Uunaiga a le Agaga

Saunia e Elder Gary E. Stevenson

O Le Korama a Aposetolo e Toasefululua

O le mafutaga faifai pea a le Agaga Paia o se tasi o meaalofa faaleagaga aupito maoae o loo sapi ai le Au Paia o Aso e Gata Ai.

Faatomuaga

Talu ai nei, na taulai atu ai mata o le lalolagi i taaloga i le Ipu o le Lalolagi a Tamaitai o le FIFA 2023 a le Lalolagi, lea sa talimalo ai Ausetalia ma Niu Sila. O tagata taaalo sili ona lelei i le lalolagi sa fai ma sui o le silia i le 200 o au a atunuu mai le kelope atoa sa faaalia lo latou pulunaunau, tuuto, talenia, ma le malolosi a o latou tausinio mo le faamamaluga aupito maualuga o le soka i le lalolagi.

Tatou te maofa i au taaalo i le tele o taaloga ma isi matata o e ua ausia le tulaga aupito maualuga i a latou faatufugaga. Tatou te talanoa i a latou taleni po o meaalofa ua tuuina mai e le Atua. O lea e aofia ai i latou ua faameaalofaina i le siva, tāgāfiti, musika, faatufugaga, tala faatino, matematika, saienisi, ma le tele o isi mea. O ia ituaiga tagata taitoatasi ua faaalia ni meaalofa ua aumaia e le Atua, ua faapea ona polesiina ma faaleleia e ala i se olaga atoa o le galue malosi, suesue, ma le faataitai. O meaalofa e tuuina mai e le Atua e maua ai tagata talenia.

Faaaogaina o Meaalofa Faaleagaga

O le vaai ai e ala i tioata o le talalelei, ua faaee ai e le Atua i Ana fanau ia le tele o meaalofa faaleagaga, ua avea ai i latou o ni tagata talenia faaleagaga. O tagata tausi feagaiga o le Ekalesia ua faaeeina i ai meaalofa o le Agaga, lea e aofia ai le meaalofa o se molimau ia Iesu Keriso o lo tatou Faaola, le meaalofa o le Agaga Paia, le meaalofa o le faatuatua e faamalolo ma ia faamaloloina, le meaalofa o le iloatino, le meaalofa o le mauaina o vavega, ma meaalofa o le poto ma le malamalama.¹ Ua valaaulia i tatou e le Alii ia saili ma le faamaoni i meaalofa e sili ona lelei, o meaalofa faaleagaga ia. Ua Ia tuuina mai meaalofa faaleagaga e faamanuia ai i tatou ma ia faaaoga e faamanuia ai isi.²

O le toefoi i le tatou talafaatusa i tagata taaalo talenia, e taua le manatua e faapea, o se meaalofa lava ia e le faapea o le a lelei ai se tagata i lena meaalofa. E ui i le i ai o taleni faalenatura tulagaese ae e ala i faataitaiga ma taumafaiga faigata ma mamafa e faaatoatoa ma faaleleia ai e tagata taaalo a latou faatufugaga ina ia ausia ai lo latou tulaga aupito maualuga o le tomai. E oo lava i meaalofa na mauaina ma e le’i afifiina e masani ona o mai faatasi ma le gagana taufaafefe “e manaomia sina tuufaatasia.”

E faapena foi, ua ou matauina se faafitauli i le aoaoina lea e o mai faatasi ma meaalofa faaleagaga. O le faaaogaina o meaalofa faaleagaga e manaomia ai le faamalositino faaleagaga. “O le i ai o le taitaiga a le Agaga Paia i lou olaga e manaomia ai le galuega faaleagaga. O lenei galuega e aofia ai le tatalo faatauanau ma suesuega faisoo o tusitusiga paia. E aofia ai foi le tausia o au feagaiga ma poloaiga a le Atua. … E aofia ai le taumamafa ma le agavaa i le faamanatuga i vaiaso taitasi.”³

O a fua o le faaaogaina o meaalofa faaleagaga? E aofia ai uunaiga mai le Agaga lea e fesoasoani ia i tatou e feagai ai ma o tatou manaoga i aso taitasi ma faaali mai ia i tatou le mea e fai ma tautala atu ai ma faamanuiaga o le filemu ma le toafimalie. A o tatou faalogo ma faatino ia nei uunaiga faaleagaga, e faalautele e le Agaga Paia o tatou tomai ma gafatia ina ia ausia ai mea e sili atu nai lo o mea e mafai ona tatou faia na o i tatou lava. O nei meaalofa faapelepele faaleagaga o le a fesoasoani ia i tatou i vaega uma o o tatou olaga.⁴

O le mafutaga faifai pea a le Agaga Paia o se tasi o meaalofa faaleagaga aupito maoae o loo sapi ai le Au Paia o Aso e Gata Ai.

