Paseka ma le Puapuagatia i le Faatoaga

“Lo’u Tama e, afai e mafai, ia ave ese lenei ipu ia te au; ae aua le faia lo’u loto, ao lou finagalo” (Mataio 26:39).

Ata

O Iesu Keriso ma aposetolo e toasefulutasi o loo alala i luga o le fola faataamilo i se laulau maualalo

Sa faamamaluina e Iesu le aso malolo paia o le Paseka faatasi ma Ana Aposetolo. Sa Ia faatuina le sauniga paia o le faamanatuga, lea na valaaulia ai Ona soo e aai ma feinu e manatua ai o Ia. Sa ia aoaoina i latou i le mana faamafanafana o le Agaga Paia. Ma o le iloaina o Le a vave ona uma Lona taimi ma i latou, sa Ia poloaiina ai i latou ia “fealofani” e pei ona Ia alofa atu ia i latou (Ioane 13:34–35). O lena alofa, na Ia fetalai ai, o le a avea ma faailoga i isi o i latou o Ona soo. Ua tele se suiga i Ana Aposetolo talu mai le taimi muamua na latou fetaiai ai ma Iesu, ae o Ana upu na faaalia ai sa Ia silafia lo latou liua i ni soo moni ua faatoa amata.

I le mae’a ai o se sauniga lea e masani ona ta’ua o le Tausamaaga Mulimuli, sa fetalai atu ai Iesu i Ana Aposetolo e mulimuli ia te Ia i le po atoa i se togalaau filemu e igoa ia Ketesemane. E ui ina talosagaina i latou e lo latou Matai ia latou mataala faatasi ma Ia, ae sa momoe lava le au soo ua vaivai. Na amata ona tatalo Iesu, na o Ia lava, ma sa lei pine ae lofituina i mafatiaga e le mafai ona malamalama i ai. O iina i le faatoaga, sa Ia amata ai le faagasologa o le tauaveina i Ona lava luga o agasala ma tiga o le lalolagi. O le amataga lea o se galuega o le ositaulaga o le a taunuu i le faaiuga o le aso na sosoo ai i luga o le satauro i Kolokota.

Mulimuli ane i lena lava po, sa faalataina ai e Iuta le Sekara le Faaola ma tuuina atu o Ia i leoleo, o e na pue faapagotaina Iesu ma aumaia o Ia i le fale o Kaiafa, le faitaulaga sili. O iina, o le a faatalitali ai Iesu mo Lona faamasinoga seia oo i le taeao e sosoo ai.

Ua valaaulia pea lava pea i tatou e Peresitene Russell M. Nelson e faalatalata atili atu ia Keriso e ala i le faagasologa o le salamo, ua mafai ona o mafatiaga ma le Togiola a Iesu:

E leai se mea e sili atu ona saoloto, sili atu ona malualii, pe sili atu ona tāua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e le o se mea e tupu faatasi [i se taimi e tasi]; ae o se faagasologa. O le autu lea i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso. (“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67)

Faitau ma Mafaufau loloto

E mafai faapefea e le salamo i aso taitasi ona fesoasoani ia te oe e faamamalu ma manatua Iesu Keriso?

Maimoa

“The Last Supper”

“The Savior Suffers in Gethsemane”

Pese

“Ia Fealofani,” Viiga, nu. 195.