i tatou taitoatasi ona faia o soo se mea e mafai i lo tatou li’o o tosinaga e tausisia ai le mamalu ma le faaaloalo e tatau ai mo atalii ma afafine uma o le Atua.”9 O le mea moni, o le mamalu faaletagata soifua e moomia ai ona tatou mua’i tuu le faaaloalo i o tatou eseesega.10
O le mafaufau i le noataga paia lea e tuufaatasia ai i tatou ma le Atua ma Ana fanau, o le faatonuga faaperofeta lea na tuuina mai e Peresitene Nelson, o se laasaga faavae e le masalomia agai i le fauina o sootaga o le malamalama nai lo le fatuina o papupuni o le faailoga tagata ma le faailoga lanu ia i tatou.11 Peitai, sa fautuaina Efeso e Paulo, e tatau ona tatou iloa, ina ia mafai ona ausia lenei faamoemoega, o le a manaomia ona faia se taumafaiga taitoatasi ma tuufaatasi e galulue ai i le lotomaualalo, agamalu, ma le talitiga i le tasi ma le isi.12
E i ai se talafatu i se rapi Iutaia sa fiafia lava ma ana uo e toalua i le laoso. Sa ia fesili atu ia i la’ua, “E faapefea ona oulua iloa le taimi e uma ai le po ma ua amata se aso fou?”
Sa tali ane le tasi o i la’ua, “Pe a mafai ona e tilotilo i sasae ma mafai ona e iloa le eseesega o se mamoe mai se ‘oti.”
Ona tali atu lea o le isi, “Pe a mafai ona e tilotilo i le tafatafā’ilagi ma iloa le eseesega o se laau o le olive mai se laau o le mati.”
Ona la liliu atu lea i le rapi poto ma fesili atu ia te ia le fesili lava lea e tasi. I le mavae ai o se manatunatuga umi, sa ia tali mai, “Pe a mafai ona e tilotilo i sasa’e ma vaaia foliga o se fafine po o foliga o se tane ma mafai ona fai mai, ‘O ia o lo’u tuafafine; o ia o lo’u uso.’”13
A’u uo pele, e mafai ona ou faamautinoa atu faapea o le malamalama o se aso fou e susulu malamalama i o tatou olaga pe a tatou vaai ma taulima o tatou uso a tagata ma le faaaloalo ma le mamalu ma o ni uso ma ni tuafafine moni ia Keriso.
I le taimi o Lana misiona i le lalolagi, sa faaa’oa’o atoatoa mai e Iesu lenei mataupu faavae a o Ia “femaliuai ma agalelei”14 i tagata uma, ma valaaulia i latou e o mai ia te Ia ma taumamafa i Lona agalelei, tusa lava po o a o latou faapogai, ituaiga faaleagafesootai, po o uiga faaleaganuu. Sa Ia auauna atu, faamalolo, ma sa gauai atu e le aunoa i manaoga o tagata uma, aemaise i latou sa manatu i ai e ese, ta’ufaatauvaaina, pe le taulia. E leai se tasi na Ia faafitia, ae na taulimaina i latou i le alofa tutusa, aua na Ia silasila atu ia i latou o Ona uso ma tuafafine, o atalii ma afafine o le Tama lava e tasi.15
O se tasi o taimi e sili ona mata’ina ina ua tulai mai lenei mea o le taimi lea na malaga atu ai le Faaola i Kalilaia, ma ui atu ma le loto i ai i le auala lea e pasi atu i Samaria.16 Ona tonu lea ia Iesu e nofo i autafa o le vaieli o Iakopo e malolo ai. A o i ai iina, sa alu ane se fafine Samaria e utu lana kate i le vai. I Lona tulaga e silafia mea uma, sa fetalai atu ai Iesu ia te ia, ma faapea atu, “Aumai ia ia te au ou te inu.”17
Sa ofo le fafine i le fesili atu o se Iutaia i se fafine Samaria mo se fesoasoani ma faailoa atu lona maofa, ma faapea atu, “E faapefea ona e fai mai, o le Iutaia i se mea e inu ia te a’u, le fafine Samaria? aua e le feavea’ia mea a Iutaia ma Samaria.”18
Peitai o Iesu, i le faatuatuana’i ai o tu masani ua loa o le feitagai i le va o Samaria ma Iutaia, sa auauna atu ma le alofa i lenei fafine, ma fesoasoani ia te ia ia malamalama pe o ai moni o Ia—o lona uiga, o le Mesia, o le a ta’uina atu mea uma ma o loo faatalitali ai o ia i lona afio mai.19 O le aafiaga o lena auaunaga manaia na afua ai ona tamo’e le fafine i le aai ma faasilasila atu i tagata le mea na tupu, ma faapea atu, “Pe le o le Keriso ea lenei?”20
E loloto lo’u mutimuti alofa mo i latou ua agaleagaina, ta’ufaatauvaaina pe sauaina e tagata lē mafaufau, aua, i le aluga o lo’u olaga, ua ou vaaitino i le tiga e feagai ma tagata lelei mai le faamasinoina pe lē amanaiaina ona e ese la latou tautala, foliga, po o le ala e ola ai. Ou te matuai lagonaina foi le faanoanoa moni i lo’u loto mo i latou o faapogisaina pea o latou mafaufau, e papa’u la latou vaaiga mamao, ma e ma’a’a pea o latou loto i le talitonuga e maualalalo i latou e ese mai i lo latou. O la latou vaaiga papa’u i isi e faalavelavea moni ai lo latou gafatia e vaai atu ai ia i latou o fanau a le Atua.
