Mataupu Faavae ma Feagaiga 2021
Faatonuga mo le Taimi o Pesepesega

“Faatonuga mo le Taimi o Pesepesega ma le Polokalama a Tamaiti i le Sauniga Faamanatuga,” Sau, Mulimuli Mai ia te A’u—Mo le Peraimeri: Mataupu Faavae ma Feagaiga 2021 (2020)

“Faatonuga mo le Taimi o Pesepesega,” Sau, Mulimuli Mai ia te A’u—Mo le Peraimeri: 2021

Ata
tamaiti o loo pepese

Faatonuga mo le Taimi o Pesepesega ma le Polokalama a Tamaiti i le Sauniga Faamanatuga

Susuga i Au Peresitene o Peraimeri ma Taitai Musika,

O pese a le Peraimeri o se meafaigaluega mamana lea e fesoasoani ai i tamaiti ia aoao e uiga i le fuafuaga o le fiafia a le Tama Faalelagi ma upumoni faaleaoaoga faavae o le talalelei a Iesu Keriso. Ao pepese tamaiti e uiga i mataupu faavae o le talalelei, o le a molimau atu le Agaga Paia e uiga i lo latou moni. O upu ma fati o le a tumau i mafaufau ma loto o tamaiti i o latou olaga atoa.

Saili le fesoasoani a le Agaga ao e sauni e aoao atu le talalelei e ala atu i musika. Faasoa atu lau molimau e uiga i upumoni o loo e pese ai. Fesoasoani atu i tamaiti ia iloa pe faapefea ona fesootai le musika i mea o loo latou aoaoina ma lagonaina i le fale ma i vasega a le Peraimeri. O le a faamanuiaina tamaiti ma o latou aiga i a outou taumafaiga tuuto.

Matou te alolofa ia te outou ma tuuina atu lo matou agaga faafetai mo le auaunaga tuuto o loo outou faia e faamalosia ma puipuia ai a tatou fanau faapelepele.

O Le Au Peresitene Aoao o le Peraimeri

Taiala mo le Polokalama o le Sauniga Faamanatuga

I lalo o le taitaiga a le epikopo, o le polokalama a tamaiti i le sauniga faamanatuga e masani lava ona faia i le kuata lona fa o le tausaga. I le avea ai ma au peresitene ma taitai musika o le Peraimeri, ia fuafua e fono i le amataga o le tausaga ma le fesoasoani o le au epikopo o loo vaaia le Peraimeri e amata talanoaina ai fuafuaga mo le polokalama. A maea ona e faia fuafuaga, ia tapa lana faamaoniga mo i latou.

O le polokalama e tatau ona faatagaina tamaiti e tuuina atu mea na latou aoaoina ma o latou aiga e uiga i le talalelei a Iesu Keriso mai le Mataupu Faavae ma Feagaiga i le fale ma i le Peraimeri, e aofia ai pese Peraimeri latou te lagiina i le gasologa o le tausaga. Ia mafaufau ma le agaga tatalo po o fea o mataupu faavae o le talalelei ma pese e lagolagoina ai mea sa latou aoaoina. A o faagasolo le tausaga, ia teu ni faamatalaga o tautalaga ma aafiaga patino a tamaiti e ono mafai ona faaaoga i le polokalama. Valaaulia tamaiti e faasoa mai mau, tala, ma a latou molimau i le Faaola ma Lana talalelei i le polokalama. Ao e fuafuaina le polokalama, mafaufau i ni auala e mafai ai ona fesoasoani i le faapotopotoga e taulai atu i le Faaola ma upumoni na Ia toefuatai mai i aso e gata ai.

O Iunite e toalaiti le aofai o tamaiti atonu e mafai ona mafaufau i ni auala e mafai ai ona auai tagata o le aiga faatasi ma a latou fanau. O se tasi o le au epikopo e mafai ona faaiuina le sauniga i se saunoaga puupuu.

A o e saunia le polokalama, ia manatua taiala nei:

  • O faataitaiga e le tatau ona alu ai se taimi le talafeagai mai vasega o le Peraimeri po o aiga.

  • O mea faitino, teuga, ma aoaoga e faia i ala o faasalalauga e le talafeagai mo le sauniga faamanatuga.

Tagai Tusitaulima 2: Taitaiina o le Ekalesia 11.5.3, ChurchofJesusChrist.org.

