iKalawa 12

Veiqaravi

iVakavuvuli Bibi: Ni o sa vakayadrati vakayalo ena vuku ni Veisorovaki i Jisu Karisito, wasea na itukutuku oqo vei ira na tani ka vakatovotovotaka na ivakavuvuli oqo ena veika kece o cakava.

Na veiqaravi ena vukei iko mo tubu ena rarama ni Yalo ena vo ni nomu bula taucoko. E nai ka 10 ni kalawa, o a vulica mo dikeva na nomu bula ena veisiga yadua ka soli itukutuku me baleta na nomu ivalavala. E nai ka 11 ni kalawa, o a vulica mo vakananuma na iVakabula ena veigauna, mo rawata tiko ga kina vakawasoma na veidusimaki ni Yalo Tabu. Nai ka 12 ni ikalawa e okati kina na ikatolu ni ka bibi—veiqaravi kivei ira tale eso—ka na vakadeitaka na tomani tiko ni veivagalalataki kei na bokoci ni ivalavala ca.

Mo na galala tiko mai na veivakatotogani, sa dodonu mo na guilecavi iko ka veiqaravi. Na gagadre mo vukei ira na tani esa dua na vua ni veivakayadrati vakayalo.

E tu vei iko e dua na itukutuku ni vakanuinui vei ira tale eso ka vakatotogani tu, vei ira na vakaleqai ka rarawa tu ka ra sa tu vakarau me ra vakasamataka e dua na rai vakayalo me ra veisautaka kina na nodra bula, kei ira kece era vakasaqara na dina kei na buladodonu. Na itukutuku sa ikoya ni Kalou e sa Kalou ni cakamana, me vaka ga ni sai Koya koya tu ga ena veigauna kece (raica na Moronai 7:29). Na nomu bula e vakadinadinataka oya. Ko sa yaco tiko mo dua na tamata vou ena Veisorovaki i Jisu Karisito. Ko na wasea vaka vinaka cake nai tukutuku oqo, ena nomu sasaga mo veiqaravi vei ira na tani. Ni o veiqaravi voli, na nomu kilamatata kei na kila-ka ni iwalewale oqo ena vakaukauwataki ka vakatitobutaki talega.

Na nomu wasea na nomu ivakadinadina me baleta na Nona loloma cecere kei na Nona loloma soli wale, sa dua na cakaitavi bibi duadua eda rawa ni solia. Na nomu colata na nodra icolacola na tani ena cakacaka ni yalovinaka kei na veiqaravi sega ni nanumi koya, e sa tiki ni nomu bula vou me vaka e dua na tisaipeli i Karisito (raica na Mosaia 18:8).

O Peresitedi Ezra Taft Benson a vakavulica: “Ira na tagane kei na yalewa ka ra solia na nodra bula vua na Kalou, era na kunea ni o Koya ena rawa ni cakava e levu sara na ka ki na nodra bula, mai na nodra sasaga ga o ira vakai ira. O Koya ena vakatitobutaka na nodra reki, vakarabailevutaka na nodra rai, vakamakaretaka na nodra vakasama, vaqaqacotaka na nodra viciko, vueta cake na yalodra, vakalevutaka na nodra kalougata, vakavuqataka na nodra madigi, vakacegui ira, kauta mai eso na nodra itokani, ka sovaraka vei ira na vakacegu. Okoya ena vakayalia na nona bula ena cakacaka ni Kalou ena kunea na bula tawamudu” (“Jesus Christ—Gifts and Expectations,” Ensign, Dec. 1988, 4).

Vakasamataka ena masumasu na sala eso mo veiqaravi kina, ka segata tikoga mo na tuberi mai vua na Yalo Tabu. Kevaka o sa tuvakarau, ko na kunea e vuqa na madigi mo wasea na ivakavuvuli vakayalo o sa vulica. Ko na kunea na sala eso mo wasea na nomu ivakadinadina vei ira na tani kei na madigi mo veiqaravi kina kivei ira ena vuqa sara na sala. Ena nomu veiqaravi vei ira na tani, ko na qarava ena yalomalumalumu ka vakanamata tiko ki na ivakavuvuli ni kosipeli kei na vakatotovo o sa vulica. Oqori ga o sa qai rawa ni vakadeitaka kina ni nomu inakinaki kei na veivakauqeti era sa vinaka. Mo raica mo solia wale, ka kakua ni namaka e dua na kena isau. Rokova na nodra galala ni digidigi na tamata tale eso. Mo nanuma tiko ni vuqa vei keimami e a “laki tavutu mai ra” ni bera ni keimami a rawa ni vulica ka vakayagataka na vei ivakavuvuli oqo. Na veika oqo ena dina vei ira e vuqa o gadreva mo na vukea.