E pei ona muai ta’ua e perofeta, ua tatou ola nei i aso mata’utia e tau atu i le Afio Mai Faalua o le Faaola.21 O le lalolagi i le tulaga lautele ua tavavaeina e fevaevaea’iga malolosi, ua faamamafaina e laina o ituaiga lanu, faapolotiki, ma feutagaiga faaletamaoaiga. O ia fevaevaeaiga i nisi taimi e i’u ai ina tosinaina le ala e mafaufau ai tagata ma faatino ai e tusa ma o latou uso a tagata. Mo lenei mafuaaga, e le o se mea e le masani ai le vaai atu i tagata ua faauiga le ala o mafaufauga, faatinoga, ma talanoa e uiga i isi aganuu, lanu, ma ituaiga faapea e maualalo, ma faaaoga manatu faamasinosino, taufaasese, ma tele ina faaamuamu, ma amatalia uiga faaalia o le inoino, fia’ese, lē faaaloalo, e oo lava i le faailoga tagata ia i latou. O ia uiga faaalia ua maua’a i le faamaualuga, valea, matau’a, ma le lotovale, o uiga o se natura faalelalolagi,22 ia e matua’i feteena’i lava ma uiga faaKeriso. E le fetaui lea amio ma i latou o loo taumafai malosi ia avea ma Ona soo moni.23 O le mea moni, o’u uso e ma tuafafine, e leai se nofoaga mo mafaufauga po o faatinoga faamaualuga i le nuu o le Au Paia.
I le avea ai ma atalii ma afafine o le feagaiga, e mafai ona tatou fesoasoani e tuuitiitia lenei ituaiga o amio e ala i le tilotilo i eseesega iloga ia e tulai mai i lo tatou va, i mata o le Faaola24 ma faavae i mea e tutusa ai i tatou—o lo tatou faasinomaga ma le sootaga paia. E sili atu i lo lena, e mafai ona tatou taumafai e vaai ia i tatou lava o atagia mai i miti, faamoemoega, faanoanoaga ma tiga o lo tatou tuaoi. O i tatou uma o ni tagata faimalaga o fanau a le Atua, e tutusa o tatou tulaga le atoatoa ma i lo tatou gafatia e tuputupu a’e. Ua valaaulia i tatou e savavali faatasi ma le filemu, ma o tatou loto ia tutumu i le alofa i le Atua ma tagata uma—pe, faapei ona matauina e Aperaamo Linikone, “ia aunoa ma se tasi e lotoleaga i ai, a ia alofa mama i tagata uma.”25
Pe i ai ea se taimi ua e mafaufau ai i le ala e faaali ai le mataupu faavae o le faaaloalo mo le mamalu o le tagata soifua ma le tulaga tutusa, e ala i le faiga o o tatou ofu i totonu o le maota o le Alii? Tatou te o mai uma i le malumalu ua lotogatasi i le faamoemoega e tasi ma ua tutumu i le naunautaiga ia mama a’ia’i ma paia i Lona afioaga paia. I le laei papa’e ai, e taliaina ai i tatou uma e le Alii lava Ia o Ana fanau faapelepele, o alii ma tamaitai o le Atua, o fanau a Keriso.26 Ua faamamaluina i tatou e faatino sauniga lava e tasi, osia feagaiga e tasi, tuuto i tatou lava e ola i ni olaga ua siitia le maualuga ma le paia ma maua folafolaga lava e tasi o le faavavau. O le fusia faatasi i le faamoemoega, tatou te vaai atu ai i le tasi ma le isi i ni mata fou, ma i lo tatou tasi, tatou te patipatia ai o tatou eseesega o ni fanau paia a le Atua.