Faatonuga mo le Taimi o Pesepesega

5 minute (au peresitene o le Peraimeri): Tatalo amata, mau po o se mataupu faavae o le faatuatua, ma se lauga e tasi

20 minute (taitai musika): Taimi o pesepesega

O le faamoemoega o le taimi o pesepesega o le fesoasoani lea i tamaiti ia faateleina lo latou faatuatua i le Tama Faalelagi ma Iesu Keriso e ala i musika. E filifilia e le au peresitene o le Peraimeri ma le taitai musika pese mo masina taitasi ma lenei faamoemoega i le mafaufau. O pese e tatau ona faamalosia ai mataupu faavae o loo aoaoina e tamaiti e uiga i le talalelei a Iesu Keriso i a latou vasega ma i le fale. O se lisi o pese e toe faamalosia ai nei mataupu faavae o loo faaaofiaina atu i lenei taiala. O nei pese o loo fautuaina atu foi i otootoga o le Sau, Mulimuli Mai ia te A’u—Mo le Peraimeri.

Ao e aoao atu pese i tamaiti, valaaulia i latou e faasoa mai mea ua uma ona latou aoaoina e uiga i tala ma mataupu faavae faaleaoaoga na aoao atu e pese. Atonu e te manao e toe suesue i otootoga o le Sau, Mulimuli Mai ia te A’u—Mo le Peraimeri lea o loo aoaoina e tamaiti i totonu o a latou vasega. O le a fesoasoani lenei mea ia te oe e te malamalama ai i tala ma mataupu faavae o loo latou aoaoina ina ia mafai ai ona e mafaufau i auala e lagolagoina ai a latou aoaoga i musika.

I le taimi o pesepesega, e mafai foi ona e toe faamanatu ai pese na aoaoina muamua e tamaiti ma pese latou te fiafia e pepese ai. A’o tou faamanatuina, valaaulia ia tamaiti e faasoa mai o latou manatu ma lagona e uiga i upumoni o loo maua i pese.

O le Tusipese a Tamaiti o le punaoa autu lea mo musika i le Peraimeri. O viiga mai le tusipese ma pese mai le Uo ma le Liahona e talafeagai foi. O nisi taimi e mafai e tamaiti ona usuina pese faaleatunuu po o pese o aso malolo ia e fetaui mo le Aso Sa ma mo le matutua o tamaiti. O le faaaogaina o nisi lava musika i le Peraimeri e tatau ona faamaonia e le au epikopo (tagai Tusitaulima 2: Taitaiina o le Ekalesia 11.2.4).

Ata
tamaiti o loo pepese i le sauniga faamanatuga

Aotelega o le Peraimeri

O vaiaso taitasi, e aofia i le Peraimeri:

Taimi o pesepesega:25 minute

Fesuiaiga:5 minute

Vasega:20 minute

E mafai e taitai i Peraimeri toatele ona vaevae tamaiti i ni vaega se lua ma tuu le tasi vaega i vasega Peraimeri ao le isi i le taimi o pesepesega. Ona fesuiai lea o vaega e lua. I ia tulaga, atonu e manaomia e taitai o le Peraimeri le fetuunai o taimi o loo faaali atu i luga e fetaui ma o latou tulaga.

Musika mo le Taimi o Pesepesega

Ianuari

Fepuari

Mati

Aperila

Me

Iuni

Iulai

Aokuso

Setema

Oketopa

Novema

Tesema

Faaaogaina o Musika e Aoao Atu ai Aoaoga Faavae

Manatua o le faamoemoega o le taimi mo pesepesega e le na o le aoaoina o tamaiti pe faapefea ona pepese, ae ia faaaoga musika e fesoasoani e faalolotoina ai lo latou faatuatua i le Tama Faalelagi ma Iesu Keriso. O manatu nei e mafai ona musuia ai oe ao e fuafua auala e faia ai lenei mea.

Aoao e uiga i le Tama Faalelagi ma Iesu Keriso. Valaaulia tamaiti e faasoa mea na latou aoaoina e uiga i le Tama Faalelagi ma Iesu Keriso mai pese e te usuina. Valaaulia i latou e faasoa mai upu latou te fiafia i ai mai le pese e faamatala ai le Atua ma le Faaola.

