iVakamacala Taumada

Ke o iko vakai iko o sotava tiko na veivakatotogani se veimaliwai vata kei na dua e vakaoqori, na idusidusi oqo ena rawa ni dua na veivakalougatataki ki na nomu bula. Na Tinikarua na iKalawa ni Vueti mai me kua ni Daumateni sa vakarautaki tu ki na ituvatuva vakacakacaka ni ivunau, ivakavuvuli, kei na vakabauta eso ni Lotu i Jisu Karisito ni Yalododonu Edaidai. Era sa biu tiko ena itekivu ni iwase yadua ni ra sa ivakavuvuli bibi sara. Na idusidusi oqo e na vukei iko mo vulica na ivakarau mo bulataka kina na vei ivakavuvuli bibi oqo; e rawa ni veisautaka na nomu bula.

Na idusidusi oqo e kena inaki me dua na ivola ni cakacaka kei na ivurevure vei ira na lewe ni ilawalawa veitokoni ni veivagalalataki mai veivakatotogani ka tokoni mai na Qaravi ni Matavuvale ni YDE. Ia, na ivunau kei na ivakavuvuli e vakavulici sa rawa talega ni yaga sara vei ira era bula ena vanua ka sega ni rawa kina na vakaitavi ena dua na ilawalawa ni veitokoni. Na idusidusi oqo e rawa ni vakayagataki mai vei ira na tamata era vaqara mera veisautaka na nodra bula ka vakauasivi vei ira era sa tu vakarau me ra cakacaka vakayadua kei na bisopi se dua na kenadau ena veivakasalataki.

O ira na tagane kei na yalewa era sa vosota oti na revurevu ca ni so na veivakatotogani, ka sa sotava oti na veivagalalataki era a sureti mai na Qaravi ni Matavuvale ni YDE me ra wasea na veika era sa sotava ena nodra vakayagataka na vei ivakavuvuli oqori ena nodra bula. Na nodra ivakarau ni rai (na “o keimami” ena idusidusi oqo) e vakayagataki me vakaraitaki kina na yaluma ni veivakatotogani kei na reki ni nodra vakabulai kei na veivagalalataki. Sa rawa mo kunea na veivakacegui, veitokoni, kei na ivau ni duavata vata kei ira.

O ira na iliuliu ni Lotu kei na kenadau ena veivakasalataki, era sa okati tale ga ena volai kei na kena vakatorocaketaki na idusidusi oqo. Na umanivata ni nodra yalomatua kei na kilaka na dauvolaivola e vuqa oqo, e vakarautaka e dua tale na ivakadinadina ni dina ni Veisorovaki i Jisu Karisito, kei na kena rawa ni veivagalalataki mai na veivakatotogani.

Keimami sa kila oti na rarawa levu, ia keimami sa raica talega na kaukauwa ni iVakabula me vukica na neimami vakadrukai vaka ca, ki na lagilagi ni qaqa vakayalo. Oi keimami ka a bula tu ena lomaocaoca e veisiga, nuiqawaqawa, rere, kei na cudru veivakarusai sa mai sotava tu oqo na reki kei na vakacegu. Keimami sa vakadinadinataka na cakacaka mana ena neimami bula kei na nodra bula na tani era a tacori ena itovo veivakatotogani.

Keimami sa sauma oti na isau e ca sara ena neimami vakararawataki keimami ena vuku ni neimami itovo veivakatotogani. Ia na veivakalougatataki sa sovaraki mai, ni keimami taura na veikalawa yadua ki na veivagalalataki. Ni yaco mai na veivakayadrati vakayalo, keimami segata e veisiga me vakatorocaketaka na neimami veiwekani kei na Tamada Vakalomalagi kei na Luvena, o Jisu Karisito. Ena vuku ni Veisorovaki i Jisu Karisito, keimami sa vakabulai.

Keimami sureti kemuni ena taucoko ni neimami kauwai kei na loloma moni duavata kei keimami ena dua na bula lagilagi ni galala ka taqomaki, e ovici tu ena loloma i Jisu Karisito, na noda Dauveivueti. Keimami kila mai na veika keimami dui sotava ni o rawa ni sereki mai na ivesu ni veivakatotogani. Se mani vakacava na nomu vakila ni o lako sese ka sega na nomu inuinui, o iko e dua na luve ni Tamada Vakalomalagi dauloloma. Kevaka o sa guilecava na dina oqo, na vei ivakavuvuli ka vakamacalataki ena idusidusi oqo ena vukei iko mo kunea tale ka vakotora ki na lomamu sara e loma. Na vei ivakavuvuli oqo ena rawa ni vukei iko mo lako mai vei Karisito ka vakatarai Koya me veisautaki iko. Ni ko sa bulataka na vei ivakavuvuli oqo, o sa na vakayagataka na kaukauwa ni Veisorovaki ka na sereki iko mai na veivakabobulataki na Turaga.

