tagata i le lalolagi o agaga

Ua vaai Iosefa i lona tamā, tina, ma lona uso i le malo selesitila (Joseph Smith’s Vision of the Celestial Kingdom, Robert Barrett).

29 Novema–5 Tesema

Mataupu Faavae ma Feagaiga 137–138

“O Le Faaaliga o le Togiolaina o E ua Maliliu”

Vaai mo mataupu faavae i nei faaaliga e foliga taua mo tamaiti o loo e aoaoina. E faapefea ona e fesoasoani ia latou malamalama i nei mataupu faavae?

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Faaali atu se ata o Iesu Keriso i le lalolagi o agaga, e pei o le ata i le otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga. Valaaulia tamaiti e faasoa mai ni mea latou te iloa e uiga i le lalolagi o agaga.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 137:1–5

Ua tuuina mai e le Atua ia te au se auala e faatasi ai ma loʻu aiga e faavavau.

I se faaaliga vaaia, na vaai Iosefa Samita i tagata o lona aiga o faatasitasi i le malo selesitila. E faʻapefea ona e faʻaaogaina lana faʻaaliga e aʻoaʻo ai tamaiti e mafai ona faʻavavau aiga?

Gaoioiga e Mafai Ona Fai

• Faaali atu se ata o se tasi o lou aiga, ma talanoa e uiga i le tele o lou manao e faatasi ma ia i le malo selesitila. Faamalamalama atu o le uso o Iosefa Samita o Alavini na maliu ao avea o ia ma se alii talavou ma na matuai misia lava o ia e Iosefa. Faitau le Mataupu Faavae ma Feagaiga 137:1, 5, ma fesili atu i tamaiti pe o ai na vaai i ai Iosefa Samita i lana faaaliga e uiga i le malo selesitila (tagai foi Tala o le Mataupu Faavae ma Feagaiga, 152–53). Valaaulia tamaiti e faaloloa faalautetele o latou lima e faaali atu ai le tele o lo latou alolofa i o latou aiga, ma fai atu ia i latou e faasoa mai pe aisea latou te mananao ai e faatasi ma o latou aiga i le malo selesitila.

• Faaaoga le Mataupu Faavae ma Feagaiga 137:1–5 ma le itulau o gaoioiga o le vaiaso lenei e fesoasoani ai i tamaiti e saili auiliiliga e uiga i le faaaliga a Iosefa Samita e uiga i le malo selesitila. Valaaulia i latou e tusi se ata o i latou lava ma o latou aiga i le itulau o gaoioiga ao e taina pe usu se pese e uiga i aiga, e pei o le “E Mafai Ona Faavavau Aiga” (Tusipese a Tamaiti,98).

Mataupu Faavae ma Feagaiga 138:6–11

E mafai e le Agaga Paia ona fesoasoani ia te a’u ia ou malamalama i tusitusiga paia.

O tusitusiga paia e mafai i nisi taimi ona faigata ona malamalama i ai, aemaise lava mo tamaiti. O loo aoao mai leMataupu Faavae ma Feagaiga 138:11 e mafai e le Agaga Paia ona tatala “mata o lo [tatou] malamalama.”

tamaitiiti o loo faitau tusitusiga paia

E mafai e le Agaga Paia ona fesoasoani ia i tatou ia malamalama i mea tatou te faitau ai i tusitusiga paia.

Gaoioiga e Mafai Ona Fai

• Faaali atu se ata o Peresitene Iosefa F. Samita (tagai Tusi Ata o le Talalelei, nu. 127). Faamalamalama atu o ia o le Peresitene lona ono o le Ekalesia, ma i se tasi aso sa ia faitauina ai tusitusiga paia ma mafaufau loloto i ai (mafaufau i lo latou uiga). Ao e faitauina le Mataupu Faavae ma Feagaiga 138:6, 11, valaaulia tamaiti e faafoliga o latou o Peresitene Samita ma faia taga e o faatasi ma upu.

• Ta’u atu i tamaiti e uiga i se taimi na e mafaufau loloto ai i se mea i tusitusiga paia ma na fesoasoani le Agaga Paia ia e malamalama i ai. Usu faatasi se pese e faatatau i le suesueina o tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti,66). O le a le mea o fai mai lenei pese e tatau ona tatou faia e malamalama ai i tusitusiga paia?

Mataupu Faavae ma Feagaiga 138:18–35

O fanau uma a le Atua o le a maua le avanoa e faalogo ai i le talalelei.

Ina ua uma ona faasatauroina Iesu Keriso, sa Ia asiasi atu i Ana Au Paia faamaoni i le lalolagi o agaga. Sa Ia faatonuina i latou e aoao atu le talalelei ia i latou e lei mauaina.

Gaoioiga e Mafai Ona Fai

• Faaali atu se ata o se tuugamau (tagai Tusi Ata o le Talalelei, nu. 58, 59 po o Ata pue o le Tusi Paia, nu. 14), pe tusi se ata o se tuugamau i luga o le laupapa. Faaali atu se ata o le Faaola i le lalolagi o agaga ao i ai Lona tino i totonu o le tuugamau, (e pei o le ata i le otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga). Ao e faia, ia fai atu fesili e fesoasoani i le fanau e iloa ai faamatalaga autu i le Mataupu Faavae ma Feagaiga 138:18-19, 23-24, 27-30, e pei o le, o ai na asiasi i ai Iesu, pe na faapeī o latou lagona, ma po o a mea na Ia fai atu ia i latou e fai.