Faitau mau e fesootai i ai. Mo le tele o pese i le Tusipese a Tamaiti ma le tusi o viiga, o loo lisiina atu ai ni mau faasino e fesootai i ai. Fesoasoani i tamaiti e faitau se mau, ma talanoa pe faapefea ona fesootai ma le pese o loo e usuina. E mafai foi ona e lisiina nisi o mau faasino i luga o le laupapa ma valaaulia tamaiti e faatusatusa ia mau faasino taitasi i se pese po o se fuaiupu mai se pese.

Faatumu le avanoa. Tusi se fuaiupu o le pese i luga o le laupapa ma ni nai upu autu o loo misi. Ona fai lea i tamaiti e usu le pese, faalogologo mo upu ia e faatumu ai ia avanoa. Ao latou faatumuina ia avanoa taitasi, talanoa po o a ni mataupu faavae o le talalelei na e aoaoina mai upu na misi.

Ata
tamaiti o loo pepese i le sauniga faamanatuga

Upusii mai taitai o le Ekalesia. Valaaulia tamaiti e faalogologo i se upusii mai se taitai o le Ekalesia lea e aoao mai ai se mataupu faavae e tasi e pei o le pese o le Peraimeri. Fai atu ia i latou e sii o latou lima pe a latou faalogo i se mea e fesoasoani ia i latou ia malamalama ai i le upumoni o loo latou pepese ai. Fai i ai e faasoa mai mea na latou faalogologo i ai.

Molimau atu. Molimau puupuu atu i tamaiti e uiga i upumoni o le talalelei o loo maua i pese o le Peraimeri. Fesoasoani i tamaiti ina ia malamalama o le usuina o pese o se tasi lea o auala e mafai ai ona latou tuuina atu se molimau ma lagonaina ai le Agaga.

Tu atu o se molimau. Valaaulia tamaiti e auauai ona tutu ma faasoa atu ni mea sa latou aoaoina mai le pese o loo latou usuina po o o latou lagona e uiga i upumoni na aoao mai i le pese. Fai atu ia i latou po o le a so latou lagona ao latou usuina le pese, ma fesoasoani atu ia i latou ia iloa le uunaiga a le Agaga Paia.

Faaaoga ata. Fai atu i tamaiti e fesoasoani ia te oe e sue pe fai ni ata e o faatasi ma upu taua po o fuaitau o i le pese. Valaaulia i latou e faasoa mai pe faapefea ona fesootai le ata i le pese ma le mea o loo aoao mai e le pese. Mo se faʻataʻitaʻiga, afai o e aoaoina le pese “Pe A Ia Toe Afio Mai,” (Tusipese a Tamaiti, 46–47), e mafai ona e faia ni ata i totonu o le potu e faʻaalia ai upu taua mai le pese (pei o agelu, kiona, ma le fetu). Fai atu i tamaiti e ao mai ata ma uu i luga i le faasologa sao ao tou usuina faatasi le pese.

Faasoa se lesona faitino. E mafai ona e faaaogaina se mea faitino e uunaia ai le talanoaga e uiga i se pese. Mo se faataitaiga, o le pese “Pe A Ou Papatiso,” (Tusipese a Tamaiti,53) e ta’ua ai le timu. E mafai ona e faaali atu i tamaiti se ata o timuga po o se ipu vai ma talanoa e uiga i auala e faamama ai e le papatisoga ma le Agaga Paia o tatou agaga e pei o le timu e faamama le eleele; e mafai ona taitaiina atu ai i se talanoaga e uiga i faamanuiaga o le papatisoina ma le mauaina o le meaalofa o le Agaga Paia.

Valaaulia le faasoa o aafiaga faaletagata lava ia. Fesoasoani atu i tamaiti e fesootai mataupu faavae na aoaoina i le pese ma aafiaga sa latou mauaina i na mataupu faavae. Mo se faataitaiga, ao lei usuina le pese “Ou Te Fia Vaai i le Malumalu” (Tusipese a Tamaiti,99), e mafai ona e fai atu i tamaiti e sii i luga o latou lima pe afai na latou vaai i se malumalu. Valaaulia i latou e mafaufau ao latou pepese pe faapefea ni o latou lagona pe a latou vaai i se malumalu.

Fai fesili. E tele naua fesili e mafai ona e tuuina atu a o outou usuina ni pese. Mo se faataitaiga, e mafai ona e fesili i tamaiti po o le a se mea sa latou aoaoina mai fuaiupu taitasi o le pese. E mafai foi ona e fai atu ia i latou e mafaufau i ni fesili o loo taliina e le pese. E mafai ona taitaiina e lenei mea se talanoaga e uiga i upumoni na aoao mai i lenei pese.