Eso na tamata era raica na veivakatotogani me dua ga na itovo ca ka rawa ni valuti ena kaukauwa ga ni igueloma, ia e vuqa na tamata era sa soli ira taucoko kina dua nai tovo ni bula se ki na dua na ka ni veivakatotogani, ka ra sa sega ni rawa ni vakuai ira mai kina. Era vakayalia na rai donu kei na vakilai ni veika eso e dodonu me vakaliuci ena nodra bula. E sega tale ni dua na ka e bibi vakalevu cake mai na kena vakamamautaki na gagadre. Ni ra tovolea me ra vakuai ira, era vakila na gagano kaukauwa ni yago, vakasama, kei na lomadra. Ni ra sa vakamatautaka mera digidigi cala, era kunea ni nodra rawata me ra digitaka na dodonu sa vakalailaitaki se yalani. Me vaka a vakavulica o Peresitedi Boyd K. Packer ena Kuoramu ni iApositolo Le Tinikarua: “Na veivakatotogani e na rawata me tawasea na vakatulewa ni tamata ka na rawa ni bokoca na galala ni digitaka na dodonu. E rawa ni kauta tani mai vua e dua na kaukauwa me vakatulewa” (ena Conference Report, Oko. 1989, 16; se Ensign, Nove. 1989, 14).

Na veivakatotogani e rawa ni okati kina na vakayagataki ni ka me vaka na tavako, alakaolo, kofi, ti, kei na wainimate (ka solia o vuniwai kei koya e tabu vakalawa), kei na itovo me vaka na veimau ilavo, veivakalolomataki, saravi ni iyaloyalo vakasisila, na veimoceri sega ni veiganiti, kei na leqa eso ka vu mai na kana. Na waigaga kei na itovo vakaoqo e vakalailaitaka na noda rawa ni vakila na Yalotabu. Era vakacacana na bulabula ni yago kei na vakasama kei na veimaliwai, na lomada, kei na bulabula vakayalo. A vakavulica o Elder Dallin H. Oaks ena Kuoramu ni iApositolo Le Tinikarua: “Sa dodonu me da levea na itovo e dau veivakatotogani. Na ka ga edau veivakatotogani e na dau vakamalumalumutaka na noda vakatulewa. Na noda vakalaiva na gagadre veirawai, ka vu mai na ivurevure cava ga ni veivakatotogani me buturaka na noda vakatulewa, sa sotavi sara ga kina na inaki nei Setani, ka vakacalai na nei Tamada Vakalomalagi. Oqo e cavuti ki na veivakatotogani ni waigaga (me vakataka na nakotiki, alakaolo, nikotini se kefini), vakatotogani ki na ivalavala me vaka na veimau ilavo, kei na so tale na itovo ni veivakatotogani. Eda rawa ni levea na veivakatotogani ena muri ni ivakaro ni Kalou” (“Free Agency and Freedom,” Brigham Young University 1987–88 Devotional and Fireside Speeches [1988], 45).

Ena yalomalumalumu kei na yalodina ka kaciva na Kalou kei na so tale me veivuke, sa rawa ni o uabaleta na nomu vakatotogani ena vuku ni Veisorovaki i Jisu Karisito. Me vaka ga ni keimami sa vagalalataki mai, sa na rawa talega vei iko, ka marautaka na veivakalougatataki kece ni kosipeli i Jisu Karisito.

Kevaka o siqema ni ko sa vakatotogani ka o vakila edua sara mada ga na gagadre lailai mo sereki, keimami sa sureti iko mo duavata kei keimami ena vulici kei na bulataki ni ivakavuvuli ni kosipeli i Jisu Karisito me vaka era vakavulici ena idusidusi oqo. Keimami vakadeitaka vei iko ni kevaka o na muria na salatu oqo ena yalodina, ko na kunea na kaukauwa o gadreva mo vagalalataki kina mai na veivakatotogani. Ni o bulataka vakayadua sara na ivakavuvuli e tinikarua oqo ena yalodina, ena vaqaqacotaki iko na iVakabula ka ko na qai “kila na dina, ia na ka dina ena sereki kemudou” (Joni 8:32).