iKalawa 9

Veivakalesui kei na Veivakaduavatataki

iVakavuvuli Bibi: Ena veivanua cava ga e rawa, cakava na veivakalesui vakadodonu vei ira na tamata kecega ko sa vakamavoataki ira.

Ni keimami toso ki nai ka 9 ni kalawa, keimami a tu vakarau me kere veivosoti. Me vakataki iratou na luvei Mosaia eratou sa veivutuni, eratou sa lako voli ka “segata vagumatua sara me ratou vakavinakataka na veileqa kece era sa vakayacora” (Mosaia 27:35), keimami sa gadreva me caka vinaka. Ia, ni keimami yacova nai ka 9 ni ikalawa, keimami kila ni keimami sega ni rawa ni vakayacora na neimami gagadre vakavo ga ke sa vakalougatataki keimami na Kalou ena nona Yalotabu. Keimami a gadreva na yaloqaqa, vakatulewa vakamatau, veikauwaitaki, vuku, kei na gauna donu. Oqo era sega ni ivakarau a taukena tu e vuqa vei keimami ena gauna o ya. Keimami a vakila ni i ka 9 ni ikalawa ena vakatovolea tale na neimami yalorawarawa me vakayalomalumalumutaki keimami, ka kerea na veivuke kei na loloma soli wale ni Turaga.

Ena vuku ni veika keimami sotava ena gauna ni dredre oya, keimami via solia e vica na vakatutu. Sa ka bibi sara mo kakua ni vakariri se vakawaletaka na nomu tovolea mo vakavinakataka na cala. Sa tautauvata ena kena bibi, mo kakua ni lokuyarataka na nomu vakavinakataka na cala. Sa vuqa na tamata era bula cake mai era rawai tale nira vakatara na rere me tarovi ira me cakava nai ka 9 ni kalawa. Masuta na veidusimaki ni Turaga ka veitalanoa vata kei na dua na daunivakasala nuitaki me veivuke me levea na veika dredre eso oqo.

Ena so na gauna o na temaki beka mo levea na veisotari kei na dua na tamata ena nomu lisi. Ia keimami vakatura, mo vorata na veitemaki oqo, vakavo ga, ke o tarovi vakalawa mo sota vata kei na dua. Na yalomalumalumu kei na yalodina ena rawa me vakavinakataka na veiwekani ka sa vakacacani, ni o sasaga ena nomu igu mo dau veisotari ena matanavotu. Vakatakila vei ira na tamata, ni o torovi ira tiko yani mo ia na veivakameautaki. Rokova na nodra gagadre kevaka era vakaraitaka ni ra sega ni via veivosakitaka na ka oqori. Kevaka era solia vei iko na madigi mo kere veivosoti, me na lekaleka ka matata na ka ko nanuma me baleta na ituvaki o ya. E sega ni yaga me matailalai sara. E sega ni kena inaki mo tukuna se vakamacalataka na nomu ile ga o iko. Na kena inaki o ya mo tusanaka na cala o sa cakava, kerea na veivosoti, ka vakavinakataka na cala ena veivanua e rawa kina. Kakua ni veiba vata kei ira na tamata se vakalewai ira, kevaka sara mada ga e sega ni taudonu mai se veiciqomi na nodra isau ni taro. Torova na tamata yadua ena yalo malumalumu, ka solia na veivakaduavatataki ka sega na veivakadodonutaki.

Na kere veivosoti ena vuku ni ivalavala eso ena rawa me veibolei sara. Me kena ivakaraitaki, ena gadrevi beka mo veitalanoataka eso na ka ena rawa ni tiko na kena revurevu vakalawa, me vaka na cakacaka lawaki se ivalavala ca bibi ni veiyacovi. O na temaki beka mo vakaraitaka vakasivia na itovo ni yalomu se soli iulubale mo levea kina na veivakameautaki. E dodonu mo vakasaqara ena yalomasumasu na ivakasala vakalotu se vaka kenadau, ni bera ni vakayacori e dua na cakacaka ena veikisi dredre vaqori.

Ena so tale na gauna, ena sega beka ni rawa ni o veivakameautaki vakadodonu. Sa mate beka na tamata oya, se o sega beka ni rawa ni kila na vanua e vakaitikotiko kina. Ena veigauna vakaoqori, sa rawa ga mo na veivakameautaki ena dua tale na sala. E rawa ni o vola e dua na ivola vua na tamata oya ka vakaraitaka kina na nomu veivutuni kei na gagadre ni veivakaduavatataki, ka dina mada ga ni sega ni rawa ni soli na ivola. E rawa ni o solia e dua na isolisoli kina kato ni nona soli iloloma taleitaki, na tamata o ya. E rawa ni o raica e dua ka na vakananumi iko ena tamata o ya, ka cakava eso na ka mo vukei koya kina, se yalewa se tagane. Se o na rawa ni cakava e dua na ka, mo vukea lo ga e dua na lewe ni matavuvale.

