iKalawa 11

iVakatakila ki na Tamata Yadua

iVakavuvuli Bibi: Vakasaqara ena masu kei na vakanananu vakatitobu mo kila na loma ni Turaga kei na kaukauwa mo vakayacora kina.

Ni keimami a vulica ka vakatovotovotaka na ikalawa eso ni veivagalalataki, keimami a yaco me kila ka logaloga vinaka ena dua na bula e yavutaki ena yalomalumalumu kei na ciqoma na lewa ni Kalou. Sa oti na gauna ni cudru kei na veilecayaki ni neimami dau masu ena dua na itovo ni yalo vakadrecike ni murimurilomana se tagi ena vakalomalomani koya. Keimami sa tekivu me bula ena bula ka i yaloyalo ni ivakasala vakaparofita nei Peresitedi Ezra Taft Benson: “Na taro ka dau votu vakawasoma mai ena veigauna ki na neimami vakasama, ka tara na vakanananu kei na ivalavala kece ni neimami bula, e dodonu me, ‘ Kemuni na Turaga, a cava ko ni sa vinakata meu cakava?’ (Cakacaka 9:6.) Na isau ni taro oqori ena qai lako walega mai ena Rarama i Karisito kei na Yalo Tabu. Sa ra kalougata o ira era bula tiko ka ra vakasinaiti vei rau” (“Jesus Christ—Gifts and Expectations ” Ensign, Dec. 1988, 2).

E nai ka 11 ni kalawa, keimami a cakava edua na yalayala ni bula taucoko me vakasaqara ena veisiga yadua, me kila na loma ni Turaga kei na kaukauwa me vakayacori kina. E a neimami gagadre levu duadua oya me vakatorocaketaka na kaukauwa me ciqoma kina na veidusimaki mai vua na Yalo Tabu ka bula sara me vakakina. Na gagadre oqo sa veibasai sara vakalevu kei na itovo ni yalo ka tiko veikeimami ni keimami a yali voli ena neimami vakatotogani.

Kevaka o a vakataki keimami, ni bera ni o tekivu mo vagalalataki o a nanuma ni vakanuinui, na reki, na vakacegu, kei na veivakamamautaki ena basika mai na dua na ivurevure vakavuravura. Se ivurevure oqo na alakaolo, waigaga, veiyacovi, veimau ilavo, vakayagataki ilavo vakailawaki, ivakarau ni kana tawabulabula se veivakalolomataki—se cava ga na nomu itovo vakatabakidua ni veivakatotogani—na nomu sasaga, oya mo a rawa ni bula ena dua na vuravura ka o veilecayaki, yali, ka galili voli kina. Ni ra a tovolea na tamata mera lomani iko, e rairai ko a sega beka ni rawa ni vakila. Na nodra loloma e a takiveiyaga. E sega ni dua na ka a vakaceguya rawa na viakana o a vakila. Ia, ena nomu sa mai bulataka nai vakavuvuli ni veivagalalataki na yalomu kei na nomu bula sa veisau.

O sa tekivu mo kilamatata ka vakavinavinakataka na nomu gadreva na iVakabula, o Jisu Karisito, kei na Nona itavi ki na nomu bula ka vakamareqeta na Rarama i Karisito. O sa tekivu me vakila ni o sega ni vosavosa i yalomu tiko, ena nomu sa vakila mai ni dusimaki iko tiko na nomu lewa e loma. Sabalia ka sakasaka me vaka o a vakila taumada beka, ia oqo o sa qai masu vua na Tamada ena yaca i Karisito mo sema voleka ena veiwekani vata kei koya. O sa nakita “mo dou vakasaqarai Jisu oqo, okoya era sa volavola kina na parofita kei ira nai apositolo” (Ica 12:41).

