Iulai
Ou Te Filifilia le Mea Sa’o e ala i le Ola Ai i Mataupu Faavae o le Talalelei
“O le mea lea ia tatou faamaoni ai i le tausiga o poloaiga a le Atua” (1 Nifae 3:16).
Pese: “Tagata Poto ma le Tagata Valea”
(TT, 132) po o se pese e filifili mai le Tusipese a Tamaiti
Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”
Vaiaso 1: O le anapogi ma le tatalo e mafai ona faamalosia ai la’u molimau.
Faailoa atu le aoaoga faavae (vaaia o se lesona faatino): Ia saunia ni uputusi se lua: Anapogi ma le Tatalo. Valaaulia ni tamaiti se toalua e tutu faatasi, ma ia tofu le tamaitiiti ma le uputusi. Fai i se isi tamaitiiti e savali i le va o i laua. Fai i tamaiti muamua e toalua e uumau o la lima, ma fai i le isi tamaitiiti e taumafai e toe savali i lo la va. Faailoa atu po o le a le malosi ua i ai nei tamaiti pe a fesootaimau faatasi. Faamalamalama atu e sili atu le malosi o le anapogi ma le tatalo pe tatou faaaogaina faatasi. Tusi i luga o le laupapa “O le anapogi ma le tatalo e mafai ona faamalosia ai la’u molimau”, ma fai faatasi mai e tamaiti.
E maua uputusi i le sharingtime.lds.org
Uunaia le [agaga] malamalama (faalogologo i mau ma auai i se lesona faatino): Fai atu i tamaiti e faalogo i mea na fai e atalii o Mosaea ina ia malolosi ai i le talalelei ao e faitauina le Alema 17:2–3. Valaaulia ia tamaiti e faavaivai o latou maso i taimi lava latou te faalogo ai i se mea na fesoasoani i atalii o Mosaea ina ia malolosi ai.
Taitai se talatalanoaga i le anapogi e ala i le faia o ni fesili e pei o le “O le a le anapogi?” “Aisea e tatau ai ona tatou anapogi?” “O le a le taimi e tatau ona tatou anapogi ai?” ma le “Aisea e tatau ai ona tatou tatalo pe a tatou anapogi?” (tagai ia Joseph B. Wirthlin, “O Le Tulafono o le Anapogi,” Liahona, Iulai 2001, 88–91). Faataga ia tamaiti uma e faaopoopo atu i le talanoaga e uu le pito e tasi o se fasi filo po o se manoa. Uu i lou lima le isi pito o fasi manoa taitasi. I le faaiuga o le talatalanoaga, fai atu i tamaiti o loo uuina ia manoa e o mai i le ogatotonu o le potu ma milo faatasi a latou fasi manoa, e faia ai se maea malosi. Faamatala atu o fasi manoa taitasi tatou te faaopoopoina i le maea o le a atili malosi ai le maea. Fesoasoani i tamaiti ia malamalama o se auala e tutusa ai, o taimi uma lava tatou te anapogi ma tatalo ai ua tatou faaopoopo atu le malosi i a tatou molimau.
O le a fesoasoani faataitaiga vaaia i tamaiti ina ia malamalama manatu faavae lavelave.
Vaiaso 2: O le agalelei o le faia lea ma tautala atu i ni upu manaia i isi.
Faailoa atu le aoaoga faavae (taulotoina o se mau): Tusi i luga o le laupapa “A ia outou feagaleleiai” (Efeso 4:32) ma tusi i lalo ifo o upu taitasi le numera 1 e oo i le 4. Ia tofu le tamaitiiti ma se numera mai le 1 e oo i le 4. Amata i le fai atu e tutu uma ia 1 ma fai mai “A” ona toe nonofo vave lea i lalo. Ona tutu lea o le 2 ma fai mai “ia,” ma toe nonofo vave i lalo. Faaauau ai pea i le vaega o totoe o le fuaiupu. Ia toe fai mo ni nai taimi. Ona fai lea i tamaiti uma e toe fai mai faatasi le fuaiupu atoa.
