Fepuari
Pe a Tatou Filifili le Mea Sa’o, Ua Faamanuiaina i Tatou
“Afai ua outou tausi i ana poloaiga ua ia faamanuiaina ma faauluolaina ai outou” (Mosaea 2:22).
Pese: “Filifili Tau o Mea Tonu”
(Viiga, nu. 149)
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma pe mafai faapefea ona ou fesoasoani ia latou lagonaina le Agaga?”
Vaiaso 1: Na faamanuiaina Noa mo le filifiliina o le mea sa’o.
Faailoa atu le aoaoga faavae (taaalo i se taaloga faatusatusa): Tusi se vaa faigofie i luga o le laupapa. Ia saunia ni nai seti ata o manu tutusa tailua. Ia tofu tamaiti ma se ata se tasi. Fai atu i tamaiti e tutu ma faatino le leo o le manu i a latou ata ma faalogo i se isi tagata o loo faatinoina le leo lava e tasi. Pe a maua e tamaiti e tutusa ata le tasi ma le isi, fai atu la te tutu faatasi seia tofu paga uma ia manu. Fai atu i tamaiti e o mai o ni paga ma tuu a latou manu i le ata o le vaa. Fai atu i tamaiti, “Po o le fea o perofeta na fai atu i ai le Alii e faapotopoto ia manu i totonu o le vaa?” Ia faailoa atu atonu sa avea ma se galuega faigata le faapotopotoina o le tele o manu i totonu o le vaa, ae peitai na filifili lava Noa e usitai i le faatonuga a le Alii.
Uunaia le [agaga] malamalama (faitauina o tusitusiga paia): Faaali atu i tamaiti se ata o Noa o loo talai, ma faitau le Mose 8:20. Fesili i tamaiti pe aisea na le’i faalogo ai tagata ia Noa. Tusi se laina e vaelua ai le laupapa, ma tusi ia fesili nei i le tasi itu, ma mau faasino i le isi itu i soo se faasologa: O le a se mea o le a faia e le Alii e faaumatia ai le amioleaga? (Kenese 6:17). O le a se mea na Ia fetalai atu ai ia Noa e fai e faasao ai lona aiga? (Kenese 6:18). O le a le mea na fai e Noa e filifili ai le mea sa’o? (Kenese 7:5). Fai atu i tamaiti e faitau ia mau ma saili po o fea o tali e taliina fesili taitasi. Faaali atu i tamaiti le ata o Noa o loo fauina le vaa. Faamatala atu o nisi taimi e faigata ai le filifiliina o le mea sa’o. Fesili atu, “Pe na faapefea ona faamanuiaina Noa i le filifiliina o le mea sa’o?” Uunaia ia tamaiti e faasoa atu le auala o le a faamanuia ai i latou ao latou filifiliina le mea sa’o.
Vaiaso 2: Na faamanuiaina soo o Iesu e ala i le filifiliina o le mea sa’o.
Uunaia le [agaga] malamalama (faitauina o tusitusiga paia, valivali, ma le faaaogaina o ni papeti): Faitau faatasi ma tamaiti ia tala nei i le auala na filifili ai e soo o Iesu le mea sa’o: Luka 10:38–42 (Maria); Mataio 4:18–20 (Peteru ma Aneterea); Galuega 9:1–9, 17–20 (Paulo). Ia talanoaina nisi o faamanuiaga na maua e nei tagata mo le filifiliina o le mea sa’o. Tusi ni nai ata faigofie mo tamaiti taitasi (pe faaaoga ia ata o tusitusiga paia i le “Itulau o Mea Malie,” Liahona, Ian. 2006, U13; ma le “Itulau o Mea Malie,” Liahona, Fep. 2006, U11). Tuu i tamaiti e valivali ia ata, oti ia ata, ona fai lea ia avea ma se papeti laau po o ni papeti taga pepa. Valaaulia ia tamaiti e faaaoga a latou papeti e toe faamatala ai se tasi o tala. Mo se faataitaiga: “O Lo’u igoa o Paulo. Sa ou faasaua i tagata o e na mulimuli ia Iesu. Sa ou vaaia Iesu i se faaaliga. Sa fetalai mai Iesu ia te au e aua ou te toe faasaua ia te Ia. Sa ou filifili e mulimuli ia Iesu ma avea ma se faifeautalai mo aso uma na totoe o lo’u ola.”