Faalogo mo tali. Fai i tamaiti e faalogo mo tali i fesili. Mo se faataitaiga, o le pese “Na Ia Auina Mai Lona Alo” (Tusipese a Tamaiti, 20) o loo i ai ni nai fesili ma tali. E mafai ona e fesili atu i tamaiti fesili ona fai atu lea ia i latou e faʻalogo mo tali aʻo latou pepese.

Fesoasoani i Tamaiti e Aoao ma Manatua Pese o le Peraimeri

E aoao e tamaiti se pese e ala i le faalogo ma le pepese faafia ai. Ia usu i taimi uma i tamaiti upu o se pese fou—ae aua le na o le faitau atu pe na o le taulotoina foi. E fesoasoani lenei faiga i tamaiti e faafesootai ai le fati i upu. A uma ona aoaoina se pese, toe faamanatu atu i ni auala eseese ma malie i le faagasologa o le tausaga. O nisi nei o manatu e fesoasoani i tamaiti e aoao ma toe faamanatu ai pese.

Faataitai i leo maualuga ma le maualalo. Ina ia fesoasoani i tamaiti e aoao le fati o le pese, taofi lou lima i se tulaga faalava, ma ao e usuina upu, sii i luga lou lima e faailoa atu ai ia leo maualuga ma tuutuu i lalo e faailoa atu ai ia leo maualalo.

Siuleo. Valaaulia tamaiti e avea ma ou siuleo i le toe usuina o upu na e usuina. Usu i tamaiti se fuaiupu po o se laina puupuu, ona fai atu lea i ai latou e toe usuina mai ia te oe.

Faaaoga fesuiaiga. Usu pese i ni auala eseese, e pei o le musumusu, hamu, patipati i le pao, fesuiai le pao, pe pepese ao saofafai pe tutu. E mafai foi ona e faia se tamai pusa faatafafa mai se pepa, ma i itu taitasi o le tamai pusa faatafafa, tusi ai se auala ese e pese ai. Valaaulia se tamaitiiti e faataavale le pusa faatafafa e filifili ai pe faapefea ona usuina e tamaiti le pese.

Pese i vaega. Tuu atu ia tofu le vasega po o tagata taitoatasi ma se fuaiupu e tasi e usuina ao tutu, ona fai atu lea e fesuiai a latou fuaiupu seia tofu uma vasega po o tagata taitoatasi ma le avanoa e usuina ai fuaiupu taitasi.

Faaaoga taga. Valaaulia tamaiti e mafaufau i ni taga faigofie e fesoasoani atu ia i latou ina ia manatua ai upu ma savali o se pese. Mo se faataitaiga, pe a tou usuina le “Ia Migao Filemu,” (Tusipese a Tamaiti,11), e mafai ona e valaaulia tamaiti e piilima, punonou o latou ulu, ma paʻi i o latou fatu pe a latou usuina laina talafeagai i le pese.

Pepese teineiti, pepese tamaiti. Tusi se ata o se tama ma se ata o se teine. Ao faamanatuina se pese, uu i luga se tasi o ata e faailoa atu ai po o ai e tatau ona usuina lena vaega o le pese.

Togi i totonu o se ato. Tuu ni ato ua faanumeraina po o nisi koneteina i luma o le potu—o le tele o koneteina e pei o le tele o fuaiupu o se pese faapitoa. Valaaulia se tasi o tamaiti e togi se tagapi po o se fasi pepa ua numinumiina i totonu pe latalata i se koneteina ua faanumeraina. Fai atu i tamaiti e usu le fuaiupu e tutusa le fuainumera ma le koneteina.

Faafetaui se ata i se fuaitau. Tusi ia laina taitasi o se pese i luga o se isi fasipepa, ma sue se ata e suitulaga i laina taitasi. Tuu ata i se itu e tasi o le potu ma pepa i le isi itu. Usu le pese, ma fai atu i tamaiti e faafetaui ata i upu.

Faia ni pepa lautele o i ai ni savali. Faaali atu ni pepa lautele o i ai ni upu mai fuaiupu taitasi po o ata lea e sui tulaga i upu. Ao pepese tamaiti, kava ni upu po o ni ata sei iloga ua mafai ona latou usuina le fuaiupu atoa e aunoa ma le pepa o loo i ai upu. E mafai foi ona e valaaulia tamaiti e fesoasoani e fai ni pepa lautele o i ai ni savali.