iKalawa 7

Yalomalumalumu

iVakavuvuli Bibi: Ena yalomalumalumu kerei Tamada Vakalomalagi me vagalalataka na nomu malumalumu.

Na veikalawa kece e gadrevi kina na yalomalumalumu, ia nai ka 7 ni ikalawa sa gadrevi vakalevu sara kina: “Ena yalo malumalumu kerei Tamada Vakalomalagi me vagalalataka na nomu malumalumu.” Na yalo malumalumu keimami a tara cake e nai ka 6 ni kalawa a vakavuna me keimami tekiduru e nai ka 7 ni kalawa, ka kerea na Turaga me kauta laivi na neimami malumalumu. Ni keimami sa mai yacova na vanua oqo, keimami sa vakarau tu me keimami masu ena sega tale ni dua nai naki, ia ena neimami gagadre ga me duabau ena yalo kei na vakasama vata kei na Tamada Vakalomalagi kei na Turaga o Jisu Karisito. Keimami sa sega tale ni qai vakacegui ena veisau ni itovo se ena ivakarau ni bula. Keimami sa qai vakarau tu me veisautaka na Kalou na keimami ituvaki.

Nai ka 7 ni kalawa e matataka vei keimami na neimami soli keimami taucoko ki vua na iVakabula, ka vuqa vei keimami sa sega ni tarova me tagi e yalona, me vakataki Alama, “Oi kemuni Jisu, na luve ni Kalou, ni yalololoma vei au” (Alama 36:18). Na rarawa vakaidina a luvuca na yalo i keimami, sega walega ena vuku ni keimami a kune rarawa se vakayacora talega eso mera rawarawa, ia baleta ga ni neimami kila ni ena gauna sara mada ga ni neimami sa vagalalataki, keimami sega tikoga ni kauta tani rawa na neimami malumalumu.

Ena neimami sa vakila e dua na iwase ni nona loloma na Kalou, keimami a gadreva me biuta tani na neimami ivalavala ca kecega, io na gagadre mada ga ni ivalavala ca, me keimami rawa ni kilai Koya kina vakavinaka cake. Kena itinitini, ena neimami lewa, mai vu ni yaloi keimami, a cabora na yalo i keimami taucoko vua na Kalou ka kerei Koya me vosoti ka vakayacori keimami me ucui Koya. Sa qai yaco me keimami qai kila kina ni sega ni dua tale na yaca, sega ni dua tale na sala se ivakarau, ena solia vei keimami na taucoko ni vakabokoci ni neimami ivalavala ca. Keimami a vakatakekere vua na Tamada ka sega ni vakavotaka tale edua na ka, ena vuku ni Nona loloma veivueti, me vosoti keimami ena neimami dokadoka, ivalavala ca, kei na neimami malumalumu. Keimami a kerei Koya me solia vei keimami na Nona loloma soli wale, ni ena vukuna ga ena rawa me keimami maroroya tiko kina na neimami ivakarau vou ni bula.

Na Turaga a sega ni tekivu vakayacora e dua na veisau vou ki na neimami itovo taucoko ni bula, me yacova na gauna keimami sa vakatara kina Vua. Nai ka 7 ni kalawa e sa neimami vakatulewa. Keimami sa nakita vakaidina me vaka yalomalumalumutaki keimami sara. Keimami a cabora yani na vei tiki kece sara ni dokadoka ni boletaki keimami vakai keimami, ka vakatusa ni sega ni veirauti na neimami sasaga me vakabulai keimami ga vakai keimami. Keimami a vakila me bulataka na dina a vakavulica o Penijamini na Tui—ni da sa daukerekere kecega vua na Kalou ka sa na sega na inuinui ni veivakabulai ena noda sasaga ga, ia ena vuku ga ni loloma veivueti kei na loloma soli wale i Jisu Karisito (raica na Mosaia 2:21; 4:19–20).

