“9: Ako,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó (2020)
“9: Ako,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó
Ako—Taimi Lōloa Tahá: Miniti ʻe 60
1. Ngāue Fakaetauhi ʻo Hangē ko e Fakamoʻuí
Laukonga:
Kuo kole mai e ʻEikí ke tau ngāue fakaetauhi ki he niʻihi ʻoku tau feohí. ʻOku hoko e talanoa ʻo ʻAlamā mo ʻAmulekí ko ha fakahinohino. Naʻe ʻiloʻi ʻe ʻAlamā naʻe faingataʻaʻia fakaeloto moʻoni ʻa ʻAmuleki, pea naʻá ne ʻave tonu ia “ki hono fale ʻoʻoná, mo tauhi ia ʻi heʻene ngaahi mamahí, mo tokoniʻi ia ʻi he ʻEikí” (ʻAlamā 15:18).
Fakalaulauloto:
Kuo tokoniʻi fēfē koe ʻe he kakaí ke ke “[fakamālohia] … ʻi he ʻEikí”?
Aleaʻi:
Ko e hā ha ngaahi founga te tau lava ai ʻo fakamālohia e niʻihi kehé ʻi he ʻEikí?
2. Ngaahi Talatupuʻa fekauʻaki mo hono Tokoniʻi e Niʻihi Kehé
Laukonga:
ʻOku ʻi ai ha ngaahi talatupuʻa angamaheni mahalo kuó ke tui ki ai fekauʻaki mo hono tokoniʻi ʻo e niʻihi kehé. ʻI hoʻo lau e ngaahi talatupuʻa ko ʻení, siviʻi pe kuo ʻi ai nai ha taimi kuó ke ongoʻi peheni ai.
Talatupuʻa #1:
ʻOku 100% ʻEku Fatongia ʻaki hono Fakahoko ki he Niʻihi Kehé ʻa e Tokoni ʻOku Nau Fiemaʻú.
Ko e Tuʻunga Moʻoní:
Ko e Fakamoʻuí pē ʻa e faifakamoʻui moʻoni ʻo e ngaahi laumālié, ka te ke lava ʻo kau ko ha konga ʻo e kakai ʻoku nau faitāpuekina e niʻihi kehé. Te ke hoko ko ha konga ʻo e kakai faifakamoʻui ko ʻení ʻi hoʻo ʻoatu ho ngaahi mālohingá mo e fakakaukau makehé pea tokoni ʻi he taimi te ke lava aí.
Talatupuʻa #2:
ʻOku Totonu Ke u Taukei ʻi hono Fakaleleiʻi e Ngaahi Palopalema ʻa e Niʻihi Kehé.
Ko e Tuʻunga Moʻoní:
Naʻa mo e kau faifaleʻi fakapalōfesinalé ʻoku nau tui ko honau fatongiá pē ke tokoniʻi ha taha ke ne fai ʻene ngaahi liliu pē ʻaʻaná kae ʻikai ko hono ʻoatu ha tohi fakahinohino. Ko ho fatongiá ke ʻofa mo ngāue fakaetauhi ki he kakaí, pea ko e Fakamoʻuí te Ne toki fai e fakamoʻuí.
Talatupuʻa #3:
ʻOku ʻi ai ha Ngaahi Fakalelei Vave ki he Ngaahi Palopalema ʻo e Moʻuí.
Ko e Tuʻunga Moʻoní:
Ko hotau taufatungamotuʻá ʻa e fakatōliʻa vavé, pea ʻoku palōmesi ha ngaahi solovaʻanga vave ki ha faʻahinga meʻa pē. Ka ʻoku tātātaha pē ke ʻi ai ha ngaahi solovaʻanga vave ki he ngaahi palopalema ʻo e moʻuí. Ko hono ngāueʻi e liliú ko ha founga ngāue ia pea ʻoku meimei ke lōloa maʻu pē ia ʻi he meʻa ʻokú ke fakakaukau ʻe hokó. Ko e liliu moʻoní ko ha founga fakaleleiʻi ia kuo pau ke ke foua pe ko e niʻihi ʻokú ke ʻofa aí.
Talatupuʻa #4:
ʻOku ʻIkai Ke u ʻIlo ʻa e Meʻa Totonu ke Lea ʻAkí, ko ia ʻOku Lelei Ange ke ʻOua Naʻá Ku Lea ʻAki ha Meʻa.
Ko e Tuʻunga Moʻoní:
Ko e ongoongo fakafiefiá he ʻoku ʻikai faʻa lahi ha meʻa ke ke lea ʻaki. Ko e meʻaʻofa maʻongoʻonga taha te ke lava ʻo foaki ki he niʻihi kehé ko hoʻo fakahaaʻi hoʻo mahuʻingaʻia ʻiate kinautolú, ʻeke ha ngaahi fehuʻi, fakafanongo ʻi he ʻofa, pea tokoni ke nau ongoʻi malu ʻi heʻenau vahevahe mo koé.
