Aokuso

Ou Te Filifili e Faatumulia Lo’u Olaga i Mea E Valaaulia ai le Agaga

“Afai o i ai nisi mea mama, matagofie, logoleleia, ma tauleleia, matou te saili ia mea uma” (Mataupu Faavae o le Faatuatua 1:13).

Pese: “O Loo Ou Taumafai e Avea e Pei o Iesu”

(TT, 40–41)

Ia faaopoopo ni ou manatu i manatu ua tuuina atu iinei. I vaiaso taitasi, fuafua ni auala e (1) faailoa atu ai le aoaoga faavae, (2) fesoasoani i tamaiti ia malamalama i ai, ma (3) fesoasoani ia i latou ina ia faaaogaina i o latou olaga. Fesili ifo ia te oe lava, “O le a se mea o le a fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1: O le i ai o ni uo lelei o le a fesoasoani lea ia te a’u e filifili le mea sa’o.

Uunaia le [agaga] malamalama ma le faaaogaina (faalogologo i se tala): Faamatala atu le tala lenei: “Sa maua e ni tamaiti se toalua se pea seevae ua masaesae i tafatafa o le ala. Sa la vaai atu i le tagata o loo galue mai i le faatoaga. Sa fai atu le tama talavou i lana soa, la te nanaina seevae, ona lalafi lea, ma matamata i le atuatuvale o lē ona ia seevae pe a foi mai.” Fai atu i tamaiti e faasoa mai po o le a sa latou tala e fai atu i lenei alii. Ona faamatala lea o le vaega o totoe o le tala: “O le tama matua, sa manatu o ia, nai lo le nanaina o seevae, o le a tuu e laua se tala siliva i seevae taitasi, ma o le mea lena na la faia. E lei umi a e foi mai le tamaloa mai le faatoaga. Ina ua ia mauaina ia tupe siliva, sa vaaia le te’i ma le ofo i ona foliga, ma na ootia o ia i ona lagona ma tootuli ifo i lalo ma faia se tatalo leotele o le faafetai. Sa ia ta’ua ai lana ava o loo ma’i ma vaivai ma lana fanau e leai se meaai, ona ia faafetai atu ai lea i le Alii mo lenei faamanuiaga mai ni lima e le vaaia ma talosagaina faamanuiaga o le lagi ia oo atu i ē na foai mai ia te ia lenei fesoasoani manaomia. Na ootia o la loto i lana tatalo ma sa maua e laua se lagona mafanafana i o laua loto ma faafetai na la filifilia le mea sa’o” (tagai ia Gordon B. Hinckley, i le Conference Report, Ape. 1993, 71; po o le Liahona, Iulai 1993, 67, 68). Ia valaaulia ni nai tamaiti e faasoa mai ni taimi na fesoasoani ai ni uo lelei ia i latou e filifili le mea sa’o.

Vaiaso 2: E tatau ona ou faitau, faalogo, ma vaai i mea e fiafia i ai le Tama Faalelagi.

Faailoa atu le aoaoga faavae (vaaia o se lesona faatino): Faaali atu i tamaiti se pesini e tumu i fualaau aina ma se pesini e tumu i palapala. Fesili i tamaiti po o le fea o mea e lelei ona ‘ai ma pe aisea. Faamatala atu e finagalo le Tama Faalelagi tatou te faatumuina o tatou mafaufau i mea e lelei mo i tatou nai lo mea e lamatia ai. Valaaulia i latou e faapea atu, “E tatau ona ou faitau, faalogo, ma vaai i mea e fiafia i ai le Tama Faalelagi,” ma fai ni taga faigofie mo le faitau, faalogo, ma le vaai.

Ata

bowls of dirt and fruit

Uunaia le [agaga] malamalama (talanoaina le aoaoga faavae): Tau atu i tamaiti afai tatou te faia ni filifiliga e le fiafia i ai le Tama Faalelagi tatou te ono misia se mea e sili ona taua. Fai atu ia i latou e faalogo mo le mea lea e taua ao e faitauina le parakalafa muamua o loo i lalo o “Faafiafiaga ma Ala o Faasalalauga” mai le Mo Le Malosi o le Autalavou (tagai foi i le “O Ou Tulaga Faatalalelei”). Fesili atu i tamaiti pe na latou faalogo i le mea e le iloa pe a tatou faia ni filifiliga sese (o le Agaga). Vavae ia tamaiti i ni vaega se tolu ona fai lea i ai e feauaua’i e asiasi i vaega e tolu: “Faitauina,” “Faalogologo,” ma le “Vaavaai.” I vaega taitasi ia valaaulia tamaiti e faitau, faalogo, po o le vaai i se mea e fiafia i ai le Tama Faalelagi. Talanoa po o le a so latou lagona pe a latou faitau, faalogo, ma vaai i mea e fiafia i ai le Atua.

Vaiaso 3 ma le 4: E tatau ona ou faia mea i le Sapati o le a fesoasoani ia te au ina ia ou latalata ai i le Tama Faalelagi.

