iKalawa 6

Na Veisau ni Yalo

iVakavuvuli Bibi: Mo tuvakarau me kauta tani vei iko na Kalou na malumalumu kecega ni nomu itovo ni bula.

Ni oti mai na veivakasavasavataki dredre ni loma kei na yaloi keimami mai nai ka 4 kei nai ka 5 ni kalawa, e vuqa vei keimami a kurabui ena veisau a yaco vei ira. Keimami a masu sara vagumatua, vakananuma vakawasoma na ivolanikalou, ka maroroya tiko e dua na ivolaniveisiga. Keimami a vakavakarau me cakava ka maroroya na veiyalayalati tabu ena neimami dau tiko ena soqoni ni sakaramede.

Ni keimami a taura nai ka 5 ni kalawa, e vuqa a sota vata kei ira na nodra bisopi ka va-qara na veivuke me veivutuni. E vuqa vei keimami a raica nira sega ni temaki vakaukauwa sara mai na nodra vakatotogani ka sega talega ni vakawasoma. Eso vei keimami era sa galala sara ga mai na nodra vakatotogani. Eso vei keimami era vakataroga se cava era gadreva tale kina na vo ni ikalawa, nira sa raica na veisau levu vakaoqo ena nodra ivakarau kei na nodra bula.

Ni toso tiko na gauna, keimami a raica ena neimami vakuwai keimami tiko e vaka me laurai vakalevu cake na neimami malumalumu, ka keimami raica ga o keimami. Keimami a tovolea me lewa na vakanananu ca kei na nanuma, ia era a basika tikoga mai, me vakarerea se vakacacana na neimami bula vou ni vakuwai keimami kei na qaravi itavi ena Lotu. O ira era sa taura dei na yaga vakayalo ni vakalesui mai era uqeti keimami me kila, ni dina ga ni totoka tu na veisau ni bula e taudaku, e vinakata me vakalougatataki keimami vakalevu sara na Turaga. Era vukei keimami na itokani me raica ni kevaka me keimami vinakata me kua ni levei walega na neimami vakatotogani ia me vakayali sara ga na gagadre me lesuvi tale, e dodonu me sotavi e dua na veisau ni Yalo. Na veisau ni yalo se gagadre oqo sai koya na inaki ni i ka 6 ni kalawa.

“E rawa vakacava?” o na taroga beka. “Ena rawa vakacava meu tekivu me rawati e dua na veisau?” Kakua ni yalolailai ena itovo ni yalo vakaoqo. Nai ka 6 ni kalawa, me vaka na ikalawa eso sa oti yani, ena vakilai beka me dua na bolebole e veiluvuci. Ena mosi beka, ka o na vakatusa vata kei keimami, ni kena kilai ka vakatusai na malumalumu ni nomu itovo ni bula e nai ka 4 kei nai ka 5 ni kalawa, e sega ni kena ibalebale ni o sa vakarau tu mo biuti ira tani. O na rawa ni kila ni ko se kubeta tikoga na ivalavala makawa ni sotavi kei na rawai ni vei dredre ni bula—ia ka vakalevu cake sara ena gauna oqo ni ko sa na biuta tani na nomu itovo veivakatotogani.

E rairai, na ka veivakayalomalumalumutaki duadua mo tusanaka sai koya ni se tikoga na gagadre dokadoka mo veisau ka sega ni veivuke kina na Kalou. Nai ka 6 ni kalawa e kena ibalebale oya mo solia vua na Kalou na ivovo kece ni dokadoka kei na murimuri-lomamu. Me vaka nai ka 1 kei nai ka 2 ni kalawa, na kena i ka 6 ni kalawa e gadrevi iko mo na vakayalomalumalumutaki iko ka tusanaka na nomu gadreva na kaukauwa ni veivueti kei na veivakavoui i Karisito. Ko sa raica, ni nona isoro ni veivakaduavatataki sa rawa kina vei iko mo vakacavara kina na veikalawa yadua me yacova mai oqo. E sega ni vakuwai kina nai ka 6 ni ikalawa.