O le a le taua o lenei meaalofa? Na tali mautinoa mai e Peresitene Russell M. Nelson lenei fesili ina ua ia saunoa faapea, “i aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”⁵

Auala e Valaaulia ma Iloa ai Uunaiga a le Agaga

I le aluga o la’u auaunaga, ua ou iloa ai se moomooga taatele a tagata uma ina ia iloa le auala e valaaulia ma iloa ai uunaiga a le Agaga Paia. O uunaiga a le Agaga e ese le patino ma e oo mai i auala eseese. Ae ui o lea, ua faamanuiaina i tatou i le i ai o saunoaga a perofeta, o aso anamua ma aso nei, e tuu mai ai ia i tatou ni malamalamaaga taua e uiga i le auala e maua ai le taitaiga mai le Agaga.

Sei ou ofoina atu ni mataupu faavae taiala se fa e ono fesoasoani ia te oe i le valaauliaina ma le iloaina o uunaiga a le Agaga.

Tutu i Nofoaga Paia

O le muamua o le tu i nofoaga paia.⁶ Sa ou auai talu ai nei i le faletatala o le Malumalu o Tokyo Iapani. O le tali atu i valaaulia aloaia na auina atu e le gata i le au faasalalau ma malo faaaloalogia VIP na sili atu nai lo faamoemoega. E faitau selau na auai i nei maimoaga taialaina faataamilo i le malumalu. Sa matuai faagaeetia malo valaaulia i le matagofie o le malumalu, e aofia ai mamanu ma autu faatasi ai ma sootaga loloto faaleaganuu a Iapani. Atonu o le mea na sili atu ona faagaeetia o le ava ma le migao na faaalia e tagata valaaulia a o faamatalatalaina sauniga faaleaiga i potu ia o le a faatino ai. Peitai o mea na sili atu ona faamafanafana loto o faaosofiaga a le Agaga.

O se tasi o taimi faapena ma se taitai iloga faalemalo o loo tumau pea i lo’u mafaufau. I le sosoo ai ma se taimi o le filemu manatunatu loloto i totonu o le potu selesitila, sa ia musumusu mai ai ma le faagaeetia ma le matuai ootia lava i lo’u taliga, “E oo lava i le ea o loo ou manavaina i totonu o lenei potu e ese lava.” Na ou iloaina sa ia taumafai e faamatala mai le i ai o le Agaga Paia lea, sa mautinoa lava, na i ai i nofoaga paia. Afai e te faamoemoe ia lagona le Agaga, ia i ai i se nofoaga e faigofie ona afio ai le Agaga.

O o tatou malumalu ma aiga o ni nofoaga sili ona paia ia o nei nofoaga faapaiaina. O i totonu ua sili atu ona faigofie ona tatou valaaulia ma iloa ai le Agaga. O isi nofoaga paia e aofia ai falelotu, fale o le seminare ma inistitituti, nofoaga o talafaasolopito o le Ekalesia ma nofoaga autu o tagata asiasi. Tutu i nofoaga paia.

Tutu ma Tagata Paia

Lona lua, ia tutu ma tagata paia. O le a ou faamatalaina le mataupu faavae taiala lona lua i se isi mea e manatua.

O le a le galo lava ia te a’u le auai ai i se faigalotu na faia i se falematamata lauiloa mo taaloga. E masani lava, o lenei falematamata sa faatumulia i le au tapuai pisapisaō e tapua‘ia a latou ‘au ma atonu foi e feei taufaalilili atu i ‘au o latou tauva. Peitai i le po lea, sa fai si ese o le siosiomaga. Sa faatumulia le falematamata i le faitau afe o tagata talavou sa tauaofia e faamamalu ma faamanatu le soifuaga o le Perofeta o Iosefa Samita. O o latou leo migao, ma fifilemu; loto faafetai, ma agaga tatalo na faatumulia ai le falematamata i le mafutaga a le Agaga Paia. Na mafai ona ou vaaia moni lava i o latou foliga. O le meaalofa o le Agaga Paia i lona faatinoga, ua faamautuina ai molimau na faia e uiga ia Iosefa Samita ma le Toefuataiga o le talalelei.

