Ianuari
Ianuari: O Le Faitalia O se Meaalofa e Filifili ai mo i Tatou Lava
“O lea ua saoloto ai tagata … e filifili le saolotoga ma le ola faavavau, talu le Puluvaga sili o tagata uma” (2 Nifae 2:27).
Pese: “Se Fanau a le Atua”
(itulau e 28 i le otootoga lenei)
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma le (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1 ma le 2: O le faitalia o se meaalofa e filifili ai mo i tatou lava.
Faailoa atu le aoaoga faavae (taaalo i se taaloga taumatemate): Ta’u atu i tamaiti o loo e mafaufau i se upu, ma tuu atu ia i latou ni faaataataga e fesoasoani latou te matea ai le upu. Fai atu i ai e sii o latou lima pe a fai latou te iloa le tali. O faaataataga e mafai ona aofia ai mea nei: Sa tatou mauaina lenei mea ae tatou le’i o mai i le lalolagi. O se meaalofa mai lo tatou Tama Faalelagi. O se vaega taua o le fuafuaga a le Tama Faalelagi mo i tatou. Tatou te faaaogaina pe a tatou faia ni filifiliga. O se meaalofa e faataga ai i tatou tatou te filifili mo i tatou lava. E amata i le mataitusi F. Pe a uma ona mate e tamaiti le tali, ia fai faatasi, “O le faitalia o se meaalofa e filifili ai mo i tatou lava.”
Uunaia le [agaga] malamalama (vaaia ma talanoaina o se lesona faatino): Faaali atu i tamaiti se laau o loo tusi ai i le isi itu le upu filifili ma le upu taunuuga o loo tusia i le isi itu. Faamalamalama atu o se taunuuga o se mea e masani lava ona tupu o se filifiliga tatou te faia; mo se faataitaiga, afai tatou te filifili e faataitai le taina o se mea faifaaili, o le a tatou lelei ai, ma pe a tatou filifili e pa’i atu i se afi, o le a tatou mu ai. Piki i luga le laau ma faaali atu i tamaiti, o taimi uma lava e piki ai i luga le laau e te maua uma ai lava le filifiliga ma le taunuuga o lena filifiliga. Fai atu i se tamaitiiti matua e faitau le 2 Nifae 2:27. Valaaulia isi tamaiti e faalogo po o a ni taunuuga o le faia o se filifiliga sa’o (saolotoga ma le ola e faavavau) ma po o le a ni taunuuga o le filifiliga sese (faatoilaloina ma le malaia). Tusi se kata faigofie i luga o le laupapa e pei o le ata lea o loo faaali atu iinei.
Fesoasoani i tamaiti ia malamalama o filifiliga lelei tatou te faia, e taitai atu ai i le saolotoga ma le fiafia, ao filifiliga le lelei tatou te faia, e taitai atu ai i le faatoilaloina ma le le fiafia.
Valaaulia ni tamaiti se toalua e o mai i luma o le potu, ma tuu atu i tamaiti e tofu ma le pito o le laau e uu. Fai atu i le tamaitiiti o loo uuina le pito o le “filifili” e tuu mai se faataitaiga o se filifiliga lelei (mo se faataitaiga, o le tautala ma le agalelei i isi). Fai atu i le isi tamaitiiti e faasoa mai ni taunuuga lelei mo lena filifiliga (mo se faataitaiga, o le faia o ni faauoga tumau). Toe fai ma nisi tamaiti.
Ia faamalosia le aoaoina o tamaiti e ala i le faisoo. Teu le laau o le “filifiliga ma taunuuga”. O le a i ai nisi avanoa e faaaoga ai i le taimi o le fetufaaiga i le gasologa o le tausaga.
Uunaia le [agaga] malamalama (aoaoina o ni tala faatusipaia): I vaiaso muamua o le masina, aoao atu nisi o tala mai tusitusiga paia lea e faaalia ai, o le faia o ni filifiliga sa’o e taitai atu ai i le saolotoga ma le fiafia ao le faia o ni filifiliga le lelei o le a taitai atu ai i le faatoilaloina ma le malaia. O tala faatusipaia e mafai ona e faaaogaina e aofia ai le Faaola ma Satani (tagai i le Mose 4:1–4); Nifae ma Lamana ma Lemuelu (tagai i le1 Nifae 2–4, 7, 18); Sataraka, Mesako, ma Apeteniko (tagai i le Tanielu 3); po o Alema ma le Tupu o Noa (tagai i le Mosaea 17–19). Pe a maea ona aoaoina se tala, valaaulia ni tamaiti se toalua e tofu ma le pito o le laau o le “filifiliga ma taunuuga”. Fai atu i se tasi o tamaitiiti e faamatala mai ni filifiliga na faia e i latou i totonu o le tala ae fai i le isi tamaitiiti e faamatala mai ni taunuuga o na filifiliga.
