Tō’u niu : Fa’a’ite i te parau ti’a—’Eiaha ’ia hau i te roa : 20 minuti

Feruri :

Nō te aha te Fatu e here ai i te feiā « parau ti’a o te ’ā’au » (Te Ha’api’ira’a Tumu ’e te mau Fafaura’a 124:15) ?

Māta’ita’i :

« What Shall a Man Give in Exchange for His Soul [E aha tā te ta’ata e hōro’a ’ei ho’o nō tōna ora ]? » e vai ra i ni’a i te https://churchofjesuschrist.org/study/video/self-reliance-videos. (’Aita e video ? ’A tai’o i te pāpie « E aha tā te ta’ata e hōro’a ’ei ho’o nō tōna ora ?»)

E aha tā te ta’ata e hōro’a ’ei ho’o nō tōna ora ?

Mai te mea ’aita e ti’a ia ’outou ’ia mata’ita’i i te video, ’a tai’o i teie pāpie.

te tamāroa i te fare teatara’a

Elder Robert C. Gay :

I te hō’ē taime, ’ua ui te Fa’aora i tāna nā pipi i teie uira’a : « Eaha ho’i tā te ta’ata e ’ore e hōro’a ’ei ho’o i tōna iho ora ? »

E uira’a teie tā tō’u metua tāne i ha’api’i mai iā’u ’ia feruri māite e rave rahi matahiti i teie nei. ’A pa’ari ai au, ’ua fa’aue mai tō’u nā metua iā’u ’ia rave i te tahi mau ’ohipa ’ati a’e i te fare ’e ’ua ’aufau mai i te tahi moni nā’u nō taua mau ’ohipa ra. E mea pinepine au i te fa’a’ohipa hau ri’i noa atu i te 10 tāra i te hepetoma nō te haere i te teata. I terā rā tau, e 5 tāra te tīteti nō te tamari’i 11 matahiti. E toe mai ïa e 5 tāra nō te ho’o i te tahi tōtōrā, e 5 tāra hō’ē. Hō’ē hōho’a teata ’e e pae tōtōrā ! ’Ua hope te au.

Mai te reira noa ē, 12 atura tō’u matahiti. Tei te rēni tia’ira’a vau i te hō’ē avatea ’e ’ua ’ite a’era vau ē, e 7 tāra te tīteti nō te tamari’i 12 matahiti, te aura’a ra, e piti ïa tōtōrā iti mai tā’u. Nō tō’u ineine ’ore i te rave i te reira tusia, feruri a’era vau ē, « ’Aita tō ’oe hōho’a i taui mai te hepetoma i ma’iri ». Ti’a atura vau i mua ’e ani ani atura i te tīteti 5 tāra. ’Aita te vahine ho’o i tau’a a’e, ’e ’ua ho’o mai au i tā’u nā tōtōrā e pae, ’eiaha rā e toru.

Nō tō’u ’oa’oa i te ’ohipa tā’u i rave, i muri iho, ’ua horo vau i te fare nō te fa’ati’a i tō’u metua tāne i teie ’ohipa. ’A fa’ati‘a noa ai au i tā’u ’ā’amu, ’ua vai mū noa ’oia. ’Ia oti rā tā’u parau, ’ua hi’o mai ’oia iā’u ’e ’ua parau mai ra, « Tamaiti, e ho’o ānei ’oe i tō ’oe vārua nō te hō’ē toata ? » Puta roa tō’u ’ā’au 12 matahiti i tāna mau parau. E ha’api’ira’a teie ’aita roa i mo’e iā’u.

(« What Shall a Man Give in Exchange for His Soul [E aha tā te ta’ata e hōro’a ’ei ho’o nō tōna ora ?] » Liahona, Novema 2012, 34)

Tāu’aparau :

E aha te aura’a ’ia vai parau ti’a ? E aha te tahi mau rāve’a ha’iha’i tā te ta’ata e rave nō te ho’o i tō rātou vārua nō te mau mea i roto i teie orara’a ?

