O i Tatou o Ana Fanau
E tutusa lo tatou faapogai paia ma gafatia tutusa e leai se tuaoi e ala i le alofa tunoa o Iesu Keriso.
Tou te manatua le aafiaga o le perofeta o Samuelu ina ua auina atu o ia e le Alii i le fale o Iese e faauu le tupu fou o Isaraelu? Sa vaai Samuelu ia Eliapo, le ulumatua a Iese. O Eliapo, e foliga mai, e umi ma sa ia te ia foliga o se taitai. Sa vaai Samuelu i lena mea ma fai ai loa se faaiuga. Na i’u ane o se faaiuga sese, ma sa aoao Samuelu e le Alii: “Aua e te vaai i lona tino, po o le maualuga o lona tino; … aua e le vaai Ieova pei o le vaai a tagata, aua e vaai tagata i le tino, a e vaai Ieova i le loto.”1
Tou te manatua le aafiaga o le soo o Anania ina ua auina atu o ia e le Alii e faamanuia Saulo? Ua leva ona salalau le tala i uiga o Saulo, ma sa faalogo ai Anania e uiga ia Saulo ma ana sauaga mataga, ma le matautia i le Au Paia. Sa faalogo i ai Anania ma fai ai se faaiuga atonu e le tatau ona ia auauna atu ia Saulo. Na i’u ane o se faaiuga sese, ma sa aoao Anania e le Alii: “O le ipu lava o ia ua filifilia ma’u e momoli lo’u igoa i luma o nuu ese, ma tupu, ma le fanauga a Isaraelu.”2
O le a le mea na faaletonu ai Samuelu ma Anania i nei taimi e lua? Sa la vaai i o la’ua mata ma faalogo i o la’ua taliga, ma o se taunuuga, na la pasia le faamasinoga i luga o isi i foliga vaaia ma tala salatua.
Ina ua vaai tusiupu ma le au Faresaio i le fafine na molia i le mulilua, o le a le mea sa latou vaaia? O se fafine amioleaga, o se tagata agasala ua tatau i ai le oti. Ina ua silasila atu Iesu ia te ia, o le a le mea na Ia vaai i ai? O se fafine na faamatuu atu i se taimi le tumau i vaivaiga i le tino, ae e mafai ona toe maua mai e ala i le salamo ma Lana Togiola. Ina ua vaai atu tagata i le taitai o le toaselau, lea na maua lana auauna i le ma’i supa, o le a le mea sa latou vaaia? Atonu na latou vaai o se tagata e solivale, o se tagataese, o se tasi e tatau ona faaesea. Ina ua silasila atu Iesu ia te ia, o le a le mea na Ia vaaia? O se tamaloa na popole mo le soifua manuia o se tasi o lona aiga, o se sa sailia le Alii i le faamaoni ma le faatuatua. Ina ua vaai atu tagata i le fafine na maua i le punatoto, o le a le mea na latou vaaia? Atonu o se fafine e lē mamā, o se fafine faaaunu’ua e tatau ona taumamao mai ai. Ina ua silasila atu Iesu ia te ia, o le a le mea na Ia vaaia? O se fafine ma’i, e faavauvau ma faaesea ona o tulaga na te le pulea, o sē sa faamoemoe ia faamaloloina ma toe avea ai o se tasi o i latou.
I tulaga uma lava, sa silasila le Alii i nei tagata taitoatasi i lo latou faasinomaga ma sa ia auauna ia i latou taitoatasi e tusa ma le manaoga. E pei ona sa tautino mai e Nifae ma lona uso o Iakopo:
“Ua Ia valaaulia i latou uma e o mai ia te Ia …, uliuli ma le paʼepaʼe, e pologa ma le saoloto, o tane ma fafine; ma e manatua e ia le ua faapaupau; ma e tutusa tagata uma i le Atua.”3
“Ma ua tutusa le pele o le tasi tagata i lana silafaga e pei o le isi.”4
Talosia ia faapena i tatou ia aua nei taitaiseseina i tatou e o tatou mata, o o tatou taliga, po o o tatou atuatuvalega ae ia tatala o tatou loto ma mafaufau ma auauna saoloto ai ia i latou o siomia ai i tatou e faapei ona sa Ia faia.