Ni o sa lako mai vei Jisu Karisito, ka vakasaqara na veivuke ena ikalawa oqo, ko na sega ni tale lala. Kevaka mo vakararavi Vua ka vosota tiko, ko na raica na nomu dokadoka ni sa na vakaisosomitaki mai vakamalua ena yalomalumalumu. Ena waraki iko ena vosota o Koya me yacova ni ko sa oca ena nomu sasaga taudua me veisau, ia ena kena gauna totolo ga o vuki ki vua ko na vakadinadinataka tale na nona loloma kei na kaukauwa ena vukumu. Nomu sega ni via biuta tani nai vakarau makawa ni itovo, ena vakaisosomitaki ena vakasama e tadola, ni vakatututaka vakamalua na Yalo ni tiko e dua na ivakarau ni bula vinaka cake. Na nomu rerevaka na veisau, ena seyavu ni o kila ni Turaga e kila na mosi kei na dredre ni cakacaka e gadrevi kina.

Ena gauna sa vakayacoka kina na iwalewale ni lako mai vei Karisito ena yalomu, ko na kunea ni vakabauta lasu ka a uqeta mai na veiyasana ca,sa vakaisosomitaki mai vakamalua ena dina. Ko na tubu ena kaukauwa ni o tomana tiko na nomu vulica na vosa ni Kalou ka vakasamataka matua na kena na bulataki yadudua. Mai na nodra ivakadinadina na tani, na Turaga ena vukei iko mo vulica na ka dina, ni o sa sega ni yawa mai na nona kaukauwa me veivakabulai. Na gagadre mo beitaki ira na tani ena vuku ni ituvaki ni nomu itovo ni bula, se mo vakaiulubaletaka na nomu sala mo lako tani mai na veisau ni Yalo, ena vakaisosomitaki ena gagadre mo na soli itukutuku vua ka talairawarawa ki na Nona lewa. Ena gusu i Isikeli na parofita, a kaya kina na Turaga, “Au na solia talega vei kemudou na yalo vou … kau na vakacuruma ki na lomamudou na yalo vou: au na kauta tani talega maivei kemudou na yalo vatu ” (Isikeli 36:26).

E vinakata na Turaga me vakalougatataki iko me veisau nomu gagadre ka na vakaduavatataki iko Vua ena vakasama kei na yalo, me vaka ga e Rau sa duabau kei Tamana. E vinakata o koya me solia vei iko na vakacegu ena na nomu vakatikitikitaki iko tani mai vua na Kalou na Tamada, na veivakatikitikitaki ka vakavuna na yalo rere ka cau ki na nomu itovo veivakatotogani. E vinakata o Koya, me mana eke ena gauna oqo, e nomu bula na Veisorovaki.

Ni o soli iko ki na veivakauqeti ni Yalo ka rai vua na iVakabula mo vakabulai, sega walega mai na veivakatotogani ia mai na malumalumu ni itovo ni bula, o rawa ni vakadeitaka ni na dua na gagadre se ivakarau vou ni bula ena tubu mai na yalomu e vakarau tu. Na gagadre ni lomada me vakatabui mai vua na Kalou, ena vakarautaki iko ki na dua na veisau ni nomu bula sara ga. E dua na ivakamacala uasivi duadua ni cakacaka oqo e rawa ni kune ena vosa oqo nei Peresitedi Ezra Taft Benson:

“Na Turaga e dau cakacaka mai loma ki tuba. Na vuravura e dau cakacaka mai tuba ki loma. Na vuravura ena kauta tani na tamata mai na vanua vakasisila. O Karisito e kauta tani na vakasisila mai vei ira na tamata, ka ra qai kauti ira tani mai na vanua vakasisila. Na vuravura ena moica na tamata ena veisautaki ni vanua era vakaitikotiko kina. O Karisito e veisautaka na tamata, ka yaco mera qai veisautaka na vanua era vakaitikotiko kina. Na vuravura ena veisautaka na itovo ni tamata, ia o Karisito ena veisautaka na ituvaki ni tamata. …

“O koya meda qai vakadeitaka ni o Jisu sa Karisito, digitaka mo muri Koya, mo veisau ena Vukuna, liutaki maivei Koya, daugadrevi Koya, ka sucu tale” (ena Ripote ni Koniferedi, Okot. 1985, 5–6; se Ensign, Nov. 1985, 6–7).

iTuvatuva ni Cakacaka

Mo yalorawarawa ni vakatara nai Vakabula me saumaka na lomamu; vakaitavi ena veitokani vata kei Karisito ena nomu dau tiko ena Wilivola ni Sigatabu kei na iSoqosoqo ni Veivukei se soqoni ni matabete

Ena gauna eda a papitaiso kina, e vica wale sara vei keda a taura dei na cakacaka dina ni saumaki mai, ka kovuta na bula taucoko. Ia, o Peresitedi Marion G. Romney ena Mataveiliutaki Taumada a vakamacala vakamatata sara kina: “Ni dua e saumaki dina sara, na gagadre ni veika e veisaqasaqa kei na kosipeli i Jisu Karisito sa vakamatei dina sara. Ka sa vakaisosomitaki kina na loloma vua na Kalou, ena yalo tudei ka guta me muria na nona vunau” (ena Ripote ni Koniferedi, Koniferedi ni iWasewase e Guatemala 1977, 8).

