ata tusi o Maria ma le tama meamea o Iesu

Nativity in Copper and Umber, saunia e J. Kirk Richards

20–26 Tesema

Kerisimasi

O le Meaalofa Lē Mafaatusalia o le Alo Paia o le Atua

O le Kerisimasi o se taimi fiafia mo le tele o tamaiti. Mafaufau pe o le a faapefea ona e fesoasoani ia i latou e faafesootai le olioli i le taimi o le Kerisimasi ma le olioli o le talalelei a le Faaola.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Valaaulia tamaiti e faasoa mai ni mea na latou faia i le vaiaso ua mavae atu nei e faamanatu ai le soifua mai o le Faaola.

aikona o le aoao atu

Aoao atu le Aoaoga Faavae: Tamaiti Laiti

E mafai ona ou “ofoina atu [laʻu] molimau” e faamanatu ai le fanau mai o Iesu.

I le “O Le Keriso Soifua” (ChurchofJesusChrist.org), na tuuina mai ai e le Au Peresitene Sili ma le Korama a Aposetolo e Toasefululua a latou molimau ia Iesu Keriso e “faamanatu ai le fanau mai o Iesu Keriso.” Mafaufau pe faʻapefea ona e faʻamalosia tamaiti e faʻasoa atu a latou molimau i isi.

Gaoioiga e Mafai Ona Fai

• Faaali atu i tamaiti se kopi o le “O Le Keriso Soifua” (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Tusi atu [lou lima] i le upu Keriso o loo i le autu, ma tuu tamaiti e tusi atu foi i ai i le upu. Faasino atu foi i saini i le pito i lalo o le itulau, ma taʻu atu i tamaiti e faapea, i le 2000, na tusia ai e le Au Peresitene Sili ma Aposetolo e Toasefululua a latou molimau ia Iesu Keriso, saini ai o latou suafa, ma faasoa atu i le lalolagi.

• Faaali atu se ata o Iesu Keriso, ma valaaulia tamaiti taitoatasi e tutu ma faasoa mai se mea na te iloa e uiga ia te Ia. Afai latou te manaʻomia se fesoasoani, taʻu mai ni mea moni mai le “O Le Keriso Soifua.” Faamanatu atu i tamaiti afai latou te ta’u atu i isi e uiga ia Iesu, o loo latou faasoa atu a latou molimau.

• Ta’u atu i tamaiti pe na faapefea ona e mauaina lau molimau ia Iesu Keriso ma le mea o loo e faia e faamalosia ai lau molimau. Fesoasoani ia i latou e mafaufau i auala e mafai ona latou faamalosia ai a latou molimau ia Iesu Keriso, ma valaaulia i latou e filifili se mea se tasi o le a latou faia.

Na auina mai e le Tama Faalelagi Lona Alo o se meaalofa ia i tatou.

O le tuʻuina atu ma le mauaina o meaalofa o se aga masani o le Kerisimasi mo le toʻatele o tagata. O lenei aga masani e tatau ona fesoasoani ia i tatou e manatua ai le “meaalofa le mafaatusalia a le Atua o Lona Alo paia” (“O Le Keriso Soifua”).

Gaoioiga e Mafai Ona Fai

• Fesili atu i tamaiti e uiga i meaalofa na latou tuuina atu pe mauaina. Faitau atu ia i latou le fuaiupu mulimuli o le “O Le Keriso Soifua,” ma valaaulia i latou e faalogo mo le meaalofa na tuuina mai e le Atua ia i tatou. (Afai e manaʻomia, fesoasoani ia i latou ia malamalama o le “le mafaatusalia” o lona uiga o le “sili atu nai lo se isi.”) Aisea ua avea ai le Alo o le Atua, o Iesu Keriso, ma meaalofa silisili?

