Konafesi Aoao
Savavali i le Sootaga i le Feagaiga ma Keriso
Konafesi aoao ia Oketopa 2023

Savavali i le Sootaga i le Feagaiga ma Keriso

Saunia e Peresitene Emily Belle Freeman

Peresitene Aoao o Tamaitai Talavou

O Lē na maosiosia ma nutimomoia mo i tatou o le a mafai ai e le olaga faitino ona faia lana galuega i totonu o i tatou, ae e le fetalai mai o Ia ia tatou faafetaiaia na o i tatou na luitau.

Sa folasia mai ia te a’u se alasopo i Isaraelu e la’u uo lelei o Ilan. “Ua ta’ua o le Alasopo o Iesu,” na ia fai atu ai, “aua o le ala mai Nasareta i Kapanaumi lea e toatele na talitonu sa savalia e Iesu.” Sa tonu ia te a’u i lena taimi iina ou te fia savali ai, o lea sa amata ai ona ou fuafuaina se malaga i Isaraelu.

E ono vaiaso a’o le’i alu le malaga, ae gau lo’u tapuvae. Sa popole lo’u toalua i lo’u manu’a; o lo’u popolega tele o le, pe o le a faapefea ona ou savali i le Alasopo o Iesu i le tasi le masina mulimuli ane. O a’u e fai a si lotoma’a’a, o lea ou te le’i faaleaogaina ai pepa o le vaalele.

Ou te manatua le feiloai ai i le matou taiala Isaraelu i lena taeao matagofie o Iuni. Sa ou musa vaetasi ese ona toso mai lea o se seti tootoo ma se sikuta tulivae [knee scooter]. Sa faafeiloaia a’u e Mya, le matou taiala, tilotilo mai i le simā o lo’u vae, ma fai mai, “A, ailoga e mafai ona e savalia lenei alasopo i lena tulaga.”

“Ailoga,” sa ou tali atu ai. “Ae e leai se mea e mafai ona taofia au mai lo’u taumafai.” Sa lue teisi mai lona ulu, ma sa matou amata loa. Ou te alofa ia te ia ona o lena mea, mo le talitonu e mafai ona ou savalia le alasopo i lo’u vae gau.

Sa ou asaina e a’u lava ia le ala tifatō ma ‘alā na paepae solo i le alasopo atoa mo sina taimi. Ona, o le faamaoni o lo’u tuuto na tuia ai le loto o Mya, sa ia toso ese mai ai se maea tuaiti, ma nonoa i ‘au o la’u sikuta [scooter], ma amata loa ona toso. Sa ia tosoina a’u i luga o le maupuepue, e ui atu i togā tipolo, ma auvai oneonea o le Sami o Kalilaia. I le faaiuga o le malaga, sa ou momoli la’u faafetai i la’u taiala lelei, o lē sa fesoasoani ia te a’u ia ausia se mea semanu ou te le mafai ona ausia na o a’u lava ia.

Ina ua valaauina Enoka e le Alii e malaga taamilo i le laueleele ma molimau atu ia te Ia, sa faatuatuai Enoka.1 Sa na o ia o se tama, e āmu lana tautala. E mafai faapefea ona ia savalia lena ala i lona tulaga? Sa faatauasoina o ia i le mea sa gauī i totonu ia te ia. O le tali a le Alii i le mea na faalavelaveina ai o ia sa faigofie ma vave: “Savali faatasi ma a’u.”2 Faapei foi o Enoka, e tatau ona tatou manatua o le Toatasi o lē na faalavaau ma puapuaga mo i tatou3 o le a tuu atu i le ola faitino e fai lana galuega ia i tatou, ae e le o faapea mai o Ia ia tatou faafetaia’ia na o i tatou na luitau.4 Po o le a le mamafa o la tatou tala, po o le kosi o lo tatou ala i le taimi nei, o le a Ia valaaulia i tatou e savavali faatasi ma Ia.5

Mafaufau i le alii talavou i se tulaga faigata o lē na feiloai ma le Alii i se nofoaga tuufua. Sa faimalaga mamao Iakopo mai lona aiga. I se po pogisa, sa faia sana miti sa le gata ina i ai se apefa’i ae sa faia ai ni folafolaga taua o le feagaiga, e aofia ai le mea ou te fia ta’ua o le folafolaga e lima-tamatama’ilima.6 I le po lena, sa tu ai le Alii i autafa o Iakopo, ma folasia atu Ia lava o le Atua o le tamā o Iakopo, ona folafola atu lea:

  • Ou te i ai ia te oe.