Talatupuʻa #5:
Kapau Te u Tokoni, Te Nau Fakafalala Maʻu Pē Kiate Au.
Ko e Tuʻunga Moʻoní:
ʻI hoʻo tokoní, te ke lava ʻo fokotuʻu ha ngaahi fakangatangata ʻoku leleí ke fakapapauʻi ʻokú ke tokangaʻi koe mo hoʻo fāmilí. ʻE lava ke tataki koe ʻe he ʻEikí ke ke ngāue ʻi ha ngaahi founga te ne fakamālohia e moʻui fakafalala ʻa e tokotahá kiate iá. ʻOua naʻá ke teitei fakasiʻia e mālohi ʻe lava ke maʻu ʻe he fanga kiʻi ngāue ʻofa iiki mo faingofuá ʻi he moʻui ʻa e kakaí, pea ʻoua naʻá ke manavasiʻi ke fakaʻaongaʻi ha taimi ki ha taha pea ʻofa kiate ia.
Aleaʻi:
Aleaʻi mo haʻo hoa ha taha ʻo e ngaahi talatupuʻa ko ʻeni te ke ala fefaʻuhi mo iá mo e founga te ke lava ʻo ikunaʻi ai iá.
3. Fai ha Tali ʻoku Tāú ki he Niʻihi Kehé
Laukonga:
Neongo pe ko e hā hoʻo ʻuhinga lelei tahá, ka ʻoku faingofua ke lea ʻaki ha ngaahi meʻa ʻoku ʻikai fuʻu ʻaongá lolotonga hoʻo feinga ke tokoniʻi ha taha he taimi faingataʻá. Ka ʻoku ʻikai totonu ke fakailifiaʻi koe ʻe he meʻá ni mei he hokohoko atu hoʻo feinga ke tokoní. ʻOku finangalo e ʻOtuá ke ke ʻofa mo tokoniʻi ʻEne fānaú. Tokanga ki he ngaahi ongo ʻa kinautolu ʻokú ke feinga ke tokoniʻí, ʻo tokanga ke ʻoua naʻá ke lea ʻaki pe fai ha faʻahinga meʻa te ne holoki ʻenau mamahí mo e faingataʻaʻiá.
Aleaʻi:
Ko e hā ha ngaahi kupuʻi lea kehe kuó ke fanongo ai ʻe tokoni pe ʻikai tokoní?
4. Ko Hono Fakapapauʻi ki he Niʻihi Kehé
Laukonga:
Naʻe akoʻi ʻe Sisitā Leina I. ʻApeto ʻo pehē, “Naʻa mo e taimi ʻoku ʻikai mahino ai kiate kitautolu e meʻa ʻoku foua ʻe he niʻihi kehé, ʻe lava ke hoko ʻa hono fakapapauʻi ʻoku moʻoni ʻenau mamahí ko ha ʻuluaki sitepu mahuʻinga ia ʻo e feinga ke mahino e meʻa ʻoku hokó mo maʻu ha fakamoʻuí” (“Lolotonga e Ngaahi Faingataʻá, ʻEiki Ta Feʻao Pē!” Liahona, Nov. 2019, 58). ʻOku ʻuhinga hono fakapapauʻi e ngaahi ongo ʻa e kakaí ko hono tomuʻa tali ʻenau ngaahi ongó pea toki maʻu ha mahino kiate kinautolu.
ʻOku ʻoatu ʻi lalo ha ngaahi founga ke tokoni atu ke ke fakapapauʻi e ongo ʻa ha taha ʻoku fehangahangai mo ha faingataʻa:
-
Fakafanongo. Tokanga pea fakafanongo fakalelei ki he meʻa ʻoku talaatu ʻe he tokotahá. ʻOua te ke tulitonuhia kapau kuó ke fakalahi e palopalema ʻa e tokotahá.
-
Feinga ke mahino kiate koe. Mahalo naʻa fiemaʻu ke ke ʻeke ha ngaahi fehuʻi manavaʻofa ke mahino lelei ange ʻa e meʻa ʻoku ongoʻi ʻe he tokotaha ko ʻení. Fai ho lelei tahá ke mahino e meʻa ʻoku foua ʻe he tokotahá.
-
Tali e ngaahi ongo ʻa e tokotahá. ʻOua ʻe feinga ke ke liliu e tokotahá pe pehē ʻoku hala ʻene ongoʻi pehení. ʻI hoʻo fai ʻení, tokanga ke ʻoua naʻá ke poupouʻi e ngaahi sīpinga fakakaukau ʻoku ʻikai fakatupu moʻui leleí pe fakatuʻutāmakí.