Ni yaco mo kila ni tiko tale eso ka ra sotava ena nodra bula se nodra bula na nodra daulomani na veivakatotogani, sa rawa mo vakaraitaka vei ira na idusidusi oqo kei na Parokaramu ni Veivagalalataki mai na Veivakatotogani ni Veiqaravi ni Matavuvale ni YDE. Kevaka era nanuma me talanoa, mo vakalaivi ira sara. Tukuna eso na kemu italanoa mera vakila ni o kauwaitaki ira. Kakua ni soli ivakasala se tovolea mo vakavinakataki ira ena sala cava ga. Vakamacalataka ga vei ira na parokaramu kei na ivakavuvuli vakayalo ka ra sa vakalougatataka na nomu bula.

O na rawa ni kunea ni kevaka e sega ni tu vakarau me ciqoma na vei ivakavuvuli vakayalo oqo o koya ka vakatotogani, e rairai ena dua beka na lewe ni matavuvale se itokani i koya ka vakatotogani ena gadreva me ciqoma. Sa rawa ni voleka ni tamata kecega ka bula tiko ena gauna dredre vakaoqo, ena yaga sara vei ira na nodra vulica ka vakayagataka na ivakavuvuli ni kosipeli. Ko na vakauqeti beka ena so na gauna mo solia vua e dua, na ilavelave ni idusidusi oqo vata kei dua na iVola i Momani. Ni o vakayacora vakakina, o sa na wasea tiko na iyaya ni cakacaka e sa vukei iko mo tara cake tale na nomu bula ena nomu lako mai vei Karisito.

Ni o cakava e dua na ka vua e dua tale se wasea na itukutuku ni vakanuinui kei na veivagalalataki, mo na kakua ni vakatara tale vua edua na tamata me na dau vakararavi mai vakalevu vei iko. Sa nomu itavi mo vakayaloqaqataki ira na tamata era sasaga bula tiko mera gole vua na Tamada Vakalomalagi kei na iVakabula ena vuku ni veidusimaki kei na kaukauwa. Me kena ikuri, kakua ni tuvakasuka mo uqeti ira me ra cakacaka vata talega kei ira na italai vakadonui ni Turaga. E rawa ni yaco mai na veivakalougatataki cecere mai vua na Turaga mai vei ira era taura tu na idola ni matabete.

Ni o tovolea mo vukei ira na tani, sa dodonu mo kilamatata ni na dredre sara vei ira me ra tiko ga ena veivagalalataki kevaka era sega ni tokoni mai vei ira na lewe ni matavuvale se era sega ni tauradei ni veivagalalataki e dau taura na gauna. Ena rawa vua e dua ga na tamata me na vagalalataki ka veitalia sara na itovo era vakaraitaka mai na tani se o ira sara mada ga na wekadra voleka.

Ni o kauta vei ira na tani na itukutuku ni veivagalalataki ena ivakavuvuli ni kosipeli, sa dodonu mo na dau vosota vakadede, ka yalomalua. E sega ni tiko ena nomu bula vou e dua na tikina vua na dokadoka se na vakasama ni o sa uasivi cake mai vei ira. Kakua ni guilecava na vanua o a lako mai kina, kei nai valavala ni nomu vueti cake ena vuku ni loloma soliwale ni Kalou. O Jisu Karisito ena vakayacora vakakina “ena veigauna kece” vei ira era veivutuni ka lesu Vua (Mosaia 29:20).

Ena nomu maqusa mo vukei ira na tani, mo qarauna mo tikoga ena veimama ni kena wasei na itukutuku kei na cakacakataki ni nomu parokaramu. Na nomu i naki bibi duadua sai koya mo vakanamata tikoga mo bulataka vakai iko na vei ivakavuvuli oqo. Nomu sasaga mo wasea na veivakasama oqo vata kei ira tale eso, ena yaga ga ni o maroroya tiko na nomu sa vagalalataki tiko.