  • Ou te tausi ia te oe.

  • Ou te toe faafoisia mai oe i le nuu nei.

  • Ou te le tuua oe.

  • Ou te faia le mea ua ou fai atu ai ia te oe.7

Sa i ai se filifiliga a Iakopo e fai. Sa mafai ona ia filifili e ola i lona olaga e na ona ogatusa ma le Atua o lona tama, pe sa mafai foi ona ia filifili e ola i le olaga i se sootaga tuuto i le feagaiga ma Ia. E tele tausaga mulimuli ane, na molimau ai Iakopo i se olaga sa ola ai i totonu o folafolaga o le feagaiga a le Alii: “Na tali mai le Atua … ia te au i le aso na ou puapuaga ai, ma sa ia te a’u i le ala na ou ui ai.”8 E faapei foi ona sa Ia faia ia Iakopo, o le a tali mai foi le Alii ia i tatou taitoatasi i o tatou taimi o puapuaga pe a tatou filifili e sele o tatou olaga faatasi ma Ia. Ua uma ona Ia folafola mai e savali faatasi ma i tatou i le ala.

Tatou te ta’ua lenei mea o le savalia o le ala o feagaiga—o se ala e amata i le feagaiga o le papatisoga ma e tau atu ai i feagaiga e loloto atu tatou te osia i le malumalu. Atonu tou te faalogo i na upu ma mafaufau i se lisi e i ai pusa e faailoga. Atonu na pau mea tou te vaai i ai o se ala o mea o loo manaomia. O se autilo latalata i ai e faaalia mai ai se mea e sili ona faatauanau. O se feagaiga e le na o se konekarate e faatatau i ai, e ui ina e taua lena mea. E faatatau i se sootaga. Na aoao mai Peresitene Russell M. Nelson, “O le ala o feagaiga e faatatau uma i la tatou sootaga ma le Atua.”9

Manatu i se feagaiga o le faaipoipoga. E taua le aso o le faaipoipoga, ae e tutusa foi le taua o le sootaga na fua mai i se olaga e ola faatasi ai mulimuli ane. E faapena foi le moni i sootaga i le feagaiga ma le Atua. Ua uma ona faatulagaina tulaga, ma o le a i ai faamoemoega i le aluga o le ala. Ua Ia valaaulia i tatou taitoatasi e o mai pe a tatou mafaia, ma le faamoemoe atoa o le loto, ma ia “fetaomi atu i luma”10 faatasi ma Ia i o tatou autafa, ma le faatuatua o le a oo mai Ana faamanuiaga folafolaina. Ua faamanatu mai e se mau ia i tatou e faapea, e tele ina oo mai na faamanuiaga i Lona lava taimi ma i Lona lava ala. 38 tausaga.11 12 tausaga,12 i le taimi lava lena.13 A oo ina faigata lou alasopo, o le a faapena foi Lana fesoasoani.14

O Lana, o se misiona e oo lava i tulaga aupito maualalalo. O le a faafetaui i tatou e Iesu Keriso i le mea o loo tatou i ai i o tatou tagata o i ai. O le mafuaaga lea o le faatoaga, le satauro, ma le tuugamau. Na auina mai le Faaola e fesoasoani ia i tatou e faatoilalo.15 Ae o le nopia’i ai i le mea o tatou i ai, o le a le aumaia ai le lavea’iga o loo tatou sailia. E faapei lava ina sa Ia le tuua Iakop iina i le palapala, e le o faamoemoe foi le Alii e tuua se tasi o i tatou i le mea o tatou i ai.