• Usu faatasi se pese e faatatau ia Iesu Keriso, e pei o le “Na Ia Auina Mai Lona Alo” (Tusipese a Tamaiti, 20--21). Fesoasoani i tamaiti e filifili se fasifuaitau mai le pese latou te mananao e tusi ai se ata (e pei o le “alo [pepe faatoa fanau mai]” poʻo le “[savavali faatasi ma alii]”). A o latou tusia ata, fai i tamaiti e taʻu atu ia te oe o latou lagona e uiga i le mea na faia e Iesu mo i latou. Faasoa atu foi ou lagona.

E valaaulia au e Iesu Keriso e mulimuli i Lana faataitaiga.

O se vaega o le “aafiaga … loloto” a le Faaola i le lalolagi o Lana faataitaiga atoatoa. E mafai faapefea ona musuia tamaiti e mulimuli ia te Ia?

Gaoioiga e Mafai Ona Fai

• Mai le parakalafa lona lua o le “O Le Keriso Soifua,” faitau atu i tamaiti nisi o mea na faia e Iesu. Faaali atu ata mai i Lona soifuaga (tagai i le itulau o gaoioiga o le vaiaso lenei), ma valaaulia tamaiti e talanoa e uiga i mea o loo faia e le Faaola i ata. Fesoasoani ia i latou e mafaufau i auala e mafai ai ona latou mulimuli i Ana faataitaiga.

• Filifili se vitio “Light the World” (ComeuntoChrist.org) e faaali atu i tamaiti, pe faamatala atu foi se taimi na faamanuiaina ai oe i se auaunaga faaKeriso a se tasi. Valaaulia se tamaitiiti e faatino se taga faigofie o le auauna atu, ma fai atu i isi tamaiti e mate mai po o le a le mea o loo ia faia. Tuu atu i tamaiti taitasi ia maua se avanoa. Fesoasoani i tamaiti e mafaufau i se mea e mafai ona latou faia e auauna atu ai i se tasi i lo latou aiga.

aikona o le aoao atu

Aoao atu le Aoaoga Faavae: Tamaiti Matutua

“Matou te ofoina atu le matou molimau.”

O faataitaiga a perofeta ma aposetolo na tusia “O Le Keriso Soifua” e mafai ona musuia tamaiti e faasoa atu a latou molimau ia Iesu Keriso.

Gaoioiga e Mafai Ona Fai

• Tusi i luga o le laupapa Ou te iloa o Iesu Keriso … ma valaaulia tamaiti e tusi i luga o le laupapa auala eseese e faauma ai le fuaiupu. Fautua atu e saili le “O Le Keriso Soifua” mo ni manatu. O a ni mea e mafai ona tatou faia e faamalosia ai a tatou molimau ia Iesu Keriso? E faapefea ona faamanuiaina isi pe a tatou faasoa atu a tatou molimau?

• Faamanino atu “O Le Keriso Soifua” sa sainia e le Au Peresitene Sili ma Aposetolo e Toasefululua. Faitau faatasi le Mataupu Faavae ma Feagaiga 107:23. O le a le mea e ese ai Aposetolo “mai isi mautofi i le ekalesia”? Filifili se tasi o vitio o le “Special Witnesses of Christ” e faasoa atu i tamaiti (ChurchofJesusChrist.org). Aisea tatou te faafetai ai i le i ai o molimau faapitoa a Keriso i o tatou aso?

“E leai se tasi na i ai sona aafiaga loloto.”

I le “O Le Keriso Soifua,” na tautino mai ai e perofeta ma aposetolo e leai se tasi na sili atu lana faatosinaga i fanau a le Atua nai lo Iesu Keriso. Mafaufau loloto pe faapefea ona e fesoasoani i tamaiti e aoao e uiga i faatosinaga loloto a le Faaola ia i tatou uma lava.