O vulica na ivolanikalou baleta ni ra sa tukuni Koya kece sara, vakabibi na iVola i Momani. Ena vuqa sara na ivakadinadina, era vakamacalataka kina na parofita ni iVola iMomani na vakasaqarai kei na kunei ni kilamatata baleta na Tamada, mai na Yalo Tabu. O sa vakatovotovotaki ira na ivolanikalou ka kunea nira sa dina taucoko. Na masu kei na vakanananu vakatitobu sa yaco me ivurevure bula ni nomu bula vou. A dau vakawaletaki tu mailiu na masu kei na vakanananu vakatitobu, ia oqo sa gagadre ni yalomu mo tekiduru e na mata i Tamamu ena mataka kei na yakavi, ka sovaraka Vua na yalomu ena vakavinavinaka me baleti Jisu Karisito kei na Yalo Tabu.

Ni o cakava nai ka 11 ni kalawa, ena yaco mo kila vakalevu cake sara ni sa mai vua na Yalo Tabu, o na ciqoma kina na kilaka se na ivakatakila ni lewa nei Tamada me baleti iko. Ena vuku ni Veisorovaki, o na taukena na kaukauwa (se loloma soliwale) mo vakayacora kina na lewa nei Tamada. O na kila ni o sa vakalougatataki ka tokoni mai vei iratou na tolu na tamata lagilagi—na Kalou na Tamada, o Jisu Karisito, kei na Yalo Tabu—eratou sa duabau ena kaukauwa kei na inaki me kauta mai vei iko na nomu tawa mate rawa kei na bula tawamudu.

O na tubu mo gumatua mo vorata rawa na veitemaki, ni ko vulica na ivolanikalou ka masu ka vakanananu vakatitobu kina. Na vulici ni kena ciqomi na ivakatakila e taura na vakatovotovo kei na vosota. E rawa ni o vakarautaki iko ena nomu vulica na veika sa tukuni oti mai vei ira na parofita kei na iapositolo, kei na nomu tovolea mo bula me vaka na nodra ivakavuvuli. E rawa ni o vakavakarau ena nomu sa vakarau tu mo ciqoma, vola, vakasamataka, ka vakamuria na veivakauqeti o sa ciqoma. Ni o vakaraitaka na nomu vakavinavinaka vua na Turaga ena vuku ni veivakalougatataki o sa ciqoma, ena vakalevutaki na nomu noke ni ciqoma na veidusimaki.

Ni o vagalalataki iko mai na nomu vakatotogani, sa na yaco me rawa vakalevu cake mo ciqoma na veidusimaki ni Yalo Tabu. A vakavulica o Elder Dallin H. Oaks ena Kuoramu ni iApositolo Le Tinikarua: “Na Yalo Tabu e na taqomaki keda mai na veivakacalai, ia meda vakila na veivakalougatataki vakasakiti o ya, sa dodonu meda dau cakava tikoga na veika e ganita me na tiko ga kina kei keda na Yalo. Sa dodonu meda talairawarawa ki na ivakaro, masuta na veidusimaki, ka tiko ena soqoni ni Lotu ka vakaivotavota ena sakaramede ena vei Sigatabu. Ia meda kakua ni cakava e dua na ka me na vagolea tani na Yalo. Vakabibi, meda levea na iyaloyalo vakasisila, na alakaolo, tavako, kei na waigaga ni veivakamatenitaki, ka dau levea ena veigauna kece sara na voroki ni lawa ni tiko savasava. Meda kakua ni vakacuruma se cakava kina yagoda na veika ena vakasuka kina vei keda na Yalo ni Turaga, ka laivi keda me sega na noda itataqomaki vakayalo mai na veivakacalai” (ena Ripote ni Koniferedi, Oko. 2004, 49; se Ensign, Nove. 2004, 46).