Faailoa atu le aoaoga faavae (taulotoina o se mau): Tau i tamaiti o le a tuuina atu ia i latou ni faaataataga ina ia iloa ai se savali taua. Tusi le mataitusi muamua o upu taitasi i le Esoto 20:8 i luga o le laupapa (I E M L A S E T F). Faamalamalama atu o mataitusi ia o mataitusi muamua o upu taitasi i le savali. Tuu atu le isi faaataataga e ala i le faaali atu o se ata o Mose ma Tulafono e Sefulu. Ona valaaulia lea o tamaiti e sue le Esoto 20:8 ma faitau faatasi. Tuu atu i tamaiti e saili ia fesootaiga i le va o mataitusi o loo i luga o le laupapa ma le mau. Fesoasoani i tamaiti e tauloto le mau e ala lea i le tusi o lou lima i mataitusi i luga o le laupapa ao latou toe fai faatele mai le mau.

O le fetuunaia o gaoioiga e faatatau i le aofaiga o le Peraimeri o le a fesoasoani lea i le faaaofiaina o le toatele o tamaiti. O lenei gaoioiga, pe afai e toatele lau Peraimeri, mafaufau e fai ni nai ato ma tuu i tamaiti e faasoa atu i totonu o vaega toalaiti.

Uunaia le [agaga] malamalama (talanoaina ma valivali): Vavae ia tamaiti i ni vaega se fa. Tuu atu i vaega taitasi se palakalafa mai le vaega o le “Tausia o le Aso Sapati” mai leMo Le Malosi o le Autalavou e faitau. Fai i ai e talanoaina le palakalafa i a latou vaega ona faasoa mai lea i isi tamaiti mea na latou aoaoina. Tuu atu i tamaiti taitasi se fasi pepa, ma valaaulia i latou e tusi ni ata o ni mea lelei e fai i le Sapati. Fai atu i ni nai tamaiti e faasoa mai a latou ata i le Peraimeri atoa. Uunaia i latou e faasoa atu i o latou aiga i le fale mea na latou aoaoina.

Uunaia le [agaga] malamalama (faia o se gaoioiga mai se mau): Ao le’i faia le Peraimeri, ia saunia se ato e tumu i ni fasi pepa e suitulaga i le manai ina ia faaaogaina i lenei gaoioiga. Tusi le faamatalaga lenei i luga o le laupapa:

O le a se meaai na tuuina atu e le Alii mo le fanauga a Isaraelu i le vao?
O le a le aofai e tatau ona latou aoina i aso taitasi?
O le a le mea e tatau ona latou faia i le aso lona ono?
O le a se mea na ese ai le Sapati?

Fai atu i tamaiti e faalogo mo tali ao e faamatalaina le tala i le fanauga o Isaraelu o loo faaputuina le manai (tagai i le Esoto 16:11–31). Fai atu ia i latou e tutu i luga pe a latou faalogo i se tali o se tasi o fesili. Tuu atu i se tamaitiiti se toatasi e toe faamatalaina le vaega o le tala o loo taliina ai le fesili. Ona faaauau lea o le tala o loo totoe. A uma, talatalanoa ma tamaiti e uiga i le mafuaaga e le’i finagalo ai le Alii e aoina e le fanauga a Isaraelu le manai i le Sapati. Fai atu i tamaiti e moeiini o latou mata ma faafoliga o loo momoe. Ia faavave ona faasalalau le “manai” i totonu o le potu. Fai atu i tamaiti e pupula o latou mata ma ao mai le latou vaega o le manai (tasi pe lua ni manai). Fai i tamaiti e toe tuu ia manai i totonu o le ato. Ao faia e tamaiti taitasi lea tulaga, fai atu i se tasi o i latou e faasoa mai se auala talafeagai e tausia ai ia paia le aso Sapati.

Fesoasoaniga mo le taitai musika

Ina ia fesoasoani i tamaiti e aoao le pese “O Loo Ou Taumafai e Avea e Pei o Iesu” (TT, 40–41), mafaufau e fai mea nei:

Usu le pese i tamaiti. Valaaulia i latou e faitau i o latou lima le aofai o taimi e te usuina ai le upu taumafai . Toe usu le pese, ma fai i tamaiti e pati i le pao ao e pese.
Faapipii solo i totonu o le potu o le Peraimeri ni ata faigofie faatasi ai ma ni upu autu mai fuaiupu taitasi o le pese (e pei o le e avea, faapei, alofa, mea uma e fai, faaoso, ma le usitai), ma ia faaavanoa le puipui i luma o le potu. Fai atu i tamaiti e faalogo ao amata ona e usuina le pese. Valaaulia i latou e faasino i se ata latou te mafaufau e tutusa ma upu o loo e usuina. Fai atu i se tasi o tamaiti e ave i le puipui o loo i luma o le potu. Ia usuina e tamaiti uma le vaega atoa lena o le pese. Faaauau le pese ma toe fai le gaoioiga mo ata taitasi. Ona fai lea i tamaiti e usu le pese atoa mo ni nai taimi. Ia molimau puupuu atu i le taua o le taumafai e avea faapei o Iesu.

Ata
simple pictures

E maua ata i le sharingtime.lds.org