• Faaali atu se ata o ni faifeautalai (tagai Tusi Ata o le Talalelei, nu. 109, 110), ma fai atu i tamaiti e faasoa mai ni mea e fai e faifeautalai. E mafai foi ona e valaauliaina i latou e faatino nisi o mea e faia e faifeautalai. Faitau le Mataupu Faavae ma Feagaiga 138:31–34 i tamaiti. Faamalamalama atu e pei lava ona i ai faifeautalai iinei i le lalolagi, e i ai foi faifeautalai i le lalolagi o agaga o loo aoaoina tagata iina.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 137:1–5

Ua tuuina mai e le Atua ia te au se auala e faatasi ai ma loʻu aiga e faavavau.

Na maua e Iosefa Samita se faaaliga o le malo selesitila ma vaaia ai ona matua ma lona uso o Alavini iina. O lenei faaaliga ua aoaoina ai i tatou afai tatou te amiotonu, e mafai ona faaauau a tatou sootaga faaleaiga i le isi olaga.

Gaoioiga e Mafai Ona Fai

• Valaaulia tamaiti e faitau le Mataupu Faavae ma Feagaiga 137:1-5 ma tusi se ata o mea na latou faitauina (tagai foi i le itulau o gaoioiga o lenei vaiaso). Faamata o le a se lagona o Iosefa Samita ina ua ia vaaia tagata o lona aiga i le malo selesitila?

• Faaali le vitio “Families Can Be Together Forever” (ChurchofJesusChrist.org), pe usu se pese e uiga i aiga, e pei o le “E Mafai Ona Faavavau Aiga” (Tusipese a Tamaiti,98). O le a se mea o aoao mai e le vitio po o le pese ia i tatou e uiga i mea e mafai ona tatou faia ia faavavau ai o tatou aiga?

Mataupu Faavae ma Feagaiga 138:1–11

Pe a ou mafaufau loloto i tusitusiga paia, e mafai e le Agaga Paia ona fesoasoani ia ou malamalama i ai.

O le a se mea e mafai ona aoaoina e tamaiti mai le faataitaiga a Peresitene Iosefa F. Samita atonu e ono faaleleia ai le auala latou te suesue ai i tusitusiga paia?

Gaoioiga e Mafai Ona Fai

• Valaaulia tamaiti e faitau le Mataupu Faavae ma Feagaiga 138:1-11, ma fesoasoani ia i latou e tusi se otootoga e tasi le fuaiupu o le aafiaga o Peresitene Iosefa F. Samita. O le a le mea na ia faia na taitai atu ai i lana faaaliga ofoofogia? O le a le uiga o le manatunatu loloto pe mafaufau i tusitusiga paia?

• Fesili i tamaiti po o le a le mea latou te faia pe a i ai ni a latou fesili e uiga i le talalelei. Faasoa atu ni faataitaiga mai tusitusiga paia po o lou lava olaga i se taimi na aumaia ai e le mafaufau loloto i mau le malamalama mai le Agaga (tagai, mo se faataitaiga, 1 Nifae 11:1–6; Mataupu Faavae ma Feagaiga 76:19–24; Talafaasolopito—Iosefa Samita 1:11–12).

Mataupu Faavae ma Feagaiga 138:12–35

O fanau uma a le Tama Faalelagi o le a maua le avanoa e faalogo ai i le talalelei.

Na aoao mai Peresitene Iosefa F. Samita o le galuega o le talaiga o le talalelei e faaauau pea i le lalolagi o agaga. O lenei galuega e faamautinoa ai o le a maua uma e tagata le avanoa e talia ai le talalelei.

Gaoioiga e Mafai Ona Fai

• I luga o le laupapa, lisi nisi o fuaiupu mai le vaega 138. Ona lisi lea, i se isi faatulagaga, faamatalaga e otooto ai seti o fuaiupu. Valaaulia tamaiti e faafetaui faamatalaga ma fuaiupu sa’o. O fuaiupu e aofia ai 12--16 (potopoto agaga amiotonu e faatali mo Iesu e faaali mai), 18--19 (ua faaali atu le Faaola i agaga amiotonu), 29--30 (Ua faauu e Iesu avefeau e talai le talalelei), 31--35 (ua talai e agaga amiotonu le talalelei), ma isi. Pe a uma ona faafetaui e tamaiti, fai atu i ai e faasoa mai mea ua latou aoaoina mai i nei fuaiupu.

• Fai atu i nisi o tamaiti e faitau le Mataupu Faavae ma Feagaiga 138:33 e saili po o a mataupu faavae o le talalelei na aoaoina i agaga o e ua maliliu. Fai atu i tamaiti e faitau mataupu faavae i le Mataupu Faavae ma Feagaiga 1:4. O le a se mea o tutusa ai i nei fuaiupu, ma o le a le mea e ese ai? O le a se mea o loo aoao mai e lenei mea ia i tatou e uiga i le Tama Faalelagi ma Lana fuafuaga?

aikona o le aoaoina

Uunaia le Aoaoina i le Aiga

Valaaulia tamaiti e fuafua se taimi i lenei vaiaso o le a latou mafaufau loloto ai i tusitusiga paia o loo latou faitauina.

Faaleleia o Lo Tatou Aoao Atu

Fautuaina le migao. Fesoasoani i tamaiti ia malamalama o se vaega taua o le migao o le mafaufau lea i le Tama Faalelagi ma Iesu Keriso. E mafai ona e faamanatu i tamaiti o le migao o le usuusu lemu lea pe hamuina se pese Peraimeri pe faaali se ata o Iesu.

itulau o gaoioiga: Ua tuuina mai e le Atua ia i tatou se ala e faatasi ai ma o tatou aiga e faavavau