Ena tiko eso beka na gauna ni torovi e dua tale na tamata se segati na veivakavinakataki ena dau mosimosi vua se veivakaleqai sara mada ga. Kevaka o nanuma ni na yaco vakakina, veivosakitakitaka na ituvaki vata kei na dua na nomu daunivakasala nuitaki ni bera ni o qarava yani. Na tiki ni veivakalesui mai oqo, me na kakua ni veimuataki ki na nodra vakacacani tale na tani. Ena so talega na gauna, ko a vakavuna beka edua na veivakacacani ka sa na sega ni rawa ki na sasaga vakatamata me vakavinakataka. O Elder Neal A. Maxwell a tukuna na ka dina oqo: “Ena so na gauna … na veivakavinakataki e dau sega dina ni rawa, me vakataka na gauna e dau cau kina edua me vakayali na nona vakabauta se ivalavala dodonu e dua na tamata. Ia, edau tarava mai e dua na ivakaraitaki ni bula dodonu e vakarautaka edua na i sosomi ni veivakavinakataki”(ena Ripote ni Koniferedi, Okot. 1991, 41; se Ensign, Nov. 1991, 31). Mai na gauna ko digitaka mo taurivaka kina na vei ivakavuvuli dina oqo me nomu ivakarau vou ni bula, o sa tekivu mo veivakameautaki.

Ni oti na nomu vakameautaka e vuqa na nomu ivakarau sa sivi, ena tiko beka e vica na tamata o vakila ni ko ririko mo sotavi ira. Kakua ni lomaleqa E vuqa vei keimami a sotava dina na veika vata oqori. Keimami vakatura mo kauta na lomamu ki vua na Turaga ena masu ena yalodina. Kevaka e se tikoga na taqaya ni o se cudruva tiko edua, ena dodonu beka mo na vakadaroya na veisotari kei koya, se tagane se yalewa. Me rawai kina na yasana ca ni veika e vakilai, e rawa mo na masuta na loloma cecere ka raica na tamata oya me vaka e raici koya na Turaga. Ena rawa mo raica na vuna vinaka ena veivuke kina na veivakalesui kei na veivakaduavatataki. Kevaka o vakayacora na veika oqo ka vosota tiko, na Turaga ena rawa—ena Nona sala ga kei na Nona gauna—me solia vei iko na kaukauwa kei na veimadigi veivakurabuitaki eso mo vakaduavatataki kina kei ira kece sara era tiko ena nomu lisi.

Ni sa vakacavari nai ka 9 ni kalawa ena kena vinaka duadua o rawata, o sa qai cakava kece sara na ka o rawata mo duavata kina kei na ivakaro ni Turaga. O sa tekivu me vakila e dua na bula vou ni inuinui—sega ena nomu nuitaki iko ia na loloma ga ni Kalou. O a sa siro sobu sara ki na yalomalumalumu sa titobu, ka raica kina na Turaga ni wawa tu me mokoti iko. O sa cakava na veika kece o sa rawata me vakabulabulataka tale na veimaliwai, ka yaco me vakaduavatataki kei ira tale eso. O sa curu vakatikina ki na Nona ivakavakacegu; kei na tiko e kea sa yaco me nomu gagadre uasivi duadua. O sa vulica mo kila ka muria na ivakatakila yadudua vakavinaka cake, ka sa muataki iko mo bulataka na nodra ivakavuvuli na parofita ni Kalou ni gauna makawa kei na gauna oqo. Ena gauna sara mada ga ni nomu veigauna dredre, ko sa vakila e dua na mataqali vakacegu vou. O sa vulica mo ciqoma na veivakalougatataki a vakamacalataka o Paula ni a vola, “Na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou ena vukui Karisito Jisu” (Filipai 4:7).

iTuvatuva ni Cakacaka

Lomani ira na tani; tarovi iko mai na nomu vakalewai ira na tani; mo tu vakarau me ciqoma e dua na veikacivi ni Lotu ka sauma na ikatini kei na isolisoli

Ena gauna e liu, kevaka ko a bulabula tiko ena lotu, e rarai ko a vakauqeti beka kina ena nomu rerevaka na veilewai ni Kalou, se na veika era na nanuma na tani. E rairai o cakava beka ena vuku ni vakasama ni vakayaco itavi ga. Nikua o sa kila ni veiqaravi e dua na sala ni lako mai vei Karisito. Sa ikoya e dua na sala ni vakaraitaki ni loloma kivua na Kalou. E vakatakila na kena gadrevi tikoga na Nona kaukauwa kei na vakavinavinaka ena vuku ni Nona veivuke vakalou. Vakasamataka na nomu bulabula tiko ena Lotu e se yavutaki tiko ga ena rere kei na cakaitavi, se mai na dua na coke ni nomu vakabauta sa sucu vou vua na Karisito.