Gaoioiga e Mafai Ona Fai

• Tuu atu i tamaiti taitoatasi se fasifuaitau po o se fuaiupu mai le “O Le Keriso Soifua,” ma fai atu ia i latou e tusi se ata o lena fuaitau po o le fuaiupu. A o faaali atu e tamaiti taitoatasi lana ata i le vasega, ia fai atu i isi tamaiti e mate po o le a le mea o loo faaalia i le ata ma saili le fuaiupu talafeagai i le “O Le Keriso Soifua.” E faapefea ona faamanuiaina i tatou ona o le soifuaga ma le misiona a Iesu Keriso?

• Fesoasoani i tamaiti e su’e suafa po o faalagiga eseese o Iesu Keriso i le “O Le Keriso Soifua” ma vase lalo, pe a mafai (o nisi faataitaiga e aofia ai le Mesia, Ulumatua, le muamua ma le mulimuli, fautua, ma le maatulimanu autu). Talanoa e uiga i mea ua aoao mai e nei faalagiga taitasi e uiga ia te Ia. (O nisi o nei autu o loo faamatalaina i le Taiala i Tusitusiga Paia po o le Bible Dictionary.)

“O Ia o le malamalama, o le ola, ma le faamoemoega o le lalolagi.”

O le Kerisimasi o se vaitau olioli ona o le faamoemoe na aumaia e Iesu Keriso i le lalolagi e ala i Ana aoaoga, faataitaiga, ma le taulaga togiola.

Iesu Keriso

O Le Malamalama o le Lalolagi, na saunia e Howard Lyon

Gaoioiga e Mafai Ona Fai

• Valaaulia se tamaitiiti e tusi se ata o se laau kerisimasi, pe tusi i luga o le laupapa. Valaaulia tamaiti e teuteu le laau i upu po o fuaitau mai le “O Le Keriso Soifua” o loo faamatalaina ai se meaalofa na tuuina mai e le Faaola ia i tatou (e pei o le “malamalama,” “ola,” ma le “faamoemoe”). Tuu atu ia i latou e talanoa pe aisea na latou filifilia ai na upu po o fuaitau.

• Fesoasoani i tamaiti e su’e ni viiga o le Kerisimasi o faamatala ai le malamalama, olaga, ma le faamoemoe na aumaia e le fanau mai o le Faaola i le lalolagi—mo se faataitaiga, “Peteleema e, le ‘A‘ai” po o le “Ua Logo! Pesega a Agelu Mai Luga” (Viiga, nu. 122, 115). Usu faatasi viiga, ma tuu atu i tamaiti e fetufaai mai pe o faapefea ona aumaia e Iesu le malamalama, ola, ma le faamoemoe i o latou olaga.

• Fai atu i nisi o tamaiti e faitau e uiga i leoleo mamoe i le Luka 2:8-20. Fai atu i isi e faitau e uiga ia Simeona i le Luka 2:25--33. Valaaulia i latou e fefaasoaai i le tasi ma le isi pe o a ni lagona o leoleo mamoe ma Simeona e uiga i le iloa ua fanau mai Iesu. Aisea na latou maua ai nei lagona faapea? Aisea e aumaia ai ia i tatou e Lona fanau mai le “olioli tele”?

aikona o le aoaoina

Uunaia le Aoaoina i le Aiga

Valaaulia tamaiti e mafaufau i se tasi o lo latou aiga e mafai ona latou faasoa atu i ai a latou molimau e uiga ia Iesu Keriso. Fesoasoani ia i latou e mafaufau po o le a se mea latou te ono fai atu e faamalosia ai le faatuatua o lena tagata ia te Ia.

Faaleleia o Lo Tatou Aoao Atu

Sauni e ala i le suesue i tusitusiga paia. “O le suesueina ma le agaga tatalo o le afioga a le Atua e tuuina i tatou e ogatasi ai ma le Agaga Paia. Ona mafai lea ona Ia musuia i tatou e mafaufau i mea ua tatou suesueina a o tatou aoao atu ma siitia isi” (Aoao Atu i le Ala a le Faaola, 12).

itulau o le gaoioiga: Ua valaaulia au e Iesu Keriso e mulimuil i Lana faataitaiga