O Lana foi, o se misiona ina ia siitia maualuga atu. O le a galue o Ia i totonu o i tatou16 e si’i a’e i tatou i luga i le mea o i ai o Ia ma, i le faagasologa, ia mafai ai ona tatou avea e faapei o Ia. Na afio mai Iesu Keriso e siitia i tatou.17 E finagalo o Ia e fesoasoani ia avea i tatou ma ni ō. O le mafuaaga lea o le malumalu.

E tatau ona tatou manatua: ua lē na o le gasologa o le a faaeaina ai i tatou; o le mafutaga—a lo tatou Faaola. Ma o le mafuaaga lenei o le sootaga i le feagaiga.

A o o’u i ai i Isaraelu, sa ou asiasi i le Western Wall [Papuipui o Sisifo]. Mo Iutaia, o le nofoaga aupito paia lea i Isaraelu. E na o le pau na o mea o totoe o lo latou malumalu. O le toatele e fai o latou laei aupito mananaia pe a asiasi i lenei nofoaga paia; o la latou filifiliga o laei o se faatusa o lo latou tuuto i la latou sootaga ma le Atua. Latou te asiasi i le papuipui e faitau ai tusi paia, e tapuai ai, ma tuuto atu o latou [loto] i tatalo. O le augani mo se malumalu i le totonugalemu o i latou e uma ai o latou aso taitasi, o a latou tatalo uma, o le faanaunauga lenei mo se fale o le feagaiga. Ou te faamemelo i lo latou tuuto.

Ina ua ou toe taliu mai i le fale mai Isaraelu, sa ou faalogologo ma le toto’a atili i talanoaga e siomia ai a’u e faatatau i feagaiga. Sa ou matauina tagata o fesili, Aisea e tatau ai ona ou savali i se ala o feagaiga? Aisea e tatau ai ona ou ulu i se fale e osia ai ni feagaiga? Aisea ou te faia ai ni ofusa pa’ia? Pe tatau ona ou teu faaagaga i se sootaga i le feagaiga ma le Alii? O le tali i nei fesili lelei ma le taua e faigofie: e faalagolago i le maualuga o le sootaga e te manao e te oo i ai faatasi ma Iesu Keriso.18 E tatau ia i tatou taitoatasi ona maua la tatou lava tali i na fesili patino loloto.

Ou te savalia lenei ala o se afafine “faapelepele o ni matua faalelagi,”19 e iloga faalelagi20 ma loloto le faatuatuaina21 I le avea ai o se afafine o le feagaiga, ua ou agavaa ai e maua faamanuiaga folafolaina22 . Ua ou filifili23 e savavali faatasi ma le Alii. Ua valaauina24 au e tu atu o se molimau a Keriso. A oo ina pei ua lofituina le ala, e faamalosi25 a’u e le alofa tunoa gafatia. O taimi taitasi ou te kolosia ai faitotoa o Lona maota, ou te lagonaina lava le sootaga loloto atu i le feagaiga ma Ia. Ua faapaiaina26 a’u e Lona Agaga, ua faaeeina27 i Ana meaalofa, ma ua vaetofia28 e fau Lona malo. E ala i le faagasologa o le salamo i aso taitasi ma le ‘ai ma inu i vaiaso taitasi i le faamanatuga, ua ou aoaoina ai ia mausali29 ma alu ma agalelei.30 Ona ou te savalia lenei ala faatasi ma Iesu Keriso, ou te pulunaunau lava i le aso folafolaina pe a toe afio mai o Ia. Ona faamauina lea o Lana31 ma siitia a’e ai o se afafine paia32 o le Atua.

O le mafuaaga lea ou te savali ai i le ala o feagaiga.

O le mafuaaga lea ua ou pipiimau ai i folafolaga o feagaiga.

O le mafuaaga lea ou te ulu ai i Lona maota o le feagaiga.

O le mafuaaga lea e fai ai o’u ofusa paia o se faamanatu faifai pea.

Ona ou te manao e ola i le sootaga tuuto i le feagaiga ma Ia.