Vakaraica na sala mo veiqaravi kina ena vanua cava ga o tiko kina. Mo yaco mo kilikili ka vakarau tu me veiqaravi ena dua na veikacivi ni Lotu, se ena so tale na sala. Ni o qaravi ira tiko na tacimu kei na ganemu ka vakavulici ira ena vosa kei na ivakaraitaki, o sa na wasea vata kei ira na Nona bula dina tiko ena nomu bula. (Raica na Maciu 25:40; Joni 13:34–35; Joni 15:15; Mosaia 2:17.)

Mo tu vakarau mo cakava na veika sa kilikili me ia kina na veivakameautaki

Ena tauri ni i ka 9 ni ikalawa, mo kakua ni yalolailai kevaka era sega ni ciqoma vinaka na tani na nomu kere veivosoti, se kevaka era sega ni vakabauta ni o sa veisau dina. Na veivakameautaki ena taura na gauna kei na vosota. Solia vei ira na tamata na gauna me ra na raica rawa ni gauna oqo e sa duidui. Ena gauna oqo o sa sega ni yalayala wale tiko; o sa bula tiko mo ciqoma na taucoko ni vakabokoci ni nomu itovo veivakatotogani kei na malumalumu ni itovo ni bula. E muri, ena yaco me ivakadinadina na nomu sa vakuai iko mai na veivakatotogani kei na vou ni nomu ivakarau.

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei iko ena tauri ni i ka 9 ni ikalawa. Vakayagataka na ivolanikalou oqo, kei na taro me lewe ni vakanananu vakatitobu, vuli, kei na volavola. Nanuma na nomu volavola me dina ka matata.

Vakauqeti ira na tani ki na veika vinaka

“Ia oqo a sa kaya vei au na Yalo ni Turaga: Mo vakaroti ira na luvemu me ra ivalavala vinaka, de ra na vagolea tani na yalodra na tamata me ra rusa kina; o koya, au sa vakaroti kemuni kina na luvequ, ena rerevaka na Kalou, mo ni kakua sara ni kitaka na ivalavala ca;

“Ia mo saumaki vua na Turaga ena nomu vakasama taucoko, na nomu igu taucoko kei na nomu kaukauwa kecega; io mo kakua tale ni vagolea vakatani na yalodra na tamata me ra kitaka na ivakarau ca; ia mo lako yani ka tusanaka vei ira na nomu cala kei na veika ca ko a cakava” (Alama 39:12–13).

• Eso na leqa ca duadua eda sa cakava vei ira na tani, o ya ena noda vakauqeti ira mera tara cake na itovo veivakatotogani vakai ira. Vola me baleta na tamata ena nomu bula o sa vakauqeti ira ena sala vata oqo.

• O na kunea maivei na kaukauwa mo sota vata kina kei ira na tamata oqo, me vaka na ivakavuvuli nei Alama ena veitikina oqo?

Veivakauqeti se veivakasaurarataki

“Ko cei ga e lako mai ia me lako mai ka mai gunu ena wai ni bula ena yalo galala; ia ko cei ga ena sega ni lako mai ena sega ni vakasaurarataki me lako mai; ia ena siga mai muri ena vakalesui tale vei koya me vaka na nona ivalavala” (Alama 42:27).

• Ni tu e vuqa sara na vuna kaukauwa mo taura kina nai ka 9 ni ikalawa, sa dodonu mo na kakua ni coriti ena vakaiulubale se lasutaka ni sa sega tale na nomu digidigi. Na Parokaramu ni Veivagalalataki mai na Veivakatotogani e dua na parokaramu ni veivakauqeti, sega ni veivakasaurarataki. Vola nai tovo ni yalomu se o a vakauqeti se vakasaurarataki mo taura nai ka 9 ni kalawa. Na cava eso na vuna kara sa volai tiko ena tikina oqo o vakauqeti kina?

Vakarau mo sotava na Kalou.

“Au gadreva mo ni lako mai ka kakua ni vakaukauwataka tiko na lomamuni; ia raica, oqo na kena gauna kei na siga ni nomuni vakabulai; o koya, kevaka ko ni veivutuni, ka sega ni vakaukauwataka na lomamuni, ena kau yani vakatotolo vei kemuni na ituvatuva cecere ni veisereki.

“Ia raica, na bula oqo sai koya na gauna me vakarautaki koya kina na tamata me sota kei na Kalou; io, raica na veisiga ena bula oqo me vakayacora kina na tamata na nona cakacaka kecega” (Alama 34:31–32).

