iKalawa 10

Vakatulewataki iko e Veisiga

Na iVakavuvuli Bibi: Tomana tikoga mo dau dikevi iko, kei na gauna o cala kina, tusanaka sara vakatotolo.

Ena gauna o yacova kina nai ka 10 ni kalawa, o sa na vakarau tu ki na dua na ivakarau vou ni bula. Na imatai ni ciwa na ikalawa a vukei iko mo vulica e dua na ivakarau ni bula e yavutaki ena ivakavuvuli vakayalo. Na vei ivakavuvuli oqo esa yaco me sa yavu mo na tara cake kina na vo ni nomu bula.

Ena nomu taura nai matai ni ciwa na ikalawa, ko sa bulataka kina na ivakavuvuli ni kosipeli—vakabauti ni Turaga o Jisu Karisito kei na veivutuni. Ko sa raica na cakamana ni veisau ena nomu bula. O sa sotava na loloma kei na vosota, ka o sa tara cake e dua na gagadre me rawati na vakacegu. Na nomu gadreva na nomu itovo veivakatotogani sa mai takali kece. Ni ko dau temaki, o dau raici iko ni o cata ka sega ni gadreva na nomu itovo veivakatotogani. Ko vakila na yalomalua kei na kurabui ena veika sa cakava na Tamada Vakalomalagi ka o a sega ni rawa ni cakava taudua.

Nai otioti ni tolu na ikalawa ena vukei iko mo taqomaka na nomu ivakarau vou ni vakasama ni bula vakayalo, ka sa dau vakatokai wasoma me ikalawa veimaroroi.

Na noda dikevi keda vakaikeda ena gauna ni bula taucoko e sega ni dua na vakasama vou. Ena iVola i Momani, a vakavulica kina o Alama ni taqomaki ni dua na veisau levu ni yalo e rawati ena sasaga. Ena vuqa sara na tikina, a vakatakila ni noda dikevi keda ena yalo e dina, kei na masumasu kei na kusarawa ni veivutuni e dodonu me tiki tiko ni bula (raica Alama 5:14–30). Mo maroroya na ka ko sa rawata mai, e dodonu mo tikoga ena ituvaki kaukauwa vakayalo. O vakayacora oqo ena nomu taroga na mataqali taro eso ka a kaya o Alama me baleta na ka o vakila, na vakanananu, na vei inaki eso, kei na itovo. Ena nomu dikevi iko e veisiga, o na tarovi iko mai na cakitaka na malumalumu kei na logaloga vinaka tiko.

Me vaka ni o sa vulica mai na ikalawa 4 kei na 5, na veika e okati ga ki na nomu itovo e sega ni veirauti mo veisautaka kina na yalomu. E dodonu talega mo dikeva na nomu vakanananu kei na veika o vakila. Na ivakavuvuli oqo e dina talega e nai ka 10 ni kalawa. Tomana tiko na qarauni ni viavialevu ena sala kece e rairai kina, ia ena yalomalumalumu kauta na nomu malumalumu vua na Tamamu Vakalomalagi, me vaka o sa vulica mo cakava mai nai ka 6 kei nai ka 7 ni kalawa. Kevaka o vakila ni o lomaleqa, vakalomalomani iko, veilecayaki, nuiqawaqawa, yaloca, vakanananu vakayago, se rere ena sala cava ga, gole sara vakatotolo vua na Tamada ka vakatarai Koya me vakaisosomitaka na veivakanananu oqori ena vakacegu.

Ni ko yadrava matua na nomu vakasama kei na veika o vakila, o na rawa talega ni kunea eso na vakabauta ca o se maroroya tu. Kerea vua na Tamada mai Lomalagi me kauta tani na veika oqo. Ena tauri ni ka 10 ni kalawa, o na sega tale ni lesu ki na vakadonui iko, vakaiulubale, se bilitaka e dua se dua tale na ka. Na nomu takete oya mo dolava na yalomu ka vakanamata nomu vakasama e na lesoni eso sa vakavulica na iVakabula.

Vuqa vei keda eda muria nai ka 10 ni kalawa ena noda dikevi keda ena veisiga yadua. Ni o tuvalaka na nomu siga, vakadikeva ena masumasu na nomu inakinaki. O sa cakava tiko vakasivia se vakalailai? O sa qarauna tiko beka na ka o gadreva taumada vakayalo, loma kei na yago? O veiqaravi beka vei ira na tani?

Tarogi iko ena vei taro oqo kei na so tale ena nomu vakasaqara tiko na bula e veiraurau ka maravu ena nomu siga. Ni toso tiko na siga, sa rawa mo muduka vakatotolo na vakanananu ca se na ka o vakila ni saga me vakadrukai iko. Mo na qarauna sara vakabibi na itovo se ivakarau makawa ni vakasama ena gauna e veilecayaki sara kina vakalevu na ituvaki.