-
Fakahaaʻi e manavaʻofá. Fakahaaʻi ʻokú ke tokanga ki he meʻa ʻoku ongoʻi ʻe he tokotahá. Tatau ai pē pe ʻoku ʻikai mahino kiate koe ʻa e tūkungá pe tupuʻanga ʻo e ongó, te ke lava ʻo fakapapauʻi e ngaahi ongo ʻa e tokotahá ʻaki haʻo lea ʻaki ha ngaahi meʻa hangē ko e “ʻOkú ke ongoʻi ʻoku taʻetokaʻi koe [pe loto-hohaʻa, siva e ʻamanakí, taʻe-mahuʻinga, ʻita, mo e alā meʻa pehē]. ʻOku faingataʻa ke te ongoʻi pehē.”
-
Fakahaaʻi e ʻofa. Talaange ki he tokotahá ni ʻokú ke tokanga kiate ia pea ʻokú ke falala te ne lava ʻo fakaleleiʻi pe ikunaʻi ʻa e palopalemá.
Laukonga:
Ko ha sīpinga ʻeni ʻo e founga te ke lava ai ʻo fakapapauʻi e ongo ʻoku maʻu ʻe ha taha ʻokú ne foua ha taimi faingataʻa:
Ko Silá ko ha faʻē taautaha naʻe toki mālōlō pē hono fohá koeʻuhí ko ha fuʻu tōtuʻa e faitoʻo konatapú. ʻOkú ne nofo toko taha pē pea ʻoku ʻikai hano fāmili ʻe nofo ofi atu ki ai. Naʻe haʻu ʻa Malia ke talanoa mo ia mo ʻeke ange pe ʻokú ne fēfē. Naʻe loto ʻa Malia ke ne hohaʻasi e fakamatala ʻa Silá, ka naʻe ʻikai ke ne fai ia. Naʻá ne fakafanongo pē. ʻI he taimi naʻá ne ongoʻi ai e taimi totonu ke leá, naʻá ne ʻeke ha ngaahi fehuʻi hangē ko e “ʻOkú ke ongoʻi fēfē he taimí ni?” mo e “Ko e hā e meʻa faingataʻa taha kiate koé?” Naʻe mahino kiate ia ʻoku ongoʻi moʻoni ʻe Sila e mole hono fohá, pea ʻikai leva ke ne pehē ange, “Sai pē he ʻokú ne nofo mo e ʻOtuá he taimí ni.” Naʻe fakakaukau ʻa Malia ke fakahaaʻi ʻene kaungā-ongoʻí ʻaki ʻene pehē, “ʻOku ou lava pē ʻo tala ʻokú ke siʻi ʻofa lahi kiate ia, pea ʻoku ou ongoʻi mamahi fakataha pē mo koe.” Naʻá ne fakahaaʻi leva ʻene ʻofá ʻaki ʻene tangutu ʻo tangi fakataha mo ia.
Kiʻi Tokoni:
ʻOku kau ʻi he uepisaiti ʻa e Siasí ki he ngāue fakaetauhí ha ngaahi fakakaukau lahi ange ʻe ala tokoni ke mahino kiate koe ʻa e founga ke fakahaaʻi ai e manavaʻofá. Vakai, ministering.ChurchofJesusChrist.org.
5. Ko Hono Fakaʻapaʻapaʻi e Tauʻatāina ʻa e Niʻihi Kehé ke Filí
Laukonga:
Kuo foaki ʻe he Tamai Hēvaní ki he tokotaha kotoa pē ʻa e meʻa-foaki ʻo e tauʻatāina ke filí, pea ʻoku fatongia ʻaki ʻe he niʻihi fakafoʻituituí ʻa ʻene ngaahi fili pē ʻaʻaná neongo pe ko e hā e tokoni te ke faí. ʻI hoʻo tokoni ki he niʻihi kehé, manatuʻi ʻoku ʻikai ke ke fatongia ʻaki ʻa hono fakaleleiʻi ʻenau palopalemá pe puleʻi e ngaahi fili ʻoku nau faí. ʻOku mahuʻinga ke ke fokotuʻu haʻo ngaahi fakangatangata ʻoku leleí lolotonga hoʻo tokoniʻi e niʻihi kehé.
ʻOku finangalo e Fakamoʻuí ke ke fakaʻapaʻapaʻi e tauʻatāina ʻa e niʻihi ʻokú ke ʻofa aí ke nau fai ha filí, ka ʻoku ʻikai ʻuhinga ia ke ke nofonoa pē taʻe fai ha tokoni. Fekumi ki he tokoni ʻa e Laumālié ke mahino kiate koe ʻa e founga te ke lava ai ʻo tokoniʻi e niʻihi kehé ʻi ha ngaahi founga ʻe fakaʻapaʻapaʻi ai ʻenau tauʻatāina ke filí pea ʻikai ongoʻi ai ʻe he niʻihi kehé ʻoku ʻikai tokangaʻi kinautolu.