Ni o sotava tiko na cakamana ni veivagalalataki—taumada mai nai tovo veivakarusai ni veivakatotogani qai tarava yani na malumalumu ni itovo ni bula—ko na qai vakila na saumaki dina. Ko sa na tekivu vakayadrati, mo kilai yalomu mai me vaka ka yaco vua na gone cidroi (raica na Luke 15:17). Ko na tekivu vakila mai, ni lesu tale ki na matanitu nei Tamada Vakalomalagi, e sega ni dodonu ga mo yadra, ia mo tucake mai ka vakatarai Jisu Karisito me nomu Dauveivueti.

Ni ko solia na yalomu vua na Kalou ka tubu mo qaqaco ena yalomalumalumu, na nomu gagadre me kakua ni tokaruataki nai tovo makawa sa na qai vakadeitaki tiko ga mai. Ni o sa sereki mai na veivakabobulataki ni veigauna sa oti, ko na vakila vakalevu cake na logaloga vinaka ena kedra maliwa na tacimu kei na ganemu ena loma ni Lotu. O na raica ni o na gadreva mo lesu tale ka vakasoqoni me vaka e dua na luve ni Kalou ka okati kemuni vata ena taucoko ni veitokani ena kedra maliwa na sipi ni Nona lomanibai (raica na 1 Nifai 22:24–26; Mosaia 27:25–26; Mosaia 29:20; Ilamani 3:35).

Mo yalorawarawa mo veisau me rawa ni vagalakataki na veika e sega ni taucoko ena kaukauwa ni Kalou.

Se o vakatotogani ena alakaolo, waigaga ni veivakamatenitaki, veimau ilavo, iyaloyalo vakasisila, ivakarau ni kana veivakarusai, vakayagataki ilavo vakaveitalia, se e dua tale na itovo se iyau me matataka na nomu gadreva mo vuni mai na lomaocaoca se bolebole ni nomu bula, ko na qai rawa ni kila ni veika kece e tekivu ena nomu vakasama kei na yalomu. Na veivakabulai talega e tekivu e na nomu vakasama kei na yalomu. Ni o yalorawarawa mo veisau ena nomu lako mai vei Jisu Karisito, o na kila kina na Nona kaukauwa me veivakabulai.

Ena nomu taura nai ka 6 ni kalawa, o vakadeitaka tale kina na nomu yalayala mo vakuwai iko mai na veivakatotogani makawa, ena dua na veimaliwai titobu kei na iVakabula, o Jisu Karisito, kei na Tamana, ka a talai Koya mai. Ko sa digitaka mo tamata yalomatua me vaka na parofita gone o Momani (raica na Momani 1:15). Ka o tomana tikoga na nomu ciqoma ni Kalou sa dodonu me ka bibi duadua ena nomu bula me rawa ni vakabulai iko mai na malumalumu ni vakanananu, vosa, kei na ivalavala.

Vuli kei na Kilamatata

Na vei ivolanikalou kei na itukutuku oqo mai vei ira na iliuliu ni Lotu e rawa me vukei iko mo taura nai ka 6 ni kalawa. Vakayagataka na ivolanikalou oqo, kei na taro me lewe ni vakanananu vakatitobu, vuli, kei na volavola.

Solia yani na nomu ivalavala ca kece

“Sa kaya na tui … io a cava me’u kitaka meu sucu vou kina vua na Kalou, me cavuraki kina na yalo ca mai na lomaserequ, ka ciqoma na Yalona, ka me’u vakasinaiti ena marau. … Au na solia yani na veika kece au sa taukena … me rawa ni’u ciqoma kina na marau levu oqo. …

“… A sa tekiduru na tui ka cuva sobu vua na Turaga; io, a sa cuva vakatoboicu ki na qele, ka masu vagumatua, ka kaya:

“Oi kemuni na Kalou … ka’u na veivutunitaka na noqu ivalavala ca kecega me’u kilai kemuni, ka me’u vakaduri cake mai na mate, ka vakabulai ena siga mai muri” (Alama 22:15, 17–18).