Nai ka 7 ni kalawa a vakatakilakilataka vei keimami sara vakayadua, na gauna keimami a qai soli keimami taucoko sara kina ki na dina tawamudu e vakavuvulitaki ena Mosaia 16:4: “A ka oqo era sa lakosese kina na tamata kecega; ka raica, era na lakosese vakadua ko ira oqo kevaka me a sega ni sereki ira na Kalou mai na itutu era sa lakosese ka lutu tu kina.” Na veika keimami sotava a vakavulica vei keimami, ni kena tauri nai ka 7 ni kalawa, e sega ni vagalalataki keimami mai na cakacaka me keimami cakava. A gadrevi tikoga me keimami dau vosota ka “toso ki liu ka tudei vei Karisito” (2 Nifai 31: 20).

Keimami se sega ni galala vakaoti sara mai na gadreva na ivalavala ca. Keimami a vulica kina me ciqoma na bula e na vosa ni Kalou ka waraka na Nona gauna kei na Nona inaki—ena gauna mada ga me na bokoci kina na neimami malumalumu. Ena tauri ni i ka 7 ni kalawa, keimami a vulica kina me bula ena yalomalumalumu kei na vosota kivua na Kalou ka a vakaraitaka ko Alama kei ira na wekana ni a vakarawarawataki na nodra icolacola ia a sega ni kautani sara: “Ka ra soli ira ena yalomarau kei na yalovosota ki na nona inaki na Turaga” (Mosaia 24:15). Keimami sa qai biuta laivi vakadua na vakasama, ni rawa me keimami vakavinakataki keimami ga vakai keimami, ka keimami ciqoma na dina, ni Kalou e gadreva me keimami valuta na neimami malumalumu ena bula oqo, ena neimami lako mai vei Karisito ka vakataucokotaki ki vua. Keimami a raica ni ena vuku ni Nona loloma soli wale, a vakaukauwataki keimami me vakuwai keimami mai na ka kecega sa sega ni vakalou, ka kila ni veivakabulai e lako mai Vua ka sega ena neimami kaukauwa (raica na Moronai 10:32).

Na veikalawa yadua e salamuria koto edua na veivakaroti ka sega ni galala mai kina nai ka 7 ni ikalawa. O keimami ka sa mai ciqoma na vei ivakavuvuli oqo keimami sa vakasalataki iko ni o sega ni rawa ni namaka mo na taura na ikalawa oqo ke sega na solibula—ka sa dina sara oya. Ena Vunau kei na Veiyalayalati 59:8, na Turaga e vakarota, “Mo vakacabora nai soro ena buladodonu vua na Turaga na nomu Kalou, io na loma raramusumusu kei na yalo bibivoro.” Na isolisoli oqo sai koya na uto ni i ka 7 ni kalawa. Ni o vakila tiko na mosi ni nomu sucu tale, mo nanuma ni Nona rarawa, ka sega ni nomu, e vakadeitaka na nomu sereki mai na ivalavala ca. Na nomu solibula sa ivakananumi yalomalumalumu duadua ga ni Nona “ilutua ka iotioti ni soro” ena vukumu (Alama 34: 14).

Ni ko biuta na veika kece ki na liga ni Kalou, o sa qai cakava na veika kece o rawata mo ciqoma kina na Nona ivakadinadina tawacala ni sa vosoti na nomu ivalavala ca, kei na nomu bula makawa sa na biu vakatikitiki yani. Me vakataki ira na tamata era a saumaki mai ena iVola i Momani, o sa rawa ni vakadinadinataka ni sa “curumi [iko] na kaukauwa kei na Yalo ni Kalou, ka [sa] tu vei Jisu Karisito” (3 Nifai 7:21). O sa rawa ni cavuta vata kei Alama: “Au sa sega ni nanuma tale na noqu mosi; io, sa oti vakadua na noqu cukiraka na noqu vakasama baleta na noqu ivalavala ca. Ia oqo, sa dua na ka na marau, kei na kena totoka na rarama au sa raica; io, e sa vakasinaiti na yaloqu ena marau cecekia ka sivia sara na momosi a tu vei au!“ (Alama 36:19–20).