Atonu o loo e faia foi lena mea. Amata i le mea lena e te i ai.33 Aua nei faatagaina le tulaga o e i ai e faalavelaveina oe. Manatua, o le saoasaoa po o le tulaga i luga o le ala, e le tutusa le taua ma le agaigai i luma.34 Fesili i se tasi e te talitonuina, o sē o i luga o le ala o feagaiga, e faailoa atu ia te oe le Faaola ua latou iloa. Aoao atili e uiga ia te Ia. Teu faaagaga i le sootaga e ala i le ulu atu i se feagaiga ma Ia. E le afaina lou matua po o lou tulaga. E mafai ona e savali faatasi ma Ia.

Ina ua uma ona matou savavali i le Alasopo o Iesu, e le’i toe avea e Mya lana maea. Sa ia tuu e nonoa ai pea i la’u sikuta [scooter]. Mo ni nai aso na sosoo ai, sa tosoina ai a’u e nai o’u tei talavou ma le la uo i magaala o Ierusalema.35 Sa latou faamautinoa ou te le’i misia tala ia Iesu. Sa faamanatu mai ia te a’u le malosi o le tupulaga faia’e. E mafai ona matou aoao mai ia te outou. Ua ia te oe se manao moni ina ia iloa le taiala, o Iesu Keriso. Tou te faatuatuaina le malosi o le maea lea e fusia ai i tatou ia te Ia. Ua faamanuiaina oe i le faapotopotoina atu o isi ia te Ia.36

O le mea e faafetai ai, tatou te savavali faatasi i lenei ala, ma valaau atu le faamalosiauga i le ala.37 A o tatou faasoa atu o tatou aafiaga patino ma Keriso, o le a tatou faamalolosia le tuuto patino. Ou te molimau atu ai i lenei mea i le suafa o Iesu Keriso, amene.

Faamatalaga

  1. Na se ese le nuu o Enoka, sa latou faafitia Keriso, sa latou “sailia a latou lava fautuaga i le pogisa” (tagai Mose 6:27–28). I se taimi ina ua leai sona faatuatuaga i tagata, sa liliu atu Enoka i le Alii mo se taitaiga. O lenei valaau ia Enoka o le valaau lava lea e tasi ua tuuina mai e le Alii ia i tatou uma: “Savali faatasi ma au” (Mose 6:34; tagai foi Mataio 11:28). Ae atonu, faapei o Enoka, e te le o mautonu pe mafai ona e savalia lenei ala i lou tulaga. Atonu e te lagonaina le faalavelaveina i nisi itu. Atonu o le mafuaaga tonu lea e manaomia ai ona tatou savavali i le ala o le feagaiga ona o o tatou tulaga, ona o loo faalavelaveina i tatou i nisi itu ma tatou te manaomia ai Lana fesoasoani.

  2. Tagai i le Mose 6:23–34.

  3. Tagai “Jesus of Nazareth, Savior and King,” Hymns, no. 181.

  4. Tagai i le Eteru 12:27.

  5. Tagai i le Mataio 11:28–30.

  6. E mananao la’u fanau teine e musumusu atu lenei folafolaga e lima-tamailima i a latou fanau i taeao uma—o se faamanatu o se Tama oi le Lagi o le e silafia faalelagi Ana fanau taitoatasi.

  7. Tagai i le Kenese 28:10–22. O le feagaiga faaAperaamo o se faamamafa taua foi o lena po. O elemene nei o le feagaiga faaAperaamo e i ai sana matafaioi tutotonu i o tatou olaga ma i le talalelei a Iesu Keriso: (1) o le folafolaga o se tofi faavavau (fuaiupu 13); (2) fanau e faavavau (fuaiupu 14); ma le (3) o le faamanuiaga ma le tiutetauave e faamanuia ai nuu uma o le lalolagi (fuaiupu 14).

  8. Kenese 35:3; faaopoopo le faamamafa. Na faatonu e matua o Iakopo o ia e tuua le aiga ae faamamao ese o ia mai ia Esau, o lē ua faamata’uina o ia e fasioti, ma ia maua le avanoa e feiloai ai i se tasi e mafai ona ia faaipoipo i ai i le feagaiga (tagai Kenese 27:41–45; 28:1–2, 5).