E le mafai ona taofiofia le Agaga mai le auai i se tauaofiaga o tagata paia. Afai o e faamoemoe ia lagona le Agaga, ia i ai faatasi ma tagata e mafai ona faigofie ona mafuta ai le Agaga. Na fetalaia mai e le Faaola i le ala lenei, “Aua o le mea ua faapotopoto ai se toalua po o se toatolu i lo’u igoa, ou te i ai faatasi ma i latou.”⁷ Mo tagata talavou, tagai i a outou faapotopotoga o tagata paia: o korama ma vasega, MMA ma le seminare, gaoioiga a le uarota ma le siteki—e faapena ma aufaipese a le uarota. Filifili ia i ai faatasi ma tagata ma ia ō i nofoaga e maua ai le amiotonu. Ia maua lou malosi i le toatele. Saili ni uo lelei. Ia avea ma ni uo lelei. Lagolago le tasi ma le isi po o fea lava tou te i ai. Tutu faatasi ma tagata paia.

Molimau atu i Upumoni Paia

Lona tolu, ia molimau atu i upumoni paia i le tele e te mafaia ai. E faasoa mai e le aunoa le Fesoasoani Lona siufofoga pe a tatou molimau atu i o tatou leo. E molimau mai le Agaga Paia i le failauga faapena ma le tagata faalogologo.

Ou te manatua lo’u tietie ai i se taavale la’u pasese mo le 45-minute i le Aai o Niu Ioka. O le faia ai o se talanoaga mafana e uiga i le talalelei ma le avetaavale mo le taimi atoa o la’u malaga atu i le malae vaalele na ou totogiina ai o ia ma sauni e aluese mai le taavale. Ona ou iloaina ai lea ou te lei tuuina atu se molimau i mea sa ou faasoa atu i ai. O le toe taofi ai, na ou faasoa atu ai se molimau puupuu faigofie, na valaaulia ai le Agaga, ma maligi ai o ma loimata.

A’o e sailia ma faaaoga avanoa e faasoa atu ai lau molimau i isi, o le a e fatuina ni taimi e iloa ai le Agaga mo oe lava.

Faalogo i le Agaga Paia

O le mataupu faavae mulimuli o le, ia faalogo i le Agaga Paia. E mafai ona avea o Ia ma a tatou soa tumau, ae e saunoa mai i ni leo maaleale, filemu. Na iloa e le perofeta o Elia o le siufofoga o le Alii sa le’i i ai i le matagi, le mafuie, po o le afi ae sa o se “leo filemu ma le itiiti.”⁸ E “le o se leo o le faititili,” ae sa, “o se siufofoga filemu o le fimalie atoatoa, sa peiseai o se musumusu,” ma sa “ati e oo atu i totonu lava o le agaga.”⁹

Sa saunoa Peresitene Boyd K. Packer: “E le mafai ona maua e le Agaga lo tatou gauai atu e ala i le feei po o le luluina o i tatou i se lima mamafa. Ae e musumusu mai. E pa’i mai ma le malū lea afai tatou te pisi tele o le a lē mafai lava ona tatou lagonaina.”¹⁰ Ua ou matauina o ni isi taimi o Lona siufofoga e ese le maaleale, pe ou te matuai pisi lava, o lea e maua ai e sē e pele mo au. Ua tele taimi e oo mai ai uunaiga a le Agaga Paia ia te au e ala i lo’u toalua o Lesa. O matua po o taitai amiotonu e mafai ona maua taitaiga musuia mo oe.

O le vavaō, feei, ma le femisaa’i lea ua taatele i le lalolagi e ono faomalō i lagona filemu, fimalie o le Agaga Paia. Ia su’e se nofoaga filemu, se avanoa paia lea e mafai ona e saili ai ia maua le taitaiga mai le Agaga.

O Ni Nai Upu o le Lapataiga

A o e manatunatu i nei mataupu faavae e valaaulia ma iloa ai le Agaga, ia mafaufau i upu nei o le taitaiga lapatai.¹¹

Ia faamautu ou lagona faaleagaga. Mo se faataitaiga, o lagona mai le Agaga o le a ogatasi ma tusitusiga paia ma aoaoga a perofeta soifua.

Ia mautinoa o lagona e te maua e ogatasi ma lou tofiga. Vagana ua valaauina oe e ala i le pule tatau, o lagona mai le Agaga e le tuuina atu ia te oe e te fautuaina ai pe faasa’o ai isi.