Eso na tamata era nanuma ni mataqali gauna vakaoqo e gauna ni dua na cegu lailai. Ena gauna oqo ni cegu lailai, taura e vica na gauna mo vakayagataka kina na ituvaki sara ga o sotava tiko na vei ivakavuvuli yadua o sa vulica ena nomu muria na ikalawa eso. Ena totolo sara na nomu nanuma mai, ni sa bibi sara na vakararavi vua na Turaga ena nomu veisasaga taucoko mo vakalesui mai. E rawa ni o kaya vei iko ena dua na gauna ni leqa, “Na malumalumu cava ni itovo ni bula e tiko vei au sa vakayadrati mai? Na cava au sa bau cakava meu cau kina ki na leqa oqo? E tiko beka e dua na ka au rawa ni kaya se vakayacora, ka sega ni vakailasu, ka na veimuataki kina dua na iwali e veidokai vei au kei na dua tale na tamata? Na Turaga e tiko kece vua na kaukauwa. Au na yalovakacegu ka vakararavi ga Vua.”

Kevaka o sa vakayacora edua na itovo ca vua edua tale na tamata, mo na vakameautaka sara ena gauna totolo ga e rawa. Biuta vakatikitiki na dokadoka, ka vakananumi iko ni nomu kaya vakaidina “Au a cala” e vakavuqa ni dau tautauvata na kena bibi ena maroroi ni dua na veiwekani ena nomu kaya vakaoqo “Au lomani iko.”

Ni bera ni o davo mo moce, dikeva lesu na nomu siga taucoko. Tarogi iko se o se gadreva tiko mo vakasalataki mai vua na Turaga me baleta edua na itovo ca, vakasama ca, se yaloca. Me ikuri ni veivakasalataki maivua na Turaga, e rawa mo na vosa vua e dua na daunivakasala se itokani ena parokaramu, e rawa ni o nuitaka mena tukuna vakadodonu vei iko na ivakarau ni nomu vakasama.

O na dau caka cala tiko ni o veitaratara kei ira tale eso, ia na yalayala ki nai ka 10 ni kalawa e sa dua na yalayala ni nomu vakataukenitaki iko ki na nomu cala eso. Kevaka mo na vakadikeva na nomu vakanananu kei na ivalavala ena veisiga ka walia, na vakasama kei na vakilai ni ka ca ena sega ni tubu me yacova na itutu mera na vakaleqa na nomu vakuai iko tiko. Sa sega ni dodonu mo bula duadua ka tawasei mai vua na Turaga kei ira tale eso. O na rawata na kaukauwa kei na vakabauta mo na vorata kina na veika dredre ka rawai ira. E rawa ni o reki ena nomu tubu tiko ka nuitaka ni vakatovotovo kei na vosota ena vakadeitaka na tomani tiko ni veivagalalataki.

iTuvatuva ni Cakacaka

Vakaitavi ena veivakatarogi ni matabete me tiki ni nomuni soli iko ena yalodina ki na nomu dikevi iko vaka-i-iko; tomana tiko na vaqaqacotaki ni nomu veimaliwai kei ira na lewe tale eso ni Lotu

Eda rawa kece ni nanuma e dua na gauna ni da a rere meda nanuma sara kina vakakaidina na noda itovo. Na noda tovolea me levea na veigauna vakaoqori, e dua na vuna e vuqa vei keda sa yalana kina na noda vakaitavi ena Lotu. Ia, nida sa toso tiko ena parokaramu oqo ni veivakauqeti kaukauwa ena yalodina, eda sa tekivu me kila na yaga ni dikevi keda vakaikeda.

Ia oqo eda sa sega tale ni qai rerevaka na madigi eso ni dikevi keda vakaikeda ka lako mai ena itaviqaravi ena Lotu. Eda sa rawa ni marautaka kina na dina ni nona veivakavulici o Elder Joseph B. Wirthlin ena Kuoramu ni iApositolo Le Tinikarua:

“Na veivakatarogi ni bula kilikili, soqoni ni sakaramede, curuma na valetabu, kei na veisoqoni tale eso ni Lotu sa tiki taucoko ni ituvatuva e vakarautaka na Turaga me vakavukui kina na yaloda, me vukea na noda vakatorocaketaka na itovo uasivi ni dau dikeva wasoma na noda tubu, meda tiko ga kina ena salatu ni vakabauta. Na noda dau dikevi wasoma vakayalo e vukei keda meda lakova rawa na veigaunisala lelevu kei na gaunisala lalai ni bula. …

“… Eda sa rawa kece … ni kunea na vinaka ena noda rai vakatitobu ki lomada ena veigauna rokovi ni sokalou kei na masumasu ka tarogi keda ena taro rawarawa oqo, ‘Au yalodina tiko beka ?’