iTuvatuva ni Cakacaka

Vakasaqara na kaukauwa ni Veisorovaki ni iVakabula me yaco me mana sara ena nomu bula ena nomu vakananuma vakatitobu na masu ni sakaramede

E dua na ivakarau mana ni vakanananu vakatitobu sai koya mo vakasamataka e dua na tikina se dua na malanivosa ni ivolanikalou ni ko masuta mo kila na kena ibalebale kei na kena ivakavakayagataki ena nomu bula vakai iko. Me vaka ni o keda yadua a cakava na veiyalayalati ka tokaruataki tiko ena masu ni sakaramede, sa rawa meda vakanananu kina vakatitobu.

Ni oti nodra veisureti na parofita mo bulataka na ivolanikalou ena nomu bula, sa rawa mo wilika na Moronai 4:3 kei na 5:2 ka vakasamataka ena yalomalumalumu na vosa tabu oqo, ka cavuta vei iko: me kena ivakaraitaki, “Oi kemuni na Kalou, na Tamai keimami Tawamudu, [au] sa kerei kemuni ena yaca ni Luvemuni, ko Jisu Karisito, mo ni vakalougatataka ka vakatabuya na madrai oqo ki [na yaloqu me vaka au] sa vakaivotavota kina … ka muria na nona ivakaro sa solia vei [au], me tiko ga kina kei [au] na Yalona.”

Masu ena yalomalumalumu vua na Kalou me vakayacora vei iko na veika ko sega ni cakava rawa vakai iko

Ena nomu maroroya tiko e dua na masu rawarawa sara e yalomu, me vaka na “Turaga, na cava ko ni sa vinakata vei au meu cakava?” se “Me yaco ga na Nomuni lewa,” o na dau vakananumi tikoga ni ko sa vakararavi taucoko sara vua na Turaga. Na loloma ni Kalou vei iko kei na nomu loloma Vua, ena vukei iko mo yavutaka kina edua na veiwekani ka na rawa mo soli iko vakaoti sara kina. O a vakasaqara na loloma oqo ena veiyabaki o a coriti tu kina ena itovo veivakatotogani. E nai ka 7 ni kalawa, ko na kunea kina e dua na sala mo ra rawata kina na vakacegu ni o sa curu kina ki na “ivakavakacegu ni Turaga” (Moronai 7:3; raica talega na Alama 58: 11; Ezra Taft Benson, “Jesus Christ—Gifts and Expectations,” Ensign, Dec. 1988, 2).

Vuli kei na Kilamatata

Na ivolanikalou kei na itukutuku oqo mai vei ira na iliuliu ni Lotu ena rawa ni vukei iko ena tauri ni i ka 7 ni ikalawa. Vakayagataka na ivolanikalou oqo, kei na taro me lewe ni vakanananu vakatitobu, vuli, kei na volavola. Nanuma na nomu volavola me dina ka matata.

Na nomu digitaka mo yalomalumalumu

“Ia oqo, me vaka au sa kaya vei kemuni, me baleta ni ko ni sa vakasaurarataki mo ni vakayalomalumalumutaki kemuni ko ni na kalougata kina, ko ni sa sega li ni nanuma ni ra na kalougata vakalevu cake ko ira era sa vakayalomalumalumutaki ira vakataki ira ena vuku ni vosa?” (Alama 32:14).

• E vuqa vei keimami a yaco mai kina soqoni ni veivagalalataki ena lomaleqa, ka vakavu mai na itotogi ni neimami vakatotogani. Keimami a vakasaurarataki me keimami yalomalumalumu. Ia na yalomalumalumu ka vakamacalataki tiko e nai ka 7 ni kalawa, e duidui na vanua e vure mai kina. E sega ena veivakasaurarataki. Sai koya na vua ni nomu digidigi mo vakayalomalumalumutaki iko vakai iko. Sa veisau vakacava na nomu vakila na nomu yalomalumalumu, me tekivu mai na gauna o sa vagalalataki tiko mai kina?