• Wilika tale na Alama 22:15, 17–18 vakavinaka. Na cava soti e vakataotaka—oka kina na lomamu kei na ka o vakila—na nomu biuta tani yani “na [nomu] ivalavala ca kece” ka ciqoma vakataucoko na Yalo ni Turaga?

Vulici ni yalomalumalumu

“Ka kevaka era na lako mai vei au ko ira na tamata, au na vakaraitaka vei ira na nodra malumalumu. Au sa solia vei ira na tamata na malumalumu mera vakayalomalumalumutaki ira kina; ia sa rauti ira vinaka na tamata kece ga era sa vakamalumalumutaki ira vei au na noqu loloma soli wale; ni kevaka era sa vakayalomalumalutaki ira vei au, ka vakabauti au, au na qai vakayacora me vu ni nodra kaukauwa na veika malumalumu” (Ica 12:27).

• Ena vuku nida sa ivota mate ka sega ni taucoko sara, eda sa rawai kece ena malumalumu e vuqa. Ena tikina oqo, e vakamacalataka kina na Turaga na Nona inaki ka vakatara kina vei keda meda sotava na bula vakayago ka sotakaya na vei malumalumu oqori—me ra vukei keda me da yalomalumalumu. Ia mo raica, ni o keda ga eda digitaka meda vakayalomalumalumutaki keda. E yaco vakacava na nomu tu vakarau tu e nai ka 6 ni ikalawa me tiki ni nomu vaka yalomalumalumutaki iko?

• Vola eso na nomu malumalumu ni itovo ni bula, ka vola e yasana na kaukauwa era rawa ni yaco me vakakina ni o lako mai vei Karisito.

Vakaitavi ena veitokani vata ena Lotu

“Ena vuku ni ka oqo kau sa tekiduru kina vei koya na Tama ni noda Turaga ko Jisu Karisito

“O koya era vakayacani kina na mataqali kecega mai lomalagi kei vuravura,

“Me solia vei kemudou ko koya, me vaka na kena levu ni nona vinaka, me vakaukauwataki kemudou ena Yalona mo dou kaukauwa e loma;

“Me tiko ga ena lomamudou na Karisito ena vakabauta; mo dou vakawakana ka tauyavutaki ena loloma,

“Ka rawata kina mo dou kila vata kei ira kece ga sa lotu, se cava na kena raraba, kei na kena balavu, kei na kena titobu, kei na kena cere;

“Ka mo dou kila na loloma i Karisito, o koya sa uasivi cake ena ka e kilai rawa; mo dou sinai ena ka kecega sa sinai kina na Kalou” (Efeso 3:14–19).

• Ni ko taura vei iko na yaca i Karisito, ka sa vakaukauwataki ena Yalona, o na tekivu mo vakatakilakilataki iko vata kei ira na Yalododonu—tacimu kei na ganemu ka ra sa papitaiso oti ka curu ki na Nona matavuvale e vuravura (raica na Mosaia 5:7). Ni sa yaco mo mai kilai ira vinaka na nomu itokani Yalododonu, e sa mai yaco vakacava mo yalorawarawa mo vakaitavi vakataucoko sara ena veitokani vata ni matabete, na iSoqosoqo ni Veivukei, kei na Matawilivola ni Sigatabu?

Veivueti

“Ni sa meca ni Kalou na tamata vakavuravura, ka sa vakatu mai kina me tekivu sara mai na lutu i Atama, ka na vaka tu kina me sega ni mudu ka sega ni mudu, ka vakavo ke sa talairawarawa ki na veivakayarayarataki ni Yalo Tabu, ka biuta tani na tamata vakavuravura ka yaco me yalododonu ena vuku ni veisorovaki i Karisito na Turaga, ka yaco me vaka na gonelailai, me talairawarawa, yalomalua, yalomalumalumu, dauvosota, sinai ena loloma” (Mosaia 3:19).

• E vuqa vei keda e yaco me Yalododonu ena yaca wale ga ena gauna ni papitaiso ka vakayagataka na kena vo ni noda gauna ena kena sagai me “biuta tani na tamata vakavuravura” ka vakatorocaketaka na vei itovo e volai tiko ena tikina oqo. Na sala cava sa vukei iko kina na veisaqasaqa oqo me vakarautaki iko mo ciqoma ni ena Veisorovaki i Karisito duaduaga—ena nomu yaco mo duabau vata kei Jisu Karisito kei na Tamada —sa rawa ni o sotava kina na veivueti?