Na masu kei na vakanananu vakatitobu e sa wainimate kaukauwa ni rere kei na lomabibi. Ni “dou sa sega ni yaco rawa e keri kevaka me sega na vosa i Karisito kei na dei ni nomudou vakabauti Koya, ka vakararavi vakatabakidua sara ki na nona vinaka o Koya sa kaukauwa me veivakabulai” (2 Nephi 31:19). Ena qai rawa ga ni o tomana tiko mo toso ki liu ka tubu cake vakayalo, ena nomu lako mai vua na Tamada ena vukui Jisu Karisito, ena Yacana, kei na Yalona ka sa tiko kei iko. Nai ka 11 ni kalawa e matataka e dua na yalayala, mo vakatorocaketaka na nomu veiwekani vata kei na Kalou ena dua na vakatovotovo ni bula taucoko ena vakasaqarai ni veidusimaki e veisiga kei na talairawarawa ki na ivakaro.

iTuvatuva ni cakacaka

Lako mai vua na Tamada ena yaca i Jisu Karisito mo rawata na veidusimaki kei na kaukauwa ena nomu masu vakai iko kei na vakanananu vakatitobu; ciqoma ka vulica na nomu veivakalougatataki vakapeteriaki

Ena gauna ni veivagalalataki, e vuqa vei keimami a vulica me dau yadra vakamataka ka vakasaqara e dua na gauna vakanomodi ni vuli kei na masu. Kevaka o se bera ni cakava vakakina, lokuca e dua na gauna ni masu kei na vakanananu vakatitobu ena mataka lailai. Ena gauna oqori sa rawa mo vakaliuca taumada na Kalou, ni bera ni o vakaliuca edua tale se dua na ka ena loma ni siga. Tekiduru kevaka e vakatara na yagomu. Masu, vakavuqa ena domo i levu, ki vua na Tamada, ena nomu vakasaqara na Yalo me tuberi iko (raica na Roma 8:26). Qai vuli, ka vakayagataka na ivolanikalou kei na nodra ivakavuvuli na parofita ni gauna oqo me dusimaki kina na nomu vakanananu vakatitobu. Raicalesuva vakawasoma na nomu veivakalougatataki vakapeteriaki. Vakasamataka vakatitobu ena masumasu na veidusimaki o sa kunea kina. (Kevaka o se sega ni ciqoma na nomu veivakalougatataki vakapeteriaki, veitalanoa kei na nomu bisopi me rawati e dua.)

Na volavola sa na dua tale na iyaragi kaukauwa sara ni nomu vakamacalataki iko kei na nomu dikeva na kemu yaga, ni o vola na nomu vakasama kei na itovo ni yalomu ena dua na ivolaniveisiga. E rawa talega mo na toqa na ivakatakila ni ivakasala, veivakacegui, kei na yalomatua e lako mai vua na Yalo Tabu.

Ni sa mai cava na gauna talei oqo ni masu kei na vakanananu vakatitobu lo, kakua ni cegu ena masu tikoga. Na masu lo, mai na boto ni yalomu kei na nomu vakanananu, ena yaco me ivakarau tu ni nomu vakasama ena nomu veisiga kece. Ni o dau veitaratara vata kei ira tale eso, ni o vakatulewa, ni sotavi na veitubuyaki ni itovo ni yalo ka yaco mai na veitemaki—kere i vakasala mai vua na Turaga. Sureta ka vakasaqara na Yalona me tikoga vata kei iko e veigauna, me rawa ni o dusimaki mo cakava na ka dodonu. (Raica na Same 46:1; Alama 37:36–37; 3 Nifai 20:1.)

Dau vakanananu vakatitobu ena loma ni siga taucoko ena ivolanikalou kei na veivola veivakauqeti tale eso; tomana tiko na dau masu

Ena vuqa sara na sala, e yaco kina nai ka 11 ni kalawa me isema donu tikoga mai, ni nomu sasaga mai nai ka 10 ni kalawa, mo vakila tikoga kina na dina ena nomu bula. Ni ko tuvanaka na nomu siga, ka vakayacora na nomu itavi ena loma ni siga, ka cegu ena nomu idavodavo ena bogi, mo masuta tikoga na Kalou ena yalomu. E dua na vakasama o ya, mo taura e dua na vakasama mai na veika o wilika ena nomu vuli ena mataka, ka vakanananu vakatitobu kina vakawasoma ena loma ni siga ni o qarava tiko na nomu itavi. Na vakatovotovo oqo ena vukei iko mo maroroya na nomu vakanananu me rau duavata tiko kei na dina.