Vakasinaiti ena reki

“Ka ra sa raici ira vakaira ena kedra ituvaki vakayago, ni ra sa lailai sobu mai na kuvu-ni-soso. Era sa tagi vata vakadomoilevu ka kaya: Mo ni yalololoma ka vakayagataka na dra ni veisorovaki i Karisito me keimami vosoti kina ena neimami ivalavala ca, ka me vakasavasavataki kina na yaloi keimami; ni keimami sa vakabauti Jisu Karisito, na Luve ni Kalou, o koya ka a bulia na lomalagi kei na vuravura, kei na veika kecega; o koya ka na lako sobu mai ena kedra maliwa na luve ni tamata.

“Ka sa yaco ni ra sa vosataka oti na vei vosa oqo, sa sobuti ira na Yalo ni Turaga, ka ra sa vakasinaiti ena marau, ka sa bokoci na nodra ivalavala ca, ka sa vakacegu na nodra vakasama, ena vuku ni vakabauta levu sa tu vei ira me baleti Jisu Karisito o koya ka na lako mai” (Mosaia 4:2–3).

• O ira na tamata i Penijamini na Tui era a cabora na mataqali masu vata ga eda na cabora e nai ka 7 ni ikalawa. Era a vakila na vakacegu kei na reki ni sa sobuti ira na Yalo ni Turaga ka solia vei ira na vakabokoci ni nodra ivalavala ca. Vakasamataka na veika o sa sotava ena vei ituvaki ni yalo vakaoqo. Vola se ena vakacava beka me vaka tu oqo na itovo ni yalomu me i vakarau tu ni nomu bula e veisiga.

Vakabauta na Kalou

“Mo ni vakabauta na Kalou; mo ni vakabauta ni sa tiko o koya, ka a bulia na ka kecega, mai lomalagi kei vuravura; mo ni vakabauta ni sa nona kece na yalomatua, kei na kaukauwa kece, mai lomalagi kei vuravura; mo ni vakabauta ni na sega ni kila taucoko na tamata na veika kece sa kila na Turaga.

“Ka mo ni vakabauta talega ni sa dodonu mo ni veivutunitaka na nomuni ivalavala ca ka biuti ira tani sara, ka vakayalomalumalumutaki kemuni ena mata ni Kalou; ka kerea ena yalodina me vosoti kemuni; ia oqo, kevaka ko ni sa vakabauta na veika kece oqo, mo ni vakayacora sara vakakina.

“Ia au sa kaya tale vei kemuni me vaka au sa kaya oti e liu, me vaka ko ni sa kila na lagilagi ni Kalou, se kevaka ko ni a sa kila na nona vinaka ka tovolea na nona loloma, ka sa rawata na vakabokoci ni nomuni ivalavala ca, ka sa marau vakalevu sara kina na yalomuni, au gadreva mo ni nanuma vakakina, ka mo ni dau vakananuma tiko ga na cecere ni Kalou, kei na nomuni sa ka wale sara, kei na nona vinaka kei na nona sa vosoti kemuni vakadede, oi kemuni na tamata tawayaga, ka mo ni vakayalomalumalumutaki kemuni ena yalomalumalumu sa titobu sara, ka dau kaciva na yaca ni Turaga e veisiga, ka mo ni tudei tu ena vakabauta na veika ena yaco mai, ka a cavuti mai na gusu ni agilosi.

“… Kevaka ko ni na kitaka na veika oqo, ko ni na marau ena veigauna kecega, ka vakasinaiti ena loloma ni Kalou, ka na dau bokoci tiko ga na nomuni ivalavala ca; ia ena tubucake na nomuni kila na lagilagi i Koya ka a buli kemuni, se na nomuni kila na veika sa dina ka dodonu” (Mosaia 4:9–12).