E mafai ona faaaoga ni papeti faigofie e faatino ai vaega o se lesona. O ni punaoa taua ia mo le faamalosiina o le manatu autu ma le faatosinaina mai o mafaufau o tamaiti (tagai i le AALVSA, 186–).
Uunaia le faaaogaaga (toe faamanatu ia tala faatusipaia): Valaaulia ia tamaiti e faaaoga a latou papeti e toe faamatala ai ia tala faatusipaia i o latou aiga i le fale. Uunaia i latou e faamatala atu i tagata o le aiga le auala na filifili ai le mea sa’o e tagata taitasi i tala ma le auala na faamanuiaina ai i latou. Fesili atu i tamaiti pe mafai faapefea ona latou filifili le mea sa’o i le aluga o le vaiaso a sau.
E maua papeti laau i le sharingtime.lds.org
Vaiaso 3: Na faamanuiaina ia Nifae i le filifiliina o le mea sa’o.
Uunaia le [agaga] malamalama (auai i ni tala faatino): Tuu i tamaiti e faatino ni taimi na usitai ai Nifae i lona tama ma le Alii (mo se faataitaiga, tagai i le 1 Nifae 16:18–24, 30–32; 1 Nifae 17:8, 17–18, 48–53; 1 Nifae 18:9–21). Mafaufau latou te faaaogaina ni togiga faigofie ma fesoasoaniga (mo nisi faamatalaga e uiga i tala faatino, tagai i le AALVSA, 174–75). Faitau faatasi le mea na fai mai ai Nifae i le 1 Nifae 17:3.
O fesoasoani vaaia e mafai ona faaleleia ai le aoaoga. Ia faafaigofie ia fesoasoani vaaia. O lenei tulaga o le a faatagaina ai tamaiti e taulai atu i le savali nai lo le fesoasoani vaaia.
Uunaia le faaaogaaga (usuina o se pese): Faaali atu le laau o le “filifiliga ma taunuuga” mai ia Ianuari, ma valaaulia ia tamaiti e faasoa atu mea latou te manatua e uiga i filifiliga ma taunuuga. Tau atu ia i latou o le tele o faamanuiaga tatou te maua o ni taunuuga ia o ni filifiliga lelei tatou te faia. Ia valaaulia ia tamaiti e mafaufau i ni auala e mafai ai ona avea i latou e pei o Nifae ma faia ni filifiliga lelei. Fai atu i tamaiti e usu le pese “Lototele o Nifae” (TT, 64–65) ma pasi solo le laau o “filifiliga ma taunuuga” ao latou pepese. Taofi faafuasei le musika. Pe a taofi le musika, valaaulia le tamaitiiti o loo uuina le laau e faasoa mai se filifiliga lelei e mafai ona ia faia. Fai atu i le tamaitiiti e pasi le laau i se isi tamaitiiti, ma valaaulia o ia e faasoa mai se faamanuiaga na oo mai i le faia o lena filifiliga lelei. Ia toe fai pe a lava le taimi.
Vaiaso 4: Ua faamanuiaina tagata o le Ekalesia i le taimi nei i le filifiliina o le mea sa’o.
Uunaia le [agaga] malamalama (faasoaina o tala): Valaaulia ni nai matua po o matua o matua o tamaiti i lau Peraimeri e faasoa mai ni tala e uiga i se auala na filifilia e i latou po o o latou tuaa le mea sa’o. E mafai ona aofia ai ni tala e uiga i le auala na latou filifili e liliu mai ai i le Ekalesia. Ao le’i faamatalaina tala taitasi, fai atu i tamaiti e faalogo i ni auala na filifili ai e nei tagata o le Ekalesia le mea sa’o ma le auala na faamanuiaina ai i latou mo le faia o lena mea. A maea tala taitasi, fai atu i tamaiti e faamatala mai pe na faapefea ona faamanuiaina tagata o le ekalesia i le filifiliina o le mea sa’o. Mafaufau e fai atu i tamaiti e tusi ni ata e uiga i tala ao latou faalogo i ai ona faasoa mai lea o a latou ata i isi i le Peraimeri faapea foi i le aiga.