• Na cava tale o sa rawata ni ko vakamalumalumutaka na yalomu ka lako yani me veivakameautaki?

• E vakalevutaki vakacava na nomu yalo rawarawa mo veivakameautaki, ni o kila ni o sa vakavakarau tale tikoga mo sota kei na Kalou?

iTaviqaravi ena Lotu

“[Ira na luve i Mosaia] era sa lako yani ena na vanua taucoko … eratou sa segata vagumatua sara meratou vakavinakataka na veileqa kece era sa vakayacora ki na lotu, era sa tusanaka na nodra ivalavala ca, ka tukuna na veika era sa raica, ka vakamacalataka na parofisai kei na ivolanikalou kivei ira kece sa via rogoca”(Mosaia 27:35).

• Ena vuku ni itovo veivakatotogani, e vuqa na tamata era sa sega ni dau lako i Lotu. Eso era vakayagataka na nodra malumalumu na tani, me i ulubale ni nodra sega ni dau vakaitavi vakawasoma. Vola na veika o sa sotava ena vuku ni o vakaitavi tiko ena Lotu i Jisu Karisito ni Yalododonu Edaidai.

• Sa vukei iko vakacava na nomu toro voleka vua na iVakabula ena nomu vakalesui mai, mo vakila na vakaduavatataki tale kei na Nona Lotu?

• E veivuke vakacava na nomu bulabula tiko ena Lotu mo veivakameautaki kina, ka vakalesui mai vakataucoko?

Lomasoli ena veivakalesui

“E dodonu mo vakavinakataka ena kena levu ga e rawa na veika kece sara sa butakoci, vakacacani, se vakadukadukalitaki. Na vakavinakataki ni cala ena yalorawarawa sa ivakadinadina kaukauwa vua na Turaga ni ko sa yalataka me cakava na veika kece o rawata mo veivutuni” (Richard G. Scott, ena Ripote ni Koniferedi, Epe. 1995, 102; se na Ensign, Me 1995, 76).

• Vola me baleta na kena tauri nai ka 9 ni kalawa ni sa ivakadinadina sega walega vua na Turaga, ia vei iko kei ira tale eso ni ko sa yalataki iko ki na dua na bula ni yalomalumalumu kei na yalodina.

Na inaki ni lomamu

“Ia, ko koya sa veivutuni ka muria na vunau ni Turaga ena vosoti” (V&V 1:32).

• Ni o veivakameautaki tiko, o na rairai sotava eso na tamata era na sega ni vosoti iko. E rairai ni se ca tiko beka ga na lomadra vei iko, se ra sega ni nuidei sara ena nomu inakinaki. E vukei iko vakacava mo kila ni Turaga e kila deivaki tu na i naki dina ni lomamu, ka na ciqoma o Koya na nomu lomasoli mo veivutuni ka vakavinakataka na cala, veitalia mada ga nira sega ni ciqoma na tamata tale eso?

Na cava e rawa ni cakava vei iko na iVakabula

“O ira na tamata era na sega ni rawa ni vosota ga vakataki ira na nodra ivalavala ca; era na sega ni rawa ni vakasavasavataki ira mai nai sau ni nodra ivalavala ca. Na tamata e rawa ni muduka na nona caka ca ka vakayacora na veika vinaka ena gauna mai muri, ni yacovi oya, na nodra i valavala sa vakadonui e mata ni Turaga ka sa kilikili me na daunanumi tiko. Io, o cei me na vakavinakataka na cala era sa vakayacora oti ki vei ira vakai ira, kei ira tale na so, ka na rairai dredre mera vakavinakataka vakataki ira? Mai na veisorovaki i Jisu Karisito, na nona ivalavala ca o koya sa veivutuni e na bokoci laivi; ke sa damuvakula ena vaka na vutika ni sipi. Sai koya oqo na vosa ni yalayala e soli vei iko” (Joseph F. Smith, Gospel Doctrine, 5th ed. [1939], 98–99).

• Ni o sa lako yani mo ia na veivakameautaki, kua ni yalolailai ena vakasama vaka oqo “Na ka oqo ena sega ni rawa! E sega ni tiko edua na sala meu na vakavinakataka kina vakavinaka cake sara na cala au sa cakava vua na tamata oqo! ” E dina ga ni rawa ni dina oya, mo nanuma na kaukauwa i Jisu Karisito me vakavinakataka na ka o sega ni rawata. Vola me baleta na kena gadrevi mo nuitaka tiko ni o Jisu Karisito ena cakava na veika o sega ni cakava rawa.

• Ena veisala cava soti o rawa ni vakaraitaka kina vua na Turaga nomu vakararavi vei Koya? O na vakalevutaka cake vakacava na veivakabauti oqori?