Ko ha ngaahi fakakaukau ʻeni ki ha ngaahi meʻa te ke ala fai ʻo makehe mei hono fakapapauʻi e ngaahi ongó mo e fakafanongó:
-
ʻAukai pea hūfia kinautolu.
-
Fakatapui ho taimi ʻi he temipalé maʻanautolu.
-
Fekumi ki ha tokoni mo ha faleʻi fakapalōfesinale.
-
Fekumi ki he moʻui lelei fakaelotó.
-
ʻAve ha fakamatala fakalotolahi, pe vahevahe ha ngaahi pōpoaki fakaoli ke ʻai ke nau malimali.
-
Fekumi ki ha ngaahi tāpuaki mo ha faleʻi mei he lakanga fakataulaʻeikí.
-
Kau ʻi ha kulupu tokoni maʻá e fāmilí mo e ngaahi kaungāmeʻá.
-
Fakaʻataʻatā ho taimí maʻanautolu lolotonga iá ʻokú ke tauhi pē ha ngaahi fakangatangata ʻoku leleí.
-
Tokoniʻi kinautolu ʻi he ngaahi founga ʻoku nau kole pe loto ki aí—ʻa e ngaahi founga ʻoku ʻikai maumauʻi ai ʻenau tauʻatāina ke filí pe ʻai ke nau ongoʻi ʻoku ʻikai tokangaʻi kinautolú.
Aleaʻi:
Vahevahe ha aʻusia langaki moʻui naʻá ke maʻu lolotonga hono fakamālohia koé pe lolotonga hoʻo fakamālohia ha niʻihi kehé.
6. Faʻa Kātaki ʻi hono Kātekina e Niʻihi Kehé
Laukonga:
ʻE lava ke faingataʻa mo ngali tōtuʻa hono tokangaʻi e niʻihi ʻoku tau ʻofa aí. ʻI hoʻo feinga ke tokoniʻi ʻa kinautolu ʻoku faingataʻaʻiá, feinga ke ke maʻu ha mahino pea fakaʻehiʻehi mei he loto-fakamāú. Te ke lava ʻo maʻu ha faleʻi mei he folofolá pea “lotu ki he Tamaí ʻaki ʻa e ivi kotoa ʻo e lotó, koeʻuhi ke fakafonu ʻa kimoutolu ʻaki ʻa e ʻofá ni,” ʻa ia ko e ʻofa faka-Kalaisí (Molonai 7:48).
Kapau ʻoku ʻi ai haʻo ʻofaʻanga ʻoku ʻi ai haʻane palopalema fakaeloto, mahalo te ke faʻa nofotaha pē ʻi hono tokangaʻi ʻo e tokotaha ko iá kae ngalo ia ke ke tokangaʻi mo koe. ʻOku ʻi ai ha tokoni mo e poupou maʻau. ʻE lava ke tokoni e ngaahi kulupu poupoú ki he kau mēmipa ʻo e fāmilí ke nau ako ki he ngaahi palopalema fakaemoʻui leleí, ngaahi founga ke tokoni aí, mo e ngaahi founga ki hono matuʻuaki e ngaahi fakaʻilongá. Fetuʻutaki ki he ngaahi kaungāmeʻa falalaʻangá mo e kau mataotao ki he moʻui leleí ke tokoniʻi koe mo e taha ʻokú ke ʻofa aí. ʻE lava ke tokoni lelei e poupou mei he fāmilí mo e ngaahi kaungāmeʻá ki hono faitoʻo e ngaahi palopalema mamafa ki he moʻui lelei fakasōsialé mo fakaelotó.
Naʻe faleʻi mai ʻe ʻEletā Sefilī R. Hōlani: “Ki he kau tauhí, ʻi hoʻo feinga mateaki ko ia ke tauhi ha taha ke moʻui leleí, ʻoua naʻá ke maumauʻi ai mo hoʻo moʻui lelei ʻaʻaú. Fakapotopoto ʻi he ngaahi meʻá ni kotoa. ʻOua naʻá ke lele ʻo vave ange ʻi ho mālohí [Mōsaia 4:27]. Ko e hā pē ha meʻa te ke lava pe ʻikai ke ke lava ʻo fai, ʻe lava ke ke fai haʻo lotu peá ke ʻʻofa taʻe-mālualoi’ [Tokāteline mo e Ngaahi Fuakava 121:41]” (“Hangē ha Ipu Kuo Maumaú,” Liahona, Nov. 2013, 41).
Aleaʻi:
Ko e hā ha meʻa kuó ne tokoniʻi koe ke potupotutatau ai hoʻo tokangaekina e niʻihi kehé pea mo koé?