“Na taro ena qai yaco me yaga sara vakalevu kevaka eda sa yalodina ena noda isau ni taro ka, ke vakauqeti keda me da vakayacora na veisau eso ki na noda bula meda tiko ga kina ena salatu ni vakabauta” (ena Conference Report, Epe. 1997, 20; se Ensign, Me 1997, 17).

Ni o vakaitavi ena veimadigi oqo ni dikevi iko vakai iko, o na raica ni o na tubu ena loloma me baleti ira na tacida kei na ganeda eda veitokani ena Lotu.

Dikeva na nomu vakanananu, vosa, kei na ivalavala ena veisiga; vakadodonutaka sara vakatotolo e dua ga na cala

Nai ka 10 ni kalawa e matataka na ciqomi ni dina ni sa dodonu mo na tomana mo bula ena vei ivakavuvuli vakayalo. Kevaka o sa lako sese, veivutuni sara vakatotolo ka kerea vua na Kalou ena gauna vata oya me vakalesuya vei iko na vakacegu maivua na Nona Yalotabu. Na yalodina kei na yalomalumalumu e rawa me vakaukauwataki iko. Ena yaco mo vakila tiko vakalevu na nona voleka na Tamada Vakalomalagi ena nomu bula, ni o kerea vua me vukei iko mo savasava tiko vakayalo. O na vulica mo vakamareqeta na toso ki liu ka vosota na malumalumu e tu vei iko kei ira tale eso. Ko na vakayalia na gagadre mo veisaqasaqa kei na dua tale se kei na dua na ka. Na dikevi iko vakai iko sa yaco me dua na ivakarau ni bula ni o sereka laivi na rere ka rawa na veitemaki ena veisiga vakayadua.

Vuli kei na Kilamatata

Vulica na ivolanikalou kei na itukutuku oqo maivei ira na iliuliu ni Lotu. Vakayagataka na ivolanikalou, itukutuku, kei na taro eso oqo me lewe ni vakanananu vakatitobu, vuli, kei na volavola. Mo yalodina ka matata.

Qarauna nomu vakanananu, vosa, kei na nomuni cakacaka

“Kevaka ko ni sa sega ni qarauni kemuni vinaka, kei na nomuni vakanananu, kei na nomuni vosa, kei na nomuni cakacaka, ka muria tiko na ivunau ni Kalou, ka tiko ga ena vakabauta ni veika ko ni sa rogoca me baleta na nona lako mai na noda Turaga, me yacova sara nai tinitini ni nomuni bula, ko ni na rusa vakaidina. Oi kemuni na tamata, mo ni dau nanuma, mo ni kakua kina ni rusa” (Mosaia 4:30).

• E rawa ni rerevaki sara se veivakarusai talega kevaka o sega ni qarauna na veika o cakava tiko ni o draiva voli ena motoka. Ena vukei iko vakacava nai ka 10 ni ikalawa mo yadrava ka kidava tiko na vanua sa mua tiko kina na nomu bula?

• Vola na veika o raica tiko me baleta nomu bula. E vukei iko vakacava na nomu dikevi iko vakai iko mo levea kina na lesuvi tale ni nomu itovo veivakatotogani (ka rusa)?

Na yalo malumalumu kei na vakatulewataki vinaka ni bula

“O koya era sa kalougata kina ko ira era sa vakayalomalumalumutaki ira ga ka sega ni ra vakasaurarataki mera yalomalumalumu”(Alma 32:16).

• Na yalorawarawa mo biuta tani kina na veivakanananu ca ni bera ni ra yaco mera vakatubu leqa e dua na sala ni noda vakamalumalumutaki keda ka sega ni vakasaurarataki kina. Vola me baleta na nomu yalorawarawa mo vakayalomalumalumutaki iko. Vakatovotovotaka me dua na siga na nomu kauta laivi na veivakasama ca. Na veivakalougatataki cava e yaco mai vei iko?

Bula ena siga nikua

“Na levu ga ni rarama e tu vua e dua na tamata, na levu tale ga ni nona vakasaqara na isolisoli ni veivutuni, ka na dau tovolea vagumatua me sereki koya mai na ivalavala ca ena veigauna kece e dau sega ni yacova kina na lewa vakalou. … E laurai kina, ni nodra ivalavala ca na rerevaka na kalou kei ira na yalododonu sa dau vosoti tu ga baleta ni ra sa veivutuni ka vakasaqara vou na Turaga ena veisiga kei na veiauwa” (Bruce R. McConkie, Doctrinal New Testament Commentary, 3 vols. [1966–73], 3:342–43).