Uunaia le [agaga] malamalama (faalogo i se tala): Faapipii se ata o Iesu Keriso i luga o le laupapa. Tusi ni faasitepu e agai atu i le ata. Tusi ata faatagata i se fasi pepa, faapipii i lalo ifo o faasitepu. Faamatala atu se tala puupuu e uiga i ni filifiliga e ono faia e se tamaitiiti i se aso se tasi. Mo filifiliga taitasi, fai atu i tamaiti e faailoa mai po o se filifiliga lelei po o filifiliga le lelei e ala i le tu i luga mo se filifiliga lelei ae nofo i lalo mo se filifiliga le lelei. Mo se faataitaiga: “Na aveese e Sieni se meataalo mai lona tei pepe, ma sa amata ona tagi si ona tei. Ina ua fesili le tina o Sieni ia te ia pe aisea ua tagi ai si ona tei, ae fai mai Sieni na te le iloa.” Mo filifiliga lelei taitasi, faame’i tasi i luga o le sitepu le faatagata e agai ia Iesu. Faaauau le tala ma isi filifiliga seia oo le faatagata i le Faaola. Ia talanoaina pe faapefea ona aumaia ia i tatou e filifiliga lelei le fiafia ma fesoasoani tatou te latalata atili atu ai i le Alii.
Vaiaso 3: I le muai olaga, sa ou filifili e mulimuli i le fuafuaga a le Atua.
Uunaia le [agaga] malamalama (usuina o ni pese): Ia talanoaina puupuu ia mataupu nei, ona usu lea faatasi ma tamaiti o ni pese e faatatau i ai: Ae ou te le’i sau i le lalolagi sa ou nofo i le lagi (“Ou Te Nofo i le Lagi” [Liahona, Ape., 1999, 5]). Sa ou filifili e sau i le lalolagi ma maua se tino (“O Au o se Atalii o le Atua” [TT, 2–3]; “Ua Tuu Mai e le Alii se Malumalu” [TT, 153]). O le a ou papatiso ma maua le meaalofa o le Agaga Paia (“Pe A Ou Papatiso” [TT, 53]; “O Le Agaga Paia” [TT, 56]). E mafai ona ou sauni e alu i le malumalu (“Ou Te Fia Vaai i le Malumalu” [TT, 99]; “E Mafai ona Faavavau Aiga” [TT, 98]). O le a ou toetu (“Na Ia Auina mai Lona Alo” [TT, 20–21]).
Vaiaso 4: Na foafoaina e Iesu Keriso le lalolagi e avea o se nofoaga e mafai ona ou aoao ai e filifili le mea sa’o.
Faailoa atu le aoaoga faavae (vaaia ma talanoaina se lesona faatino Faaali atu i tamaiti se koneteina o valigao e tele lanu eseese. Faaali atu ia i latou se koneteina lona lua e na o le tasi le lanu. Fesili atu i tamaiti: “Afai o le a e valiina se ata, o fea o nei koneteina e te manao e faaaoga? Aisea?” Faamatala atu i ai o le mauaina o le tele o filifiliga o se faamanuiaga lea. Molimau atu e alolofa le Tama Faalelagi ma Iesu Keriso ia i tatou ma e finagalo i Laua tatou te faia filifiliga sa’o.
O le gaoioiga lenei, e te ono filifili ai e faatino le mataupu o le filifiliga o se faamanuiaga ma valigao, peni vali, ni fualaau aina eseese, po o nisi lava mea faitino e masani ai ia tamaiti.
Uunaia le [agaga] malamalama (valivali): Tuu i tamaiti e vali se kopi o le ata o loo i le itulau e 35 o le tusi lesona o le vasega pepe, Vaai Ia I O Outou Tamaiti, pe valaaulia i latou e tusi ni ata faapea ma e tutusa foi faaupuga. Ia talanoaina po o ai na foafoaina mea o loo i le ata ma pe aisea na foafoaina ai. Aoao atu i tamaiti o loo faamoemoe le Tama Faalelagi ia i tatou e tausia lenei lalolagi lea na foafoaina e Lona Alo mo i tatou. Fai atu i tamaiti e faamatala mai ni auala latou te filifilia e tausia ai le lalolagi ma foafoaga o loo i ai. Fai i tamaiti e ave a latou ata i le fale ma tuu i o latou matua e fai ai se tusi.