Ena itovo vakatamata, eda sa dau sega ni lewai keda rawa tu vakavinaka, ia ena noda rai vei Jisu Karisito ka raica na ivakaraitaki ka sa virikotora tu o Koya, ko na kunea na yalomalumalumu mo tomana tikoga na nomu soli iko vua na Tamada. Me vaka na iVakabula, ena rawa mo kaya vakaidina “Me yaco ga na nomuni lewa” (Maciu 26:42) ena loma ni siga taucoko. Na Rarama i Karisito ena tuberi iko ka vakarautaki iko mo ciqoma na veitokani ni Yalo Tabu. Ena yaco me vakataudeitaki tale na veitokani ni Yalo Tabu, ka na vakalevutaki na nomu rawa ni vakila ka vakadinadinataka na dina.

Vuli kei na Kilamatata

Vulica na ivolanikalou kei na itukutuku oqo mai vei ira na iliuliu ni Lotu. Era na vakatubura na nomu kilaka ka na vukei iko mo vuli. E rawa ni o vakayagataka na ivolanikalou oqo, itukutuku, kei na taro me lewe ni vakanananu ena masumasu vakatitobu, vuli yadudua, kei na veivosaki vakailawalawa.

Toro voleka vua na Turaga

“Dou toro voleka mai vei au kau na qai toro voleka yani vei kemudou; dou vakasaqarai au vagumatua dou na qai kunei au; dou kerekere ka na soli vei kemudou; dou tukituki ka na dolavi vei kemudou” (V&V 88:63).

• Na Turaga e rokova na nomu lewa kei na nomu galala ni digidigi. E vakatara vei iko mo torovi Koya ena yalo e sega ni vakasaurarataki. E toro voleka vei iko ni ko sureti Koya me voleka mai. Vola me baleta na sala o na toro voleka yani kina ki vei Koya ena siga ni kua.

Vakavinavinaka

“Dou masu tikoga ka kua ni mudu. Dou ia na vakavinavinaka ena vuku ni ka kecega: ni sa loma ni Kalou oqo vei kemudou ena vuku i Karisito Jisu. Dou kakua ni bokoca na Yalotabu” (1 Cesalonaika 5:17–19).

• Ni o dau nanuma mo dau vakavinavinakataka na veika kece sara ena nomu bula, io na veika mada ga o sega ni kilamatata, sa na qai rawa mo maroroya kina na veitaratara tiko vata kei na Kalou, ka vakatoka o Paula me masu “ka kua ni mudu.” Tovolea mo vakavinavinaka vua na Kalou ena siga taucoko. E vakayacoka vakacava kina nomu voleka vua na Yalo na vakatovotovo oqo?

Kana magiti ena vosa i Karisito

“Era sa vosa na agilosi ena kaukauwa ni Yalo Tabu; o koya, e ra sa vosataka kina na vosa i Karisito. O koya, au sa kaya kina vei kemudou, mo dou kana magiti ena vosa i Karisito; ia raica, na vosa i Karisito sa tukuna vei kemudou na veika kece mo dou kitaka” (2 Nifai 32:3).

• Ena tikina oqo, e vakavulica o Nifai ni o kana magiti ena vosa i Karisito, na vosa oqo ena dusimaki iko ena veika kece o gadreva mo kila ka cakava. Raitayaloyalotaka se na vakacava mo drau sala vata ka veitalanoa vata kei Jisu Karisito ena loma ni siga taucoko. Vola na veika o vakila ni o vakananuma vakatitobu na iyaloyalo oqo.

iVakatakila yadua

“A tukuna na iVakabula ‘Au na tukuna ki na nomu vakasama kei na vu ni yalomu, ena Yalo Tabu.’ (V&V 8:2, vakaikuritaki). … Nai ivakatakila ki na vakasama e dau matata vakaoti. Na veivosa matailalai e rawa me rogoci se vakilai, ka volai me vaka ga e a cavuqaqataki na ivakaro oya. Ia na veitaratara kei na uto e dau dua ga na veiuqeti raraba” (Richard G. Scott,“Helping Others to Be Spiritually Led,” Doctrine and Covenants and Church history symposium, August 11, 1998, 2).