O mea faaleagaga e le mafai ona fai faamalosia. E mafai ona e atiina ae se uiga auaumama ma se siosiomaga e valaaulia ai le Agaga, ma e mafai ona e saunia oe lava, ae e le mafai ona e faatonuina le ala po o le taimi e oo mai ai musumusuga. Ia onosai ma faatuatua o le a e maua mea e te manaomia pe a sa’o le taimi.

Faaaoga lau lava faamasinoga sili ona lelei. O ni isi taimi tatou te mananao ai ia taitaiina e le Agaga i mea uma lava. Peitai, e masani ona finagalo le Alii ia i tatou e faaaoga lo tatou atamai ua tuuina mai e le Atua ma faatino i auala ia e ogatasi ma o tatou malamalamaaga sili ona lelei. Na aoao mai Peresitene Dallin H. Oaks:

“O se manao ia taitaia e le Alii o se malosiaga, ae e manaomia ona o faatasi ma se malamalama e tuu mai e lo tatou Tama Faalelagi le tele o faaiuga mo a tatou lava filifiliga patino. … O tagata e taumafai e tuu atu le faiga o faaiuga uma i le Alii ma ole atu mo faaaliga i filifiliga uma o le a le pine ae iloaina tulaga latou te tatalo atu ai mo se taitaiga ae le mauaina. …

“E tatau ona tatou suesue i mea i o tatou mafaufau. … Ona tatau lea ona tatou tatalo mo se taitaiga ma galulue i ai. … Afai tatou te le maua le taitaiga, e tatau ona tatou faia i la tatou faamasinoga e sili ona lelei.”¹²

Faaiuga ma se Valaaulia

I le faaiuga, o le Au Paia o Aso e Gata Ai o ni tagata tausi feagaiga faameaalofaina. E ui i lea, ua taatia mo i tatou taitoatasi e saili ia faaaoga a tatou meaalofa faaleagaga ona valaaulia lea ma aoao ia iloa uunaiga a le Agaga. O mataupu faavae taiala e fa e fesoasoani ia i tatou i lenei taumafaiga taua faaleagaga o le:

Tutu i nofoaga paia.
Tutu ma tagata paia.
Molimau atu i upumoni paia.
Faalogo i le Agaga Paia.

O lou mafai ona valaaulia ma iloa uunaiga a le Agaga o le a atiina ae i se laasaga e tasi i le taimi. O le atili masani i le gagana a le Agaga e pei o le aoaoina o se isi gagana. O se faagasologa faifaimalie lea e manaomia ai taumafaiga filiga, ma le onosai.”¹³

O le toefoi i le mea na tatou amata ai, faamolemole ia manatua i le avea ai o ni Au Paia o Aso e Gata Ai, ua faameaalofaina outou. Vaai faalemafaufau i le vaaiga masani lenei o le Aso Sa anapogi, lea na faamatalaina talu ai nei ia te au. O se tamaitiiti laitiiti, o loo tu i luga o se nofoa, sa tau le iloa atu i luga o le pulelaa. Sa tu ai lona tamā i ona tala ane, e ofo atu le faamalosiauga ma fesoasoani atu i ni tuumumusu malū i lona taliga a o ia faasoa atu ma le mitamita, “O au o se afafine o le Atua.”

O le isi molimau na sosoo ai sa mai i se talavou nofofua o lā sa amata i se faaupuga fefevale: “Maimau pe ana i ai se tasi e musumusu mai faapea i lo’u taliga.” Ona ia maua lea o se musumusuga vave ma molimau mai, “E i ai se tagata e musumusu mai faapena i lo’u taliga—o le Agaga Paia!”

Ou te faaiu atu ma se valaaulia e faapitoa mo talavou uma! O le toatele o outou e amata o outou aso i le tutu i luma o se fā’ata. O taeao, i lenei vaiaso, i lenei tausaga, ma aso uma lava, ia taofi a o e tilotilo atu ia te oe lava i le fā’ata. Mafaufau ia te oe lava, pe fai leotele pe a e manao ai, “Oka, sei vaaia ia te au! E ofoofogia a’u! O a’u o se atalii/afafine o le Atua! Na te silafia au! E alofa o Ia ia te a’u! Ua faameaalofaina a’u— faameaalofaina i le Agaga Paia e fai ma a’u soa tumau!”

Ou te faaopoopo atu la’u molimau ia te outou, le Au Paia o Aso e Gata Ai faameaalofaina, i le Atua le Tama, Iesu Keriso ma le Agaga Paia, o lē e molimau atu ia i Laua. I le suafa o Iesu Keriso, amene.