Tai’o :

« Te ti’aturi nei mātou ē, e mea ti’a i te ta’ata ’ia ora ma te parau-ti’a » (Hiro’a Fa’aro’o 1:13).

« E ’ore ā vau e fa’aru’e i te parau mau nā’u ra e pohe noa atu vau » (Ioba 27:5).

’Ohipa e rave

’O ’outou ana’e, ’a tai’o i te tāpura i raro nei ’e ’a fāito e aha tō ’outou huru i ni’a i te ’ohipa tāta’itahi nō te hi’o i hea ’outou e riro ai ’ei mea parau ti’a a’e.

E aha te pinepinera’a e nā reira ai au

1 = ’aita roa, 2 = i te tahi taime, 3 = pinepine, 4 = i te mau taime ato’a

1. E tāpe’a vau i tā’u parau.

2. ’Aita vau e fa’arahi i te rave i te ’ohipa ’ia hi’ohia mai tōna maita’i, ’aita nei rā.

3. E parau vau i te parau mau, noa atu ē, ’ua hape au i te ma’itira’a.

4. E fa’aho’i au i te mea tā’u i tārahu ’e e’ita vau e rave i te mau mea e ’ere nā’u.

5. E ha’apa’o maita’i au i tō’u hoa fa’aipoipo (mai te mea ’ua fa’aipoipohia) ’e i tō’u ’utuāfare i roto i tā’u mau parau ’e tā’u mau ’ohipa.

6. E’ita roa atu vau e tāviri, noa atu ē, ’ua ’ite au ē, e’ita vau e haruhia.

7. ’Ia itehia iā’u te hō’ē mea e’ere nā’u, e fa’aho’i au i te reira i te fatu ra.

8. I te mau taime ato’a e fa’aho’i au i te moni tā’u e tārahu.

9. E fāri’i au ’ia hape noa atu vau.

Tai’o :

I te ’īrava ’e te fa’ahitira’a parau i muri nei a Elder Wirthlin :

« ’E ’ua hina’aro vau ’ia ha’amana’o ’outou ē, ’o te ta’ata i rotopū ia ’outou ’o tē tīpe’e i tā tōna ta’ata tupu, ’ia fa’aho’i ’oia i te mea tāna i tīpe’e mai, mai te au i te parau tāna i fa’aau atu ; mai te mea ’aita ’ua rave ïa ’oe i te hara ; ’e e riro ato’a paha te reira i te fa’atupu i te hara i roto i tō ’oe ta’ata tupu » (Mosia 4:28).

« Te aura’a o te parau ti’a, o te rave-tāmau-ra’a ïa i te mau mea tano ’e te maita’i, noa atu te mau hope’ara’a e tupu ’oi’oi mai. Te aura’a, o te vai-parau-ti’a-ra’a ïa mai te hōhonu-roa-ra’a o tō tātou ’ā’au, ’eiaha i roto noa i tā tātou mau ’ohipa, te mea faufa’a a’e rā, i roto ïa i tō tātou mau mana’o ’e i tō tātou ’ā’au… Te ha’avare ri’i, te tāviri ri’i, ’aore rā te ravera’a i te tahi maita’i ti’a ’ore, ’aita ïa e fāri’ihia e te Fatu… Te utu’a maita’i hope o te parau-ti’a, o te auhoara’a tāmau ïa o te Vārua Maita’i… ’Ia rave ana’e tātou i te mea ti’a, e nehenehe tāna e pārahi i pīha’i iho ia tātou ’e e arata’i ho’i ia tātou i roto i te mau mea ato’a tā tātou e rave » (Joseph B. Wirthlin, « Personal Integrity », Ensign, Mē 1990, 30, 32–33).

Tāu’aparau :

Nō te aha te vaira’a ’ei mea parau ti’a e tūra’i ai i te ta’ata ’ia mapu maita’i a’e i te pae mānava ?

Fafau ia ’oe :

E rahi atu ā tō’u parau ti’a i roto i te hō’ē o nā tuha’a e iva tā’u i fa’ata’a i ni’a nei.