Dou lako mai vei Karisito

“Veitalia na ivurevure ni dredre cava soti ka veitalia na sala o rawata mai kina na veivakacegui—se mai vua e dua na dauveiqaravi kenadau vakaivola, vuniwai, na iliuliu ni matabete, itokani, itubutubu kauwai, se na noda daulomani—se cava ga na ivakarau o tekivu kina, na vei iwali kece oqori ena sega ni vakarautaka nai sau kece ni taro. Na veivakabulai ena yaco mai ena vakabauti Jisu Karisito kei na Nona ivakavuvuli, ena yalo sa raramusumusu kei na yalo bibivoro kei na talairawarawa ki na Nona ivakaro” (Richard G. Scott, ena Ripote ni Koniferedi, Epe. 1994, 9; se Ensign, Me 1994, 9).

• A vakatavulica o Elder Richard G. Scott ena Kuoramu ni iApositolo Le Tinikarua ni sega ni dua na iwiliwili ni veitokoni kei na veitokani—mai na ilawalawa sara mada ga ni veivagalalataki se o ira na ivavakoso ni Lotu—ena kauta mai vei iko na veivakabulai. Eso tale na tamata era na tokoni iko beka ka vakalougatataki iko ena nomu ilakolako, ia e muri, sa na dodonu ga mo lako mai vei Karisito. Vola me baleta na sala e tekivu kina na nomu ilakolako ni vagalalataki.

• O cei a vakaitavi sara vakalevu ena nomu vukei mo lako ena salatu ni veivutuni kei na veivagalalataki? Sa dusimaki iko vakacava na nodra ivakaraitaki kivua na iVakabula?

• Na cava o sa vulica me baleta na iVakabula ka sa vukea se vakauqeta na nomu gagadre se na nomu i gu mo veisautaka na nomuni itovo?

Vosota na iwalewale

Raica, dou sa gonelalai ga ka sega ni kila na ka kecega; sa kilikili mo dou tubu cake ena loloma soli wale ka kila na ka dina.

“Dou kakua ni rere, koi kemudou na gone lalai, ni dou sa noqu, au sa vakamalumalumutaki vuravura, …

Ka na sega ni dua vei ira sa solia vei au ko Tamaqu ena yali” (V&V 50:40–42).

• Ena so na gauna eda yalototolo se yalolailai baleta ni veivagalalataki e dua na iwalewale ena vakayacori tikoga. Na veitikina oqo e vakaraitaka na nodrau vosoti keda na iVakabula kei na Tamada Vakalomalagi ena noda itutu me vaka na “gone lailai.” Vakayagataka na veitikina oqo ki vei kemuni, ena nomuni volavola ki vei kemuni vakayadua.

• E rawa vakacava ki na veiyalayala ena veitiki ni ivolanikalou oqo me vaqaqacotaki iko ena gauna o yalolailai kina?

Veivuke mai vua na Turaga

“Ia oqo, oi kemudou na wekaqu lomani, ni dou sa tu ena sala qiqo ka rabailailai oqo, au na taroga mada se sa vakayacori na ka kece sara? Raica, au sa kaya vei kemudou, E segai; ni dou sa sega ni yaco rawa e keri kevaka me sega na vosa i Karisito kei na dei ni nomudou vakabauti Koya, ka vakararavi vakatabakidua sara ki na nona vinaka o Koya sa kaukauwa me veivakabulai.

“Ia, sa kilikili mo dou toso ki liu ka tudei vei Karisito, ena taucoko ni nomudou vakanuinui, ka mo dou lomana na Kalou kei ira na tamata kecega. O koya, kevaka dou sa toso ki liu, ka kana magiti ena vosa i Karisito, ka vosota me yacova na ivakataotioti, raica, sa kaya vakaoqo na Tamada: Dou na rawata kina na bula tawamudu” (2 Nifai 31:19–20).

• Tugana ka vola me baleta na sala e vukei iko vakacava kina na Turaga ena salatu rabalailai ka qiqo. E vukei iko vakacava na tubu cake ni nomu loloma vua na Kalou kei ira na tani me kauti iko tani mai na veivakatotogani, vukei iko mo tomana tikoga na nomu vakuwai iko mai na kina, ka vakalesui iko ki na inuinui ni bula tawamudu?