  9. Russell M. Nelson, “O Le Feagaiga e Faavavau,” Liahona, Oke. 2022, 11.

  10. 2 Nifae 31:20.

  11. Tagai i le Ioane 5:5, o le tala i le vai o Petesa.

  12. Tagai i le Mareko 5:25, o le tala i le fafine na pa’i atu i le ofu o Keriso.

  13. Tagai i le Mataio 14:31, o le tala ia Peteru o loo savali i luga o le vai.

  14. Tagai i le “Le Faavae Malosi,” Viiganu. 45.

  15. Tagai i le 1 Nifae 11:16–33.

  16. Tagai i le Filipi 1:6; 2:13; Upu a Mamona 1:7.

  17. Tagai i le Ioane 12:32.

  18. O se ala e tele ina faauigaina e uiga autu e pei o ni pou ta’iala po o faailoga o maila. O se auala e mautinoa ai o loo e i ai i luga o le alasopo sa’o po o le alualu foi i luma i le itu sa’o. O se sootaga e mafai foi ona faauigaina i uiga autu. O nisi o nei uiga e aofia ai le faamoemoe (tagai Ieremia 29:11; Mataupu Faavae ma Feagaiga 132:7); gauai atu (tagai Mosaea 3:19; Alema 7:23; 13:28); lotomaualalo, usitai, onosai, faamatuu, faatuatuaga (tagai Faataoto 3:5); ma le alofa (tagai Roma 8:31–39).

  19. “Autu a Tamaitai Talavou,” Gospel Library, faaopoopo le faamamafa; tagai foi Bonnie H. Cordon, “O Afafaine Pele,” Liahona, Nov. 2019, 67.

  20. Tagai i le Ioane 4:1–29, o le tala i le fafine i le vaieli.

  21. Tagai i le Alema 38:1–3.

  22. Tagai i le Numera 6:23–27.

  23. Tagai i le Iosua 24:22.

  24. Tagai i le Mataupu Faavae ma Feagaiga 25:3, o le tala ia Ema Samita.

  25. Tagai i le 1 Korinito 15:9–10.

  26. Tagai i le 2 Nofoaiga a Tupu 20:1–17, aemaise le fuaiupu 14.

  27. Tagai i le Mataupu Faavae ma Feagaiga 109:1–46.

  28. Tagai i le 1 Samuelu 16:11–13.

  29. Tagai i le Eseta 4:16, o le tala ia Eseta.

  30. Tagai i le Galuega 10:38.

  31. Tagai i le Isaia 43:1–5.

  32. Tagai i le Teuteronome 28:1–9.

  33. Sa faamanatu mai e se uo lelei ia te a’u e faapea, o se valaau e faatino e taua i soo se sootaga.

  34. Talanoaga ma Kristen Olsen, Sete. 2023.

  35. Ia Mack Oswald, Camden Oswald, Ashton Matheny, ma Jack Butler, faafetai mo le tosoina o a’u.

  36. “Tou te manatua na ou valaauliaina le autalavou a Le Ekalesia a Iesu Keriso o le Au Paia o Aso e Gata Ai ia auai i le autau talavou a le Alii ia auai ai i le galuega silisili i luga o le lalolagi i le asō—le faapotopotoina o Isaraelu. Sa ou tuuina atu lenei valaaulia i a tatou talavou aua e le masani ona talenia i latou i le aapa atu i isi ma faasoa atu mea latou te talitonu i ai i se faiga faatalitonuina” (Russell M. Nelson, “O Molimau, Korama a le Perisitua Arona, ma Tamaitai Talavou,” Liahona, Nov. 2019, 39).

  37. “O le malo o le Atua … ua e pei o se aai ua puipuia e siomia uma ona itu e le oti. E tofu le tagata ma lona tulaga i luga o le puipui e puipuia ai ma e leai se tasi e mafai ona tu i le mea o tu ai se isi, ae ‘e leai se mea e taofia ai i tatou mai le valaau atu i le faamalosiauga i le tasi ma le isi’” (Martin Luther, i le Lewis William Spitz, The Renaissance and Reformation Movements [1987], 335).