Na vei ivakavuvuli o sa vulica ka vakatovotovotaka mo valuta rawa kina na nomu vakatotogani sa ivakavuvuli vata ga e na liutaki iko ena ituvaki kece ni nomu bula me vaka na nona ituvatuva na Turaga. Ni ko vakayagataka na vei ivakavuvuli oqo ni kosipeli, ena rawa kina ni o vosota me yacova na ivakataotioti me vaka sa vakarota na Turaga, ka na rawa ni o vakayacora vakakina ena reki.

iTuvatuva ni cakacaka

Wasea nomu ivakadinadina e matadra na lewe vuqa; vakalevulevuya na veikacivi kei na taledi ena veiqaravi vei ira na tani; vakayacora na lotu kei na masu vakamatavuvale; vakavakarau mo gole ki na valetabu ka sokalou kina

Nomu ivakadinadina me baleta na loloma kei na loloma veivueti nei Tamada Vakalomalagi kei na Luvena lomani, o Jisu Karisito, sa sega tale ni qai ka ni vakasama walega. Sa yaco me dua na ka dina ni bula. O sa sotava oti vakataki iko. Ni ko sa mai kila na Nona lomani iko, o sa yaco talega me kila na Nona lomani ira na tani.

E a vakavulica o Peresitedi Howard W. Hunter, “O keda eda sa vakaivotavota ena Veisorovaki sa noda itavi me wasea ena yalodina noda ivakadinadina me baleta na noda Turaga ka iVakabula” (“The Atonement and Missionary Work,” nodra semina na peresitedi vou ni kaulotu, 21 ni Jiune, 1994, 2).

Wasea na ivakadinadina ki na nomu matavuvale ena vosa kei na ivalavala ena loma ni nomu itikotiko. Wasea na ivakadinadina ena lotu vakamatavuvale ena veiyakavi, masu vakamatavuvale, kei na vuli ivolanikalou vakamatavuvale. Wasea na ivakadinadina ena nomu bulataka na ivakarau va-Karisito, ka duavata kei na nomu matavuvale ena cakacaka ni veiqaravi. E rawa talega ni o wasea nomu ivakadinadina ena soqoni ni Lotu eso, me vakataka ena soqoni ni lolo kei na soli ivakadinadina se ena kalasi se ni vakayacori na veiqaravi ena Lotu.

Vakalevulevuya na veikacivi o ciqoma ena Lotu. Kevaka e sega na nomu itavi ena nomu tabanalevu se na iteki, vakaraitaka vua na nomu bisopi ni o sa tu vakarau tu me veiqaravi. E rawa talega mo vakalougatataki ira na tani ena nomu vakaitavi ena cakacaka ni tuva kawa, ka vakavakarau mo sokalou ka veiqaravi ena loma ni valetabu ka caka veiyalayalati vata kei na Turaga. O Peresitedi Gordon B. Hinckley a vakavuvulitaka ni, “Veiqaravi ena valetabu e ilutua ni noda veituberi kei na itaviqaravi kece” (ena Ripote ni Koniferedi, Okot. 2005, 3; se Ensign, Nove. 2005, 4). Na ivakavuvuli e vakavuvulitaki tiko ena idusidusi oqo ena liutaki iko yani ki na valetabu; era na vakatubura na nomu gagadre mo veiqaravi e kea.

E dina ga ni o a sega beka ni vakasamataka ni na rawa mailiu, sa rawa ni o raitayaloyalotaka oqo ni o curuma yani na katuba ni valetabu, marautaka na vakacegu e kea, ka vakila tiko vakavoleka na Turaga ena Nona vale. Ena loma ni valetabu, ko na kunea na kaukauwa vakayalo me tomani tiko kina na nomu vagalalataki. E a vakadinadinataka o Elder Joseph B. Wirthlin ena Kuoramu ni iApositolo Le Tinikarua: “Na cakacaka vakawasoma e valetabu ena rawa ni solia mai na kaukauwa vakayalo. E rawa ni dua na ikelekele ena noda bula e veisiga, na ivurevure ni veidusimaki, veitaqomaki, veikaroni, vakacegu, kei na ivakatakila” (ena Ripote ni Koniferedi, Epe. 1992, 123; se Ensign, Me 1992, 88).

Veiqaravi vei ira na tani era sasaga bula tiko mai na veivakatotogani ena kena wasei nai ivakavuvuli ni veivagalalataki; ka bulataka na vei ivakavuvuli oqo ena ituvaki kece sara ni bula.