I ni nai tausaga ua mavae, sa maua ai e lo’u toalua, o Isabelle se tofiga e le masani ai e auauna atu. Sa talosagaina o ia e asiasi i se olomatua ua oti lana tane i le matou uarota, o se tuafafine e i ai luitau faalesoifua maloloina ma lona lagona tuuatoatasi na aumaia ai le tiga matuitui i lona olaga. Sa tapunipuni ona ie faamalama; sa gaogaosa lona fale; sa lei manao o ia e asiasi atu se isi ma sa faamanino mai ai faapea “e leai lava se mea e mafai ona ou faia mo se isi tagata.” Sa tali atu Isabelle, e aunoa ma se poi, “Ioe, e i ai! E mafai ona e faia se mea mo i matou i lou faatagaina lea o i matou e o mai ma asia oe.” Ma o lea na alu atu ai Isapela, ma le faamaoni.
I se taimi mulimuli ane, sa faia se taotoga o lenei tuafafine lelei i ona vae, na manaomia ai ona sui ona fusiga i aso uma, o se mea sa le mafai ona faia e ia lava. Na tele aso, sa alu ai Isabelle i lona fale, fufulu ona vae, ma sui ona fusiga. Na te le’i vaaia lava se auleaga; na te le’i sosogia lava se namuleaga. Sa na o se afafine lalelei lava o le Atua na ia vaaia, o loo manaomia le alofa ma le tausiga agalelei.
Na mavae tausaga, na faamanuiaina a’u ma le anoanoai o isi i le meaalofa a Isabelle o le vaai atu e faapei ona silasila atu o le Alii. Pe o oe o le peresitene o le siteki po o le tagata o le uarota e faafeiloa’ia tagata, pe o oe o le tupu o Egelani pe e te nofo i se faleo’o, pe e te tautala i lana gagana po o se isi, pe e te tausia poloaiga uma pe o tauivi ma nai isi, o le a ia laulau atu ia te oe lana ‘aiga aupito sili i ana ipu e sili ona lelei. O le tulaga faaletamaoaiga, lanu o le pa’u, talaaga faaleaganuu, tagatanuu, tulaga o le amiotonu, tulaga faaagafesootai, po o se isi lava mea e iloa ai pe faaigoa ai, e le taua ia te ia. E vaai atu o ia ma lona loto; e iloa atu e ia se atalii/afafine o le Atua i tagata uma.
Na aoao mai Peresitene Russell M. Nelson:
“E fiafia le fili i igoa valaau ona latou te vaeluaina i tatou ma faatapulaaina le auala tatou te mafaufau ai e uiga ia i tatou lava ia ma i le tasi ma le isi. E faanoanoa tele pe a tatou faamamaluina igoa valaau e sili atu i lo tatou faamamaluina o le tasi ma le isi.
“O igoa valaau e mafai ona taitai atu i le faamasino atu ma le ita. Soo se sauaina po o le faailoga lanu i se isi tagata ona o le tagatanuu, ituaiga, tulaga faaleitupa, itupa, faailoga faaleaoaoga, aganuu, po o isi mea taua ua faailoga ai, e tausuai lea i lo tatou Māta’isau!”5
O Farani e le o a’u lea; o le mea lea sa ou fanau ai. O le pa’epa’e e le o a’u lea; o le lanu lea o lo’u pa’u, po o le leai o se lanu. O le Polofesa e le o a’u lea; o le mea lea sa ou faia e lagolago ai lo’u aiga. O le Fitugafulu Pulega Aoao e le o a’u lea; o le mea lea o loo ou auauna atu ai i le malo i le taimi nei.
“O le mea muamua lava ma le sili,” e pei ona faamanatu mai e Peresitene Nelson ia i tatou, o a’u o se “atalii/fafine o le Atua.”6 E faapena foi oe; e faapena foi isi tagata uma o loo siomia ai i tatou. Ou te tatalo ia tatou maua se agaga talisapaia sili atu o lenei upumoni ofoofogia. E suia ai mea uma!
E eseese aganuu na tatou ola a’e ai; atonu tatou te o mai i tulaga eseese tau i le tamaoaiga; o o tatou tupuaga i le olaga nei, e aofia ai o tatou tagatanuu, lanu o pa’u, meaai tatou te fiafia i ai, manatu faapolotiki, ma isi mea, e ono tele se eseesega. Peitai, o i tatou o Ana fanau, i tatou uma e aunoa ma se tuusaunoaga. E tutusa lo tatou faapogai paia ma gafatia tutusa e leai se tuaoi e ala i le alofa tunoa o Iesu Keriso.