• Vola ena masumasu na lisi ni veika a kaya o Penijamini na Tui ni dodonu meda cakava. Era semati vakacava na veika oqo ki nai ka 7 ni kalawa?

• Na yalayala cava so e yaco mai vei keda nida cakava na ka e a vakarota o Penijamini na Tui? (Raica na iotioti ni tikina)

• Kevaka o ciqoma na vei yalayala oqo, na cava ena veisau ena nomu bula?

Talairawarawa ki na lawa kei na ivakaro

“Ia ena vuku ni inaki oqo sa soli kina na lawa; o koya sa yaco kina me ka mate vei keda na lawa, ka da sa bula ga vei Karisito ena vuku ni noda vakabauta; ia eda sa muria ga na lawa ena vuku ni ivakaro” (2 Nephi 25:25).

• Eda sa “bula ga vei Karisito ena vuku ni noda vakabauta [ti] ” Koya. Na cava e kena ibalebale ni sa ka mate vei keda na lawa? Na cava na vuna eda maroroya tikoga kina na lawa se talairawarawa ki na ivakaro?

• Na cava o vakila nikua me baleta na kena muri tiko na lawa?

• Sa vakaraitaka vakacava na nomu loloma vua na Kalou, na nomu talairawarawa tiko ki na ivakaro?

Na Loloma ni Kalou

“Nida vakaliuca na Kalou, na veika kece era na tuvalaki vakadodonu se era na kau tani mai na noda bula. Na noda lomana na Turaga ena vakatulewataka na gagano ni yaloda, na veika eda vakayagataka kina na noda gauna, na veika taleitaki eda vakayacora, kei na ituvatuva ni veika eda vakaliuca” (Ezra Taft Benson, ena Ripote ni Koniferedi, Epe. 1988, 3; se na Ensign, Me 1988, 4).

• Ena kena sa mai kilai na loloma veivueti kei na nona vinaka na Kalou, o sa rairai tekivu mo vakila na loloma ni Kalou—mo lomani Koya ka mo lomani mai Vua. Vakasamataka ka vola me baleta edua na tubu cake ni loloma o sa vakila ni o vakayacora voli na vei ikalawa oqo.

• E veiganiti vakacava nai ka 7 ni ikalawa me ivakaraitaki cecere duadua ni nomu loloma, me yacova mai oqo?

Taura ki vei iko na yaca i Karisito

“Ia ena qai yaco ni ko koya yadua sa vakayacora vakaoqo ena kunei mai na liga imatau ni Kalou, ni na kila ko koya na yaca sa kacivi kina, ni na kacivi ena yacai Karisito” (Mosaia 5:9).

• E vuqa vei keda e nanuma tiko na tauri ni yaca i Karisito vei keda, ena vakasama ni sakaramede kei na papitaiso, ka sa dina sara oya. Vakasamataka mada vakamalua se cava beka e kena ibalebale meda kacivi ena yaca i Karisito, ka yaco na kena irogorogo me vaka ga e nomu.

• Na cava o gadreva mo na cakava mo na kunei kina ena liga imatau ni Kalou? Na cava o sa yalataka mo vakayacora ena nomu papitaiso kei na nomu vakaivotavota ena sakaramede?

• Vola na veika o vakila ni ko vakasamataka na Nona lomasoli me solia vei iko na Yacana se na kena irogorogo me isau ni nomu malumalumu kecega.

Cabora yani na nomu malumalumu

“Na lotu ka sega ni gadreva na solibulataki ni veika kecega sa sega kina na kaukauwa me rawa ni vakavurea na vakabauta e veiganiti kaya na bula kei na veivakabulai” (Joseph Smith, comp., Lectures on Faith [1985], 69).

• Eso na tamata era wilika na vosa oqo ka nanuma “na veika kecega” e vakaibalebaletaki ki na ka kece e taukeni. Sa vakalevutaka vakacava, na nomu cabora na nomu malumalumu kecega vua na Turaga, mo kilamatata sara na kena ibalebale mo solibulataka na veika kecega?