“10: Ko Hoku Fakavaʻé: Maʻu e Ngaahi Ouau Fakatemipalé,” Ko Hono Maʻu e Mālohi ʻi he ʻEikí: Ivi Matuʻuaki Fakaelotó (2020)
“10: Ko Hoku Fakavaʻé: Maʻu e Ngaahi Ouau Fakatemipalé,” Ko Hono Maʻu e Mālohi ʻi he ʻEikí: Ivi Matuʻuaki Fakaelotó
Ko Hoku Fakavaʻé: Maʻu e Ngaahi Ouau Fakatemipalé—Taimi Lōloa Tahá: Miniti ʻe 20
Fakalaulauloto:
Ko e hā ha niʻihi ʻo e ngaahi meʻa mahuʻinga taha kiate koé?
Mamata ʻi he:
“Doing What Matters Most,” ʻoku maʻu ʻi he https://churchofjesuschrist.org/study/video/self-reliance-videos. (ʻIkai ha vitiō? Lau ʻa e fakamatala ki he “Ko Hono Fakahoko e Meʻa ʻOku Mahuʻinga Tahá.”)
Ko e Fakahoko ʻa e Meʻa ʻOku Mahuʻinga Tahá
Kapau ʻoku ʻikai ke mou lava ʻo mamata ʻi he foʻi vitioó, pea lau ʻa e fakamatala ko ʻení.
Tokotaha fakamatalá:
Naʻe tō ʻo pā ha vakapuna ʻi Folōlita ʻi ha pō fakapoʻuli ʻi Tīsema. Naʻe mate ai ha kakai ʻe toko 100 tupu. Naʻe maile pē ʻe 20 mei he feituʻu naʻa nau mei hao ki aí.
Palesiteni Dieter F. Uchtdorf:
Naʻe feinga e kau fakatotoló ke ʻiloʻi ʻa e tupuʻangá, ʻi he hili e fakatuʻutāmakí. Naʻe ʻosi tukuange fakalelei hifo pē ʻa e naunau ki he tūʻutá. Naʻe fakaʻofoʻofa ʻaupito pē ʻa e tafaʻaki fakamīsini ia ʻo e vaká. Naʻe ngāue lelei ʻa e meʻa kotoa pē—tukukehe pē ha meʻa ʻe taha: ko ha foʻi ʻuhila ʻe taha naʻe pā. Naʻe hanga ʻe he kiʻi foʻi ʻuhila ko iá—ʻa ia naʻe sēniti nai ʻe 20 hono mahuʻingá—ʻo kamataʻi ha ngaahi meʻa lalahi ne iku ke mole fakamamahi ai ha moʻui ʻa ha kakai ʻe toko 100 tupu.
Ko hono moʻoní, naʻe ʻikai ko e foʻi ʻuhilá naʻá ne fakatupu ʻa e fakatuʻutāmakí; naʻe hoko ia he naʻe tukutaha e tokanga ʻa e kau ngāué ia ʻi ha meʻa naʻe ʻikai fuʻu mahuʻinga he taimi ko iá, kae ngalo ʻiate kinautolu ʻa e meʻa mahuʻinga tahá.
ʻOku ʻikai ko e kau pailaté pē ʻoku nau faʻa fakahehema ke tukutaha ʻenau tokangá ʻi he ngaahi meʻa ʻoku ʻikai mahuʻingá. ʻOku tau ʻi ha tuʻunga fakatuʻutāmaki kotoa pē. …
ʻOku tukutaha nai hoʻomou fakakaukaú mo e lotó ʻi he ngaahi meʻa muna mo laulaunoa ʻoku fuonounoú, pe ko e ngaahi meʻa ʻoku mahuʻinga tahá?
(Vakai, “ʻOku Tau Fai ha Ngāue Lahi pea ʻOku ʻIkai ke Tau Faʻa ʻAlu Hifo,” Liahona, Mē 2009, 59, 60.)
Aleaʻi:
Ko e hā ha ngaahi meʻa laulaunoa ʻoku nau tohoakiʻi kitautolu mei he fakalakalaká? ʻE tokoniʻi fēfē kitautolu ʻe he ngaahi ouau ʻo e ongoongoleleí?
Laukonga:
Ko e potufolofola mo e ngaahi fakamatala ko ʻení naʻe fai ʻe he kau taki ʻo e Siasí:
“ʻOku fakahā ʻi hono ngaahi ouaú ʻa e mālohi ʻo e anga faka-ʻOtuá” (Tokāteline mo e Ngaahi Fuakava 84:20).
“ʻE lelei kiate kitautolu kapau te tau ako ʻa e vahe 109 ʻo e Tokāteline mo e Ngaahi Fuakavá pea mo muimui ki he naʻinaʻi ʻa Palesiteni [Hauati W.] Hanitaá ‘ke fokotuʻu ʻa e temipale ʻo e ʻEikí ko e fakaʻilonga maʻongoʻonga ʻo [ʻetau] hoko ko e mēmipá’” (Quentin L. Cook, “Sio Kiate Koe ʻi he Loto Temipalé,” Liahona, Mē 2016, 99).
Ko e ikuʻanga ʻoku tau takitaha fāifeinga ki aí, ke fakakoloaʻi kitautolu ʻaki ʻa e mālohi ʻi he fale ʻo e ʻEikí, silaʻi hotau fāmilí, faivelenga ʻi hono tauhi e ngaahi fuakava naʻe fai ʻi he temipalé ke tau feʻunga ai ke maʻu e meʻaʻofa maʻongoʻonga taha ʻa e ʻOtuá—ʻa ia ko e moʻui taʻengatá. Ko e ngaahi ouau ʻo e temipalé mo e ngaahi fuakava ʻokú ke fakahokó, ko e kī ia ki hono fakamālohia hoʻo moʻuí, hoʻo nofo malí mo e fāmilí, pea mo hoʻo malava ke matuʻuaki e ngaahi ʻohofi ʻa e filí. ʻE hanga ʻe hoʻo moihū ʻi he temipalé mo hoʻo tokoni ai ki hoʻo ngaahi kuí, ʻo faitāpuekina koe ʻaki ha fakahā fakafoʻituitui mo ha melino ʻoku lahi angé, pea ʻe fakamālohia ai hoʻo tukupā ke nofo maʻu ʻi he hala ʻo e fuakavá” (Russell M. Nelson, “ʻI Heʻetau Laka Fakataha Atu Kimuʻá,” Liahona, ʻEpeleli 2018, 7).
Aleaʻi:
ʻE fakatupulaki fēfē ʻe he moihū ʻi he temipalé mo e hisitōlia fakafāmilí hotau ivi matuʻuaki fakaelotó?
Tukupā:
Te u fokotuʻu ha ʻaho ke u ʻalu ai ki he temipalé kapau ʻe ʻi ai haʻaku lekomeni temipale. Kapau ʻoku ʻikai ke ʻi ai haʻaku lekomeni temipale, te u fokotuʻu ha taimi ke u talanoa ai mo ʻeku pīsopé pe palesiteni fakakoló ke fakafoʻou ʻeku lekomení pe aleaʻi e founga te u lava ai ʻo teuteu ke maʻu hoku ngaahi ouau fakatemipalé.