41-р бүлэг
Көртланд дахь асуудлууд
1837–1838 он
Көртланд дахь гэгээнтнүүд аз жаргалтай байв. Их Эзэн тэднийг адисалжээ.
Зарим ахлагч бусад газарт сайн мэдээг заахаар Көртландаас явав. Маш олон хүн ахлагчдыг сонсож, Сүмд нэгджээ.
Удалгүй Көртландад асуудал бэрхшээл гарч эхлэв. Иосеф Смит болон Сүмийн бусад удирдагч гэгээнтнүүдийн мөнгөө хадгалуулдаг банк ажиллуулж эхлэв.
Зарим гэгээнтэн маш их мөнгөтэй болохыг хүсэж байлаа. Банкинд ажиллаж байсан нэгэн эр шударга байсангүй. Тэр мөнгө хулгайлжээ.
Иосеф Смит өөр нэгэн хүнд мөнгийг сайн харж байхыг даалгасан ч банк асуудалтай хэвээр байв. Удалгүй бүх мөнгө байхгүй болсон учраас банк хаагдах хэрэгтэй болжээ. Тухайн үед Америкийн Нэгдсэн Улсын олон банкны хувьд хүнд хэцүү үе байсан бөгөөд өөр олон банк хаагдсан аж.
Олон гэгээнтэн мөнгөө буцааж авч чадаагүй учраас ууртай байлаа. Зарим нь банк хаагдсанд Иосеф Смитийг буруутгаж байв. Иосефын зарим сайн найз түүнийг муулах болов. Зарим нь бүр түүнийг алахыг хүсэж байлаа.
Сүмийн зарим удирдагч мөн адил ууртай байлаа. Тэдний зарим нь Сүмийн гишүүн байхаа болихыг хүссэн бөгөөд цөөн хэд нь Сүмийн дайсан болов.
Харин Сүмийн бусад удирдагч Иосефыг хайрладаг мөн түүнд тусалдаг байв. Бригам Янг сайн удирдагчдын нэг байлаа. Тэр гэгээнтнүүдэд Иосеф бол Бурханы бошиглогч гэдгийг мэддэг гэдгээ хэлж байлаа. Зарим хүн бошиглогчийг дэмжсэн болохоор нь Бригам Янгад уурлаж, улмаар тэр өөрт нь хор учруулахаас өмнө Көртландаас явах хэрэгтэй болов.
Сүмийн дайснууд Көртландад олон асуудал үүсгэв. Тэд гэгээнтнүүдийн эд зүйлсээс хулгай хийж, гэр орныг нь эвдэн сүйтгэж байлаа. Тэд мөн гэгээнтнүүдийг гэмтээж, заримыг нь ална хэмээн сүрдүүлж байв.
Сүмийн зарим ахлагч Көртландын ариун сүмд хуран цугларч, Иосеф Смитийг шүүмжилж, шинэ удирдагч сонгох талаар ярилцаж байв. Бүр зарим хүн хутга мэс, буу шийдэм барин ариун сүм рүү дайрч орох гэж оролдов. Тиймээс Көртландад байхад аюултай болж, Иосеф 1838 оны 1-р сард тэндээс Миссури руу хөдөлжээ.
Көртланд дахь мөрдлөг хавчлагаас болж Сүмийн удирдагчид гэгээнтнүүдийг тэндээс явуулах төлөвлөгөө гаргаж эхлэв. 1838 оны 7-р сард Сүмийн 500 гаруй гишүүн Көртландаас явав. Бараг 1609 километр зам туулсныхаа дараа тэд 10-р сард Миссуригийн Фар Вестэд ирлээ. Иосеф Смит болон Сүмийн олон гишүүн тэнд амьдарч байв.