• Ni tubu cake na nomu kilamatata na ivakatakila ki na tamata yadua, ko na kila vakalevu cake kina, ka vakawasoma ena veisala duidui e vuqa. Vola me baleta na ivakarau o sotava kina na veivakauqeti kei na ivakatakila mai vua na Turaga.

“Au sa kaya vei kemuni [na veika oqo au sa vosataka ] sa vakatakilai ira vei au na Yalo ni Kalou. Raica, au a lolo ka masu ena vuqa na siga meu kila kina na veika oqo. Ia oqo au sa kila ni ra sa ka dina; ni sa vakatakila vei au na Turaga na Kalou ena kaukauwa ni nona Yalo Tabu; ia oqo na yalo ni vakatakila sa tiko vei au” (Alma 5:46).

• E a vakadinadinataka o Alama ni gauna a masu ka lolo kina, a vakalevutaki na nona rawa ni ciqoma na ivakatakila. Na nomu vakuwai iko mai na nomu itovo veivakatotogani sa rawa ni okati me dua na ivakarau ni lolo. Vola me baleta na sala e vakalevutaki kina na nomu rawa ni ciqoma nai vakadinadina ena nomu vakuwai iko.

“Na vakasama ni wiliki ni ivolanikalou, ka rawa me veimuataki yani kina veivakauqeti kei na ivakatakila, e tadolava na katuba ki na dina, ni dua na ivolanikalou e sega ni yalani na kena ibalebale ki na gauna e a volai kina, ia e rawa talega ni oka kina na kena ibalebale nikua vei koya e wilika. Me kena ikuri, na wili ivolanikalou ena rawa me veimuataki talega yani ki na ivakatakila ena gauna oqo ena veika cava tale e gadreva na Turaga me vakatakila vei koya e wilika ena gauna o ya. Keitou sega ni rawa ni vakabibitaka vakasivia na tikina oqo, ena neitou tukuna ni ivolanikalou e rawa ni Urimi kei na Cumimi me rau veivuke vei keda yadudua meda ciqoma na ivakatakila kina tamata yadua” (Dallin H. Oaks,“Scripture Reading and Revelation,” Ensign, Janu. 1995, 8).

• Na vulici ni vosa ni ivolanikalou e sa vaka na vulici ni dua na vosa vulagi. Na sala vinaka duadua ni vuli sai koya mo dau vakaogai iko kina, ka wilika ka vulica ena veisiga. Vola me baleta e dua na tiki ni ivolanikalou e sa tadola vei iko ka sa yaco vei iko e dua na ivakatakila.

Ciqoma tiko na ivakasala mai vua na Turaga

“Dou kakua kina ni segata mo dou vakasalataka na Turaga, ia mo dou muria ga na ivakasala mai na ligana. Ia raica, dou sa kila vakai kemudou ni sa veivakasalataki ko koya ena yalomatua, kei na lewa dodonu, kei na loloma cecere levu, ena nona ibulibuli kecega” (Jekope 4:10).

• Na noda masu a sega beka ni vakayacoka mailiu me baleta na noda vakayagataka vakalevu cake na gauna ena noda vakasalataka na Turaga—ena noda tukuna Vua na ka eda vinakata—mai na kena vakasaqarai na Nona lewa ki na noda vakatulewa kei na ivalavala. Vakasamataka mada e dua na gauna ni masu wale tikoga oqo. E a sinai tu beka ena ivakasala vua na Turaga, se mai vua na Turaga? Vola me baleta na nomu lomasoli mo vakatudaliga ka ciqoma na Nona ivakasala vei iko.