Na faaupuina faapea e C.S. Lewis: “O se mea taua le ola ai i se sosaiete ua mafai ona avea ma ni atua ma atua fafine, ia manatua o le tagata sili ona le taua e mafai ona e talanoa i ai e i ai se aso o le a avea ma se tagata, ana e vaai i ai i le taimi nei, o le a faaosoosoina oe e tapuai malosi i ai. E leai ni tagata masani faatauvaa. Tou te le’i talanoa lava i se na o se tagata ola. O atunuu, aganuu, faatufugaga, malo—o a le tino ia, o lo latou ola ia i tatou e pei o le ola o se iniseti. Ae o tagata ola pea ia tatou te tausua faatasi, galulue faatasi, faaipoipo i ai, le amanaia, ma faaaoga i le olaga lenei.”7
Na faamanuiaina lo matou aiga e nonofo i ni atunuu ma ni aganuu eseese; na faamanuiaina le ma fanau e faaipoipo i totonu o agaifanua eseese. Ua ou iloa ai o le talalelei toefuataiina a Iesu Keriso o le malosiaga sili lea e faalaugatasia ai eseesega. A tatou opomauina moni, “e molimau mai lea lava Agaga i o tatou agaga, o fanau i tatou a le Atua.”8 E faasaoloto i tatou e lenei upumoni ofoofogia, ma o pona ma eseesega ia e ono faamafatia ai i tatou ma a tatou sootaga i le tasi ma le isi e “tofatumoanaina … ia Keriso.”9 E le’i pine ae manino mai faapea, o i tatou, faapea foi ma isi, “e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua.”10
Sa ou faalogo talu ai nei i le peresitene o le paranesi o se tasi o iunite o gagana faaleaganuu eseese o ta’ua le mea lenei, e pei ona sa faia e Elder Gerrit W. Gong, faapea o le i ai i feagaiga.11 Se manatu faavae ina a matagofie! O i tatou o ni ō o se vaega o tagata e taumafai uma e tuu le Faaola ma a latou feagaiga i le totonugalemu o o latou olaga ma ia ola fiafia i le talalelei. O lea, nai le vaai atu o le tasi i le isi e ala i tioata taufaasese o le olaga nei, a ua siitia e le talalelei a tatou vaaiga ma faataga i tatou e vaai atu i le tasi ma le isi e ala i tioata e le masuia le mama a’ia’i o a tatou feagaiga paia. O le faia o lena mea, e amata ai ona tatou tuuitiitia o tatou faailoga tagata faalenatura ma le faaitu’au i isi, lea e fesoasoani ai ia i latou e tuuitiitia foi lo latou faailoga tagata ma le faaitu’au mai ia i tatou,12 i se faataamilosaga ofoofogia tausimamalu. Ioe, tatou te mulimuli i le valaaulia a lo tatou perofeta pele: “O’u uso e ma tuafafine pele, e matuā taua lava le auala tatou te taulima ai e le tasi le isi! O le ala tatou te tautatala atu ai i isi ma e uiga i isi i le fale, i le lotu, i le galuega, ma upega tafa’ilagi e taua tele. O le asō o le a ou talosagaina ai i tatou e fegalegalea’i ma isi i se ala maualuga atu ma sili ona paia.”13
O le aoauli nei, i le agaga o lena valaaulia, ou te fia faaopoopo atu la’u folafolaga i a tatou tamaiti ofoofogia o le Peraimeri:
Afai e le savali e pei o isi,
O nisi e ‘alo mai ia te oe,
Ae Ou te le faia! Ou te le faia!
Afai e le tautala e pei o isi,
O nisi e ula ia te oe,
Ae Ou te le faia! Ou te le faia!
Ta savavali. Ta talanoa.
E faaalia ai lo’u alofa.
E le i savali ese Iesu.
Na ia alofa ia te oe.
O le a ou faia! O le a ou faia!14
Ou te molimau atu o Ia o lē ua tatou faalagiina o lo tatou Tama oi le Lagi o lo tatou Tama moni lava, e alofa o Ia ia te i tatou, Na Te silafia lelei Ana fanau taitoatasi, e loloto Lona amana’ia o i latou taitoatasi, ma e moni e tutusa i tatou uma ia te Ia. Ou te molimau atu o le ala tatou te taulima ai le tasi ma le isi, o se faailoga tonu lea o lo tatou malamalama ma le talisapaia o le taulaga taualuga o le Togiola a Lona Alo, lo tatou Faaola, o Iesu Keriso. Ou te tatalo, e faapei o Ia, ia tatou alolofa i isi aua o le mea sa’o lena e fai, e le faapea ona o loo latou faia le mea sa’o pe o latou foliga “tonu” mai i le mea o manatu ai isi. I le suafa o Iesu Keriso, amene.