Na parokaramu ni Veivagalalataki mai na Veivakatotogani ni Veiqaravi ki na Matavuvale ni YDE, e solia tu e levu na madigi ni veiqaravi. E rawa ni o veiqaravi vei ira na tani ena nomu tiko ena soqoni ka wasea kina na veika o sotava, nomu vakabauta, kei na inuinui. Sa rawa mo veitokoni vei ira eso tale ka vaqaqacotaki ira.

Me vaka ni o sa vakatovotovotaka na ivakavuvuli ni kosipeli, o sa vulica kina ni Veisorovaki e yaga ki na vei ituvaki kece sara ni bula. A vakadinadinataka o Peresitedi Boyd K. Packer ena Kuoramu ni iApositolo Le Tinikarua: “Ena so na vuna, eda vakasamataka kina ni Veisorovaki i Karisito e vakayagataki walega ena mua ni bula vakayago me veivueti mai na Lutu, mai na mate vakayalo. E sivia cake sara mai na ka oya. Sa ikoya e dua na kaukauwa ka dau tu voli ga meda masuta ena bula ni veisiga. Ena gauna eda kuretaki ka cukiraki se basuraki kina ena rarawa, se rarawa ena vuku ni cakacala se bikai ena icolacola bibi, o Koya e rawa ni vakabulai keda” (ena Ripote ni Koniferedi, Epe. 2001, 28; se Ensign, Me 2001, 23).

Sa rawa mo wasea na itukutuku oqo vei ira na tani ena na nomu vosa ni veivakayaloqaqataki kei na nomu ivakaraitaki. Ni ko sotavi ira na tamata ena siga taucoko, kidavaki ira ena matadredredre. Vakaraitaka na vakavinavinaka ki na veika era cakava. Ni yaco mai na madigi, wasea na ivakadinadina ni inuinui e lako mai na Veisorovaki i Jisu Karisito.

Vuli kei na Kilamatata

Na ivolanikalou kei na nodra ivakavuvuli na iliuliu ni Lotu e na vukei iko me tomani tiko na nomu vagalalataki. Vulica na ivolanikalou kei na veivosa oqo. Vakayagataki ira ena yalo masumasu ena vakanananu vakatitobu, vuli yadudua, kei na veivosaki vaka ilawalawa.

Na saumaki kei na veivakalesui.

“Saumaki e kena ibalebale me vuki tani mai na dua na i vakarau ni vakabauta se dua nai vakarau ni bula kina dua tale. Na saumaki sa ikoya edua na veisau vakayalo ka savasava.. Saumaki e sega wale ga ni kena ibalebale na ciqomi Jisu kei na nona ivakavuvuli vakavakasama ga, ia na vakabauta veivakauqeti talega vei Koya kei na nona kosipeli—e dua na vakabauta ka kauta mai e dua na veisau, na veisau ni nona kilamatata edua na ibalebale ni bula kei na nona yalodina vua na Kalou ena lomana, ena vakasama, kei na itovo“ (Marion G. Romney, ena Ripote ni Koniferedi, Koniferedi iWasewase e Guatemala 1977, 8).

• Na iVakabula e vakasalataki Pita me vakataudeitaki ira na wekana, ni oti na nona saumaki mai (raica Luke 22:32). Vola na veika me baleta na ivakamacala nei Peresitedi Romney ena ibalebale ni saumaki, kei na kena rawa ni vakayagataki ki na veika o sotava ena nomu vakalesui mai.

• Na cava o vakila me baleta na vakataudeitaki ira na tani ni ra sa vagalalataki tiko mai na itovo eso ni veivakatotogani?

Na tubu cecere mai na veikalawa lalai

“Ia dou kakua ni oca ena cakacaka vinaka, raica dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere” (V&V 64:33).

• Vola na veika o vakila me baleta na nomu vakasamataka na bulataki ni vei ivakavuvuli oqo ena vei ituvaki kece sara ni nomu bula. E veivuke vakacava me kilai ni veicakacaka cecere era vakayacori ena veikalawa lalai?

Vakataudeitaki ira na tani

“Io oqo na noqu lagilagi de na rawa meu iyaya ni cakacaka ena liga ni Kalou meu kauta mai eso na yalo ki na veivutuni; ka sai koya oqo na noqu marau.