• E dua na revurevu yaga vakalevu—ki na vakasama, lomada, ka vakayalo—ni bulataki ni ivakavuvuli eso ka vakamacalataki tiko ena vei ikalawa oqo, sai koya na nomu vulica mo guilecava na siga sa oti ka vakanamata kina siga ni kua. E vukei iko vakacava nai ka 10 ni kalawa mo qarava ga na bula ni dua na auwa ena dua na gauna ni sa gadrevi vakakina?

• E vukei iko vakacava mo kila ni ko sa gadrevi mo bulataka na vei ivakavuvuli oqo ena dua ga na siga ena dua na gauna?

Tomani tiko ni veivutuni kei na veivosoti

“Ia era na vosoti ena veigauna kece ga era sa veivutuni kina, ena yalodina” (Moronai 6:8).

• Na nomu kila ni Turaga sa tu vakarau me vosoti iko ena veigauna kece o veivutuni kina ena yalodina, ena solia vei iko na yaloqaqa mo tovolea tale ena veigauna o yacokoso kina. Vola na cava o nanuma ni kena ibalebale mo veivutuni ka vakasaqara na veivosoti ena yalodina.

Tomani tiko ni nomu tubu vakayalo

“Ia oqo au gadreva mo dou yalomalumalumu, moni talairawarawa ka yalomalua; mo dou vakamasuti vakarawarawa; sinai ena yalodei kei na vosota vakadede; ka matau ena ka kecega” (Alama 7:23).

• O koya ga a cavuta mailiu na ivosavosa makawa “Na vakatovotovo e basika kina na taucoko” a sega ni tukuna na levu ni vosota e gadrevi me vakatovotovo tikoga kina. E vakadeitaka vakacava vei iko ni nomu dikeva na nomu bula ka vakadodonutaka na ka e gadrevi ena veisiga ena tomani tikoga kina na nomu yalomalumalumu kei na nomu tubu cake vakayalo?

“Ia raica, ena veisiga mai muri, … ko ira kara na lako mai ki na vanua oqo kei ira era tiko ena veivanua tale e so, io ena veivanua kecega e vuravura, raica, era na mateni ena caka cala kei na veimataqali itovo vakasisila kecega. …

“… Raica, koi kemudou kece sa caka cala, dou tu vakadua ka vakananuma, ni dou na tagi mai, ka tagi; io, dou na mateni ka sega ena waini, dou na tataivatia ka sega ena gunu kaukauwa” (2 Nifai 27:1, 4).

“Ia ni sa bogi mai era sa mateni ena cudru me vaka na tamata sa mateni ena waini; a ra sa moce vata tale kei na nodra iseleiwau” (Ica 15:22).

• Ena veitikina oqo, na tamata sa vakamacalataki ni mateni ia sa segai ena waini. O ira na bula cake tiko mai na veivakatotogani era vakatoka oqo me “vaka era mateni tu ia segai ena alakaolo” se “mateni levu ena vuku ni ituvaki ni yalo.” Vola e dua na ka me baleta na itovo ni yalo ka se tiko vei iko mo taura matua tiko kina na cudru se na itovo veivakamavoataki tale eso.

• E vukei iko vakacava na nomu dau raica lesu nomu bula ni oti edua na siga me vukei iko mo ra-wa na itovo ni yalo vaka oqo?

Vakatorocaketaki ni bula taucoko

“Au vakila ni tiko na gagadre meu vakauqeti ira Yalododonu Edaidai ena kena gadrevi me bulataki sara vagumatua na ivakavuvuli ni kosipeli ena noda bula, ena noda ivalavala kei na vosa kei na veika kece sara eda cakava; ia e gadrevi kina na tamata taucoko, na taucoko ni bula meu yalodina tiko ki na toro cake me rawa ni da lako mai ki na kila ka dina me vaka sa tiko vei Jisu Karisito” (Brigham Young, Discourses of Brigham Young, sel. John A. Widtsoe [1954], 11).

• Na tauri ni veikalawa oqo sa rawa saraga ni vakamacalataki me “bulataki vagumatua” ni ivakavuvuli ni kosipeli. E veivuke vakacava beka na nomu tu vakarau mo vakadikeva vakai iko ena veisiga ena veitagede kece—ivalavala, vosa, vakanananu, veika vakilai, kei na vakabauta—me vukei iko mo soli iko taucoko ki na vakatorocaketaki ni bula ena nomu bula taucoko?