Uunaia le [agaga] malamalama (faalogologo i se tala ma usuina se pese): Faamatala i tamaiti se tala o le agalelei, e pei o le “Tu Atu mo Kalepo” (Liahona, Mat. 2009, U8–U9). Fai ia i latou e tuu uma i luga lima matua pe a latou faalogo o faatino le agalelei i totonu o le tala ae tuu uma i lalo lima matua pe a latou faalogo e le o se faatinoga agalelei. Usu le pese “O Le Agalelei e Amata Ia Te Au” (TT, 83). Fai i tamaiti e tutu i luga pe a latou usuina le pese e uiga i se e tatau ona latou agalelei atu i ai. Toe usu le pese, ma fai i ai e tusi uma lima matua ia i latou pe a latou usuina le pese, “O le agalelei e amata ia te a’u.”
O le faaaogaina o tamaiti i faataitaiga vaaia o le a faaaofia ai tamaiti ma o le a fesoasoani foi e faaosofia ai le manao o isi tamaiti.
Uunaia le faaaogaaga (faasoaina atu o auala e agalelei ai): Faailoa atu ni nai tagata i olaga o tamaiti (e pei o le tama, tina, uso, tuagane, tuafafine, tama matua, uo, po o faiaoga) i se uputusi, se ata, po o se fesoasoaniga faigofie (e pei o se fusiua mo tama po o se tootoo mo tama matua). Tuu atu ni mea faitino i ni nai tamaiti, ma valaaulia i latou e o mai i luma o le potu. Fai i tamaiti taitasi e faasoa mai se mea manaia e mafai ona latou fai atu pe faia mo le tagata o loo suitulaga ai le mea faitino. Ona fai atu lea ia i latou e pasi i isi tamaiti a latou uputusi, ata, po o fesoasoaniga. Ia toe fai pe a lava le taimi.
Vaiaso 3: O le migao o le faaaloalo loloto lea ma le alofa i le Atua.
Faailoa atu le aoaoga faavae (usuina o se pese): Ia saunia ni nai asoa e fai i manoa ma se fatu e fai i le pepa e faapipii i asoa taitasi. Tusi se upu autu po o se fuaiupu mai le pese “Faaaloalo o le Alofa Lea” (TT, 12) i luga o fatu taitasi (mo se faataitaiga, nofonofo filemu, mafaufau, lagona, ma isi). Valaaulia ni nai tamaiti e fai a latou asoa. Usu le pese “Faaaloalo o le Alofa Lea,” ma fai atu i tamaiti o i ai asoa e savavali ma le migao i luma o le potu pe a usuina le upu o loo i luga o a latou fatu. Valaaulia ia tamaiti o loo i ai asoa e tutu i le faasologa sa’o, ma toe usu le pese.
E maua fatu i le sharingtime.lds.org
Uunaia le faaaogaaga (talanoaina le migao): Ia saunia ni uputusi pe tusi ni ata faigofie o mata, lima, vae, taliga, gutu, ma le mafaufau. Vavae ia tamaiti i ni vaega, ma tuu i vaega taitasi e filifili ni uputusi po o ni ata se tasi pe lua. Tuu atu i vaega taitasi e faasoa mai (i ni upu ma taga) ni nai auala e mafai ona faaali ai le migao e lenei vaega o latou tino e ala i le faaalia o le faaaloalo ma le alofa i le Atua.
E maua ata i le sharingtime.lds.org
Vaiaso 4: O le faamaoni o le ta’uina lea o le mea moni e tusa lava po o a ni taunuuga.
Uunaia le [agaga] malamalama (talanoaina o taunuuga): Sauni ni nai tulaga faatusa e aoao ai (tagai i le AAVLSA, 170–) lea e feagai ai tamaiti ma se filifiliga ina ia faamaoni pe le faamaoni. Mo se faataitaiga, “Ua e poina lou uso, ona fesili atu lea o lou tina pe aisea ua tagi ai o ia.” Fesili, “O a ni taunuuga o le faamaoni?” Ona fesili atu lea, “O a ni taunuuga o le le faamaoni?” Fesoasoani i tamaiti ia iloa o taunuuga vave o le faamaoni e ono faigata ae e umi ma taitaiina atu ai i le filemu ma le fiafia.
Uunaia le faaaogaaga (fatuina o se solo): Valaaulia ia vasega taitasi (faatasi ai ma le fesoasoani a o latou faiaoga) ina ia fatuina se faaupuga e tasi le laina po o se solo e uiga i le faamaoni. Mo se faataitaiga, “Afai ou te ta’uina le mea moni, o le a ou le toilalo lava!” Valaaulia ia vasega taitasi e faasoa mai a latou faaupuga i isi tamaiti. Uunaia i latou e toe fai ia faaupuga i soo se taimi lava e faaosoosoina ai i latou ina ia le faamaoni.