Ia raica, sa vakasinaiti na yaloqu ena marau, ni’u sa raica ni ra sa veivutuni vakaidina e vuqa na wekaqu, ka ra lako mai ki vua na Turaga na nodra Kalou; ia ka’u nanuma na ka sa kitaka vei au na Turaga, io, ni sa rogoca ko koya na noqu masu; io, au a qai nanuma ni sa dodoka tu mai vei au ko koya na ligana dauloloma” (Alama 29:9–10).

• Eda sa vulica ni sa bibi sara kina noda vagalalataki na noda tu vakarau me da wasea na noda vakadinata na veivakavuvuli oqo. Ena vukei iko vakacava na nomu wasea na veika o sa sotava, mo na kaukauwa tikoga ena nomu vagalalataki?

“Io, [ka dou] sa lomasoli mo dou rarawa vata kei ira sa rarawa; io, ka vakacegui ira era sa gadreva na veivakacegui, ka mo dou tu ka vakadinadinataka na Kalou ena veigauna kecega, kei na veika kecega, kei na veivanua kecega dou sa tiko kina, ka me yacova na mate, io me rawa ni sereki kemudou na Kalou, ka mo dou okati vata kei ira ena imatai ni tucake tale, mo dou rawata kina na bula tawamudu—

“Oqo au sa kaya vei kemudou, ke sa vakaoqo na gagadre ni lomamudou, ia na cava sa tarovi kemudou mo dou papitaisotaki ena yaca ni Turaga, mo dou nona ivakadinadina ni dou sa ia oqo na veiyalayalati kei koya, mo dou na qaravi Koya ka muria na nona ivunau, me na qai sovaraka mai kina vakalevu sara vei kemudou na Yalona?” (Mosaia 18:9–10).

• Na veika o sa sotava mai ena nomu vakatotogani ena vukei iko mo vakila talega na dredre era sotava tiko na vakatotogani; na veika o sotava ena nomu vagalalataki ena vukei iko mo vakacegui ira. Vola na veika me baleta na vakalevutaki cake ni nomu gagadre kei na nomu sasaga mo tu ka ivakadinadina ni Kalou, me vaka na nomu sa muria mai na ikalawa eso ni veivagalalataki.

Veiqaravi ena veivuke ni Turaga.

“Sa digitaki ira na tamata ka sega ni taucoko tu na Dauveivueti me ra vakavulica na sala ki na bula e uasivi sara. A vakayacora o Koya mai liu ; E vakayacora tiko vakakina oqo” (Thomas S. Monson, ena Ripote ni Koniferedi, Epe. 2004, 19; se Ensign, Me 2004, 20).

• Ena so na gauna eda dau vakataroga se eda sa vakarau tu beka meda wasea na veivagalalataki vei ira na tamata, baleta nida se sega ni vakatovotovotaka tiko na vei ivakavuvuli oqo vakavinaka sara. E kinoci sobu beka vakacava na nomu rere, ni o kila ni iVakabula e dau cakacaka mai vei ira na tamata ka se bera ni taucoko tu?

Na kaukauwa ni Kalou me veivakabulai

“Niu sa sega ni maduataka na itukutuku vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta” (Roma 1:16).

• Vola na nomu vakanananu kei na lomamu, ena nomu rai lesu ka vakasamataka ni a taura edua na veivakauqeti vakayalo, me vukei iko mo ra-wa kina na nomu vakatotogani. Vola na veika eso me baleta e dua nai tovo ni yalo ni tuvakasuka ka se tiko vei iko, mo tukuna kina vei ira na tani, ni o a vakabulai ena nomu vakayagataka na vei ivakavuvuli ni kosipeli i Karisito.

“Mo lako yani ki na vanua ka’u sa talai iko kina, ia ena vakatakila vei iko na Dauveivakacegui na vanua mo lako kina kei na veika mo laki kitaka.

“Mo daumasu tiko ga mo kakua ni rawai ena veitemaki, ka vakayalia na kemu isau.

“Mo yalodina tiko ga me yacova na ivakataotioti, raica au sa tiko vata kei iko. Na vosa oqo e sega ni nona yalayala e dua na tamata, se nodra yalayala na tamata, raica oqo na ka au sa yalataka koi au ko Jisu Karisito na nomu Dauveivueti, me vaka na lewa i Tamaqu” (V&V 31:11–13).

• Na ivolanikalou era sinai tu kina na veituberi ena vukudra o ira era gadreva me ra tiko ga ena dua na sala vakayalo ni bula ka na kauti ira lesu vua na Kalou. Na veidusimaki digitaki cava o kunea ena veitikina oqo?