Sa ou fesoasoani talu ai nei e taiala malo faaaloalogia ma taitai faalemalo i le maimoaga i le Malumalu o Brasilia Brazil. Sa ma tutu i le itu e fesuia’i ai ma le sui peresitene o Pasila, ma sa ma talanoa e uiga i laei papa’e e ofuina e tagata uma i totonu o le malumalu. Sa ou faamatala atu ia te ia faapea, o le faaaogaina laugatasia o laei papa’e o le faatusa lea o lo tatou tutusa uma i le Atua, ma i le malumalu, o o tatou faasinomaga e le o se sui peresitene o se atunuu po o se taitai o le ekalesia, ae o lo tatou faasinomaga faavavau o ni atalii o se Tama Faalelagi alofa.
O le Vaitafe o le Iguaçú e tafe atu i Pasila i saute ma māūi atu ai i se maupuepue lea e fatua’i ai se paea’iga o āfu lea ua lauiloa i le lalolagi atoa o Iguaçú Falls—o se tasi o foafoaga manaia ma le matagofie a le Atua i le lalolagi, ua faitaulia o se tasi o mea ofoofogia e fitu o le lalolagi. E tafe atu se voluma tele na’ua o le vai i se vaitafe e tasi ona ta’ape ai lea, ma fatua’i ai le faitau selau o āfu e le mafaatusalia. I se tulaga faavaliata, o lea paea’iga ofoofogia o āfu o se ata lafoia o le aiga o le Atua i le lalolagi, aua e tutusa lo tatou faapogai ma elemene faaleagaga, e afua mai i lo tatou tupuaga ma le sootaga faalelagi. Peitai, ua taitasi i tatou ma soifua a’e i aganuu eseese, o ituaiga, ma tagatanuu, e eseese foi manatu, aafiaga, ma lagona. Ae ui o lea, tatou te agai i luma o ni fanau a le Atua ma o ni uso ma tuafafine ia Keriso, e aunoa ma le aveesea o lo tatou sootaga faalelagi, lea e avea ai i tatou ma tagata tulaga ese ma se nuu faapelepele.27
O’u uso e me tuafafine, talosia ia tatou faaogatusa o tatou loto ma mafaufau ma le malamalama ma molimau faapea e tutusa i tatou uma i luma o le Atua, ua faaeeina atoatoa i tatou uma i le gafatia e tasi ma le tofi e faavavau. Talosia ia tatou olioli atili i le sootaga faaleagaga o loo tulai mai i lo tatou va ma faatauaina uiga faaleatua ma meaalofa eseese ua ia i tatou uma. Afai tatou te faia lena mea, ou te folafola atu o le a tatou ola i o tatou lava ala, e faapei o vai o le Afu o Iguaçú, e aunoa ma le aveesea o lo tatou sootaga faalelagi lea e iloga ai i tatou o se nuu tulagaese, “o fanau a Keriso, ma suli i le malo o le Atua.”28
Ou te molimau atu a faaauau ona tatou ola ai i le ala lea i lo tatou olaga faitino, o le a amata se aso fou ma se sulu fou lea o le a faamalamalamaina ai o tatou olaga ma suluia ia avanoa matagofie e faataua atili, ma ia faamanuiaina atili ai i le anoanoai o mea na foafoaina e le Atua mo Ana fanau.29 O le a avea moni i tatou ma meafaigaluega i Ona aao e faalauiloa le faaaloalo ma le mamalu i Ona atalii ma afafine uma. O loo soifua le Atua. O Iesu o le Faaola o le lalolagi. O Peresitene Nelson o le perofeta a le Atua i o tatou taimi. Ou te molimau atu ai i nei upumoni i le suafa paia o Iesu Keriso, amene.